"ತುಮ್ಚೆರ್ ಪವಿತ್ರ್ ಅತ್ಮೊ ಯೆತಲೊ ತೆದ್ನಾ ತುಮ್ಕಾಂ ಬಳ್ ಮೆಳ್ತಲೆಂ. ಉಪ್ರಾಂತ್ ಜೆರುಜಲೆಮಾಂತ್, ಸಗ್ಳ್ಯಾ ಜುದೇಯಾಂತ್ ಆನಿ ಸಾಮಾರಿಯಾಂತ್ ಆನಿ ಸಂಸಾರಾಚ್ಯಾ ಪೊಂತಾ ಥಾವ್ನ್ ಪೊಂತ್ ಪರ್ಯಾಂತ್ ತುಮಿ ಮ್ಹಾಕಾ ಸಾಕ್ಸ್ ದಿತಲ್ಯಾತ್" (ಧ. ಕೃ. 1:8).
ಸಬಾರಾಂಕ್ ಸಾಂತಿಸಿಮ್ ತ್ರಿಂದಾದಿಚೊ ತಿಸ್ರೊ ಜಣ್ ಜಾವ್ನ್ ಆಸ್ಚೊ ಪವಿತ್ರ್ ಅತ್ಮೊ ಏಕ್ ಮಿಸ್ತೆರ್. ಪೂಣ್ ಪವಿತ್ರ್ ಅತ್ಮ್ಯಾನ್ ಭರೊನ್ ಜಿಯೆತೆಲ್ಯಾಕ್ ಮಿಸ್ತೆರ್ ನ್ಹಯ್ ಬಗಾರ್ ಏಕ್ ಸತ್ ಜಾವ್ನಾಸಾ. ಭಾವ್ ಜೋಸ್ ಅನಾತನಮ್ ಅಶೆಂ ಮ್ಹಣ್ತಾ, ಜರ್ತರ್ ಆಮಿ ಪವಿತ್ರ್ ಅತ್ಮ್ಯಾನ್ ಭರೊಂವ್ಕ್ ನಾಂವ್ ತರ್ ಆಮಿ ಕ್ರಿಸ್ತಾಂವ್ ನ್ಹಯ್. ವ್ಹಯ್! ಜೀವ್ ದಿಂವ್ಚೊ ಪವಿತ್ರ್ ಅತ್ಮೊ ನಾ ತರ್ ಖರಿ ಇಗರ್ಜ್ಮಾತಾ ಬಾಂದುಂಕ್ ಅಸಾಧ್ಯ್. ಪವಿತ್ರ್ ಅತ್ಮೊ ನಾ ತರ್ ತಿ ಇಗರ್ಜ್ಮಾತಾ ಜೀವ್ ನಾತ್ಲ್ಲಿ ಏಕ್ ಸಮಡ್ತ್ ಜಾವ್ನಾಸಾ. ಜೀವ್ ದಿಂವ್ಚೊ ಪವಿತ್ರ್ ಅತ್ಮೊ ಆಮ್ಚೆ ಥಂಯ್ ನಾ ತರ್ ಜೆಜು ಥಂಯ್ ಆಮ್ಚೆಂ ಜಿವಿತ್ ಜೊಡುಂಕ್ ಅಸಾಧ್ಯ್. "ಹೊಗ್ಳಾಪ್ ತುಕಾ ಸೊಮ್ಯಾ, ಫಾದರ್, ತುಮ್ಚೆಂ ಮಾಗ್ಣೆಂ ದೆವಾನ್ ಆಯ್ಕಾಲೆಂ ಆನಿ ಮ್ಹಾಕಾ ಏಕ್ ಬರೆಂ ಕಾಮ್ ಮೆಳ್ಳೆಂ" ಮ್ಹಣ್ ಎಕಾ ತರ್ನಾಟ್ಯಾನ್ ಫೋನ್ ಕೆಲೆಂ. ಅನ್ಯೇಕ್ಲ್ಯಾನ್ ಬರಯ್ಲೆಂ "ತುಮಿ ಆಮ್ಚೆಂ ಘರ್ ಆಶೀರ್ವಾದಿತ್ ಕೆಲ್ಯಾ ಉಪ್ರಾಂತ್ ಆಮ್ಚ್ಯಾ ಘರಾಂತ್ ಸಮಾಧಾನ್ ಆಯ್ಲಾಂ". ಅನ್ಯೇಕಾ ಚೆಡ್ವಾನ್ ಅಜಾಪ್ ಜಾವ್ನ್ "ಮ್ಹಜೆಂ ಪಾಟ್ಲೆಂ ಜಿವಿತ್ ಉಗ್ಡಾಪೆಂ ಜಾಲೆಂ" ಮ್ಹಣ್ ಸಾಂಗ್ಲೆಂ. "ದೆಂವ್ಚಾರ್ ತಾಚೆ ಥಾವ್ನ್ ಪೋಳ್ನ್ ಧಾಂವ್ಲೊ". ಎಕಾ ಇಷ್ಟಾನ್ ವಾಂಟುನ್ ಘೆತ್ಲೆಂ. ಹ್ಯಾ ಸರ್ವ್ ಅಜಾಪಾಂಚೊ ಘುಟ್ ಕಸಲೊ ಜಾವ್ಯೆತ್? ಹೆಂ ಕಶೆಂ ಸಾಧ್ಯ್?! ಪವಿತ್ರ್ ಅತ್ಮೊ ಕೋಣ್?! ತಾಕಾ ಕಶೆಂ ಆಮಿ ಸಮ್ಜೊವ್ನ್ ಘೆಂವ್ಚೆಂ?! ತಾಚಿಂ ಕಾಮಾಂ ಕಸಲಿಂ ಜಾವ್ಯೆತ್? ಆಮ್ಚೆ ಥಂಯ್ ಆಮಿ ತಾಕಾ ಕಶೆಂ ಆಪ್ಣಾಂವ್ಚೆಂ? ತಾಚೆ ಥಂಯ್ ಆಮಿ ಕಶೆಂ ವಾಡ್ಚೆಂ? ತರ್ ಹೆಂ ಸತ್ ಆಮಿ ಜಾಣಾ ಜಾವ್ಯಾಂ.
