ದೈವಿಕ್ ಸ೦ದೇಶ್

ಪಯ್ಲೆಂ: ಜೊನಾ. 3:1-5,10 ದುಸ್ರೆಂ: 1 ಕೊರಿಂ. 7:29-31 ಶುಭ್‌ವಾರ್ತಾ: ಮಾರ್ಕ್. 1:14-20

ವಿಶಯ್: ಜೆಜುಚ್ಯಾ ರಾಜಾಂತ್ ಭಾಗಿಧಾರ್ ಜಾವ್ಯಾಂ

ಜೆಜುನ್ ಗಾಲಿಲೆಯಾಂತ್ ಶುಭ್‌ವಾರ್ತಾ ಪರ್‍ಗಟ್ ಕರ್ತಾಸ್ತಾನಾ ದಿಲ್ಲೊ ಉಲೊ ಅಯ್ಚ್ಯಾ ವಾಂಜೆಲಾಂತ್ ಆಮಿ ಆಯ್ಕತಾಂವ್; ವೇಳ್ ಭರ್ತಿ ಜಾಲೊ, ದೆವಾಚೆಂ ರಾಜ್ ಲಾಗಿಂ ಪಾವ್ಲಾಂ. ಪಾತ್ಕಿ ಜಿಣಿ ಬದಲಾ, ಬರಿ ಖಬರ್ ಸತ್ಮಾನಾ ಹೊ ಉಲೊ ದಿತಾಸ್ತಾನಾ ಜೆಜು ದೋನ್ ಸಂಗ್ತಿ ಆಮ್ಚೆಮುಕಾರ್ ದವರ್ತಾ.

"ಹಾಂವೆಂ ತುಕಾ ಫರ್ಮಾಯ್ಲಾಂ ನ್ಹಯ್? ದೃಢ್ ಆನಿ ಥಿರ್ ರಾವ್! ಭಿಯೆನಾಕಾ ಆನಿ ಧಯ್ರ್ ಸಾಂಡಿನಾಕಾ; ಕಿತ್ಯಾಕ್ ಸರ್ವೆಸ್ಪರ್ ತುಜೊ ದೇವ್, ತುಂ ಖಂಯ್ ಗೆಲ್ಯಾರ್‌ಯೀ, ತುಜೆ ಸವೆಂ ಆಸ್ತಲೊ." (ಜೊಶ್ವಾ. 1:9)

ಪೂಣ್ ಸರ್ವೆಸ್ಪರಾನ್ ಸಾಮುಯೆಲಾಕ್ ಮ್ಹಳೆಂ: "ತಾಚೆಂ ರೂಪ್ ವಾ ತಾಚಿ ಉಂಚಾಯ್ ಪಳೆನಾಕಾ, ಕಿತ್ಯಾಕ್ ಹಾಂವೆಂ ತಾಚೊ ತಿರಸ್ಕಾರ್ ಕೆಲಾ. ಮನಿಸ್ ಪಳೆತಾ ತಶೆಂ ದೇವ್ ಪಳೆನಾ, ಕಿತ್ಯಾಕ್ ಮನಿಸ್ ಭಾಯ್ಲೆಂ ರೂಪ್ ಪಳೆತಾ, ಪೂಣ್ ಸರ್ವೆಸ್ಪರ್ ಕಾಳಿಜ್ ಪಳೆತಾ." (ಸಾಮುಯೆಲಾಚೆಂ ಪಯ್ಲೆಂ ಪುಸ್ತಕ್. 16:7)

