ದೈವಿಕ್ ಸ೦ದೇಶ್

"ಪಾತಕ್ ರಡುನ್ ತುಮ್ಚಿ ಜಿಣಿ ಬದ್ಲಲೇ ಖರಿತ್ ತುಮಿಯೀ ಸಮೆಸ್ತ್ ತಾಂಚೇ ಬರಿಚ್ ನಾಸ್ ಜಾತಲ್ಯಾತ್" (ಲೂಕ್. 13:3).

ಕೊಣೀ ಉದಾರ್ ದಾನಿ, ಸಾದೊ ಮನಿಸ್, ಮಹಾನ್ ವ್ಯಕ್ತಿ ಅವ್ಚಿತ್ ಅವ್ಗಡಾಕ್ ಸಾಂಪ್ಡೊನ್ ಮರಣ್ ಪಾವ್ತಿತ್, ತರ್ ಆಮ್ಚಿ ಪ್ರತಿಕ್ರಿಯಾ, "ಚೆ! ಕೊಣಾಯ್ಕಿ ತಶೆಂ ಘಡೊಂಕ್ ನಜೊ ಆಸ್‌ಲ್ಲೆಂ, ಮಸ್ತ್ ಬರಿಂ ಕಾಮಾ ತಾಣೆ ಕೆಲ್ಲಿಂ, ಕೊಣಾಯ್ಕಿ ಉಪಾದ್ರ್ ದೀನಾತ್‌ಲ್ಲೊ, ತಸಲ್ಯಾಂಕ್ ಅಶೆಂ ಜಾಂವ್ಕ್ ನಜೊ ಆಸ್‌ಲ್ಲೆಂ". ಪುಣ್ ಜೆಜು ಆಮ್ಕಾಂ ಸಾಂಗ್ತಾಂ, "ತ್ಯಾ ಗಾಲಿಲೆಯಾಗಾರಾಂಕ್ ತಸಲೆಂ ಭೊಗುಂಕ್ ಮೆಳ್ಳೆಂ ದೆಕುನ್, ಹೆರ್ ಸಮೇಸ್ತ್ ಗಾಲಿಲೆಯಾಗಾರಾಂ ಪ್ರಾಸ್ ತೆ ಚಡ್ ಪಾತ್ಕಿ ಮ್ಹಣ್ ತುಮಿ ಚಿಂತ್ತಾತ್‌ವೆ?" (ಲೂಕ್. 13:2).

ತುಜೆರ್‌ಚ್ ತುಜೆ ದೊಳೆ ಪರ್ತಿ, ಹೆರಾಂಚ್ಯಾ ಕರ್ನ್ಯಾಚಿ ಝಡ್ತಿ ತುಕಾ ನಾಕಾ. ಹೆರಾಂಚಿ ಝಡ್ತಿ ಕೆಲ್ಲೆವರ್ವಿ೦ ಮನ್ಶಾನ್ ವ್ಯರ್ಥ್ ವಾವುರ್ಚೆ೦ ಆನಿ ಚಡಾವತ್ ಚುಕೊನ್ ಪಡ್ಚೆಂ ಆನಿ ಸಸಾರಾಯೆನ್ ಪಾತಕ್ ಆಧಾರ್ಚೆ೦. ಪುಣ್ ಆಮ್ಚಿಚ್ ಝಡ್ತಿ ಕರುಂ ಜಾಲ್ಯಾರ್ ಆಮ್ಚೊ ವಾವ್ರ್ ಫಳಾಧಿಕ್ ಜಾತಾ. ಏಕ್ ವಸ್ತ್ ಆಮ್ಚ್ಯಾ ಮನಾಕ್ ಕಶಿಗಿ ತ್ಯಾ ಪರ್ಮಾಣೆ ಆಮಿ ಜಾಯಿತ್ತೆ ಪಾವ್ಟಿಂ ತೀರ್ಪ್ ದಿತಾಂವ್. ಜರ್ತರ್ ಕೆದಾಳಾಯ್ ದೆವಾಕ್ ಮಾತ್ರ್ ಖರ್‍ಯಾ ಮನಾನ್ ಆಮಿ ಆಶೆಲ್ಲ್ಯಾಂವ್ ಆಮ್ಚ್ಯಾ ಆಲೊಚನೆಕ್ ಆಡ್ ಗೆಲ್ಲ್ಯಾ ವೆಳಾರ್ ಇತ್ಲ್ಯಾ ಸಸಾರಾಯೆನ್ ಆಮಿ ಕರ್ಕರ್ ಜಾತೆನಾಂವ್.