ಪವಿತ್ರ್ ಅತ್ಮ್ಯಾಚೊ ಅರ್ಥ್ ಆನಿ ಸ್ವಭಾವ್:
ಗ್ರೀಕ್ ಭಾಷೆನ್ ಪವಿತ್ರ್ ಅತ್ಮೊ ಮ್ಹಳ್ಯಾರ್ 'ನ್ಯೂಮಾ' ಯಾ 'ಡುನಾಮಿಸ್'. ನ್ಯೂಮಾಚೊ ಅರ್ಥ್ 'ಜೀವ್, ಅತ್ಮೊ, ಉಸ್ವಾಸ್ ಯಾ ವಾರೆಂ' ಮ್ಹಣೊನ್ (ಉತ್ಪತ್ತಿ. 1:2). ಡುನಾಮಿಸ್ ಸಬ್ದಾಚೊ ಅರ್ಥ್ 'ಸಕತ್ ಯಾ ಶ್ಯಾತಿ' ಮ್ಹಣೊನ್. ಅತ್ಮ್ಯಾಕ್, ಉಸ್ವಾಸಾಕ್ ಯಾ ವಾರ್ಯಾಕ್ ಆಪ್ಡುಂಕ್ ಅಸಾಧ್ಯ್. ಪಳೆಂವ್ಕ್ ಯಾ ಧರುಂಕ್ ಅಸಾಧ್ಯ್. ಫ್ಯಾನ್ ಘುಂವ್ತಾನಾ ಆಮ್ಕಾಂ ದಿಸ್ತಾ ಪೂಣ್ ತಾಚೆ ಥಾವ್ನ್ ಉತ್ಪನ್ನ್ ಜಾಂವ್ಚೆಂ ವಾರೆಂ ಆಮ್ಕಾಂ ದಿಸಾನಾ. 'ನಾ'! ತೆಂ ವಾರೆಂ ಆಮ್ಕಾಂ ಧರುಂಕ್ ಜಾತಾಗೀ? 'ನಾ'. ಪೂಣ್ ತಾಚೊ ಪ್ರತಿಫಳ್ ಜಾವ್ನ್ ಥಂಡ್ ವಾರೆಂ ವಾಳ್ತಾನಾ ಆಮ್ಕಾಂ ಅನ್ಬೋಗ್ ಜಾತಾ. ವೀಜ್-ಸಕತ್ ಆಮ್ಕಾಂ ಪಳೆಂವ್ಕ್ ದಿಸಾನಾ, ಆಪ್ಡುಂಕ್ ಯಾ ಧರುಂಕ್ ಜಾಯ್ನಾ. ಪೂಣ್ ತಾಚೊ ಪ್ರಭಾವ್ ಜಾವ್ನ್ ತಾಚಿ ಸಕತ್ ಉಜ್ವಾಡಾ ಮುಖಾಂತ್ರ್ ಅನ್ಬೋಗ್ ಜಾತಾ. ತ್ಯಾಚ್ ಪರಿಂ ಪವಿತ್ರ್ ಅತ್ಮ್ಯಾಕ್ ಆಕಾರ್ ನಾ ತರೀ ಸಕತ್ ಆಸಾ. ತಿ ಸಕತ್ ದೆವಾ ಥಾವ್ನ್ ಆಯಿಲ್ಲಿ ಜಾವ್ನಾಸಾ. ಡುನಾಮಿಸ್ ಸಬ್ದಾಚೊ ಅರ್ಥ್, ಪವಿತ್ರ್ ಅತ್ಮ್ಯಾಕ್ ಆಮಿ ಸ್ವೀಕಾರ್ ಕೆಲ್ಲ್ಯಾ ವೆಳಾರ್ ತಾಚೆಂ ಕಾಮ್ ಆಮ್ಚೆ ಥಂಯ್ ಸುಫಳ್ ಜಾತಾ. ಆಪೊಸ್ತಲಾಂಕ್ ದಿಲ್ಲೊ ಪವಿತ್ರ್ ಅತ್ಮೊ ದೆವಾಚೆಂ ಉತರ್ ಪರ್ಗಟ್ ಕರ್ಚೆ ಖಾತಿರ್ ಆನಿ ಜಿವಿತಾಚಿ ಸಾಕ್ಸ್ ಜಾಂವ್ಚೆ ಖಾತಿರ್. ದೆವಾ ಥಾವ್ನ್ ದೆಂವೊನ್ ಆಯಿಲ್ಲಿ ಹಿ ಸಕತ್ ದೆಂವ್ಚಾರಾಚಿ ಸಕತ್ ನಾಸ್ ಕರ್ತಾ. ಸಾಂ. ಪೆದ್ರು ಪವಿತ್ರ್ ಅತ್ಮ್ಯಾನ್ ಭರ್ಲ್ಲ್ಯಾ ವೆಳಾರ್, ದೆವಾಳಾ ಥಾವ್ನ್ ಘಾಲ್ಲ್ಯಾ ಸರ್ವ್ ಸವಾಲಾಂಕ್ ಜಾಪ್ ದೀಂವ್ಕ್ ಸಕ್ಲೊ. ಮಂತ್ರ್ವಾದಿ ಜಾಲ್ಲ್ಯಾ ಎಲಿಮಸಾಕ್ ಪವಿತ್ರ್ ಅತ್ಮೊ ಮುಖಾರ್ ಉಬೊ ರಾವ್ಲೊ. ಪವಿತ್ರ್ ಅತ್ಮ್ಯಾನ್ ಭರ್ಲೆಲೆ ದುಸ್ರೆ ಆಪೊಸ್ತಲ್ ದೆವಾಕ್ ಸಾಕ್ಷಿದಾರ್ ಜಾಂವ್ಕ್ ಪಾವ್ಲೆ.
