"ಆನಿ ಆತಾಂ ದೆವಾನ್ ನಜರೆತಾಚ್ಯಾ ಜೆಜುಕ್ ಪವಿತ್ರ್ ಅತ್ಮ್ಯಾನ್ ಮಾಖ್ಲೊ ಆನಿ ತ್ಯಾ ಪದ್ವೆನ್ ತೊ ಬರೆಂ ಕರಿತ್ತ್ ಗೆಲೊ ಆನಿ ಸೈತಾನಾಚ್ಯಾ ಬಂಧಡೆಂತ್ ಆಸ್ಲೆಲ್ಯಾಂಕ್ ಗೂಣ್ ಕರಿತ್ತ್ ಗೆಲೊ ಕಿತ್ಯಾಕ್ ದೇವ್ ತಾಚೆ ಸಾಂಗಾತಾ ಆಸ್ಲೊ" (ಧ. ಕೃ. 10:38). ನಜರೆತ್ಚೊ ಜೆಜು ಆಪ್ಲಿ ಪರ್ಗಟ್ ಜಿಣಿ ಪವಿತ್ರ್ ಅತ್ಮ್ಯಾನ್ ಭರೊನ್ ಆರಂಭ್ ಕರ್ತಾ. "ಸೊಮಿಯಾಚೊ ಅತ್ಮೊ ಮ್ಹಜೆರ್ ಆಸಾ, ಕಿತ್ಯಾಕ್ ತಾಣೆ ಮ್ಹಾಕಾ ದುರ್ಬಳ್ಯಾಂಕ್ ಬರಿ ಖಬರ್ ಪರ್ಗಟ್ ಕರುಂಕ್ ಅಭಿಷೇಕ್ ಕೆಲಾ..."(ಲೂಕ್. 4:18). ಜೆಜು ಪವಿತ್ರ್ ಅತ್ಮ್ಯಾಚ್ಯಾ ಪ್ರೇರಣಾಖಾಲ್ ಜಿಯೆಲೊ. ಜೆಜುಚೆಂ ವ್ಯಕ್ತಿತ್ವ್ ಸಮ್ಜೊನ್ ಘೆಂವ್ಕ್ ಆನಿ ತಾಚೆಂ ಪುನರ್ಜಿವಂತ್ಪಣ್ ಅನ್ಬೋಗ್ ಕರುಂಕ್ ಆಮ್ಕಾಂ ಪವಿತ್ರ್ ಅತ್ಮ್ಯಾಚಿ ಗರ್ಜ್ ಆಸಾ. ದೆಕುನ್ ಜೆಜು ಮ್ಹಣ್ತಾ: "ಸತಾಚೊ ತೊ ಪವಿತ್ರ್ ಅತ್ಮೊ ತುಮ್ಚೆ ಥಂಯ್ ಆಯಿಲ್ಲ್ಯಾ ವೆಳಾ, ತೊ ತುಮ್ಕಾಂ ಸಂಪೂರ್ಣ್ ಸತಾಕ್ ವರ್ನ್ ಪಾಯ್ತಾಲೊ" (ಜು. 16:13). ಜೆಜುನ್ ಆಪ್ಲ್ಯಾ ಶಿಸಾಂಕ್ ದೆವಾಚ್ಯಾ ರಾಜಾಚಿ ಬರಿ ಖಬರ್ ಸಗ್ಳ್ಯಾ ಸಂಸಾರಾಕ್ ಪರ್ಗಟುಂಕ್ ಆಜ್ಞಾ ದಿಲಿ. ಪುಣ್ ಹೆಂ ಕಾಮ್ ಸುರು ಕರ್ಚ್ಯಾ ಪಯ್ಲೆಂ ಅತ್ಮ್ಯಾಚೊ ಅಭಿಷೇಕ್ ಘೆಂವ್ಕ್ ಕಠೀಣ್ ತಾಕಿದ್ ದಿಲಿ. "ಆನಿ ಆಬ್ಳೆ ಮ್ಹಜ್ಯಾ ಬಾಪಾಚಿ ಭಾಸಾವ್ಣಿ ಜಾವ್ನಾಸ್ಚೊ ಅತ್ಮೊ ತುಮ್ಚೆರ್ ಧಾಡ್ತಲೊ. ದೆಕುನ್ ತ್ಯಾ ಸರ್ಗಿ೦ಚ್ಯಾ ಸಕ್ತೆನ್ ಅಭಿಷಿಕ್ತ್ ಜಾಯ್ಸರ್ ತುಮಿ ಹ್ಯಾ ಶಹರಾಂತ್ಚ್ ರಾವಾಜಾಯ್" (ಲೂಕ್. 24:49).
