ದೈವಿಕ್ ಸ೦ದೇಶ್

ಮುಕ್ಲ್ಯಾ ಥೊಡ್ಯಾ ಮಯ್ನ್ಯಾಂನಿ ಸಾಂ. ಪಾವ್ಲಾನ್ ರೊಮಾಗಾರಾಂಕ್ ಬರಯಿಲ್ಲ್ಯಾ ಪತ್ರಾಂತ್ಲೆ ವಿಶಯ್ ತುಮ್ಚೆ ಮುಕಾರ್ ದವರುಂಕ್ ಹಾಂವ್ ಖುಶಿ ವ್ಹರ್ತಾ೦. ಕ್ರಿ.ಶ. 49 ಇಸ್ವೆಂತ್ ಕ್ಲಾವ್ದಿಯಸ್ ಚಕ್ರವರ್ತಿನ್ ಸಕ್ಕಡ್ ಜುದೆವಾಂಕ್ ರೊಮಾಥಾವ್ನ್ ಭಾಯ್ರ್ ಘಾಲ್ಲೆಂ. ತ್ಯಾ ಕಾಳಾರ್ ಸಬಾರ್ ಜಣ್ ಕ್ರಿಸ್ತಾಂವ್ ರೊಮಾಂತ್ ಆಸ್‌ಲ್ಲೆ ಆನಿ ತಾಂಚೆಪಯ್ಕಿ ಥೊಡೆ ಜಣ್ ಜುದೆವ್ ಕುಳಿಯೆಚೆ ಜಾವ್ನಾಸ್‌ಲ್ಲೆ. ಜುದೆವ್ ನ್ಹಯ್ ಆಸ್‌ಲ್ಲ್ಯಾ ಅನ್ಯಧರ್ಮಾಚ್ಯಾಂಕ್ ಜುದೆವಾಂಥಂಯ್ ಪಾತ್ಯೆಣಿ ಉಣಿ ಜಾಲ್ಲಿ. ತಾಂತುನ್ ಕ್ರಿಸ್ತಾಂವ್ ಜಾಲ್ಲೆ ಜುದೆವ್ ಆಸ್‌ಲ್ಲ್ಯಾನ್ ತಾಂಕಾಂ ಧಯ್ರ್ ದೀವ್ನ್ ಆನಿ ಜೆಜು ಕ್ರಿಸ್ತಾಚ್ಯಾ ಕುರ್ಪೆ ಥಂಯ್ ಪಾತ್ಯೆಣಿ ದವರ್ನ್ ದೆವಾಚ್ಯಾ ಸಬ್ದಾ ಪರ್ಮಾಣೆ ಜಿಯೆಂವ್ಕ್ ಆಪ್ಲ್ಯಾ ಪತ್ರಾ ಮಾರಿಫಾತ್ ಪ್ರೊತ್ಸಾವ್ ದಿತಾ.

"ಪೃಥ್ವಿ ಶೆಕಾನ್‌ಶೆಕ್ ಸರ್ವೆಸ್ಪರಾಚೊ ಉಗ್ಡಾಸ್ ಕರ್ತಲಿ. ತಿ ತಾಚೆಶಿಂ ಪರ್ತುನ್ ಯೆತಲಿ; ರಾಷ್ಟ್ರಾಂಚಿಂ ಸರ್ವ್ ಕುಟ್ಮಾಂ ತಾಚೆ ಮುಕಾರ್ ಸರ್ಪಟ್ತಲಿಂ" (ಕೀರ್ತನಾಂ. 22:27)

"ಕಿತ್ಯಾಕ್ ರಾಜ್ವಟ್ ಸರ್ವೆಸ್ಪರಾಚೆಂ, ರಾಷ್ಟ್ರಾಂಚೆರ್ ತೊ ಪದ್ವಿ ಚಲಯ್ತಾ" (ಕೀರ್ತನಾಂ. 22:28)

"ನೆಣ್ತೆಪಣ್ ಆನಿ ಪ್ರಾಮಾಣಿಕ್‌ಪಣ್ ಮ್ಹಾಕಾ ಸಾಂಬಾಳುಂ, ಕಿತ್ಯಾಕ್ ತುಜೆರ್ ಸರ್ವೆಸ್ಪರಾ, ಹಾಂವ್ ಭರ್ವಸ್ಲಾಂ" (ಕೀರ್ತನಾಂ. 25:21)