ಪವಿತ್ರ್ ಅತ್ಮೊ - ಏಕ್ ಸತ್ ಜಾವ್ನಾಸಾ:
ಸಂಸಾರಾಚ್ಯಾ ಆರಂಭಾ ಥಾವ್ನ್ಚ್ ಪವಿತ್ರ್ ಅತ್ಮೊ ಸುಡ್ಸುಡಿತ್ ಆಸ್ಲ್ಲೊ. ಆಮಿ ವಾಚ್ತಾಂವ್ "ಪ್ರಥ್ವಿ ನಿರಾಕಾರ್ ಆನಿ ರಿತಿ ಆಸ್ಲಿ. ಆದಿಂ ಸಾಗೊರಾಚೆರ್ ಆಂಧ್ಕಾರ್ ಭರೊನ್ ಆಸ್ಲೊ ಆನಿ ದೈವಿಕ್ ವಾರೆಂ ಉದ್ಕಾಚೆರ್ ಮಾರ್ತಾಲೆಂ" (ಉತ್ಪತ್ತಿ. 1:2). ಮನ್ಶಾಚ್ಯಾ ರಚನೆಂತ್ ಪವಿತ್ರ್ ಅತ್ಮೊ ಏಕ್ ಬಳಾಧಿಕ್ ಹಾತೆರ್ ಜಾವ್ನಾಸಾ. ಆಮಿ ವಾಚ್ತಾಂವ್ ಆಮ್ಚ್ಯಾಚ್ ರುಪಾಚೊ ಆನಿ "ಆಮ್ಚ್ಯಾಚ್ ಸಾರ್ಕ್ಯಾಚೊ ಮನ್ಶಾಕ್ ಆಮಿ ಕರುಂಯಾ" (ಉತ್ಪತ್ತಿ. 1:26). ಹಾಂಗಾಸರ್ ಮನ್ಶಾಚ್ಯಾ ರಚನೆಚ್ಯಾ ಕಾಮಾಂತ್ ದೇವ್ ಆನಿ ಪವಿತ್ರ್ ಅತ್ಮೊ ಸಾಂಗಾತಾ ಮೆಳ್ಳ್ಯಾತ್. ಪವಿತ್ರ್ ಅತ್ಮೊ ಸ್ವಾಸ್ ಯಾ ದೆವಾಚೊ ಜೀವ್ ಜಾವ್ನಾಸಾ. "ತೆದ್ನಾ ಸರ್ವೆಸ್ಪರ್ ದೆವಾನ್ ಧರ್ಣಿಚೆ ಮಾತಿಯೆಚೊ ಮನ್ಶಾಕ್ ಕೆಲೊ ಆನಿ ತಾಚ್ಯಾ ನಾಕಾಚ್ಯಾ ಪುಡಾಂನಿ ಜಿವಾಚೊ ಸ್ವಾಸ್ ಫುಂಕ್ಲೊ ಆನಿ ಮನಿಸ್ ಏಕ್ ಜಿವೊ ಪ್ರಾಣಿ ಜಾಲೊ" (ಉತ್ಪತ್ತಿ. 2:7). ಜೆಜುಚ್ಯಾ ಜಿವಂತ್ಪಣಾ ಉಪ್ರಾಂತ್ ಜೆಜು ಶಿಸಾಂಕ್ ದಿಷ್ಟಿಕ್ ಪಡುನ್ ಮ್ಹಣಾಲೊ: "ಶಾಂತಿ ತುಮ್ಕಾಂ!" ಆನಿ ತಾಣೆಂ ತಾಂಚೆರ್ ಸ್ವಾಸ್ ಸೊಡ್ಲೊ ಆನಿ ಮ್ಹಳೆಂ "ಘೆಯಾ ಪವಿತ್ರ್ ಅತ್ಮ್ಯಾಕ್" (ಜುವಾಂವ್. 20:22). ಸಾಮುಯೆಲಾನ್ ಸಾವ್ಲಾಚೆ ತಕ್ಲೆರ್ ತೇಲ್ ಮಾಕ್ಲೆಲ್ಯಾ ವೆಳಾರ್ ತೊ ಪವಿತ್ರ್ ಅತ್ಮ್ಯಾನ್ ಭರ್ಲೊ ಆನಿ ಇಸ್ರಾಯೆಲ್ ಪರ್ಜೆಚೊ ಫಡಾರಿ ಜಾಲೊ. "ಸರ್ವೆಸ್ಪರಾನ್ ತುಕಾ ಆಪ್ಲೆ ಪರ್ಜೆ ಇಸ್ರಾಯೆಲಾಚೊ ಫುಡಾರಿ ಕಸೊ ಅಭಿಷೆಕ್ ಕೆಲಾ. ತುವೆಂ ಸರ್ವೆಸ್ಪರಾಚೆ ಪರ್ಜೆಚೆರ್ ರಾಜ್ವಟ್ಕಿ ಚಲೊಂವ್ಕ್ ಜಾಯ್ ಆನಿ ತಿಚೆ ಭೊಂವ್ತಣಿಂ ಆಸ್ಲಲ್ಯಾ ದುಸ್ಮಾನಾಂಚ್ಯಾ ಹಾತಾಂತ್ಲಿಂ ತಿಕಾ ನಿವಾರುಂಕ್ ಜಾಯ್. ಸರ್ವೆಸ್ಪರಾನ್ ತುಕಾ ಆಪ್ಲ್ಯಾ ದಾಯ್ಜಾಚೊ ಫುಡಾರಿ ನಿಮ್ಲಾ" (1 ಸಾಮುಯೆಲ್ 10:1). "ತೆದ್ನಾ ಸರ್ವೆಸ್ಪರಾಚೊ ಅತ್ಮೊ ತುಜೆರ್ ಯೆತಲೊ ಆನಿ ತುಂಯ್ ತಾಂಚೆಸವೆಂ ಪ್ರವಾದ್ಪಣಾಚ್ಯಾ ಆವೆಶಾನ್ ಭರೊನ್ ಏಕ್ ದುಸ್ರೊಚ್ ಮನಿಸ್ ಜಾತಲೊಯ್" (1 ಸಾಮುಯೆಲ್ 10:6).