ಆಮಿ ಎಕಾ ಮಿಸಾಂವ್ ಹಳ್ಳೆಂತ್ ಥೊಡ್ಯಾ ದಿಸಾಂ ಖಾತಿರ್ ರಾವ್ಲ್ಲ್ಯಾಂವ್. ಎಕಾ ರಾತಿಂ ವೀಜ್ ಸಕತ್ ನಾತ್ಲೆಲೆವರ್ವಿ೦ ಕಾಳೊಕಾಂತ್ ಸಾಸ್ಪಜಾಯ್ ಪಡ್ಲೆಂ. ಆಮ್ಚೆಲಾಗಿಂ ಚಾರ್ಜರ್ ಲಾಯ್ಟ್ ಆಸ್ಲ್ಲೊ. ಮ್ಹಜ್ಯಾ ಸಾಂಗಾತಿ ಪಾದ್ರ್ಯಾಬಾಕ್ ತೊ ಟಾರ್ಚ್ ವಾಪಾರುಂಕ್ ಸಾಂಗ್ಲೆಂ. ತೊ ಮ್ಹಣಾಲೊ: "ತ್ಯಾ ಟಾರ್ಚಾಚೊ ಬಲ್ಬ್ ಜಳ್ಳಾ". ಪುಣ್ ತ್ಯಾ ಟಾರ್ಚಾ ಭಿತರ್ ಚಡ್ತಿಕ್ ಬಲ್ಬ್ ಆಸ್ತಾ ತೆಂ ಹಾಂವ್ ಜಾಣಾಸ್ಲೊಂ. ದೆಕುನ್ ಹಾಂವೆಂ ಮ್ಹಳೆಂ: ತ್ಯಾ ಟಾರ್ಚಾ ಭಿತರ್ ಚಡ್ತಿಕ್ ಬಲ್ಬ್ ಆಸಾ. ಪರ್ನೊ ಬಲ್ಬ್ ಕಾಡ್ನ್ ನವೊ ಘಾಲ್ ಆನಿ ಆಮ್ಕಾಂ ಜಾಯ್ ಪುರ್ತೊ ಉಜ್ವಾಡ್ ಲಾಬ್ತಲೊ. ಹಾಂವೆಂ ತೊ ಟಾರ್ಚ್ ಮ್ಹಜ್ಯಾ ಹಾತಿಂ ಘೆವ್ನ್ ಬಲ್ಬ್ ಬದ್ಲಿಲೊ ಆನಿ ತೆದ್ನಾಂ ತ್ಯಾ ಟಾರ್ಚಾಥಾವ್ನ್ ಪರ್ಜಳಿಕ್ ಉಜ್ವಾಡ್ ಫಾಂಕ್ಲೊ. ತ್ಯಾ ಟಾರ್ಚಾಂತ್ ಚಾರ್ಜ್ ಕೆಲ್ಲಿ ಬ್ಯಾಟ್ರಿ ಆನಿ ಬರೊ ಬಲ್ಬ್ ಆಸೊನ್ಯೀ ಆಮಿ ಕಾಳೊಕಾಂತ್ ಆಸ್ಲ್ಯಾಂವ್.