"ದೆವಾಕ್ ತುಮಿ ಲಾಗಿಂ ಸರಾ ಆನಿ ತೊ ತುಮ್ಕಾಂ ಲಾಗಿಂ ಸರ್ತಲೊ. ತುಮಿ ಪಾತ್ಕ್ಯಾಂನೋ, ತುಮ್ಚೆ ಹಾತ್ ಧುಯಾ; ತುಮಿ ದೊಡ್ಯಾ ಮನಾಚ್ಯಾಂನೋ ತುಮ್ಚೆಂ ಅಂತಸ್ಕರ್ನ್ ನಿತಳ್ ಕರಾ" (ಜಾಕೊಬ್. 4:8).

ಸಬಾರ್ ಪಾವ್ಟಿಂ ದೇವ್ ತುಜೆಥಾವ್ನ್ ಪಯ್ಸ್ ಆಸಾ ಮ್ಹಣ್ ತುಕಾ ಭೊಗುಂಕ್ ಪುರೊ ವಾ ತುಜಿ ಬೋಬ್ ತಾಕಾ ಆಯ್ಕಾನಾ ಮ್ಹಣ್ ತುಕಾ ದಿಸೊಂಕ್ ಪುರೊ. ದೆವಾಚೆಂ ಉತರ್ ಹಾಕಾ ಕಾರಣ್ ಕಿತೆಂ ಮ್ಹಣ್ ಸ್ಪಷ್ಟ್ ಸಾಂಗ್ತಾ - ದೇವ್ ತುಜೆಥಾವ್ನ್ ಪಯ್ಸ್ ನಾ ಬಗಾರ್ ತುಂ ತಾಚೆಥಾವ್ನ್ ಪಯ್ಸ್ ಗೆಲಾಯ್; ತುವೆಂ ತುಕಾಚ್ ನಿತಳ್ ಕರುನ್ ತಾಚೆಲಾಗಿಂ ಆಯಿಲ್ಲ್ಯಾವೆಳಾರ್ ತೊ ತುಜೆಲಾಗಿಂಚ್ ಆಸಾ ಮ್ಹಣ್ ತುಕಾ ಕಳಿತ್ ಜಾತಲೆಂ.