'ಗಣನ್' ಪುಸ್ತಕಾಂತ್ ಆಮಿ ವಾಚ್ತಾಂವ್ "ಮೊಯ್ಜೆನ್ ಲೊಕಾ ಮಧ್ಲ್ಯಾ ಸತ್ತರ್ ಮಾಲ್ಗಡ್ಯಾಂಕ್ ಎಕ್ಟಾಂಯ್ ಕೆಲೆ ಆನಿ ತಾಂಕಾಂ ತಂಬಾ ಭೊಂವ್ತಣಿಂ ಹಾಡ್ಲೆ. ಸರ್ವೆಸ್ಪರ್ ಎಕಾ ಕುಪಾಂತ್ ಸಕ್ಲಾ ದೆಂವ್ಲೊ. ತೊ ಮೊಯ್ಜೆಕಡೆ ಉಲಯ್ಲೊ. ತಾಣೆ ಮೊಯ್ಜೆಚೆರ್ ಆಸ್ಲಲೊ ಇಲ್ಲೊ ಅತ್ಮೊ ಘೆವ್ನ್ ತೊ ಸತ್ತರ್ ಮಾಲ್ಗಡ್ಯಾಂಚೆರ್ ಘಾಲೊ. ಅತ್ಮೊ ತಾಂಚೆರ್ ಯೇನಾ ಫುಡೆಂ, ತಾಂಣಿ ಪ್ರವಾದ್ ಕೆಲೊ" (ಗಣನ್. 11:24-25).
ಸಾವ್ಲಾಚೆ ತೆಗೀ ಪೂತ್ ದೆವಾಚ್ಯಾ ಪವಿತ್ರ್ ಅತ್ಮ್ಯಾನ್ ಭರೊನ್ ಪ್ರವಾದ್ ದೀಂವ್ಕ್ಲಾಗ್ಲೆ. ಆನಿ ನಿಮಾಣೆ ಸಾವ್ಲ್ಚ್ ಪವಿತ್ರ್ ಅತ್ಮ್ಯಾನ್ ಭರೊನ್ ಪ್ರವಾದ್ಪಣಾಚ್ಯಾ ಅವೇಶಾನ್ ಭರೊನ್ ಚಮ್ಕತ್ ರಾವ್ಲೊ (1 ಸಾಮುಯೆಲ್ 19:20-21, 23). ಸಾಮುಯೆಲಾನ್ ದಾವಿದಾಕ್ ಮಾಕ್ಲ್ಯಾ ಉಪ್ರಾಂತ್ ದೆವಾಚೊ ಪವಿತ್ರ್ ಅತ್ಮೊ ವ್ಹಡಾ ಸಕ್ತೆನ್ ತಾಚೆ ಥಂಯ್ ದೆಂವ್ಲೊ ಆನಿ ದಾವಿದ್ ದೆವಾಚ್ಯಾ ಸಕ್ತೆನ್ ಭರ್ಲೊ (1 ಸಾಮುಯೆಲ್ 16:13). ಪವಿತ್ರ್ ಅತ್ಮ್ಯಾನ್ ಭರ್ಲಲೊ ದಾವಿದ್ ಗೊಲಿಯಾತಾ ಕಡೆ ಝಗಡ್ಲೊ ಮಾತ್ರ್ ನ್ಹಯ್ ದೆವಾಚ್ಯಾ ವ್ಹಡಾ ಸಕ್ತೆನ್ ತಾಣೆ ತಾಕಾ ಜಿವ್ಶಿಂ ಮಾರ್ಲೊ. ತ್ಯಾ ದೆಕುನ್ ಮನ್ಶಾಚ್ಯಾ ರಚನೆಚ್ಯಾ ಆರಂಭಾ ಥಾವ್ನ್ ಅನಿ ಇಸ್ರಾಯೆಲಾಚ್ಯಾ ಚರಿತ್ರೆಂತ್ ಪರ್ಯಾಂತ್ ದೆವಾನ್ ವಿಂಚುನ್ ಕಾಡ್ಲ್ಲ್ಯಾ ಪ್ರವಾದ್ಯಾ ಥಂಯ್, ದೆವಾಚಿ ಸಕತ್ ವರ್ತ್ಯಾ ರಿತಿನ್ ಕಾಮ್ ಕರ್ನ್ ಆಸಾ.