"ತಶೆಂ ಮ್ಹಳ್ಯಾರ್, ಕೊಣ್ ಎಕ್ಲೊ ಕ್ರಿಸ್ತಾ ಥಂಯ್ ಜಿಯೆತಾ ತರ್, ತೊ ಏಕ್ ನವಿ ರಚ್ನಾ; ಪರ್ನೆಂ ತೆಂ ಗೆಲೆಂ ಆನಿ ಸಗ್ಳೆಂ ನವೆಂ ಜಾಲಾಂ" (ಕೊರಿಂಥ್‌ಗಾರಾಂಕ್ ದುಸ್ರೆಂ ಪತ್ರ್. 5:17). ನವೆಂ ವರಸ್ ಆಯ್ಲೆಂ ಮ್ಹಣ್ತಾನಾ ಆಮಿ ಥರಾ ಥರಾಚೆಂ ನಿಚೆವ್ ಕರ್ತಾಂವ್ ಯಾ ಆಮಿ ಕಸಲೆಂಯೀ ಬರೆಪಣ್ ಕರಿಜೈ ಮ್ಹಣ್ ಆಮ್ಚೆಂ ಚಿಂತಾಪ್ ಆಸ್ತಾ ಯಾ ಆಮ್ಚ್ಯೊಪರ್ನ್ಯೊ ಸವಯೊ ಸೊಡಿಜಾಯ್ ಮ್ಹಣ್ ಆಮ್ಕಾಂಚ್ ಆಮಿ ಭಾಸಾವ್ಣಿ ಕರ್ತಾ೦ವ್. ಪೂಣ್ ಹ್ಯಾ ಆಧುನಿಕ್ ಸಂಸಾರಾರ್ ನವ್ಯಾ ವರ್ಸಾಚೊ ಸಂಭ್ರಮ್ ಗಮ್ಮತಾಂ ಆನಿ ಮಝಾ ಮಾರ್ನ್ ಭಾಯ್ಲ್ಯಾ ಸಂಸಾರಾಚಾ ದಬಾಜಾಕ್ ಆಮಿ ಚಡ್ ಗಮನ್ ದಿತಾಂವ್. ನವೆಂ ವರಸ್ ಮಾತ್ರ್ ನಹಿಂ ಆಮ್ಚ್ಯಾ ಜಿವಿತಾಚೊ ಹರ್ಯೇಕ್ ನವೊ ದೀಸ್ ಖಂಚಾ ಥರಾನ್ ಆಮಿ ಸುರು ಕರಿಜಾಯ್ ಮ್ಹಣ್ ದೆವಾಚೆಂ ಉತಾರ್ ಆಮ್ಕಾಂ ಸಾಂಗ್ತಾ "ತುಮ್ಚೆಂ ಅಂತಸ್ಕರ್ನ್ ಆನಿ ತುಮ್ಚೆಂ ಚಿಂತಪ್ ನವೆಂ ಜಾಯ್ಜಯ್. ದೆವಾಚೆಂ ಪ್ರತಿರೂಪ್ ಕರ್ನ್ ರಚ್‌ಲ್ಲೆಂ ನವೆಂ ವ್ಯಕ್ತಿತ್ವ್, ಮ್ಹಣ್ಜೆ ಜೀವನಾಂತ್ ದಿಸ್ತಾ ತೆಂ ನಿತಿವಂತ್ಪಣಾಚೆಂ ಆನಿ ದೇವ್‌ಭಕ್ತೆಚೆಂ ನವೆಂ ವ್ಯಕ್ತಿತ್ವ್, ತುಮಿ ನ್ಹೆಸಜಯ್" (ಎಫೆಜ್‌ಗಾರಾಂಕ್ ಪತ್ರ್. 4:23-24).

"ಪರ್ಜೆ, ಸದಾಂಚ್ ತಾಚೆರ್ ವಿಶ್ವಾಸ್ ದವರ್. ತಾಚೆ ಮುಕಾರ್ ತುಜೆಂ ಕಾಳಿಜ್ ಉಗಡ್, ಕಿತ್ಯಾಕ್ ದೇವ್ ಎಕ್ಲೊಚ್ ಆಮ್ಚೊ ಆಸ್ರೊ" (ಕೀರ್ತನಾಂ. 62:8).