ದೆವಾಚ್ಯಾ ಸುರ್ಪಾಯೆನ್ ರಚ್ಲೆಲೆ ಆಮಿ, ತಾಚಾ ಜೀವಾಚಾ ಶ್ವಾಸಾನ್ ಜಿವೆ ಆಸ್ಚೆ ಆಮಿ ಅತ್ಮಿಕ್ ಕಾಳೊಕಾಂತ್ ಸಾಸ್ಪತಾಂವ್. ಬಾಪಾನ್ ದಿಲ್ಲ್ಯಾ ಅತ್ಮ್ಯಾಚಿ ವಳಕ್ ಆಮ್ಕಾಂ ನಾ. "ಲ್ಹಾನಾ ಭುರ್ಗ್ಯಾ೦ನೊ, ತುಮಿಂ ದೆವಾಚಿಂ ಆನಿ ಕಪಟಿ ಪ್ರವಾದ್ಯಾಂಚೆರ್ ಜಯ್ತ್ ವ್ಹೆಲ್ಲಿಂ; ಕಿತ್ಯಾಕ್ ತುಮ್ಚೆ ಥಂಯ್ ಆಸಾ ತೊ ಅತ್ಮೊ ಸಂಸಾರಾಂತ್ಲ್ಯಾ ಅತ್ಮ್ಯಾ ಪ್ರಾಸ್ ಚಡ್ ಬಳಾಧಿಕ್" (1 ಜು. 4:4). ತುಮ್ಚೆ ಥಂಯ್ ಆಸ್ಚಾ ಹ್ಯಾ ಪವಿತ್ರ್ ಅತ್ಮ್ಯಾಚಿ ಸಕತ್, ದೆಣಿಂ ಆನಿ ಫಳಾಂ ಗಳ್ಸುನ್ ಮಹಿಮೆನ್ ಜಿಯೆಯಾ.
ಆಮಿ ಕ್ರಿಸ್ತಾಚೆಂ ಪುನರ್ಜಿವಂತ್ಪಣ್ ಆನ್ಬೋಗ್ ಕರಿನಾಂವ್ ತರ್ ಹಾಕಾ ಕಾರಣ್ ಪವಿತ್ರ್ ಅತ್ಮ್ಯಾ ಥಂಯ್ ಆಮಿ ಜಿಯೆನಾಂವ್. ಜೆಜುನ್ ತಾಕಾ ಜಾಪ್ ದಿಲಿ: "ಸತ್ಚ್ ಹಾಂವ್ ತುಕಾ ಸಾಂಗ್ತಾಂ, ಪರ್ತುನ್ ಜಲ್ಮಾಲ್ಲ್ಯಾ ಖರಿತ್ ಕೊಣ್ಚ್ ದೆವಾಚ್ಯಾ ರಾಜಾಂತ್ ರಿಗೊಂಕ್ ಸಕ್ಚೆನಾಂತ್" (ಜು. 3:3). ಪವಿತ್ರ್ ಅತ್ಮ್ಯಾಥಂಯ್ ನವ್ಯಾನ್ ಜಲ್ಮೊಂಚೆಂ ಹರ್ಯೆಕ್ ಕ್ರಿಸ್ತಾಂವಾಕ್ ಗರ್ಜೆಚೆಂ ಆನಿ ಮಹತ್ವಾಚೆಂ.
ಶ್ರೀಮಾನ್ ಡೇನಿಯಲ್ ಬ್ರಗಾಂಜಾ ಬೊಂಬಯ್ಚೊ ಭಾವ್. ಕ್ರಿಸ್ತಾಂವ್ ಭಾವಾಡ್ತಾಂತ್ ಲ್ಹಾನ್ ವ್ಹಡ್ ಜಾಲ್ಲೊ. ಕಾಜಾರ್ ಜಾವ್ನ್ ದೊಗಾಂ ಇಸ್ಕೊಲಾಕ್ ವೆಚಿಂ ಭುರ್ಗಿ೦ ಆಸಾತ್. ಹರ್ಯೆಕಾ ಆಯ್ತಾರಾ ಮಿಸಾಕ್ ವಚೊನ್ ಕುಮ್ಗಾರ್ ಸೆವ್ತಾಲೊ. ಜಿವಿತಾಂತ್ ಅಚಾನಕ್ ಮ್ಹಳ್ಳೆಪರಿಂ ಪವಿತ್ರ್ ಅತ್ಮ್ಯಾಚಿ ರೆತಿರ್ ಕರುಂಕ್ ಗೆಲೊ. ಥಂಯ್ಸರ್ ಸಂಪೂರ್ಣ್ ಸತಾಕ್ ಆಪ್ಣಾಕ್ ವರ್ನ್ ಪಾವಯ್ ಮ್ಹಣ್ ಪವಿತ್ರ್ ಅತ್ಮ್ಯಾ ಲಾಗಿಂ ತಾಣೆ ಮಾಗ್ಲೆಂ. ತಾಕಾ ಪವಿತ್ರ್ ಅತ್ಮ್ಯಾಚೊ ಅಭಿಷೇಕ್ ಜಾಲೊ. ನೀಜ್ ಕ್ರಿಸ್ತಾಂವ್ ಕೋಣ್ ತೆಂ ಪವಿತ್ರ್ ಅತ್ಮ್ಯಾನ್ ತಾಕಾ ಸಮ್ಜಾಯ್ಲೆಂ. ಅತ್ಮ್ಯಾನ್ ತಾಕಾ ತಾಚಿ ವಾಯ್ಟ್ ಜಿಣಿ ದರ್ಶನಾಂತ್ ದಾಕವ್ನ್ ದಿಲಿ. ಅತ್ಮ್ಯಾ ವಿರೋಧ್ ಜಾವ್ನ್ ಹಣೆ-ಬರಾಪ್ ಪಳೆಂವ್ಚೆಂ, ಜಾತಕ್ ಪಳೆಂವ್ಚೆಂ. ನಕ್ಷತ್ರಾಂ ಥಾವ್ನ್ ಭವಿಷ್ಯ್ ವಾಚ್ಚೆಂ, ಮಾಟ್-ಮಂತ್ರಾಂ, ಬೊಂಬ್ಯಾ ಪುಜಾ ಆನಿ ನಾಗ್ಡೆಪಣ್ ಆಶೆಂವ್ಚೆಂ - ಹೆಂ ಸಗ್ಳೆಂ ತಾಕಾ ಉಗ್ಡಾಫೆಂ ಜಾಲೆಂ. ಅತ್ಮ್ಯಾಚ್ಯಾ ಸಕ್ತೆನ್ ಸಕ್ಕಡ್ ವಾಯ್ಟಾಚೆ ತಾಣೆ ಜಯ್ತ್ ವೆಲ್ಲೆಂ. ಆತಾಂ ತೊ ಥೊಡ್ಯಾ ತರ್ನಾಟ್ಯಾಂಕ್ ಸಾಂಗಾತಾ ಕರುನ್ ಹೆರಾಂಕ್ಯೀ ಅತ್ಮ್ಯಾಚ್ಯಾ ಜಿವಿತಾಕ್ ಮಾರ್ಗದರ್ಶನ್ ದಿತಾ. ಡೇನಿಯಲ್ ಆತಾಂ ಏಕ್ ನವಿ ಸೃಷ್ಟಿ!
1. ನವಿ ಸೃಷ್ಟಿ: "ಸುರ್ವೆರ್ ದೆವಾನ್ ಆಕಾಸ್ ಆನಿ ಪ್ರಥ್ವಿ ರಚ್ಲಿ ತೆದ್ನಾಂ, ಪ್ರಥ್ವಿ ನಿರಾಕಾರ್ ಆನಿ ರಿತಿ ಆಸ್ಲಿ ಆನಿ ಆದಿಸಾಗೊರಾಚೆರ್ ಆಂಧ್ಕಾರ್ ಭರೊನ್ ಆಸ್ಲೊ. ಪುಣ್ ದೈವಿಕ್ ವಾರೆಂ ಉದ್ಕಾಚೆರ್ ವಾಳೊನ್ ಆಸ್ಲೆಂ" (ಉತ್ಪತ್ತಿ. 