ಪವಿತ್ರ್ ಅತ್ಮೊ ಜೆಜುಚಾ ಜಿವಿತಾಂತ್:
"ಜೆಜು ಸ್ನಾನ್ ಘೆವ್ನ್ ಉದ್ಕಾಂತ್ಲೊ ವಯ್ರ್ ಯೆತಚ್, ಆಕಾಸ್ ಉಗ್ತೊ ಜಾಲೊ ಆನಿ ದೆವಾಚೊ ಪವಿತ್ರ್ ಅತ್ಮೊ ಏಕ್ ಪಾರ್ವ್ಯಾಬರಿಂ ಯೇವ್ನ್ ಆಪ್ಣಾಚೆರ್ ರಾವ್ಲಲೊ ತಾಣೆ ದೆಖ್ಲೊ" (ಮಾತೆವ್. 3:16). ತಾಚೆ ಉಪ್ರಾಂತ್ ದೆಂವ್ಚಾರಾನ್ ತಾಳ್ಚೆ ಖಾತಿರ್ ಪವಿತ್ರ್ ಅತ್ಮೊ ಜೆಜುಕ್ ಅರಣ್ಯಾಕ್ ವರ್ನ್ ಗೆಲೊ. ಥಂಯ್ಸರ್ ದೆಂವ್ಚಾರಾನ್ ತಾಕಾ ತಾಳ್ಣ್ಯೊ ಹಾಡ್ಲ್ಯೊ. ಪೂಣ್ ಜೆಜುನ್ ಪವಿತ್ರ್ ಅತ್ಮ್ಯಾಚ್ಯಾ ಆನಿ ಉತ್ರಾಂಚ್ಯಾ ಸಕ್ತೆನ್ ದೆಂವ್ಚಾರಾಕ್ ಸಲ್ವಯ್ಲೊ (ಮಾತೆವ್. 4:1). ಪವಿತ್ರ್ ಅತ್ಮ್ಯಾನ್ ಭರ್ಲ್ಯಾ ಉಪ್ರಾಂತ್ ಜೆಜುನ್ ಆಪ್ಲ್ಯಾ ಪರ್ಗಟ್ ಜಿಣಿಯೆಚೆಂ ಮಿಸಾಂವ್ ಆರಂಭ್ ಕೆಲೆಂ. "ಜೆಜು ಪವಿತ್ರ್ ಅತ್ಮ್ಯಾನ್ ಭರೊನ್ ಯೊರ್ದಾನ್ ನ್ಹಂಯ್ ತಡಿ ಥಾವ್ನ್ ಪಾಟಿಂ ಪರ್ತಲ್ಲ್ಯಾಫರಾ, ತ್ಯಾಚ್ ಅತ್ಮ್ಯಾಚ್ಯಾ ಪ್ರೇರಣಾಖಾಲ್ ಅರಣ್ಯಾಕ್ ಗೆಲೊ" (ಲೂಕ್. 4:1). ಪೂಣ್ ನಜರೆತ್ ಶ್ಹೆರಾಕ್ ಪಾಟಿಂ ಯೆತಚ್ ತಾಣೆ ತಾಚಿ ಪರ್ಗಟ್ ಜಿಣಿ ಸುರು ಕೆಲಿ ಮ್ಹಣೊನ್ "ದೆವಾಚೊ ಪ್ರೇರಕ್ ಅತ್ಮೊ ಮ್ಹಜೆರ್ ಆಸಾ; ಕಿತ್ಯಾಕ್ ದುರ್ಬಳ್ಯಾಂಕ್ ಬರಿ ಖಬರ್ ಪರ್ಗಟ್ ಕರುಂಕ್ ತಾಣೆ ಮ್ಹಾಕಾ ಅಭಿಷೇಕ್ ಕೆಲಾ" (ಲೂಕ್. 4:18). ತ್ಯಾ ದಿಸಾ ಥಾವ್ನ್ ಜೆಜು ಪವಿತ್ರ್ ಅತ್ಮ್ಯಾಚ್ಯಾ ಸಕ್ತೆನ್ ಶಿಕವ್ಣ್ ದೀಂವ್ಕ್ ಲಾಗ್ಲೊ. ದೆಂವ್ಚಾರಾಕ್ ಧಾಂವ್ಡಾಯ್ಲೊ, ಪ್ರವಾದ್ ಆನಿ ಜಾಯ್ತಿಂ ಅಜಾಪಾಂ ತಾಣೆ ಕೆಲಿಂ. ಹೆಂ ಸಕ್ಕಡ್ ಪವಿತ್ರ್ ಅತ್ಮ್ಯಾಚಾ ಸಕ್ತೆನ್ ತಾಣೆ ಕೆಲೆಂ. ಹ್ಯಾಚ್ ಪವಿತ್ರ್ ಅತ್ಮ್ಯಾ ಥಾವ್ನ್ ತಾಕಾ ಜಾಣ್ವಾಯ್, ಸಮ್ಜೊಣಿ, ಬೂದ್, ಪದ್ವಿ ಆನಿ ಸರ್ವೆಸ್ಪರಾಚಿ ಭಿರಾಂತ್ ಲಾಬ್ಲಿ (ಇಸಾಯಿಯಾ. 11:2). ತ್ಯಾ ದೆಕುನ್ ಜೆಜು ಥಂಯ್ ಆಮಿ ದೆಕ್ತಾಂವ್ ಪವಿತ್ರ್ ಅತ್ಮ್ಯಾಚಿಂ ದೆಣಿಂ ಆನಿ ನೋವ್ ಫಳಾಂ (ಗಾಲಾತ್. 5:22). ಜೆಜು ಪವಿತ್ರ್ ಅತ್ಮ್ಯಾನ್ ಭರೊನ್ ಸಂತೊಸಾನ್ ದೆವಾಕ್ ಅರ್ಗಾಂ ದಿಂವ್ಚೆಂ ಆಮಿ ವಾಚ್ತಾಂವ್ (ಲೂಕ್. 10:21). ಕ್ರೀಸ್ತ್ ಮ್ಹಳ್ಯಾರ್ "ಮಾಕ್ಲೊಲೊ" ಮ್ಹಣ್ ಅರ್ಥ್. ದೆಕುನ್ ಜೆಜು, ದೆವಾಚೊ ಪೂತ್ ವ್ಹಡಾ ಸಕ್ತೆನ್ ಆನಿ ಪದ್ವೆನ್ ಅಜಾಪಾಂ ಕರ್ಚೊ "ಮಾಕ್ಲೊಲೊ" ಜಾವ್ನಾಸಾ.