ಹರೇಕ್ ದೀಸ್ ಆಮಿ ಎಕಾಮೆಕಾಚೆರ್ ವಿಶ್ವಾಸ್ ದವರ್ನ್ ಜಿಯೆತಾಂವ್. ಆಮಿ ಸೆಂವ್ಚಾ ಜೆವ್ಣಾಚೆರ್, ದಾಕ್ತೆರಾನ್ ದಿಲ್ಲ್ಯಾ ವಕ್ತಾಂಚೆರ್ ಅಮಿ ವಿಶ್ವಾಸ್ ದವರ್‍ತಾಂವ್. ಅವಯ್-ಬಾಪಯ್ ಆಪ್ಲ್ಯಾ ಭುರ್ಗ್ಯಾಂಚೆರ್, ಆಮಿ ಆಮ್ಚ್ಯಾ ಇಷ್ಟಾಚೆರ್ ಯಾ ಇಷ್ಟಿಣಿಚೆರ್ ವಿಶ್ವಾಸ್ ದವರ್ತಾ೦ವ್. ಆಮ್ಚೆ ಭಿತರ್ ಆಸ್‌ಲ್ಲ್ಯಾ ಬರೆಪಣಾಂ ನಿಮ್ತಿಂ, ಹೆರಾಂ ಆಮ್ಚ್ಯಾ ಜಿವಿತಾಚೊ ಏಕ್ ವಾಂಟೊ ಮ್ಹಣ್ ಲೆಕುನ್ ಆಮಿ ಎಕಾಮೆಕಾ ಪಾತ್ಯೆವ್ನ್ ವಿಶ್ವಾಸ್ ದವರ್ತಾಂವ್. ಪೂಣ್ ಆಮ್ಕಾಂ ಕೊಣೆಂಯೀ ವಿಶ್ವಾಸ್‌ಘಾತ್ ಕೆಲೊ ತರ್ ಆನ್ಯೇಕಾ ಪಾತ್ಯೆಣೆಚಾ ಮನ್ಶಾಕ್ ಆಮಿ ಸೊದ್ತಾಂವ್.

ಸರ್ವಾಂಕ್ ಸಂತೊಸಾಚಿ ಏಕ್ ಬರಿ ಖಬರ್

ದೆವಾನ್ ಮನ್ಶಾರೂಪ್ ಘೆವ್ನ್ ಹ್ಯಾ ಸಂಸಾರಿ ಯೆಂವ್ಚೆಂ ಆನಿ ತೆಂ ಆಮ್ಚ್ಯಾ ಹರ್ಯೆಕ್ಲ್ಯಾ ಖಾತಿರ್ ಮ್ಹಳ್ಳೆಂ ಪಾತ್ಯೆಂವ್ಕ್ ಜಾಯ್ನಾ ತಸಲೆಂ ತರೀ ತೆಂ ಏಕ್ ಸತ್ ಆನಿ ವರ್ತ್ಯಾ ಸಂತೊಸಾಚಿ ಖಬರ್ ಜಾವ್ನಾಸಾ.