I. ಇಸಾಯಿಯಾ. 50:4-7; II. ಫಿಲಿಪ್ಪಿಗಾರಾಂಕ್. 2:6-11; ವಾಂಜೆಲ್: ಮಾರ್ಕ್. 14:1-15:47

ವಿಷಯ್: ಪಾಟಿಂ ಯೆ

ಆಮ್ಚ್ಯಾ ಜಿವಿತಾಂತ್ ಆಮ್ಕಾಂ ಕಷ್ಟ್ ಆಸ್ತಲೆಚ್ಚ್, ಕೊಣಾಚೆಂಯೀ, ಜಿವಿತ್ ಸುಖಾನ್‌ಚ್ ಭರ್‌ಲ್ಲೆಂ ನಾ. ಆಮ್ಚ್ಯಾ ಜಿವಿತಾಚಾ ರಸ್ತ್ಯಾರ್ ಕಾಂಟೆ- ಕುಂಟೆ, ಫಾತೊರ್ ಆಮಿಂ ಉತ್ರೊಂಕ್ ಆಸಾ. ಆಮ್ಚ್ಯಾ ಜಿವಿತಾಂತ್ ಆಮ್ಕಾಂ ಕಷ್ಟಾಂಚೆ ದೊಂಗೊರ್ ಚಡೊಂವ್ಕ್ ಆಸ್ತಲೆಚ್. ಪೂಣ್ ಹ್ಯಾ ಸರ್ವಾಚೆರ್ ಆಮಿ ಜಯ್ತ್ ವ್ಹರುಂಕ್ ಆಸಾ. ಕಶೆಂ ಆಮ್ಚೆಂ ವಾತಾವರಣ್ ಎಕಾಚ್ಚ್ ಸಾರ್ಕ್ಯಾಚೆಂ ನಾ ತಶೆಂಚ್ ಆಮ್ಚ್ಯಾ ಜಿವಿತಾಂತ್ ಆಮ್ಕಾಂ ದಗ್ದೊಣಿಂ, ಕಷ್ಟ್ ಆನಿ ಸಲ್ವೊಣಿಂ ಬೊಗುಂಕ್ ಆಸ್ತಲಿಚ್. ಪೂಣ್ ಹರ್ಯೆಕಾ ಸಲ್ವೊಣಿಂ ಥಾವ್ನ್ ಆಮ್ಕಾಂ ಜಯ್ತ್ ರಾಕೊನ್ ಆಸಾ ಮ್ಹಣ್ ಜೆಜುನ್ ಹ್ಯಾ ರಾಮಾಚಾ ಆಯ್ತಾರಾ ಆಮ್ಕಾಂ ರುಜು ಕರ್ನ್ ದಾಖಯ್ಲಾಂ. ಹ್ಯಾ ದಿಸಾಚೆಂ ಘಡಿತ್ ಆಮಿ ನಿಯಾಳ್ ಕರುಂಯಾ. ರಾಯಾಂಚಾ ರಾಯಾಕ್, ಧನಿಯಾಂಚಾ ಧನಿಯಾಕ್ ತಾಣಿ ವಸ್ತುರ್ ರಸ್ತ್ಯಾರ್ ಹಾಂತುಳ್ನ್ ರಾಮಾಚ್ಯೊ ತಾಳಿಯೊ ಕಾಣ್ಘೆವ್ನ್ ವ್ಹಡಾ ತಾಳ್ಯಾನ್ "ಹೊಸಾನ್ನಾ" ಮ್ಹಣ್ ಗಾವ್ನ್ ತಾಕಾ ಸ್ವಾಗತ್ ಕೆಲೊ. ಪೂಣ್ ಕಿತ್ಲೊ ತೇಂಪ್ ಹಿಂ ಲೊಕಾಚಿ ಸ್ತುತಿ ಬಾಳ್ವಲಿ! ತಾಚಿ ಸ್ತುತಿ ಕೆಲ್ಲ್ಯಾ ಹ್ಯಾಚ್ ಲೊಕಾನಿಂ "ಖುರ್ಸಾರ್ ತಾಕಾ ಮಾರಾ, ಖುರ್ಸಾರ್ ತಾಕಾ ಮಾರಾ" ಮ್ಹಣ್ ಬೊಬಾಟ್ ಘಾಲಿ.