ಪವಿತ್ರ್ ಅತ್ಮೊ ಶಿಸಾಂಚಾ ಜಿವಿತಾಂತ್:
ಜೆಜುಚೆ ಶಿಸ್ ಜಾವ್ನಾಸ್ಲ್ಲೆ, ಶಿಕಪ್ ನಾತ್ಲೆಲೆ, ದುಬ್ಳೆ, ಸಮ್ಜೊಣಿ ನಾತ್ಲ್ಲೆ, ಸಾದೆ ಹಳ್ಳೆಂತ್ಲೆ ಮನಿಸ್. ಖಂಚ್ಯಾಯೀ ಕಾಮಾಂತ್ ತಾಂಕಾಂ ಖಂಚಿಯೀ ತರ್ಬೆತಿ ನಾತ್ಲ್ಲಿ. ತೆ ಧೈರ್ ನಾತ್ಲ್ಲೆ, ಲಜೆಚೆ ಆನಿ ಕೊಣಾಯೀ ವಿರೋಧ್ ಉಲೊಂವ್ಚೆ ಮನಿಸ್ ನ್ಹಯ್ ಆಸ್ಲ್ಲೆ. ಪೂಣ್ ಪವಿತ್ರ್ ಅತ್ಮ್ಯಾನ್ ಭರ್ಲ್ಲೆಚ್ ತಾಂಚೆ ಥಂಯ್ ಬದ್ಲಾವಣ್ ಆಯ್ಲಿ ಆನಿ ಪೆದ್ರು ಏಕ್ ಸಕ್ತೆವಂತ್ ಶಿಕೊವ್ಣ್ದಾರ್ ಜಾಂವ್ಕ್ ಪಾವ್ಲೊ (ಧ. ಕೃ. 2:14-36). ಕ್ರಿಸ್ತಾಂವಾಂಕ್ ದಗ್ದೊವ್ನ್ ಆಸ್ಲ್ಲೊ ಸಾವ್ಲ್ ಏಕ್ ಜುದೆವ್ ಪಾವ್ಲ್ ಜಾವ್ನ್ ಏಕ್ ಧೈರಾಧಿಕ್, ಸಕ್ತೆವಂತ್ ಶಿಕೊವ್ಣ್ದಾರ್ ಜಾವ್ನ್ ಜೆಜುಕ್ ಸಾಕ್ಸ್ ದೀಂವ್ಕ್ ಪಾವ್ಲೊ. ಪೆಂತೆಕೊಸ್ತಾಚಾ ಪರ್ಬೆ ವೆಳಾರ್ ಶಿಸಾಂನಿ ಪವಿತ್ರ್ ಅತ್ಮ್ಯಾಚಿ ಸಕತ್ ಝಡ್ ವಾರ್ಯಾ ರುಪಾರ್, ಉಜ್ಯಾಚ್ಯಾ ಜಿಬೆ ರುಪಾರ್ ಪಳಯ್ಲೆಂ ಆನಿ ತೆ ಪವಿತ್ರ್ ಅತ್ಮ್ಯಾನ್ ಭರ್ಲೆ (ಧ. ಕೃ. 2:1-4; 8:14-20; 9:17; 10:44-48, 19:1-7). ಹ್ಯಾ ವೆಳಿಂ ತಾಣೆ ತಾಂಚೆಂ ಹಾತ್ ದವರ್ನ್ ಜಾಯ್ತ್ಯಾ ಜಣಾಂಕ್ ಗೂಣ್ ಕೆಲೆಂ. ತಿತ್ಲೆಂಚ್ ನ್ಹಯ್ ದೆವಾಚೆಂ ಉತರ್ ವ್ಹಡಾ ಹುಮೆದಿನ್, ಸಕ್ತೆನ್, ಬಳಾನ್, ಧೈರಾನ್ ಪರ್ಗಟುಂಕ್ ಲಾಗ್ಲೆ. ಹೆಂಚ್ ದೆವಾಚೆಂ ಉತರ್ ಲಿಕ್ಣೆ ರುಪಾರ್ ಘಾಲ್ನ್ ಪರ್ಗಟುಂಕ್ ಸಾಧ್ಯ್ ಜಾಲೆಂ. ಸ್ತೆಫಾನ್ ಪವಿತ್ರ್ ಅತ್ಮ್ಯಾನ್ ಭರೊನ್ ಏಕ್ ಮಾಡ್ತಿರ್ ಮೋರ್ನ್ ಮೆಲೊ. ಸುರ್ವೆಚ್ಯಾ ಕ್ರಿಸ್ತಾಂವ್ ಸಮುದಾಯೆಚೆರ್ ವಿಚಿತ್ರ್ ಖುಣಾಂ ದಿಸೊನ್ ಆಯ್ಲಿಂ. ದೆವಾಚ್ಯಾ ಹಾಜರ್ಪಣಾನ್ ಸುಮಾರ್ ಜಣ್ ಪರ್ಕಿ ಭಾಸಾಂನಿ ಉಲೊಂವ್ಕ್ಲಾಗ್ಲೆ. ಸುಮಾರ್ ಜಣಾಂಕ್ ಪವಿತ್ರ್ ಅತ್ಮ್ಯಾಚಿಂ ದೆಣಿಂ ಲಾಭ್ಲಿಂ. ಪಾತ್ಯೆತೆಲ್ಯಾ ಸಕ್ಡಾಂಕ್ ಪವಿತ್ರ್ ಅತ್ಮ್ಯಾಚಿಂ ಫಳಾಂ ಜಾವ್ನ್ ಶಾಂತಿ, ಸಮಾಧಾನ್, ಸಂತೊಸ್, ಮೋಗ್, ದಯಾಳಾಯ್, ಸೊಸ್ಣಿಕಾಯ್, ಪಾತ್ಯೆಣಿ, ಉದಾರ್ಪಣ್ ಲಾಭ್ಲೆಂ.