ಕ್ರಿಸ್ತಾಚ್ಯಾ ಜನನಾಚಿ ಖಬರ್ ಆಯ್ಕೊನ್ ಭಿಯೆಲ್ಲ್ಯಾ ಗೊವ್ಳ್ಯಾಂಕ್ ದೇವ್‌ದುತಾನ್ ಸಾಂಗ್ಲೆಂ: "ಭಿಯೆನಾಕಾತ್ ಪಳೆಯಾ ಸಗ್ಳೆ ಪರ್ಜೆಕ್ ಬರಿ ಖಬರ್ ಹಾಡ್ನ್ ಆಯ್ಲಾಂ ಆಯ್ಚೆ ರಾತಿಂ ದಾವಿದಾಚೆ ನಗರಿಂ ತುಮ್ಕಾಂ ಏಕ್ ತಾರಕ್ ಜಲ್ಮಾಲಾ - ತೊಚ್ ಕ್ರೀಸ್ತ್ ಸೊಮಿ" (ಲೂಕ್. 2:10-11). ನಿಜಾಯ್ಕಿ ಕ್ರಿಸ್ತಾಚೆಂ ಜನನ್ ಸರ್ವಾಂಕ್ ಏಕ್ ಬರಿ ಆನಿ ಸಂತೊಸಾಚಿ ಖಬರ್ ಜಾವ್ನಾಸಾ. ಧರ್ಮಾಚೆ, ಜಾತಿಂಚೆ ಆನಿ ರಾಜ್ಯಾಂಚೆ ಗಡಿ ಹಾಕಾ 'ನಾಂತ್'. ಕಾಳ್ಜಾಂ ಮನಾಂತ್ ಆನಿ ಅತ್ಮ್ಯಾಂತ್ ಸಂತೊಸ್ ಹಾಡ್ಚಿ ಏಕ್‌ಚ್ ವಾಟ್ - 'ಸೊಮಿ ಜೆಜು ಕ್ರಿಸ್ತ್' ಮ್ಹಣ್ ಕ್ರಿಸ್ಮಸ್ ಆಮ್ಕಾಂ ಕಳಯ್ತಾ! ಆಮಿಂ ಆಶಾಂತಿಚ್ಯಾ ಆನಿ ಭಿರಾಂತಿಚ್ಯಾ ಸಂಸಾರಾಂತ್ ಜಿಯೆತಾಂವ್ ಮ್ಹಳ್ಳೆಂ ಸರ್ವ್ ಜಾಣಾಂವ್. ಮನ್ಶಾಂಚ್ಯಾ ಕರ್ನ್ಯಾನಿ ಎಕಾಮೆಕಾ ಮೋಗ್ ಆನಿ ವಿಶ್ವಾಸ್ ಮಾಯಾಗ್ ಜಾಲಾ. ಲೌಕಿಕ್ ಸಂತೊಸಾ ಖಾತಿರ್ ಆಪ್ಲೊ ಆತ್ಮೊ ವಿಕ್ಚೆಂ ಮನ್ಶಾಚೆಂ ವರ್ತನ್ಂಚ್ ಹ್ಯಾ ಅಶಾಂತೆಕ್ ಕಾರಣ್. ಹೆರಾಂಚ್ಯಾ ಅಭಿವೃದ್ಧೆಂತ್ ಮಸರ್ ಕರ್ತಾನಾ ಆಪ್ಲಿ ಸ್ವಂತ್ ನೀದ್ ಪಾಡ್ ಜಾತಾ ಮ್ಹಳ್ಳೆಂ ಸತ್ ಮನಿಸ್ ಅರ್ಥ್ ಕರಿನಾ ಜಾಲಾ. ಮ್ಹಜ್ಯಾ ಬೆಜಾರಾಯೆಕ್ ತೊ ಕಾರಣ್ ಮ್ಹಣ್ ಆರೋಪ್ ಮಾಂಡ್ತಾನಾ ನೀಜ್ ಕಾರಣ್ ಮ್ಹಜೆ ಥಂಯ್ ಆಸ್ಚೆ ಪಾತ್ಕಿ ವರ್ತನ್ ಮ್ಹಳ್ಳೆಂ ಏಕ್ ಸತ್ ಜಾವ್ನಾಸಾ.