ಏಕ್ ದೀಸ್ ಏಕ್ ಬಾಯ್ಲ್ ಮನಿಸ್ ಯಾಜಕಾಕ್ ಭೆಟೊಂಕ್ ಗೆಲಿ. ತಿಕಾ ತಿಚ್ಯಾ ಘೊವಾಕ್ ಭೊಗ್ಸುಂಕ್ ಅಸಾಧ್ಯ್ ಮ್ಹಣ್ ಯಾಜಕಾಕಡೆ ತಿಣೆಂ ಸಾಂಗ್ಲೆಂ. ಯಾಜಕ್ ದಯಾಳಾಯೆನ್ ಆನಿ ಸಮ್ಜೊಣೆನ್ ಭರ್‌ಲ್ಲ್ಯಾ ನಿಮ್ತಿಂ ತಿಚ್ಯಾ ಘೊವಾಕ್ ತಿಣೆಂ ಭೊಗ್ಸುಂಕ್, ತಾಣೆಂ ತಿಕಾ ಕುಮೊಕ್ ಕರುಂಕ್ ಖುಶಿ ವ್ಹೆಲಿ. ತಿಂ ಎಕಾಮೆಕಾ ಸಂಭಾಶಣ್ ಕರ್ತಾಸ್ತಾನಾ, ಘೊವಾನ್ ತಿಕಾ ಮಸ್ತ್ ದೂ:ಖ್ ದಿಲಾಂ ಆನಿ ತಿಚೆಥಂಯ್ ಫಾರಿಕ್ಪಣ್ ಆನಿ ದ್ವೇಷ್ ಭರ್ಲಾ ಮ್ಹಣ್ ಯಾಜಕ್ ಸಮ್ಜಾಲೊ. ಯಾಜಕಾನ್ ತಿಕಾ ಭುಜವ್ನ್, ಸಮ್ಜಾಂವ್ಕ್ ಮಸ್ತು ಪ್ರಯತ್ನ್ ಕೆಲೆಂ. ಪೂಣ್ ತಿ ಆಪ್ಲ್ಯಾ ಘೊವಾಕ್ ಭೊಗ್ಸುಂಕ್ ಕೆದಿಂಕ್‌ಚ್ ತಯಾರ್ ನಾತ್ಲಿ. ತಿಕಾ ಸಮ್ಜೊಂವ್ಕ್ ಯಾಜಕಾಕ್ ಸಾಧ್ಯ್ ಜಾಲೆಂನಾ ಆನಿ ಘೊವಾಕಡೆಚ್ ಉಲೊಂವ್ಚೆಂ ಮ್ಹಣ್ ತಾಣೆಂ ಚಿಂತ್ಲೆಂ. ಯಾಜಾಕಾನ್ ಘೊವಾಕ್‌ಚ್ ಮ್ಹಜೆಕಡೆ ಧಾಡ್ ಮ್ಹಣ್ ವಿನಂತಿ ಕೆಲಿ. ತಾಣೆಂ ತುಜೆ ಥಂಯ್ ಆಧಾರ್‌ಲ್ಲಿ ಚೂಕ್ ಮ್ಹಣ್ ಹಾಂವ್ ತಾಕಾ ಸಮ್ಜಯ್ತಾಂ ಮ್ಹಣ್ ಯಾಜಕಾನ್ ತಿಕಾ ಸಾಂಗ್ಲೆಂ. ತೆದಾಳಾ ಬಾಯ್ಲ್ ಯಾಜಕಾಕ್ ಅಶೆಂ ಮ್ಹಣಾಲಿ "ಫಾದರ್ ತಾಕಾ ಯೇಂವ್ಕ್ ಸಾಧ್ಯ್ ನಾ". ಯಾಜಾಕಾನ್ ಕಿತ್ಯಾಕ್? ಮ್ಹಣ್ ವಿಚಾರ್ ಕೆಲೊ. ತೆದಾಳಾ ಬಾಯ್ಲ್ ಮ್ಹಣಾಲಾಗ್ಲಿ "ಫಾದರ್ ತೊ ಮೊರೊನ್ ಸುಮಾರ್ ತೇಂಪ್ ಜಾಲೊ".