ಪವಿತ್ರ್ ಅತ್ಮೊ ಆಮ್ಚೆಂ ಥಂಯ್:
ಪವಿತ್ರ್ ಅತ್ಮ್ಯಾನ್ ಭರೊಂಕ್ ಆಮಿ ಕಿತೆಂ ಕರಿಜಾಯ್? ಪೆಂತೆಕೊಸ್ತಾ ಪಯ್ಲೆಂ ಜೆಜುಚಿ ಮಾತಾ ಆನಿ ಶಿಸ್ ಖಳಾನಾಸ್ತಾನಾ ಮಾಗ್ಣೆಂ ಕರಿತ್ ಆಸ್ಲ್ಲೆ (ಧ. ಕೃ. 1:14). ಪವಿತ್ರ್ ಅತ್ಮ್ಯಾಕ್ ಸ್ವೀಕಾರ್ ಕರುಂಕ್ ಮಾಗ್ಣ್ಯಾಚಿ ತಯಾರಾಯ್ ಗರ್ಜೆಚಿ. ಮಾಗ್ಣೆಂ ಕರ್ನ್ ದೆವಾಕ್ ಸೊಧಾ. "ಸರ್ವೆಸ್ಪರ್ ಮೆಳ್ತಾ ತೆದ್ನಾ ತಾಕಾ ಸೊಧಾ, ತೊ ಲಾಗಿಂ ಆಸಾ ತೆದ್ನಾ ತಾಕಾ ಉಲೊ ಮಾರಾ" (ಇಸಾಯಿಯಾ. 55:6). ದೆವಾಚೊ ಅನ್ಬೊಗ್ ಆಮ್ಕಾಂ ಮೆಳಾಜಾಯ್ ತರ್ ದೆವಾ ಥಂಯ್ ಆಮ್ಚೊ ಸಂಬಂಧ್ ಆಮಿ ಥಿರ್ ದವರಿಜಾಯ್.
ದುಸ್ರ್ಯಾನ್, ಪಾತಕ್ ರಡುನ್ ಪಾತ್ಕಾಕ್ ಪಾಟ್ ಕರಾ. "ಪಾತಕ್ ರಡಾ ಆನಿ ಜಿಣಿ ಬದಲಾ, ಆನಿ ತುಮ್ಚೆ ಮಧ್ಲೊ ಹರ್ಯೆಕ್ಲೊ ಆಪ್ಲ್ಯಾ ಪಾತ್ಕಾಂಚೆಂ ಬೊಗ್ಸಣೆಂ ಜೊಡ್ಚ್ಯಾಕ್ ಜೆಜು ಕ್ರಿಸ್ತಾಚೆ ನಾಂವಿಂ ಪವಿತ್ರ್ಸ್ನಾನ್ ಘೆಂವ್; ತವಳ್ ತುಮ್ಕಾಂ ಪವಿತ್ರ್ ಅತ್ಮ್ಯಾಚೆಂ ದೆಣೆಂ ಮೆಳ್ತಲೆಂ" (ಧ. ಕೃ. 2:38). ದೆವಾಕ್ ಸಂಬಂಧ್ ನಾತ್ಲ್ಲೆಂ ಆಮ್ಚ್ಯಾ ಚಿಂತ್ನಾಂನಿ ಯಾ ಉತ್ರಾಂನಿ ಯಾ ಕರ್ನ್ಯಾ೦ನಿ ಕಿತೆಂ ಆಸಾ ತೆಂ ಆಮಿ ರಡುಂಕ್ ಜಾಯ್. ಕಾಳೊಕಾಕ್ ಸಂಬಂಧ್ ಜಾಲ್ಲಿಂ ಸರ್ವ್ ಪಾತ್ಕಾಂ ಮ್ಹಣ್ಜೆ ದ್ವೇಷ್, ನಾ-ಭೊಗ್ಸಾಣೆಂ, ಮಾಟ್ಮಂತ್ರಾ ಹಿಂ ಸರ್ವ್ ಪಾತ್ಕಾಂ ಆಮಿ ರಡುಂಕ್ ಜಾಯ್. ದೆಕುನ್ ಜೆಜು ಮ್ಹಣ್ತಾ: "ಉದ್ಕಾನ್ ಆನಿ ಪವಿತ್ರ್ ಅತ್ಮ್ಯಾನ್ ಜಲ್ಮಲ್ಲೆ ಖರಿತ್ ಕೊಣ್೦ಚ್ ದೆವಾಚ್ಯಾ ರಾಜಾಂತ್ ಪ್ರವೇಶ್ ಜಾಂವ್ಕ್ ಸಕ್ಚೊನಾ" (ಜುವಾಂವ್. 3:3-5). "ಉದ್ಕಾಚೊ ಬಾಪ್ತಿಜ್ಮ್ ಕಾಂಯ್೦ಚ್ ಪ್ರಯೋಜನ್ ನಾ ಗರ್ಜೆಚೆಂ ಜಾವ್ನಾಸಾ ಭೊಗ್ಸಾಣ್ಯಾಚೊ ಬಾಪ್ತಿಜ್ಮ್" (ಮಾತೆವ್. 3:2; 4:17).
ತಿಸ್ರ್ಯಾನ್, ಪವಿತ್ರ್ ಅತ್ಮ್ಯಾಕ್ ತಾನೆಯಾ. "ಸರ್ಗಿಂಚೊ ಬಾಪ್ ಆಪ್ಣಾಲಾಗಿಂ ಮಾಗ್ತಲ್ಯಾಂಕ್ ಕಿತ್ಲ್ಯಾ ಚಡ್ ಮಾಪಾನ್ ಪವಿತ್ರ್ ಆತ್ಮೊ ದೀನಾ ಜಾಯ್ತ್?" (ಲೂಕ್. 11:13). "ಕೊಣ್ಯಿ ತಾನೆಲಾ ಜಾಲ್ಯಾರ್ ತೊ ಮ್ಹಜೆ ಸರ್ಶಿಂ ಯೆಂವ್ ಆನಿ ಪಿಯೆಂವ್. ಪವಿತ್ರ್ ಪುಸ್ತಕ್ ಅಶೆಂ ಮ್ಹಣ್ತಾ: ಜೊ ಕೊಣ್ ಮ್ಹಾಕಾ ಸತ್ಮಾನ್ತಾ ತಾಚ್ಯಾ ಕಾಳ್ಜಾಂತ್ ಥಾವ್ನ್ ವ್ಹಾಳ್ತ್ಯಾ ಉದ್ಕಾಚ್ಯೊ ಝರಿ ಉಮಾಳ್ತಾಲ್ಯೊ. ಆಪ್ಣಾಕ್ ಸತ್ಮಾನ್ತಲ್ಯಾಂನಿ ಘೆಂವ್ಚೊ ಆಸ್ಲಲ್ಯಾ ಪವಿತ್ರ್ ಅತ್ಮ್ಯಾ ವಿಶ್ಯಾಂತ್ ಜೆಜುನ್ ಅಶೆಂ ಮ್ಹಳೆಂ" (ಜುವಾಂವ್. 7:37-39).