ಮನ್ಶಾಕ್ ಅಸಾಧ್ಯ್ ಜಾವ್ನ್ ಆಸ್ಚೆಂ ಸರ್ವ್ ದೆವಾಕ್ ಸಾಧ್ಯ್ ಆಸಾ. ದೆವಾಕ್ ಅಸಾಧ್ಯ್ ಮ್ಹಳ್ಳೆಂ ಖಂಚೆಂಚ್ ನಾ. ಮಾಗ್ಣೆಂ ಸರ್ವಾಂಕ್ ಗರ್ಜೆಚೆಂ ಆನಿ ಫಾಯ್ದ್ಯಾಚೆಂ ಜಾವ್ನಾಸಾ. ಮಾಗ್ಣ್ಯಾ ವರ್ವಿಂ ದೆವಾಚಿ ಖುಶಿ ಸಮ್ಜೊನ್ ಘೆಂವ್ಕ್ ಸಾಧ್ಯ್ ಜಾತಾ. ಮಾಗ್ಣ್ಯಾ ವರ್ವಿಂ ಸೊಮ್ಯಾಚ್ಯಾ ಸ್ಪಿರಿತಾ ಥಂಯ್ ಎಕ್ವಟ್ ಜಾಂವ್ಕ್ ಆಮ್ಕಾಂ ಅವ್ಕಾಸ್ ಲಾಭ್ತಾ.

ಕುರ್ಪೆನ್ ಆನಿಂ ಸತಾನ್ ಭರ್ಲಲಿ ತಾಚಿ ಮಹಿಮಾ ಆಮಿ ದೆಖ್ಲಿ (ಜು. 1:14)

ಬರ್ತ್ ಡೇ ವಾ ಜಲ್ಮಾ ದೀಸ್ ಜಿವಿತಾಚ್ಯಾ ದೆಣ್ಯಾಖಾತಿರ್ ಜೀವ್‌ದಾತಾರಾಕ್ ಅರ್ಗಾಂ ದಿಂವ್ಚೊ ದೀಸ್. ಆಮ್ಚೊ ಜಲ್ಮಾ ದೀಸ್ ಆಚರ್ಸಿತಾನಾ ಮೊಗಾಚ್ಯಾಂಕ್ ಆಪವ್ನ್ ಪಾರ್ಟಿ ಕರುನ್ ಗಮ್ಮಾತ್ ಮಾರುನ್ ಸಂಭ್ರಮ್ ಚಲಯ್ತಾಂವ್. ಪುಣ್ ಜಿವಿತಾಚೆಂ ದೆಣೆಂ ದಿಲ್ಲ್ಯಾ ದೆವಾಕ್ ಅರ್ಗಾಂ ದೀಂವ್ಕ್ ವಿಚಾರ್ತಾ೦ವ್. ಸಬಾರ್ ಜಣಾಂಕ್ ಆಪ್ಲ್ಯಾ ಆವಯ್-ಬಾಪಾಯ್ಚೊ ಉಗ್ಡಾಸ್ ಕಾಡಿನಾಸ್ತಾಂ ಸಯ್ತ್ 'ಫ್ರೆಂಡ್ಸ್' ಸಾಂಗಾತಾ ಮಾಜಾ ಮಾರುನ್ ಜಲ್ಮಾ ದಿಸಾಚೊ ಸಂಭ್ರಮ್ ಚಲಂವ್ಚೊ ಆಜ್‌ಕಾಲ್ ಸದಾಂಚೆಂ ಜಾಲಾಂ. ಸಂಸಾರ್ ಆಜ್ ಬದಲ್ಲಾ. ಸರ್ಗ್ ಆನಿ ಸಂಸಾರ್ ರಚ್‌ಲ್ಲ್ಯಾ ರಚ್ಣಾರಾಕ್ ಥಂಯ್ಸರ್ ಜಾಗೊ ನಾ (ಜು. 