"ಆನಿ ತುಂ ಮ್ಹಜ್ಯಾ ಪುತಾ, ಸಾಲ್ಮಾಂವ್, ತುಜ್ಯಾ ಬಾಪಾಯ್ಚ್ಯಾ ದೆವಾಚಿ ಒಳಕ್ ಕರುಂಕ್ ಘೆ ಆನಿ ಅಖಂಡ್ ಕಾಳ್ಜಾನ್ ಆನಿ ಖುಶೆಮನಾನ್ ತಾಚಿ ಸೆವಾ ಕರ್. ಕಿತ್ಯಾಕ್ ಸರ್ವೆಸ್ಪರ್ ಸಗ್ಳ್ಯಾ ಕಾಳ್ಜಾಂಚಿ ತಪಾಸ್ಣಿ ಕರ್ತಾ ಆನಿ ಮನಾಂತ್ಲಿಂ ಸಗ್ಳಿಂ ಚಿಂತ್ನಾಂ ತೊ ಜಾಣಾ. ತುಂ ತಾಕಾ ಸೊಧ್ಶಿ ಜಾಲ್ಯಾರ್ ತೊ ತುಕಾ ಮೆಳ್ತೊಲೊ, ಪೂಣ್ ತುಂ ತಾಕಾ ಸಾಂಡ್ಶಿ ಜಾಲ್ಯಾರ್ ತೊ ತುಕಾ ಸಾಸ್ಣಾಕ್ ಪಯ್ಸ್ ಕರ್ತಾಲೊ" (1 ಇತಿಹಾಸ್ 28:9). ಆಪ್ಣಾಕ್ ಸೊಧ್ತೆಲ್ಯಾ ಥಂಯ್ ದೇವ್ ಸಂತೊಸ್ತಾ. ತಸಲ್ಯಾಂಚ್ಯಾ ಜಿವಿತಾಂತ್ ಭಿತರ್ ಸರ್ತಾ ಆನಿ ತಾಂಕಾಂ ಆಶೀರ್ವಾದಿತ್ ಕರ್ತಾ. ತುಂ ಅತ್ಮಿಕ್ ರಿತೆಪಣ್ ಆ ಆರ್ಥಿಕ್ ಅಡ್ಚಣ್ಯೊ ವಾ ಕುಡಿಚಿ ಪಿಡಾಶಿಡಾ ಅನ್ಬೊಗ್ ಕರ್ನ್ ಆಸಾಯ್, ಪೂಣ್ ದೇವ್ ತುಕಾ ಬರೆಂ ಕರುಂಕ್ ಆನಿ ತುಜೆರ್ ಧಾರಾಳ್ ಆಶೀರ್ವಾದಾಂ ಘಾಲುಂಕ್ ತಯಾರ್ ಆಸಾ. ತಾಕಾ ವ್ಹಡಾ ಅತ್ರೆಗಾನ್ ಸೊಧ್ ಆನಿ ತಾಕಾ ಉಲೊ ಮಾರ್.