ಉತ್ಪತ್ತಿ: 22:1-2, 9a; 10-13, 15-18; ರೊಮಾ: 8:31b-34; ಮಾರ್ಕ್: 9:2-10

ಶ್ರೀಮಾನ್ ವಲೇರಿಯನ್ ಡಿಕ್ರೂಜಾಲಾಗಿಂ ಹಾಂವ್ ಜಾಯ್ತೆಪಾವ್ಟಿಂ ಗೆಲಾಂ. ಮುಂಬಯ್ಚ್ಯಾ ಬೆಂಡ್ರಾಚ್ಯಾ ಚಾಲಿಂತ್ ತೊ ರಾವ್ತಾ. ಮಾಸ್ಳೆಚೆಂ ಅಕ್ವೇರಿಯಮ್ ಕರ್ಚ್ಯಾ೦ತ್ ಆನಿ ಸೊಭಿತ್ ಸುಂದರ್ ಕಲಾಕೃತಿ ಕರ್ಚ್ಯಾ೦ತ್ ತೊ ಭೋವ್ ಪ್ರವೀಣ್. ಪುಣ್ ತೊ ವ್ಹಡ್ ಬೆಬ್ದೊ, ಸೊರ್‍ಯಾಚೊ ಗುಲಾಮ್. ಸಕಾಳಿಂ ಫುಡೆಂ ಪಿಯೊವ್ನ್ ಪಡ್ತಾಲೊ. ಏಕ್ ಪಾವ್ಟಿಂ ಆಕ್ವೇರಿಯಮ್ ಹಾಡ್ಚೆ ಖಾತಿರ್ ಹಾಂವ್ ತಾಚೆಸರ್ಶಿನ್ ಗೆಲೊಂ. ತಾಚೆಂ ಘರ್ ಪಯ್ಲೆಂಚ್ಯಾಪರಿಂ ನಾತ್‌ಲ್ಲೆಂ. ಬರೆಂ ಕರ್ನ್ ಜಾಡ್ನ್ ನಿತಳ್ ದವರ್ಲೆ೦. ಕಸ್‌ಲೊಚ್ ಕಚ್ರೊ ನಾತ್‌ಲ್ಲೊ. ಘರಾ ಭಿತರ್ ಸೊಭಿತ್ ಏಕ್ ಆಲ್ತಾರ್ ಕೆಲ್ಲಿ. ಆನಿ ವಲೇರಿಯನ್ ಜೆಜುಚ್ಯಾ ಸೊಭಿತ್ ಪಾಯ್ನೆಲಾ ಮುಕಾರ್ ಬಸೊನ್ ವಾಂಜೆಲ್ ವಾಚುನ್ ಆಸ್‌ಲ್ಲೊ. ಹೆಂ ಪಳೆವ್ನ್ ಮ್ಹಾಕಾ ಅಜಾಪ್ ಜಾಲೆಂ. 'ಪ್ರೇಯ್ಜ್ ದ ಲೋರ್‍ಡ್, ಫಾದರ್ ಬೆಸಾಂವ್ ದಿಯಾ' ಮ್ಹಣ್ ಸಾಂಗ್ತಾನಾ ಹಾಂವ್ ಅವಾಕ್ಕ್ ಜಾಲೊಂ. 'ಆಜ್ ತುಂ ಆನಿ ತುಜ್ಯೊ ಮಾಸ್ಳ್ಯೊ ಸಗ್ಳ್ಯೊ ಮಹಿಮೆಭರಿತ್ ದಿಸ್ತಾತ್' ಮ್ಹಳೆಂ ಹಾಂವೆಂ. "ಗೆಲೆತ್ಯಾ ಸುಕ್ರಾರಾ ದೀಸ್ ಮ್ಹಜೆಂ ಪುನರ್‌ಜಿವಂತ್ಪಣ್ ಜಾಲೆಂ! ತುಮಿ ಸಾಂಗ್ತೆಲ್ಯಾತ್ ರೆತಿರೆಕ್ ಹಾಜರ್ ಜಾ ಮ್ಹಣ್. ದೆಕುನ್ ಹಾಂವ್ ಮನ್ ಕರ್ನ್ ರೆತಿರೆಕ್ ಗೆಲೊಂ. ಪವಿತ್ರ್ ಸಾಕ್ರಾಮೆಂತಾಚ್ಯಾ ಆರಾಧಾನಾವೆಳಾರ್ ಮ್ಹಾಕಾ ಜೆಜು ದಿಸ್ಲೊ. 'ಹಾಂವ್ ತುಜೆಖಾತಿರ್ ಮೆಲಾಂ, ತುಂ ಆನಿ ಮುಕಾರ್ ಬೆಬ್ದೊ ನ್ಹಯ್, ತುಂ ಆನಿ ಮುಕಾರ್ ನವಿ ರಚ್ನಾ!' ಮ್ಹಜಿ ಸೊರ್‍ಯಾಚಿ ಆನಿ ಸಿಗ್ರೆಟಿಚಿ ತಾನ್ ಬಾಗ್ಲಿ. ಮ್ಹಜೆಂ ಪಿಶೆಂ ಸುಟ್ಲೆಂ. ಮ್ಹಜೆಂ ಪುನರ್‌ಜಿವಂತ್ಪಣ್ ಜಾಲೆಂ".

ಪಯ್ಲೆಂ: ಧ. ಕೃ. 4:32-35; ದುಸ್ರೆಂ: 1 ಜುವಾಂವ್ 5:1-6;