1:10-11). ಕುರ್ಪೆನ್ ಆನಿ ಸತಾನ್ ಭರ್ಲಲಿ ತಾಚಿ ಮಹಿಮಾ ಆಜ್ ಸಂಸಾರ್ ಪಳೆಂವ್ಕ್ ಸಕಾನಾ (ಜು. 1:14(b)), ಕಿತ್ಯಾಕ್ ಹ್ಯಾ ಸಂಸಾರಾಚ್ಯಾ ಅಧಿಪತಿನ್ ಸಂಸಾರಾಚ್ಯಾ ಆಡಂಬರಾಕ್ ಒಳಗ್ ಜಾಲ್ಲ್ಯಾಂಚ್ಯೊ ಅವಿಶ್ವಾಸಿ ಮತಿ ಕುರ್ಡ್ಯೊ ಕೆಲ್ಯಾತ್ (2 ಕೊರಿಂಥ್ 4:4). ಜೆಜುಚೊ ಜಲ್ಮಾ ದಿವಸ್ ಆಚರ್ಸು೦ಚ್ಯಾ ಹ್ಯಾ ಸಂದರ್ಭಾರ್, ಜೆಜುಕ್ ಹೆಪ್ಪಿ ಬರ್ತ್ ಡೇ ಮ್ಹಣೊನ್, ತಾಚೊ ಉಜ್ವಾಡ್ ಸ್ವೀಕಾರ್ ಕರುಂಕ್ ತುಂ ತಯಾರ್ ಆಸಾಯ್‌ಗೀ?ಜೆಜು ತುಜ್ಯಾ ಜಿವಿತಾತ್ ಶಾಂತಿಚೊ ಕುಂವರ್ ಜಾವ್ನ್ ಯೇಂವ್ಕ್ ಆಶೆತಾ (ಕೊರಿಂಥ್. 14:27). ತುಜಿಂ ಪಾವ್ಲಾಂ ಸಮಾಧಾನೆಚ್ಯಾ, ನೀತಿಚ್ಯಾ ಆನಿ ನಿಸ್ವಾರ್ಥಿ ಮೊಗಾಚ್ಯಾ ವಾಟೆನ್ ಕಾಡ್ಚ್ಯಾಕ್ ತುಕಾ ಖರಿ, ಜಿವಿತಾಚಿ ವಾಟ್ ದಾಖಂವ್ಕ್ ತೊ ತುಜೆಥಂಯ್ ನವ್ಯಾನ್ ಜಲ್ಮೊಂಕ್ ಆಶೆತಾ (ಜು. 14:6; ಲೂಕ್ 1:79; ಜು. 14:27). ಹ್ಯಾ ಖಾತಿರ್ 'ದೈವಿಕ್ ಸಂದೇಶ್' ಜೆಜುಕ್ "ಹೆಪ್ಪಿ ಬರ್ತ್ ಡೇ" ಮ್ಹಣ್ತಾನಾ ತುಜೆಖಾತಿರ್ ಆನಿ ತುಜ್ಯಾ ಕುಟ್ಮಾಖಾತಿರ್ ಜೆಜುಚಿಂ ಆಶೀರ್ವಾದಾಂ ಆನಿ ದೆಣಿಂ ಮಾಗ್ತಾ.