ಸಾಂ. ಪಾವ್ಲ್ ಥೆಸ್ಸಾಲೋನಿಕಾಗಾರಾಂಕ್ ಬರಯಿಲ್ಲೆಂ ಪಯ್ಲೆಂ ಪತ್ರ್ ಆಕೇರ್ ಕರ್ತಾನಾ ತಾಂಕಾಂ, ಹರ್ಯೆಕಾ ಕ್ರಿಸ್ತಾಂವಾನ್ ನಿಯಾಳಿಜೆ ಜಾಲ್ಲಿಂ ಜಾಣ್ವಾಯೆಭರಿತ್ ಸೂಚನಾಂ ದಿತಾ. "ತುಮ್ಚೆ ಮಧೆಂ ಹರ್ಯೆಕ್ಲೊ ವಾಯ್ಟಾನ್ ವಾಯ್ಟ್ ಫಾರಿಕ್ ಕರಿನಾಶೆಂ ಚತ್ರಾಯ್ ಘೆಂವ್; ಎಕಾಮೆಕಾಕ್ ಆನಿ ಸಮೇಸ್ತಾಂಕ್ ಬರ್‍ಯಾಕ್ ಪಡ್ತಾ ತಸಲೆಂ ಕರುಂಕ್ ಸದಾಂ ಫುಡೆಂ ಸರಾ" (1 ಥೆಸಾ. 5:15). ಮನ್ಶಾಂನಿ ಎಕಾಮೆಕಾಲಾಗಿಂ ದವರಿಜೆ ಜಾಲ್ಲೊ ಸಂಬಂಧ್, ಆಮ್ಚ್ಯಾ ಜಿವಿತಾಂತ್ಲ್ಯಾ ಸಕ್ಕಡ್ ವಿಶಯಾಂ ಪಯ್ಕಿ ಪ್ರಮುಖ್ ಜಾವ್ನಾಸಾ. ದೆವಾನ್ ಆಮ್ಕಾಂ ತ್ಯಾಚ್ ಉದ್ದೇಶಾಖಾತಿರ್ ರಚ್ಲಾಂ. ದೆವಾಚೊ ಮೋಗ್ ಆಮಿ ಖರ್‍ಯಾ ಎಕಾಮೆಕಾಚ್ಯಾ ಸಂಬಂಧಾಂತ್ ಮಾತ್ರ್ ಅನ್ಬೊಗ್ ಕರುಂಕ್ ಸಕ್ತಾಂವ್. ತಾಣೆಂ ಆಮ್ಕಾಂ ತಾಚ್ಯಾ ಸಾರ್ಕ್ಯಾಚಿಂ ಆನಿ ಸುರುಪಾಯೆಚಿಂ ಕರ್ನ್ ರಚ್ಲ್ಯಾಂತ್ ಆನಿ ತೊ ಆಮ್ಚೊ ಖಂಚ್ಯಾಯಿ ಶರ್ತಾವಿಣೆಂ ಮೋಗ್ ಕರ್ತಾ. ದೆಕುನ್ ಆಮಿ ಖಂಚ್ಯಾಯಿ ಮನ್ಶಾಕ್ ದುಸ್ಮಾನ್ ಮ್ಹಣೊನ್ ಲೆಕುಂಕ್ ಜಾಯ್ನಾ. ಹ್ಯಾ ಚಿಂತ್ಪಾಕ್ ಸಾಂ. ಪಾವ್ಲಾಕ್ ಪ್ರೇರಣ್ ದಿಲ್ಲಿಂ ಜೆಜುಚಿಂ ಉತ್ರಾಂ: "ಅಶೆಂ ಸಾಂಗ್‌ಲ್ಲೆಂ ತುಮಿ ಆಯ್ಕಾಲಾಂ; 'ತುಜ್ಯಾ ಪೆಲ್ಯಾಚೊ ಮೋಗ್ ಕರ್ ಆನಿ ತುಜ್ಯಾ ದುಸ್ಮಾನಾಚೊ ದ್ವೇಶ್ ಕರ್'. ಪುಣ್ ಹಾಂವ್ ತುಮ್ಕಾಂ ಸಾಂಗ್ತಾಂ: ತುಮ್ಚ್ಯಾ ದುಸ್ಮಾನಾಂಚೊ ಮೋಗ್ ಕರಾ ಆನಿ ತುಮ್ಕಾಂ ದಗ್ಧಿತೆಲ್ಯಾಂ ಪಾಸತ್ ಮಾಗಾ. ಅಶೆಂ ತುಮಿ ತುಮ್ಚ್ಯಾ ಸರ್ಗಿ೦ಚ್ಯಾ ಬಾಪಾಚಿಂ ಭುರ್ಗಿ೦ ಜಾತಲ್ಯಾತ್. ತೊ ಆಪ್ಲೊ ಸುರ್‍ಯೊ ಜಶೆಂ ಬರ್‍ಯಾಂಚೆರ್ ತಶೆಂ ಖೊಟ್ಯಾಂಚೆರ್‌ಯಿ ಉದೆಸೊ ಕರ್ತಾ ಆನಿ ಜಶೆಂ ಭಾಗೆವಂತಾಂಚೆರ್ ತಶೆಂ ಪಾತ್ಕ್ಯಾಂಚೆರ್‌ಯೀ ಪಾವ್ಸ್ ವೊತ್ತಾ" (ಮಾತೆ. 5:43-45). ಕ್ರಿಸ್ತಾಂವಾಂನಿ ತಾಂಚ್ಯಾ ದುಸ್ಮಾನಾಂಕ್ ಸಯ್ತ್ ಗೌರವ್ ದೀಂವ್ಕ್ ಆಸಾ, ಕಾರಣ್ ತಾಂಕಾಂಯಿ ದೆವಾನ್ ಆಪ್ಲ್ಯಾ ಸಾರ್ಕ್ಯಾಚೊ ಅತ್ಮೊ ದಿಲಾ. ತೊ ದೆವಾಲಾಗಿಂ ಪಾಟಿಂ ಪಾಂವ್ಚೆ ತಸಲೊ. ಕ್ರಿಸ್ತಾಂವಾಂನಿ ಆಪ್ಲ್ಯಾ ದುಸ್ಮಾನಾಥಂಯ್ ದಯಾ ಆನಿ ಕಾಕುಳ್ತ್ ದಾಕಂವ್ಕ್ ಜಾಯ್. "ದೆಕುನ್ ಜಸೊ ತುಮ್ಚೊ ಬಾಪ್ ದಯಾಳ್, ತಶೆಂ ತುಮಿಯೀ ದಯಾಳ್ ಜಾಯಾ" (ಲೂಕ್. 6:36).

"ತೊ ಮ್ಹಾಕಾ ಉಲೊ ಮಾರ್ತಾನಾ ಹಾಂವ್ ತಾಕಾ ಜಾಪ್ ದಿತಾಂ, ಆಕಾಂತಾಂತ್ ಹಾಂವ್ ತಾಚೆ ಲಾಗಿಂ ಆಸಾಂ, ತಾಕಾ ನಿವಾರ್ತಾ೦ ತಾಕಾ ಸನ್ಮಾನ್ ಕರ್ತಾ೦." (ಕೀರ್ತನಾಂ. 91:15)

"ತಶೆಂ ಮ್ಹಜ್ಯಾ ತೊಂಡಾಂತ್ಲೆಂ ಭಾಯ್ರ್ ಸರ್ತಾ ತೆಂ ಉತರ್ ನಿರ್ಫಳ್ ಜಾವ್ನ್ ಮ್ಹಜೆಶಿಂ ಪಾಟಿಂ ಯೆನಾ, ಬಗರ್ ಮ್ಹಜಿ ಖುಶಿ ಪಾಳ್ತಾ, ಅನಿ ಜೆಂ ಕಿತೆಂ ಕರುಂಕ್ ಹಾಂವೆಂ ತಾಕಾ ಧಾಡ್‌ಲ್ಲೆಂ ತೆಂ ಸಗ್ಳೆಂ ಕರ್ತಾ." (ಇಸಾಯಿಯಾ. 55:11)

I. ಉತ್ಪತ್ತಿ. 9:8-15; II. 1 ಪೆದ್ರು. 3:18-22; ವಾಂಜೆಲ್: ಮಾರ್ಕ್. 1:12-15

ವಿಷಯ್: ಪಾಟಿಂ ಯೆ

ಪಾವ್ಸಾಂತ್ ಆಕಾಸಾಚೆರ್ ಪಾವ್ಸಾಚೆಂ ಧೊಣು (ಕಾಮನಬಿಲ್ಲು) ಆಮಿ ಪಳೆವ್ನ್ ಸಂತೊಸ್ ಪಾವ್ತಾಂವ್, ಪೂಣ್ ಜೆಂ ಕಿತೆಂ ಹ್ಯಾ ವಿಶಿಂ ದೆವಾನ್ ನೊವೆಕ್ ಸಾಂಗ್‌ಲ್ಲೆಂ ತೆಂ ಆಮಿ ನೆಣಾಂವ್. ದೆವಾನ್ ನೊವೆಕ್ ಮ್ಹಳೆಂ "ಮ್ಹಜೆಂ ಧೋಣು ಕುಪಾಂಚೆರ್ ಹಾಂವ್ ಘಾಲ್ತಲೊಂ; ಹಾಂವೆಂ ಸಂಸಾರಾ ಲಾಗಿಂ ಕೆಲ್ಲ್ಯಾ ಕರಾರಾಚಿ ಖುಣಾ ತೆಂ ಜಾತಲೆಂ" (ಉತ್ಪತ್ತಿ. 9:13)