ಶುಭ್‌ವಾರ್ತಾ: ಜುವಾಂವ್. 20:19-31

ವಿಶಯ್: ದೆವಾಚಿ ಕಾಕುಳ್ತ್

ಪಾಸ್ಕಾಂಚೊ ದುಸ್ರೊ ಆಯ್ತಾರ್ 'ದೆವಾಚ್ಯಾ ಕಾಕುಳ್ತಿಚೊ ಆಯ್ತಾರ್' ಮ್ಹಣೊನ್ ಆದ್ಲೊ ಪಾಪ್‌ಸಾಯ್ಬ್ ಜುವಾಂವ್ ಪಾವ್ಲ್ ದುಸ್ರ್ಯಾನ್ ಮರಿಯಾ ಫಾವುಸ್ತಿನಾಕ್ ಸಾಂತ್ ಮ್ಹಣ್ ಪಾಚಾರ್‍ಚ್ಯಾ ದಿಸಾ ಹೆಂ ನಾಂವ್ ದಿಲ್ಲೆಂ. ಭಾಗೆವಂತ್ ಹಫ್ತ್ಯಾಂತ್ ಪಾಸ್ಕಾಚೊ ಘುಟ್, ದೆವಾಚಿ ಕಾಕುಳ್ತ್ ಆಮಿ ಆಚರಣ್ ಕೆಲಿ. ತರ್ ಹ್ಯಾ ಆಯ್ತಾರಾ ಕಿತ್ಯಾಕ್ ದೆವಾಚ್ಯಾ ಕಾಕುಳ್ತಿಚೊ ಆಯ್ತಾರ್ ಮ್ಹಣ್ ಆಚರಣ್ ಕರ್ತಾತ್? ಭಾಗೆವಂತ್ ಹಫ್ತ್ಯಾಂತ್ ವೆವೆಗ್ಳ್ಯಾ ದಿಸಾಂನಿ ಕ್ರಿಸ್ತಾಚೊ ಪಾಶಾಂವ್, ಮರಣ್ ಆನಿ ಜಿವಂತ್ಪಣ್ ಆಮಿ ಆಚರ್ಸಿಲಾಂ. ಹ್ಯಾ ಆಯ್ತಾರಾ ತ್ಯಾ ಸಕ್ಕಡ್ ಘಡಿತಾಂಚೊ ಉಡಾಸ್ ಸಾಂಗಾತಾ ಕಾಡ್ನ್, ತ್ಯಾ ಮುಕಾಂತ್ರ್ ಮೆಳ್‌ಲ್ಲಿ ದೆವಾಚಿ ಕುರ್ಪಾ ಆನಿ ಕಾಕುಳ್ತ್ ಎಕ್‌ಚ್ ಕೇಂದ್ರ್ ಜಾವ್ನ್ ಆಚರಣ್ ಕರ್ನ್ ದೆವಾಕ್ ಅರ್ಗಾ೦ ದಿತಾಂವ್. ಪಾಪ್‌ಸಾಯ್ಬ್ ಜುವಾಂವ್ ಪಾವ್ಲ್ ದುಸ್ರ್ಯಾನ್ 'ಕಾಕುಳ್ತಿಚೊ ಆಯ್ತಾರ್' ಪಾಸ್ಕಾಚ್ಯಾ ಮಿಸ್ತೆರಾದ್ವಾರಿಂ ಆಮ್ಕಾಂ ಲಾಭಯಿಲ್ಲ್ಯಾ ಸರ್ವ್ ಬರೆಪಣಾಕ್ ಅರ್‍ಗಾಂ ದಿಂವ್ಚೊ ಪ್ರತ್ಯೇಕ್ ದೀಸ್ ಜಾವ್ನಾಸಾ ಮ್ಹಣ್ ಪಾಚಾರ್ಲಾ. ಕಾಕುಳ್ತಿಚೊ ಆಯ್ತಾರ್, ಭಾಗೆವಂತ್ ಹಫ್ತ್ಯಾಂತ್ ಆನಿ ಪಾಸ್ಕಾಚ್ಯಾ ಹಫ್ತ್ಯಾಂತ್ ಮೆಳ್ಚ್ಯಾ ಸರ್ವ್ ಕುರ್ಪೆಚೆಂ ಆನಿ ಮಿಸ್ತೆರಾಚೆಂ ಸಹಮಿಲನ್ ಮ್ಹಣ್ಯೆತ್. ದೆವಾನ್ ಸಾಂ. ಮರಿಯಾ ಫಾವುಸ್ತಿನಾಕ್ ಕಳಿತ್ ಕೆಲಾಂಕೀ "....ಖಂಚ್ಯಾಯಿ ಪಾತ್ಕಿ ಮನ್ಶಾನ್ ಮ್ಹಜೆಲಾಗಿಂ ಯೇಂವ್ಕ್ ಭಿಯೆಂವ್ಕ್ ನ್ಹಜೊ, ತಾಣೆ ಪಾತ್ಕಾಂ ಕೆಲ್ಲಿಂ ವಾಯ್ಟ್ ಆಸಾತ್ ಜಾಲ್ಯಾರೀ ಭಿಯೆಂವ್ಕ್ ನ್ಹಜೊ... ಹರ್ಯೆಕ್ ಅಸ್ತಿತ್ವಾಕ್ ಆಯಿಲ್ಲೆಂ ಮ್ಹಜ್ಯಾ ಗೂಂಡ್ ಕಾಕುಳ್ತಿ ಥಾವ್ನ್ ಉಬ್ಜಾಲಾಂ... ಕಾಕುಳ್ತಿಚೆಂ ಫೆಸ್ತ್ ಮ್ಹಜ್ಯಾ ಅಪರಿಮಿತ್ ಮೊವಾಳಾಯೆಥಾವ್ನ್ ಆಯ್ಲಾಂ. ಪಾಸ್ಕಾಂಚ್ಯಾ ಪಯ್ಲ್ಯಾ ಆಯ್ತಾರಾ 'ದೈವಿಕ್ ಕಾಕುಳ್ತಿಚೆಂ ಫೆಸ್ತ್' ವರ್ತ್ಯಾ ದಬಾಜಾನ್ ಆಚರ್ಸಿಜೆ ಮ್ಹಣ್ ಮ್ಹಜಿ ಖುಶಿ. ಮ್ಹಜ್ಯಾ ಕಾಕುಳ್ತಿಚ್ಯಾ ಝರಿ ಥಂಯ್ ಆಯ್ಲ್ಯಾ ಖರಿತ್ ಮನ್ಶಾಕುಳಾಕ್ ಸಮಾಧಾನ್ ಆಸ್ಚೆಂನಾ" (ಸಾಂ. ಫಾವುಸ್ತಿನಾಚಿ ಡೈರಿ, 699). ಪಾತಾಕ್ ಜಾವ್ನಾಸಾ ಏಕ್ ಸವಾಲ್ ಆನಿ ದೈವಿಕ್ ಕಾಕುಳ್ತ್ ಜಾವ್ನಾಸಾ ತಾಚಿ ಜವಾಬ್.