1:1-2). ಮ್ಹಜ್ಯಾ ಮಾಗ್ಣ್ಯಾಚ್ಯಾ ಜಿವಿತಾಂತ್ ಹಜಾರಾಂನಿ ಆನಿ ಲಾಕಾಂನಿ ಲೊಕಾಚೆ ಕಶ್ಟ್, ಬಾಂದ್ಪಾಸ್ ಆನಿ ದೂಕ್ ಹಾಂವೆಂ ಪಳೆಲಾಂ. ತಾಂಕಾಂ ಆಸಾತ್ ಅತ್ಮಿಕ್, ದೈಹಿಕ್ ಆನಿ ಮಾನಸಿಕ್ ಕಷ್ಟ್. ಜಾಯ್ತೆ ಜಣ್ ಜಿವಿತಾಚೆಂ ವೊಜೆಂ ಸೊಸುಂಕ್ ಜಾಯ್ನಾಸ್ತಾಂ ದೆದೆಸ್ಪರ್ ಆನಿ ಕಂಗಾಲ್ ಜಾತಾತ್. ತಾಂಚೆಂ ಜಿವಿತ್ ಸೃಷ್ಟೆಚ್ಯಾ ಆದಿಂ ಆಸ್ಲೆಲ್ಯಾ ಪ್ರಥ್ವೆಕ್ ಸರಿ ಕರ್ಯೆತ್ - ರಿತೆಂಪಣ್, ನಿರಾಕರ್ಪಣ್ ಆನಿ ಆಂಧ್ಕಾರ್. ದೈವಿಕ್ ವಾರೆಂ ಮ್ಹಣ್ಜೆ ದೆವಾಚೊ ಅತ್ಮೊ ದೆವಾಚ್ಯಾ ಉತ್ರಾಕ್ ಉಪ್ಜಯ್ತಾ ಆನಿ ಸೃಷ್ಟೆಚೊ ಆರಂಬ್ ಜಾತಾ. ಸಕ್ಕಡ್ ಸಂಗ್ತಿ ದೆವಾಚ್ಯಾ ಯೆವ್ಜಣೆಖಾಲ್ ಆಸಾ ಜಾಲ್ಲ್ಯೊ ದೆವಾಕ್ ಬರ್ಯೊ ದಿಸ್ಲ್ಯೊ (ಉತ್ಪತ್ತಿ. 1:31). ದೆವಾಚ್ಯಾ ಅತ್ಮ್ಯಾಕ್ ತುಜೆಥಂಯ್ ವಾವ್ರುಂಕ್ ಸೊಡ್ ಆನಿ ತುಂ ಏಕ್ ನವಿ ಸೃಷ್ಟಿ ಜಾತಾಯ್, ಅತ್ಮಿಕ್ ಸೊಭಾಯೆನ್ ಆನಿ ಪರ್ಜಳಾನ್ ಪ್ರಕಾಸ್ತಾಯ್.
ಶ್ರೀಮತಿ ಸೆಲಿನ್ ಸುವಾರಿಸ್ ಫಾಪ್ಸಾಲ್ಲೆಂ ಕಾಳಿಜ್ ಜಾವ್ನಾಸ್ಲ್ಲಿ. ತಿಚಿ ವ್ಹಡ್ಲಿ ಧುವ್ ಎಕಾ ಮುಸ್ಲಿಂ ಕಾಜಾರಿ ದಾದ್ಲ್ಯಾಸವೆಂ ಘರ್ ಸೊಡ್ನ್ ಗೆಲ್ಲಿ. ತಿಚೊ ಎಕ್ಲೊಚ್ ಪೂತ್ ಗಾಂವ್ಚ್ಯಾ ಪೋಲಿ ಆನಿ ವಾಯ್ಟ್ ತರ್ನಾಟ್ಯಾಸಂಗಿಂ ಮೆಳೊನ್ ವಾಯ್ಟ್ ಸವಯಾಂಕ್ ಬಲಿ ಜಾಲ್ಲೊ. ತಿಚೊ ಪತಿ ನಾಕ್ಭರ್ ಪಿಯೊನ್ ಸಗ್ಳಿ ರಾತ್ ತಿಕಾ ಆನಿ ಸೆಜಾರ್ಚ್ಯಾ೦ಕ್ ಗಾಳಿ ಆನಿ ಶಿರಾಪ್ ದಿತಾಲೊ. ಸೆಲಿನಾಚಿ ತಕ್ಲಿ ಅಸ್ಕತ್ ಜಾಲ್ಲಿ. ಗಾಂವಾರ್ ತಿಕಾ ಪಿಶಿ ಮ್ಹಣ್ ಸಾಂಗ್ತಾಲಿಂ. ತಿಚ್ಯಾ ಭಯ್ಣಿನ್ ತಿಕಾ ರೆತಿರೆಕ್ ಆಪವ್ನ್ ಹಾಡ್ಲೆಂ. ಪವಿತ್ರ್ ಅತ್ಮ್ಯಾಚಿ ಭುಜಾವಣ್ ತಿಕಾ ಮೆಳ್ಳಿ. 