ಉತ್ಪತ್ತಿ: 22:1-2, 9a; 10-13, 15-18; ರೊಮಾ: 8:31b-34; ಮಾರ್ಕ್: 9:2-10

ಬಂಬಯ್ ಬ್ಯಾಂಡ್ರಾಂತ್ ಆಸ್ಚೆಂ SVD ಘರ್ ಪಾಂಚ್ ಮಾಳಿಯೆಚೆಂ ಭಾಂದಪ್. ಹಳ್ಳೆಂತ್ ವಾವುರ್ಚೊ ಎಕ್ಲೊ ಯಾಜಕ್ ಆಯಿಲ್ಲ್ಯಾ ವೆಳಾರ್ ತಾಕಾ ರಾವೊಂಕ್ ಕೂಡ್ ಪಾಂಚ್ವೆ ಮಾಳಿಯೆರ್ ದಿಲೆಂ. ತ್ಯಾ ಬಿಲ್ಡಿಂಗಾಂತ್ ಲಿಫ್ಟ್ ನಾ ದೆಕುನ್ ಶಿಡಿಯೊ ಚಡೊಂಕ್ ಆಸ್ಲೆ. ಪಾಂಚ್ವಿ ಮಾಳಯ್ ಯೆತಾನಾ, ತೊ ಪ್ರಾಯೆಸ್ತ್ ಯಾಜಕ್ ಪುರಾಸಣೆನ್ ಮ್ಹಣಾಲೊ, ಆನಿ ಸರ್ಗ್ ಚಡ್ ವಯ್ರ್ ನಾ ಮ್ಹಣ್ ದಿಸ್ತಾ! ಆಯ್ಕೊನ್ ಹಾಂವ್ ಆವಾಕ್ಕ್ ಜಾಲೊ! ವ್ಹಯಿ, ಆಮಿ ಸರ್ಗ್ ವಯ್ರ್ ಆಸಾ ದೆಕುನ್ ಸರ್ಗಾ ವಚಾಚೆ ತರ್, ಚಡೊಂಕ್ ಆಸಾ ಮ್ಹಣ್ತಾಂವ್. ಭಾರತಾಂತ್ ಕೈಲಾಸಾ (ಸರ್ಗ್) ಹಿಮಾಲಯ ಮಹಾಪರ್ವತಾರ್ ಆಸಾ ಮ್ಹಣ್ತಾತ್. ದೆವಾಚೊ ಪವಿತ್ರ್ ಜಾಗೊ ಪರ್ವತಾರ್ ಆಸಾ ಮ್ಹಣ್ ಕೀರ್ತನಾಂನಿ ಉಲ್ಲೇಖ್ ಆಸಾ (ಕೀರ್ತನ್. 24:3). ದೆವಾಚೊ ಪರ್ವತ್ ಮ್ಹಳ್ಯಾರ್ ಕಿತೆಂ?

ಪಯ್ಲೆಂ: ನಿರ್ಗಮನ್. 20:1-17, ದುಸ್ರೆಂ: 1 ಕೊರಿ. 1:22-25, ಶುಭ್‌ವಾರ್ತಾ: ಜುವಾಂವ್. 2:13-25