ಪಯ್ಲೆಂ: ಆ. ಕೃ. 13:15, 17-19; ದುಸ್ರೆಂ: 1 ಜುವಾಂವ್ 2:1-5a;

ಶುಭ್‌ವಾರ್ತಾ: ಲೂಕ್. 24:35-48

ವಿಶಯ್: ಜೆಜುಚ್ಯಾ ಜಿವಂತ್ಪಣಾಚೆ ಸಾಕ್ಷಿ ಜಾಂವ್ಯಾಂ.

ಮನ್ಶ್ಯಾಚ್ಯಾ ಚರಿತ್ರೆಂತ್ ಜೆಜುಚ್ಯಾ ಜಿವಂತ್ಪಣಾ ವಿಶ್ಯಾಂತ್ ದುಬಾವ್ ಉಚಾರ್‌ಲ್ಲೆ ಸಬಾರ್ ಆಸಾತ್. ಜೆಜುಚೊ ರಿತೊ ಪೊಂಡ್ ಪಳೆವ್ನ್ ಥೊಡ್ಯಾ ಜಣಾಂನಿ ಜೆಜುಚ್ಯಾ ಜಿವಂತ್ಪಣಾಚೆಂ ಸತ್ ಮಾನುನ್ ಘೆತ್ಲೆಂ ತರ್, ಹೆರಾಂನಿ ಜೆಜುಚಿ ನಿರ್ಜೀವ್ ಕೂಡ್ ಚೋರ್‍ನ್ ವ್ಹೆಲಾ ಮ್ಹಣ್ ಖಬರ್ ಕೆಲಿ ಮ್ಹಣ್ತಾ ಪವಿತ್ರ್ ಪುಸ್ತಕ್ (ಜುಂ. 20:1-9, ಮಾತೆವ್. 28:12-15). ಪೂಣ್ ಪಾಸ್ಕಾಚ್ಯಾ ಹ್ಯಾ ತಿಸ್ರ್ಯಾ ಆಯ್ತಾರಾಚಿ ದೇವ್‌ಸ್ತುತಿ ಸೊಮ್ಯಾಚ್ಯಾ ಜಿವಂತ್ಪಣಾಚೆಂ ಸತ್ ಅಶೆಂ ದಾಂಬುನ್ ಸಾಂಗ್ತಾಕೀ, ತ್ಯಾ ವಿಶಿಂ ಕೊಣಾಕ್‌ಚ್ ದುಬಾವ್ ಕರುಂಕ್ ಆಸ್ಪದ್ ನಾ ಕಿತ್ಯಾಕ್ ಜಿವಂತ್ ಜೆಜು ಆಜ್ ಆಮ್ಚೆ ಥಂಯ್ ಜಿಯೆತಾ ಆನಿ ತಾಚೆಥಂಯ್ ಜಿಯೆಂವ್ಚಿಂ ಆಮಿಂ ತಾಚ್ಯಾ ಜಿವಂತ್ಪಣಾಚೆ ಖರೆ ಸಾಕ್ಷಿ ಮ್ಹಣ್ ಪರ್ಗಟ್ ಕರ್ತಾ.

