"ಹರ್ಯೆಕ್ಲ್ಯಾ ಥಂಯ್ ದಿಸೊನ್ ಯೆತಾತ್ ತಿಂ ಪವಿತ್ರ್ ಅತ್ಮ್ಯಾಚಿಂ ದೆಣಿಂ ಸಮೆಸ್ತಾಂಚ್ಯಾ ಆದಾಯಾ ಪಾಸತ್ ಮ್ಹಣ್ ದಿಲ್ಯಾಂತ್" (1 ಕೊರಿಂತ್ 12:7).
ದೇವ್ ಆಪ್ಣಾಕ್ಚ್ ಸಂಪೂರ್ಣ್ ಥರಾನ್ ಆಮ್ಕಾಂ ದಿತಾ ಆಮಿ ತಾಚೆಥಂಯ್ ಸಂಪೂರ್ಣ್ ಜಾಂವ್ಚ್ಯಾಕ್. ದೆವಾಚೆಂ ಪವಿತ್ರ್ ಮಂದಿರ್ ಜಾವ್ನಾಸ್ಚಿಂ ಆಮಿಂ ತಾಚ್ಯಾ ಅತ್ಮ್ಯಾ ಮಾರಿಫಾತ್ ಎಕಾಮೆಕಾಥಂಯ್, ಎಕಾಚ್ ಭಾವಾರ್ಥಾನ್ ಎಕ್ವಟ್ತಾಂವ್. ಸಾಂ. ಪಾವ್ಲ್ ಹೆಂ ಸತ್ ದಾಂಬುನ್ ಆಮ್ಕಾಂ ಸಾರ್ಕೆಂ ಸಮ್ಜುಂಚ್ಯಾ ಭಾಶೆನ್ ಸಾಂಗ್ತಾ: "ಜಾಂಕಾಂ ದೆವಾಚೊ ಅತ್ಮೊ ಚಲವ್ನ್ ವ್ಹರ್ತಾ, ತಿಂ ದೆವಾಚಿಂ ಭುರ್ಗಿಂ; ಕಿತ್ಯಾಕ್ ಜಾಚೆಥಂಯ್ ಕ್ರಿಸ್ತಾಚೊ ಅತ್ಮೊ ನಾ, ತೊ ಕ್ರಿಸ್ತಾಚೊ ನ್ಹಯ್" (ರೊಮಾ. 8:14, 9). ತುಂ ಆನಿ ಹಾಂವ್ ಜರ್ತರ್ ಆಮ್ಕಾಂಚ್ 'ಕ್ರಿಸ್ತಾಂವ್' ಮ್ಹಣ್ ಲೆಕ್ತಾಂವ್ ತರ್ ಆಮಿ ಆಮ್ಕಾಂಚ್ ವಿಚಾರುಂಕ್ ಜಾಯ್ - 'ಮ್ಹಜೆಥಂಯ್ ಕ್ರಿಸ್ತಾಚೊ ಅತ್ಮೊ ಆಸಾಗೀ, ಆಸಾ ತರ್ ರುಜ್ವಾತ್ ಕಸಲಿ?
'ಪವಿತ್ರ್ ಪುಸ್ತಕಾಂತ್, ಪರ್ನ್ಯಾ ತಶೆಂಚ್ ನವ್ಯಾ ಸೊಲ್ಲ್ಯಾಂತ್ ದೆವಾಚ್ಯಾ ಅತ್ಮ್ಯಾನ್ ಭರೊನ್ ದೆವಾಚ್ಯೆ ಮಹಿಮೆಖಾತಿರ್ ಜಿಯೆಲ್ಲ್ಯಾ ಸಬಾರ್ ವ್ಯಕ್ತಿಂಚಿ ದೇಖ್ ಆಮ್ಚೆ ಮುಖಾರ್ ಆಸಾ. ಪವಿತ್ರ್ ಸಭೆಚ್ಯಾ ಚರಿತ್ರೆಂತ್ಯೀ ಕ್ರಿಸ್ತಾಚ್ಯಾ ಆತ್ಮ್ಯಾ ಮಾರಿಫಾತ್ ಭಾವಾರ್ಥಾಕ್ ಸಾಕ್ಸ್ ಜಾವ್ನ್ ಜಿಯೆಲ್ಲ್ಯಾಂಚಿ ಪಟ್ಟಿ ಮಸ್ತ್ ಲಾಂಬ್ ಆಸಾ. ಆಮ್ಚೆ ಮುಖಾರ್ ಗೆಲ್ಲ್ಯಾ ಹ್ಯಾ ವ್ಯಕ್ತಿಂಕ್ ದೆವಾನ್ ದಿಲ್ಲಿಂ ತಾಚ್ಯಾಚ್ ಅತ್ಮ್ಯಾಚಿಂ ದೆಣಿಂ ಆಮ್ಕಾಂಯ್ ದಿಲ್ಯಾಂತ್ ನ್ಹಯ್ಗೀ? ತರ್ ದೆವಾಚ್ಯಾ ಅತ್ಮ್ಯಾಕ್ ಆಮ್ಚೆ ಥಂಯ್ ವಾವ್ರುಂಕ್ ಆಮಿಂಯೀ ಆವ್ಕಾಸ್ ಕರ್ನ್ ದೀಜಾಯ್ ನ್ಹಯ್ಗೀ?
ಪಾಸ್ಕಾಚ್ಯಾ ಹ್ಯಾ ಕಾಳಾರ್ ಜಿವಂತ್ ಜೆಜು ಆಪ್ಲ್ಯಾ ಶಿಸಾಂಕ್ ದಿಷ್ಟಿಕ್ ಪಡುನ್ ತಾಚ್ಯಾ ಆತ್ಮ್ಯಾ ಥಂಯ್ ತಾಂಕಾಂ ಬಳ್ವಂತ್ ಕೆಲ್ಲಿಂ ಘಡಿತಾಂ ಆಮಿ ನಿಯಾಳ್ತಾಂವ್. ಪೆಂತೆಕೊಸ್ತಾಚ್ಯಾ ದಿಸಾ ಉಜ್ಯಾಚ್ಯಾ ಜಿಬೆರುಪಾರ್ ಪವಿತ್ರ್ ಅತ್ಮೊ ಶಿಸಾಂಚೆರ್ ದೆಂವ್ಲ್ಯಾ ವೆಳಾರ್ ಶಿಸಾಂಚ್ಯಾ ಜಿಣ್ಯೆಂತ್ ಜಾಲ್ಲೆಂ ಪರಿವರ್ತನ್ ಆಮಿ ಜಾಣಾಂವ್. ಜೆಜುಚ್ಯಾ ಶಿಸಾಂಕ್ ನವ್ಯಾನ್ ರಚನ್ ಕೆಲ್ಲೊ ಪವಿತ್ರ್ ಅತ್ಮೊ, ತುಮ್ಕಾಂ ತಾಚ್ಯಾ ಕುರ್ಪೆ ದೆಣ್ಯಾಂನಿ ಭರುನ್, ಸೊಮ್ಯಾಚೆ ಬಳ್ವಂತ್ ಸಾಕ್ಷಿ ಜಾವ್ನ್ ಜಿಯೆಂವ್ಕ್ ಫಾವೊ ಕರುಂದಿ ಮ್ಹಣ್ ಹಾಂವ್ ಮಾಗ್ತಾಂ.
"ತುಮ್ಚೆರ್ ಪವಿತ್ರ್ ಅತ್ಮೊ ಯೆತಲೊ ತೆದ್ನಾ ತುಮ್ಕಾಂ ಬಳ್ ಮೆಳ್ತಲೆಂ, ಉಪ್ರಾಂತ್ ಜೆರುಜಲೆಮಾಂತ್, ಸಗ್ಳ್ಯಾ ಜುದೇಯಾಂತ್ ಆನಿ ಸಾಮರಿಯಾಂತ್ ಆನಿ ಸಂಸಾರಾಚ್ಯಾ ಪೊಂತಾ ಥಾವ್ನ್ ಪೊಂತಾ ಪರ್ಯಾ೦ತ್ ತುಮಿ ಮ್ಹಾಕಾ ಸಾಕ್ಸ್ ದಿತಲ್ಯಾತ್".
ಜಿವಂತ್ ಕ್ರಿಸ್ತಾ ಥಂಯ್ ತುಮ್ಚೊ ಮೊಗಾಚೊ
ಬಾಪ್ ವಲ್ಟಿ ಎಸ್.ವಿ.ಡಿ.