ಆಮ್ಚ್ಯಾ ಹ್ಯಾ ಸಂಸಾರಾರ್ ಆರ್ಥಿಕ್ ಸ್ಥಿತಿ ಭಿಗಡುನ್, ಖಳಾನಾಸ್ತಾನಾ ದ್ವೇಷ್, ಲಡಾಯ್ ಚಲೊನ್ ಗುಸ್ಪಡ್-ಗೊಂದೊಳಾಂತ್ ಆಸ್ಚ್ಯಾ ಹ್ಯಾ ಸಂಸಾರಾರ್ ಮನಿಸ್ ಸಮಾಜೆಂತ್ ಜಾಂವ್, ಸಮಡ್ತಿಂತ್ ಜಾಂವ್, ಫಾವೊತಿ ಭದ್ರತಿ ನಾಸ್ತಾನಾ ಭಿರಾಂತೆನ್ ಜಿಯೆವ್ನ್ ಆಸಾ. ಜಾತ್-ಕಾತ್, ಸಮಡ್ತ್ ಯಾ ಭಾಸ್ ಮ್ಹಣ್ ಲೆಕಿನಾಸ್ತಾನಾ ಸಗ್ಳ್ಯಾ ಸಂಸಾರಾರ್, ದುಸ್ಮಾನ್ಕಾಯ್, ರಾಗ್ ಆನಿ ನಾಸ್ ಆಮ್ಕಾಂ ಪಳೆಂವ್ಕ್ ಮೆಳ್ತಾ. ಶಾಂತಿ, ಸಮಾಧಾನ್ ಸ್ಥಾಪನ್ ಕರುಂಕ್ ಕೋಣ್೦ಚ್ ಯಾ ಖಂಚೊಯಿ ಸಂಸ್ಥೊ ಮುಕಾರ್ ಸರನಾ. ಹ್ಯಾ ವೆಳಾರ್ ಆಮ್ಚ್ಯಾ ಸಮಡ್ತೆಂತ್ ಪರಿವರ್ತನ್ ಆಮಿ ಕಶೆಂ ಹಾಡ್ಯೆತಾ? ಸಮಾಧಾನ್ ಕಶೆಂ ಜೊಡ್ಚೆಂ? ದುಸ್ಮಾನಾಚೆ ಮುಟಿಭಿತರ್ ಆಸ್‌ಲ್ಲ್ಯಾ ಆಮ್ಕಾಂ ಕೋಣ್ ಸುಟ್ಕಾ ದೀಂವ್ಕ್ ಸಕ್ತಾ? ದೆವಾಚೆಂ ಉತಾರ್ ಮಾತ್ರ್ ಹ್ಯಾ ವೆಳಿಂ ಆಮ್ಕಾಂ ಆಧಾರ್ ದೀಂವ್ನ್ ಬರೆಪಣ್ ಜೋಡ್ನ್ ದೀಂವ್ಕ್ ಸಕ್ತಾ.