'ಧಾಡ್ ತುಜ್ಯಾ ಸ್ಪಿರಿತಾಕ್ ಏ ಸೊಮ್ಯಾ ಆನಿ ದೆಸ್ವಾಟ್ಲೆಲೆಂ ಮ್ಹಜೆಂ ಕುಟಾಮ್ ತುಂ ನವ್ಯಾನ್ ಕರ್' ಮ್ಹಣ್ ತಿಣೆ ಮಾಗೊಂಕ್ ಸುರು ಕೆಲೆಂ. ದಿಂಬಿಯೆರ್ ಪಡೊನ್ ತಿ ಮಾಗಾಲಾಗ್ಲಿ. ವೆಗಿಂಚ್ ತಿಚ್ಯಾ ಪುತಾನ್ ಜಿಣಿ ಬದ್ಲುನ್ ರೆತಿರ್ ಕೆಲಿ. ತಿಚ್ಯಾ ಧುವೆಕ್ ಮತಿಚೊ ಉಜ್ವಾಡ್ ಮೆಳ್ಳೊ. ವಾಯ್ಟ್ ಜಿಣ್ಯೆಕ್ ಪಾಟ್ ಕರುನ್ ತೆಂ ಕುವೇಯ್ಟ್ ಗೆಲೆಂ. ಥಂಯ್ಸರ್ ಕಾಮ್ ಕರ್ನ್ ಗಾಂವಾಕ್ ಪಯ್ಶೆ ಧಾಡುಂಕ್ ಸುರು ಕೆಲೆ. ಉಪ್ರಾಂತ್ ಪೂತ್ ಇಸ್ರಾಯೆಲ್ ಕಾಮಾಕ್ ಗೆಲೊ. ಆತಾಂ ನವೆಂ ಘರ್ ಬಾಂದುನ್ ಆಸಾತ್. ತಿಚ್ಯಾ ಪತಿನ್ ಸೊರೊ ಸೊಡ್ಲೊ ಆನಿ ರೆತಿರ್ ಕೆಲಿ. ಆತಾಂ ಸೆಲಿನಾಚೆಂ ಘರಾಣೆ ನವೆಂ ಜಾಲಾಂ! ಪವಿತ್ರ್ ಅತ್ಮ್ಯಾಚೆಂ ಕಾಮ್ ತೆಂ!
2. ನವೊ ಸಂಬಂಧ್: "ತೆದ್ನಾಂ ಸೊಮ್ಯಾ ದೆವಾನ್ ಧರ್ಣಿಚಿ ಮಾತಿ ಘೆತ್ಲಿ ಆನಿ ಮನ್ಶಾಚೊ ಆಕಾರ್ ಕೆಲೊ ಆನಿ ತಾಚ್ಯಾ ನಾಕಾಚ್ಯಾ ಫುಡಾಂನಿ ಆಪ್ಲ್ಯಾ ಜಿವಾಚೊ ಶ್ವಾಸ್ ಫುಂಕ್ಲೊ; ಆನಿ ಮನಿಸ್ ಏಕ್ ಜಿವೊ ಪ್ರಾಣಿ ಜಾಲೊ" (ಉತ್ಪತ್ತಿ. 2:7). ಸರ್ವೆಸ್ಪರ್ ದೆವಾನ್ ಸಗ್ಳಿ ಸೃಷ್ಟಿ ಪವಿತ್ರ್ ಅತ್ಮ್ಯಾಚ್ಯಾ ಸಕ್ತೆನ್ ರಚ್ಲಿ. ತೊ ಉಲಯ್ಲೊ ಆನಿ ತ್ಯೊ ಸರ್ವ್ ವಸ್ತು ಅಸ್ತಿತ್ವಾಕ್ ಆಯ್ಲ್ಯೊ. ಪುಣ್ ಮನ್ಶಾಕ್ ರಚ್ತಾನಾ ಏಕ್ ವರ್ತಿ ಬದ್ಲಾವಣ್ ಪಳೆತಾಂವ್. ದೇವ್ ಆಪ್ಲ್ಯಾ ಹಾತಾಂನಿ ಧರ್ಣಿಚ್ಯಾ ಮಾತ್ಯೆಕ್ ಏಕ್ ಆಕಾರ್ ದಿತಾ. ಮ್ಹಣ್ಜೆ ಮನ್ಶಾಚ್ಯಾ ಹರ್ಯೆಕ್ ಜಿವಾಚ್ಯಾ ವಿಶ್ವ್ಯಾಂಕ್ ದೇವ್ ಮೊಗಾಚೊ ಸ್ಪರ್ಶ್ ದಿತಾ. ಮನ್ಶಾಚ್ಯಾ ಕುಡಿಚೆ ಭಾಗ್ ಸೊಭಿತ್ ಮಾತ್ರ್ ನ್ಹಯ್, ಅತ್ಮ್ಯಾನ್ ಪ್ರೇರಿತ್ ಜಾವ್ನಾಸಾತ್. "ಆಮಿ ಅತ್ಮ್ಯಾಚ್ಯಾ ಪ್ರೇರಣಾನ್ ಜಿಯೆತೆಲಿಂ, ಅತ್ಮ್ಯಾಚ್ಯಾ ಮಾರ್ಗದರ್ಶನಾಖಾಲ್ ಜಿಯೆತಾತ್" (ಗಾಲಾತ್. 5:25). ಆಮಿ ಶ್ವಾಸ್ ಘೆತಾನಾ ಆನಿ ಸೊಡ್ತಾನಾ ಆಮಿ ಸೊಮ್ಯಾಚಿಂ ಜಾವ್ನಾಸಾಂವ್. ತಾಣೆ ಆಮ್ಚೊ ಮೋಗ್ ಕೆಲಾ ಆನಿ ಮೊಗಾಂತ್ ತಾಣೆ ಆಮ್ಕಾಂ ರಚ್ಲಾಂ ಮ್ಹಣ್ ಸಮ್ಜಾತಾಂವ್.
3. ಸುರಕ್ಷೆತೆಚಿ ವೇಂಗ್: "ದೆವಾಚೊ ದೂತ್ ಇಸ್ರಾಯೆಲ್ ಫವ್ಜೆಚ್ಯಾ ಮುಕ್ಲ್ಯಾನ್ ವೆಚೊ ತೊ ಘುಂವೊನ್ ಪಾಟ್ಲ್ಯಾನ್ ಯೇವ್ನ್ ರಾವ್ಲೊ ಆನಿ ಉಜ್ಯಾಚೆಂ ಕೂಪ್ ಮುಕ್ಲ್ಯಾನ್ ಥಾವ್ನ್ ಪಾಟ್ಲ್ಯಾನ್ ಯೇವ್ನ್ ರಾವ್ಲೆಂ. ಆಶೆಂ ತೆಂ ಈಜಿಪ್ತಾಚೆ ಫವ್ಜೆ ಆನಿ ಇಸ್ರಾಯೆಲ್ ಫವ್ಜೆ ಮದ್ಗಾತ್ ರಾವ್ಲೆಂ. ಆನಿ ದೆಕುನ್ ಉಜ್ಯಾಚೆಂ ಕೂಪ್ ಕಾಳೊಕಾಂತ್ ತಾಂಚೆ ಸಾಂಗಾತಾ ಆಸ್ಲೆಂ ಆನಿ ರಾತ್ ಉಜ್ವಾಡಾಯ್ಲಿ. ಕೊಣ್ಚ್ ರಾತಿಕ್ ಎಕಾಮೆಕಾ ಥಂಯ್ ವಚೊಂಕ್ ಸಕನಾತ್ಲಿಂ" (ನಿರ್ಗಮನ್. 14:19-20). ಪವಿತ್ರ್ ಅತ್ಮೊ ಕುಪಾಚೆಂ ಆನಿ ಉಜ್ಯಾಚ್ಯಾ ಕಾಂಬ್ಯಾಚೆಂ ರೂಪ್ ಘೆತಾ ಆನಿ ಇಸ್ರಾಯೆಲಾಕ್ ರಾಕ್ತಾ. ಪವಿತ್ರ್ ಅತ್ಮೊ ದೆವಾಚ್ಯಾ ಭುರ್ಗ್ಯಾಂಕ್ ರಾಕ್ಚೆ ಖಾತಿರ್ ವಿವಿಧ್ ರೂಪ್ ಘೆತಾ.