"ಹಾಚೇ ಉಪ್ರಾಂತ್ ಸರ್ಗಿಂ ಏಕ್ ವ್ಹಡ್ಲ್ಯಾ ಜಮ್ಯಾಚಿ ಬೊಬ್‌ಶಿ ಮ್ಹಾಕಾ ಆಯ್ಕಲಿ. ತೆ ಮ್ಹಣ್ತಾಲೆ: ಆಲ್ಲೆಲೂಯಾ! ತಾರಣ್, ಮಹಿಮಾ ಆನಿ ಪದ್ವಿ ಆಮ್ಚ್ಯಾ ದೆವಾಚಿ" (ಜುವಾಂವ್ಕ್ ಕೆಲ್ಲೆಂ ಉಗ್ಡಾಪಣ್. 19:1). "ಮಾಲ್ಗಡೆ ಆನಿ ತ್ಯೊ ಚಾರ್ ಜಿವಿಯೋ ದೆವಾಚ್ಯಾ ಪಾಂಯಾಂಕ್ ಸರ್ಪಡ್ಲಿಂ ಆನಿ ಶಿಯಾಸಣಾರ್ ಬಸ್ಲಲ್ಯಾ ದೆವಾಕ್ ಆರಾಧನ್ ಕರ್ನ್ ಮ್ಹಣಾಲಿಂ: ಆಮೆನ್, ಆಲ್ಲೆಲೂಯಾ!" (ಜುವಾಂವ್ಕ್ ಕೆಲ್ಲೆಂ ಉಗ್ಡಾಪಣ್. 19:3-4). ಹ್ಯಾ ಪಾಸ್ಕಾಚಾ ಕಾಳಾರ್ ಸಗ್ಳಿ ಪವಿತ್ರ್ ಸಭಾ ಸಂತೊಸಾನ್ ಗಾಯ್ತಾ ಅಲ್ಲೆಲೂಯಾ ಅಲ್ಲೆಲೂಯಾ. ಖರೆಂಚ್ ದೇವ್ ಪುನರ್‌ಜಿವಂತ್ ಜಾಲಾ. ಸತ್‌ಚ್ ಜೆಜು ಮೆಲ್ಲ್ಯಾಂತ್ಲೊ ಜಿವಂತ್ ಉಟ್ಲಾ ಆನಿ ತೊ ಜಾವ್ನಾಸಾ ಆಮ್ಚೊ ದೇವ್ ಸದಾಂಚ್ ಆಮ್ಚೆ ಮಧೆಂ ಆಸ್ಚೊ. ಪುನರ್‌ಜಿವಂತ್ ಜಾಲ್ಲೊ ಜೆಜು ಅಪೊಸ್ತಲಾಂ ಮಧೆಗಾತ್ ಯೇವ್ನ್ ರಾವ್ಲೊ ಆನಿ ಮ್ಹಣಾಲೊ "ಶಾಂತಿ ತುಮ್ಕಾಂ!" (ಜುವಾಂವ್. 20:19). "ಪರ್ತ್ಯಾನ್ ಜೆಜುನ್ ತಾಂಕಾಂ ಮ್ಹಳೆಂ: ಶಾಂತಿ ತುಮ್ಕಾಂ! ಜಶೆಂ ಬಾಪಾನ್ ಮ್ಹಾಕಾ ಧಾಡ್ಲಾ, ತಶೆಂ ಹಾಂವ್ ತುಮ್ಕಾಂ ಧಾಡ್ತಾಂ." (ಜುವಾಂವ್. 20:21).