ವಿಶಯ್: ದೆವಾಚ್ಯಾ ರಾಜಾಖಾತಿರ್ ಖತ್ಕತಿ ಉಮೆದ್

ಪ್ರಾಚಿತ್ ಕಾಳಾಚ್ಯಾ ತಿಸ್ರ್ಯಾ ಆಯ್ತಾರಾ ಆಮಿ ನಿಯಾಳ್ ಕರ್ಚಿ ಶುಭ್‌ವಾರ್ತಾ 'ಜೆಜು ದೆವಾಳ್ ಶುದ್ಧ್ ಕರ್ತಾ' ಆರ್ಥ್ ಕರ್ನ್ ಘೆಂವ್ಕ್ ಆಮಿ ದೆವಾಳಾಚಿ ಮಾಂಡಾವಳ್ ಸಮ್ಜಾಜೆ. ಹ್ಯಾ ದೆವಾಳಾಂತ್ ದೋನ್ ಭಾಗ್ ಆಸಾತ್. ಏಕ್ ದೆವಾಚೆಂ ಬಾಂದಪ್. ಹೆಂ ಬಾಂದಪ್ ದೆವಾಚ್ಯಾ ಆಸ್ತಿಚ್ಯಾ ಮಧೆಗತ್ ಆಸ್‌ಲ್ಲೆಂ. ಹ್ಯಾ ದೆವಾಳಾಕ್ ವರ್ಸಾಕ್ ಏಕ್ ಪಾವ್ಟಿಂ ಪಾತ್ಕಾಚೆಂ ಫಾರಿಕ್ಪಣ್ ದಿಂವ್ಚ್ಯಾ ದಿಸಾ ಮಾತ್ರ್ ಯಾಜಕಾಕ್ ಭಿತರ್ ವಚೊಂಕ್ ಆಸ್‌ಲ್ಲೆಂ. ದುಸ್ರೊ ಭಾಗ್ ಜಾವ್ನಾಸಾ ದೆವಾಳಾಚ್ಯಾ ಭೊಂವ್ತೊಣಿ ಆಸ್ಚ್ಯೊ ಚಾರ್ ಪೊರ್ಟಿಕೊ. ಪಯ್ಲೊ ಪೊರ್ಟಿಕೊ ಯಾಜಕಾಂನಿ ಹೋಮ್‌ಬಲಿ, ಧುಂಪ್ ಇತ್ಯಾದಿ ಭೆಟಂವ್ಚಿ ವೆದಿ ಆಸ್‌ಲ್ಲೊ ಜಾಗೊ. ದುಸ್ರೊ ಪೊರ್ಟಿಕೊ ಇಸ್ರಾಯೆಲಾಚ್ಯಾ ಜುದೆವಾಂಕ್ ಮಾತ್ರ್. ತಿಸ್ರೊ ಪೊರ್ಟಿಕೊ ಸ್ತ್ರೀಯಾಂಕ್ ಮಾತ್ರ್. ಆನಿ ಚವ್ತೊ ಪೊರ್ಟಿಕೊ ಜುದೆವ್ ಧರ್ಮಾಕ್ ಮತಾಂತರ್ ಜಾಲ್ಲ್ಯಾ ಜೆಂತಿಲಾಂಕ್ ಮಾತ್ರ್. ಹೊ ಜಾಗೊ ಪ್ರಮುಕ್ ಪವಿತ್ರ್ ಜಾಗ್ಯಾಥಾವ್ನ್ ಮ್ಹಣ್ಜೆ ಪಯ್ಲ್ಯಾ ಪೊರ್ಟಿಕೆಥಾವ್ನ್ ಜಾಯ್ತೊ ಪಯ್ಸ್ ಆಸ್‌ಲ್ಲೊ. ಹ್ಯಾ ಜಾಗ್ಯಾರ್ ಸಬಾರ್ ಥರಾಂಚೊ ವ್ಯಾಪಾರ್ ಚಲ್ತಾಲೊ. ದೆವಾಳಾಕ್ ಆಯಿಲ್ಲ್ಯಾ ಭಕ್ತಾಂಕ್ ಸಾಕ್ರಿಫಿಸ್ ಭೆಟಂವ್ಕ್ ಮನ್ಜಾತಿ, ಧುಂಪ್, ತೇಲ್, ಮೀಟ್ ಇತ್ಯಾದಿ ಗರ್ಜ್ ಪಡ್ತಾಲ್ಯೊ. ದುಸ್ರ್ಯಾ ದೆಶಾಂಚ್ಯಾ ಭಕ್ತಾಂಕ್ ತಾಂಚೆ ಪಯ್ಶೆ ಬದ್ಲಾವಣ್ ಕರ್ಚಿ ಗರ್ಜ್ ಆಸ್‌ಲ್ಲಿ. ಹಜಾರಾಂನಿ ಲೋಕ್ ಯೆತಾನಾ ತಾಂಚೊ ಆವಾಜ್, ವಿಕ್ತೆಲ್ಯಾಂಚೊ ಆವಾಜ್ ಆನಿ ಮನ್ಜಾತಿಂಚೊ ಆವಾಜ್ ಮ್ಹಣ್ತಾನಾ ತೆಂಪ್ಲಾಂತ್ ಜಾಂವ್ಚೊ ಗಲಾಟೊ ಎಕಾ ಮಾರ್ಕೆಟಿಪರಿಂ. ತುಂಚ್ ಚಿಂತುನ್ ಪಳೆ! ಹೆಂ ಸಕ್ಕಡ್ ಚಲ್ತಾಲೆಂ ಪಯ್ಶಾಂಖಾತಿರ್! ದೆವಾಳಾಂತ್ ದೆವಾಚಿ ಭಕ್ತ್ ಖಂಯ್ ಆಸಾ? ದೆಕುನ್ ಜೆಜು ಅಸಲ್ಯಾ ಸಕ್ಡಾಂಕ್ ಧಾಂವ್ಡಾವ್ನ್ ದೆವಾಳ್ ಶುದ್ಧ್ ಕರ್ತಾ.