"ಹಾಂವ್ ತುಮ್ಕಾಂ ಸರ್ವ್ ಲೊಕಾಕ್ ವ್ಹಡಾ ಸಂತೊಸಾಚಿ ಬರಿ ಖಬರ್ ಹಾಡ್ನ್ ಆಯ್ಲಾಂ; ಆಜ್ ತುಮ್ಕಾಂ ದಾವಿದಾಚೆ ನಗರಿಂ ಎಕ್ಲೊ ಸೊಡ್ವಣ್ದಾರ್ ಜಲ್ಮಾಲಾ, ತೊ ಜಾವ್ನಾಸಾ ಸೊಮಿ" (ಲೂಕ್. 1:20-11)

ಜೆಜುಚೆಂ ಜನನ್ ಸಗ್ಳ್ಯಾ ಮನ್ಶಾಕುಳಾಕ್ ವ್ಹಡಾ ಸಂತೊಸಾಚಿ ಬರಿ ಖಬರ್. ದೆಕುನ್ ಆಮಿ ಸಂತೊಸಾನ್ ಎಕಾಮೆಕಾ ಉಲ್ಲಾಸ್ ಪಾಟಯ್ತಾಂವ್: "ಭಾಗಿ ನತಾಲಾಂ ಫೆಸ್ತ್, ಸಂತೊಸ್ಭರಿತ್ ನತಾಲಾಂ ಫೆಸ್ತ್" ಜೆದ್ನಾ ಆಮಿ ಜೆಜು ಬಾಳ್ಕಾ ಥಂಯ್ ಆಮ್ಚ್ಯಾ ಜಿವಿತಾಚ್ಯಾ ಸೊಡ್ವಣ್ದಾರಾಕ್ ಮೆಳ್ತಾಂವ್, ಆಮ್ಚೊ ಸಂತೊಸ್ ಖರೊ ಆನಿ ಸಂಪೂರ್ಣ್ ಜಾತಾ. ಗ್ರೀಕ್ ಭಾಶೆಂತ್, "ಖ್ರೀಸ್ತ್ ವಾ ಖ್ರೀಸ್ತೋಸ್" ಮ್ಹಳ್ಯಾರ್ ಸೊಡ್ವಣ್ದಾರ್! ತಶೆಂಚ್ ಹೀಬ್ರು ಭಾಶೆಂತ್ "ಮೆಸ್ಸಿಯಾ" ಮ್ಹಳ್ಯಾರ್, "ಸೊಡ್ವಣ್ದಾರ್ ವಾ ಸಾಲ್ವದೊರ್". ತ್ಯಾ ಕಾಳಾರ್, ಜುದೆಯಾ ಪ್ರಾಂತ್ಯ್ ಬಳ್ವಂತ್ ರೊಮಾಚ್ಯಾ ಅಧಿಕಾರಾಖಾಲ್ ಆಸ್ಲೆಂ. ರೊಮಾಚೆ ಚಕ್ರವರ್ತಿ ಕ್ರೂರ್ ಆನಿ ನಿರ್ದಯಿ ಜಾವ್ನಾಸ್ಲೆ. ಹ್ಯಾ ವರ್ವಿಂ ಜುದೆವ್ ಸುಟ್ಕೆ ಖಾತಿರ್ ರಾಕ್ತೆಲೆ. ರೊಮಾಚ್ಯಾ ಗುಲಾಮ್‌ಪಣಾಂತ್ಲೆಂ ಸೊಡಯ್ತಾಲೊ ಬಳ್ವಂತ್ ಪದ್ವೆದಾರ್ ಮೆಸ್ಸಿಯಾ, ಕ್ರೀಸ್ತ್, ಸಾಲ್ವದೊರ್, ಸೊಡ್ವಣ್ದಾರ್ ಕೆದ್ನಾ ಯೇತ್ ಮ್ಹಣ್ ತಾಚಿ ವಾಟ್ ರಾಕ್ತಾಲೆ!

ಸರ್ವ್ ಕಾಳಾಪ್ರಾಸ್ ಚಡ್ ಆಯ್ಚ್ಯಾ ಕಾಳಾರ್, ಸಂಸಾರಾರ್ ಸರ್ವ್ ಆವಾಜ್ ಆನಿ ಮಾಲಿನ್ಯಾಮಧೆಂ ಸರ್ವ್ ಬೆಜಾರಾಯೆ ಆನಿ ಖಂತಿ ಮಧೆಂ, ಸರ್ವ್ ಎಕ್ಸುರ್ಪಣ್ ಆನಿ ಟೆನ್ಶನಾಂ ಮಧೆಂ, ಸರ್ವ್ ದೂಕ್ ಆನಿ ಕಶ್ಟಾಂಮಧೆಂ ಸರ್ವ್ ಝುಜಾಂ ಆನಿ ಭಯೋತ್ಪದನಾಂ, ಝಗ್ಡೆಂ ಆನಿ ಎಕಾಮೆಕಾ ಥಂಯ್ ಕಚ್ಚಾಟ್, ಮೊಸೊರ್, ಹಗೆಂ, ರಾಗ್ ಸ್ವಾರ್ಥ್, ಧರ್ಮಾಂಧ್‌ಪಣ್ ಹಾಚೆ ಮಧೆಂ ಮನಿಸ್ ಸಮಾಧಾನ್ ಆನಿ ಶಾಂತಿ ಖಾತಿರ್ ಲಾಲೆವ್ನ್ ಆಶೆವ್ನ್ ಆಸಾ. ಹರ್ಯೆಕ್ ಜೀವ್ ಮೋಗ್ ಆನಿ ಪ್ರಶಾಂತ್ ವಾತಾವರಣಾಕ್ ತಾನೆವ್ನ್ ಆಶಾ. ಹರ್ಯೆಕ್ ವ್ಯಕ್ತಿ ಮಾಯ್ಪಾಸ್ ಆನಿ ಭಾವ್ ಭಾಂಧವ್ಪಣಾಕ್ ಅತ್ರೆಗುನ್ ಆಸಾ.