ಮನ್ಶಾಚಿ ಮತ್ ಜಾಣ್ವಾಯೆನ್ ಭರ್‍ಲ್ಯಾ. ಖರಿ ಜಾಣ್ವಾಯ್ ಯಾ ಫಟ್ಕಿರಿ ಜಾಣ್ವಾಯ್? ಪವಿತ್ರ್ ಪುಸ್ತಕ್ ಖರ್‍ಯಾ ಜಾಣ್ವಾಯೆ ವಿಷ್ಯಾಂತ್ ಅಶೆಂ ಸಾಂಗ್ತಾ "ಜಾಣ್ವಾಯೆಂತ್ ಏಕ್ ಅತ್ಮೊ ಆಸಾ. ಹೊ ಅತ್ಮೊ ಬುದ್ವಂತ್, ಪವಿತ್ರ್, ಅಪ್ರತಿಮ್, ಜಿನಸ್‌ವಾರ್, ಸೂಕ್ಷ್ಮ್, ಸುಡ್ಸುಡಿತ್, ತೀಕ್ಷ್ಣ್ ನಿರ್ಮಳ್, ನಿತಳ್, ಅಖಂಡ್, ದಯಾಳ್, ಚತುರ್, ಆಡಾಂವ್ಕ್ ನಜೊ ಆಸ್ಲಲೊ, ಉಪ್ಕಾರಿ, ಮನ್ಶಾಂಕ್ ಮೊಗಾಳ್, ಥಿರ್, ಸುರಕ್ಷಿತ್, ಪ್ರಶಾಂತ್, ಸರ್ವ್ ಪದ್ವೆದಾರ್, ಸರ್ವೇಕ್ಷಕ್, ಆನಿ ತೊ ಸರ್ವ್ ಬುದ್ವಂತ್, ನಿರ್ಮಳ್ ಆನಿ ಸೂಕ್ಷ್ಮ್ ಅತ್ಮ್ಯಾಂನಿ ವ್ಯಾಪಕ್ ಜಾವ್ನಾಸಾ" (ಜಾಣ್ವಾಯ್. 7:22-23). ಜಾಣ್ವಾಯೆನ್ ಭರ್‌ಲ್ಲೊ ವ್ಯಕ್ತಿ ಆಪ್ಲ್ಯೊ ಕರ್ನ್ಯೊ ಭೊಳೆಪಣಾನ್ ಆನಿ ಜಾಣ್ವಾಯೆನ್ ಕರ್ನ್ ಬರಿ ದೇಖ್ ದಿತಾ. ಖರಿ ಜಾಣ್ವಾಯ್ ವಯ್ರ್ ಥಾವ್ನ್ ಯೆತಾ ಮ್ಹಣ್ ದೆವಾಚೆಂಚ್ ಉತರ್ ಆಮ್ಕಾಂ ಸಾಂಗ್ತಾ. "ವಯ್ರ್ ಥಾವ್ನ್ ಲಾಭ್ತಾ ತಿ ಜಾಣ್ವಾಯ್ ಪಯ್ಲೇ ಸುವಾತೆರ್ ನಿತಳ್; ಸಾಂಗಾತಾಚ್ ಸಮಾಧಾನಾಚಿ, ಭೊಳಿ, ಸುಧಾರ್ಸುನ್ ವ್ಹರ್ತಾ ತಸಲಿ, ದಯಾಳಾಯೆನ್ ಭರ್ಲಲಿ, ಬರ್‍ಯಾ ಕರ್ನ್ಯಾಂಚೆಂ ಫೊಳ್ ದಿತಲಿ, ಆನಿ ಪಕ್ಷಪಾತ್ ಆನಿ ಕಪಟೀಪಣ್ ನಾತ್ಲಲಿ. ಜಿಂ ಕೊಣ್ ಸಮಾಧಾನ್ ಸೊಧ್ತಾತ್, ತಿಂ ಸಮಾಧಾನಾಚೆಂ ಬಿಂ ಒಂಪುನ್ ನಿತಿವಂತ್ಪಣಾಚಿಂ ಫೊಳಾಂ ಲುಂವ್ತಾತ್" (ಜಾಕೋಬಾಚೆಂ ಪತ್ರ್. 3:17-18). "ಪ್ರಾಮಾಣಿಕ್ ಮನ್ಶಾಂಚೆ ಅತ್ಮೆ ದೆವಾಚ್ಯಾ ಹಾತಾಂತ್ ಆಸಾತ್ ಆನಿ ಕಸಲೆಚ್ ದಗ್ದ್ ತಾಂಕಾಂ ಲಾಗ್ಚೆ ನಾಂತ್" (ಜಾಣ್ವಾಯ್. 3:1). "ತಿ ದೆವಾಚ್ಯಾ ಆದೆಶಾಂಚೆಂ ಪುಸ್ತಕ್, ಸದಾಂಕಾಲ್ ತಗ್ತಾ ತೆಂ ಧರ್ಮ್‌ಶಾಸ್ತ್ರ್" (ಬಾರೂಕ್. 4:1)