ಚವ್ತ್ಯಾನ್, "ಕೀರ್ತನಾಂನಿ, ಗಿತಾಂನಿ ಆನಿ ಭಕ್ತಿಕ್ ಗಾಯನಾಂನಿ ಸಗ್ಳ್ಯಾ ಕಾಳ್ಜಾನ್ ಸೊಮಿಯಾಚಿ ಸ್ತುತಿ ಕರಾ"(ಎಫೆಜ್. 5:19) ಜೆಜು ಮಾರಿಫತ್ ದೆವಾಕ್ ಹೊಗ್ಳಪಾಚೆಂ ಬಲಿದಾನ್ ಆಮಿ ಸದಾಂಚ್ ಭೆಟೊವ್ಯಾಂ; ಹೆಂಚ್ ತಾಚೆಂ ನಾಂವ್ ಒಳ್ಕುನ್ ಘೆತ್ಲಲ್ಯಾಂಚ್ಯಾ ಒಂಠಾಂಚಿ ಉಪ್ಕಾರ್ಸ್ತುತಿ (ಹೆಬ್ರೆವ್. 13:15).
ಪಾಂಚ್ವೆಂ, ದೆವಾಚೆಂ ಉತರ್ ವಾಚ್ ಆನಿ ಪರ್ಗಟ್ ಕರ್. "ದೆಕುನ್ ವಚಾ ಆನಿ ಸಮೆಸ್ತ್ ಪರ್ಜಾಂಚೆ ಶಿಸ್ ಕರಾ; ಬಾಪಾಚೆ ಆನಿ ಪುತಾಚೆ ಆನಿ ಪವಿತ್ರ್ ಆತ್ಮ್ಯಾಚೆ ನಾಂವಿಂ ತಾಂಕಾಂ ಪವಿತ್ರ್ಸ್ನಾನ್ ದಿಯಾ; ಆನಿ ಹಾಂವೆಂ ತುಮ್ಕಾಂ ದಿಲ್ಲ್ಯೊ ಸರ್ವ್ ಆಜ್ಞಾ ಪಾಳುಂಕ್ ತಾಂಕಾಂ ಶಿಕಯಾ" (ಮಾತೆವ್. 28:19-20) "ಜೀವ್ ದಿಂವ್ಚೊ ಪ್ರೇರಕ್ ಅತ್ಮ್ಯಾನ್, ಮನಿಸ್ ಖಂಯ್ಚ್ಯಾಕ್ಯೀ ಉಪ್ಕಾರಾನಾ. ಹಾಂವ್ ತುಮ್ಚೆಲಾಗಿಂ ಉಲಯ್ಲಾಂ ತಿಂ ಉತ್ರಾಂ ಅತ್ಮಿಕ್ ಜೀವ್ ದಿಂವ್ಚಿಂ" (ಜುವಾಂವ್. 6:63) ಎಕಾ ಮನ್ಶಾಚಿ ಪವಿತ್ರ್ ಅತ್ಮ್ಯಾನ್ ಭರ್ಲೆಲಿ ಶಿಕೊವ್ಣ್ ಆನ್ಯೆಕ್ಲ್ಯಾಕ್ ಪವಿತ್ರ್ ಅತ್ಮೊ ಜೊಡುಂಕ್ ತಯಾರ್ ಕರ್ತಾ.
ದೆವಾನ್, ವಿಂಚುನ್ ಕಾಡ್ಲ್ಲ್ಯಾ ಪ್ರವಾದ್ಯಾಂಕ್ ಹಾತ್ ದವರ್ನ್ ಮಾಗೊಂಕ್ ಮಾಕ್ಲಾ. ದಾಖ್ಲ್ಯಾಕ್ ಜುವಾಂವ್ ಬಾಪ್ತಿಸ್ತಾಕ್, ಸಾಮುಯೆಲಾಕ್, ಪೆದ್ರುಕ್, ಜುವಾಂವ್ಕ್ ಆನಿ ಸಬಾರ್ ಜಣಾಂಕ್, "ತುಮಿ ಮ್ಹಜೊ ಮೋಗ್ ಕರ್ತಾತ್ ಜಾಲ್ಯಾರ್, ಮ್ಹಜೆ ಉಪದೆಸ್ ಪಾಳ್ತಲ್ಯಾತ್. ತವಳ್ ಹಾಂವ್ ಬಾಪಾಲಾಗಿಂ ಮಾಗ್ತಲೊಂ, ತೊ ತುಮ್ಕಾಂ ಏಕ್ ಮಜತ್ದಾರ್ ದಿತಲೊ ಆನಿ ಹೊ ತುಮ್ಚೆಸವೆಂ ಸದಾಂಕಾಳ್ ರಾವ್ತಲೊ." (ಜುವಾಂವ್. 14:15-16).
ಮೊಗಾಚ್ಯಾ ಭಾವಾಂನೊ ಆನಿ ಭಯ್ಣಿಂನೊ, ಪುನರ್ಜಿವಂತ್ ಜಾಲ್ಲೊ ಜೆಜು ತುಮ್ಕಾಂ ದೆವಾಚೆ ಸಕ್ತೆನ್ ಭರೊನ್, ಪವಿತ್ರ್ ಅತ್ಮ್ಯಾಚಿ ಭರ್ತಿ ಜೊಡುಂಕ್ ಹ್ಯಾ ಪೆಂತೆಕೊಸ್ತ್ ಪರ್ಬೆ ವೆಳಿಂ ತಯಾರ್ ಕರ್ತಲೊ. ಆಮೆನ್.
- ಮಾ. ಜೆರಿ ಸಿಕ್ವೇರಾ, ಎಸ್.ವಿ.ಡಿ.