ಏಕ್ ಕೊಲೊ, ಏಕ್ ರಾತಿಂ ಕಾಳೊಕಾಂತ್ ಧಾಂವ್ತಾನಾ ಇಲ್ಲೆಶೆಂ ಉದಾಕ್ ಆಸ್‌ಲ್ಲೆಂ ಎಕೆ ಬಾಂಯ್ತ್ ಪಡ್ಲೊ. ಬಾಂಯ್ತ್ ಥಾವ್ನ್ ವಯ್ರ್ ಯೇಂವ್ಕ್ ಕಿತ್ಲೆಂ ಪ್ರಯತ್ನ್ ಕೆಲ್ಯಾರೀ ತಾಕಾ ಸಾಧ್ಯ್ ಜಾಂವ್ಕ್ ನಾ. ತ್ಯಾ ದೆಕುನ್ ದುಸ್ರ್ಯಾ ದಿಸಾ ಸಕಾಳಿಂವರೆಗ್ ತಾಕಾ ಬಾಂಯ್ತ್‌ಚ್ ರಾವಾಜೆ ಪಡ್ಲೆಂ. ದುಸ್ರ್ಯಾ ದಿಸಾ. ದನ್ಪಾರಾಚ್ಯಾ ವಗ್ತಾ, ಏಕ್ ಬೊಕ್ಡಿ ತ್ಯಾ ವಾಟೆನ್ ಪಾಶಾರ್ ಜಾಲಿ. ಆಪ್ಲಿ ತಾನ್ ಭಾಗಂವ್ಕ್ ಬಾಂಯ್ತ್ ಉದಾಕ್ ಮೆಳಾತ್‌ಗೀ ಮ್ಹಣ್ ಬಾಂಯ್ತ್ ತೀಳ್ನ್ ಪಳೆಲಾಗ್ಲಿ. ತವಳ್ ಬಾಂಯ್ತ್ ಆಸ್‌ಲ್ಲೊ ಕೊಲೊ ತಿಕಾ ದಿಷ್ಟಿಕ್ ಪಡ್ಲೊ. "ಯೆ ಕೊಲ್ಯಾ ತುಂ ಥಂಯ್ಸರ್ ಕಿತೆಂ ಕರ್ನ್ ಆಸಾಯ್?" ಮ್ಹಣ್ ಬೊಕ್ಡೆನ್ ವಿಚಾರ್ಲೆ೦. "ಹಾಂವ್ ಉದಾಕ್ ಪಿಯೆಂವ್ಕ್ ಮ್ಹಣ್ ಹಾಂಗಾಸರ್ ಆಯ್ಲಾಂ. ಹಾಂಗಾಚೆಂ ಉದಕ್ ಪಿಯೆವ್ನ್ ಪಳೆ". ಶಿಂತ್ರಾಳ್ಯಾ ಕೊಲ್ಯಾಬ್ ಬೊಕ್ಡೆಲಾಗಿಂ ಸಾಂಗ್ಲೆಂ. ಪಾಟಿಂ ಮುಖಾರ್ ಚಿಂತಿನಾಸ್ತಾನಾ ಬೊಕ್ಡೆನ್ ಬಾಂಯ್ಚೆ ಭಿತರ್ ಉಡಿ ಮಾರ್ಲಿ ಉದಾಕ್ ಪೋಟ್ ಭರ್‍ನ್ ಪಿಯೆವ್ನ್ ಆಪ್ಲಿ ತಾನ್ ಭಾಗವ್ನ್ ಉಪ್ರಾಂತ್ ಪಾಟಿಂ ಕಶೆಂ ವೆಚೆಂ ಮ್ಹಣ್ ಚಿಂತಿಲಾಗ್ಲಿ. ತವಳ್ ಕೊಲೊ ಮ್ಹಣಾಲಾಗ್ಲೊ. "ಮ್ಹಾಕಾ ಏಕ್ ಉಪಾಯ್ ಝಳ್ಕಾಲಾ. ತುಂ ತುಜ್ಯಾ ಪಾಟ್ಲ್ಯಾ ಪಾಯಾಂನಿ ಉಬಿ ರಾವ್ ಹಾಂವ್ ತುಜೆ ವಯ್ರ್ ಚಡೊನ್ ಭಾಂಯ್ ಥಾವ್ನ್ ಭಾಯ್ರ್ ವೆತಾಂ ಆನಿ ತುಕಾ ಭಾಯ್ರ್ ಕಾಡುಂಕ್ ಕುಮೊಕ್ ಕರ್ತಾ೦".

ಪ್ರಾಚಿತಾಚ್ಯಾ ಕಾಳಾರ್ ಪರಿವರ್ತನ್ ಜಾಂವ್ಚೆಖಾತಿರ್ ಪವಿತ್ರ್ ಸಭಾ ಆಮ್ಕಾಂ ಉಲೊ ದಿತಾ. ಹೆಂ ಪರಿವರ್ತನ್ ತೀನ್ ರಿತಿನ್ ವಿಂಗಡ್ ಕರ್ಯೆತ್. 1. ಮನಾಚೆಂ ಪರಿವರ್ತನ್ 2. ಕಾಳ್ಜಾಚೆಂ ಪರಿವರ್ತನ್ 3. ಜಿಣ್ಯೆಚೆಂ ಪರಿವರ್ತನ್
ಹಾಂವೆಂ ಕೆಲ್ಲೆಂ ಪಾತಕ್ ಮನಪೂರ್ವಕಿ ಒಳ್ಕೊನ್ ಘೆಂವ್ಚೆಂಚ್ ಮನಾಚೆಂ ಪರಿವರ್ತನ್. ಆಪ್ಲಿ ಚೂಕ್ ಸಮ್ಜೊನ್ ಚೂಕ್ ವಳ್ಕಲ್ಲ್ಯಾ ವೆಚಿಕ್ ಪುತಾನ್ "ಬಾಬಾ, ದೆವಾಚೆ ಆನಿ ತುಜೆ ವಿರೋಧ್ ಹಾಂವೆಂ ಪಾಪ್ ಆಧಾರ್ಲೆ೦. ತುವೆಂ ಮ್ಹಾಕಾ ತುಜೊ ಪೂತ್ ಮ್ಹಣ್ ಆಪಂವ್ಕ್ ಹಾಂವ್ ಯೋಗ್ಯ್ ನ್ಹಯ್" (ಲೂಕ್. 15:18-19) ಮ್ಹಣ್ ಆಪ್ಲಿ ಚೂಕ್ ವಳ್ಕೊನ್ ಘೆತ್ಲಿ.