ಎಕಾ ಕುಟ್ಮಾಕ್ ಸೆಜಾರ್ಚ್ಯಾಂ ಥಾವ್ನ್ ನಿರಂತರ್ ಕಶ್ಟ್ ಆಸ್ಲೆ. ತಿಂ ಸೆಜಾರ್ಚಿ೦ ಮಾಟ್-ಮಂತ್ರಾಂ ಆನಿ ಬೊಂಬ್ಯಾ ಪುಜಾ ಕರ್ನ್ ಉಪದ್ರ್ ದಿತಾಲಿಂ. ಪುಣ್ ಹೆಂ ದೆವೊತ್ ಕುಟಮ್ ಎಕಾ ನಿಜಾ ದೆವಾಕ್ ಮಾತ್ರ್ ಪಾತ್ಯೆತಾಲೆಂ. ಪವಿತ್ರ್ ಪುಸ್ತಕ್ ವಾಚ್ತಾನಾ ತಾಂಕಾಂ ಮೆಳ್ಳೆಂ ದೆವಾಚೆಂ ಉತರ್, ಜಕಾರಿಯಾ 2:9: "ಹಾಂವ್ ತಾಂಚೆ ಭಂವ್ತಿಂ ಉಜ್ಯಾಚೊ ಪಾಗೊರ್ ಆಸಾ ಕರ್ತಲೊಂ ಮ್ಹಣ್ತಾ ಸರ್ವೆಸ್ಪರ್ ದೇವ್ ಆನಿ ತಾಚೆ ಮಧೆಂ ಆಸ್ತೆಲಿ ಮ್ಹಜಿ ಮಹಿಮಾ". ಹ್ಯಾ ಉತ್ರಾಂ ಪರ್ಮಾಣೆ ತಾಂಣಿ ಮಾಗೊಂಕ್ ಸುರು ಕೆಲೆಂ. ಪವಿತ್ರ್ ಅತ್ಮ್ಯಾಚೊ ಉಜ್ಯಾಚೊ ಪಾಗೊರ್ ತಾಂಕಾಂ ಸಂರಕ್ಷಣ್ ದೀಂವ್ಕ್ ಲಾಗ್ಲೊ. ಸೆಜಾರ್ಚ್ಯಾ೦ನಿ ಕೆಲ್ಲೆಂ ವಾಯ್ಟ್ ತಾಂಕಾಂಚ್ ಪಾಟಿಂ ಭೆಜ್ಲೆಂ. ಹಿಂ ಸುರಕ್ಷಿತ್ ಆಸ್ಲಿಂ.
ಅಧಿಕ್ ಮೊಗಾಚ್ಯಾಂನೊ, ತುಮಿ ಪವಿತ್ರ್ ಅತ್ಮ್ಯಾ ಥಂಯ್ ಜಿಯೆತಾನಾ, ತುಮಿ ಜಯ್ತೆವಂತ್ ಜಾವ್ನಾಸಾತ್. ಮೇ ಮಹಿನಾಚ್ಯಾ ಅಕ್ರೇಚ್ಯಾ ದಿಸಾ ಪೆಂತೆಕೊಸ್ತಾಚೆಂ ಫೆಸ್ತ್. ಪೆಂತೆಕೊಸ್ತಾಂತ್ ಪವಿತ್ರ್ ಸಭಾ ಆರಂಭ್ ಜಾಲ್ಲಿ, ತುಕಾ ಪೆಂತೆಕೊಸ್ತಾಚೊ ಆನ್ಬೊಗ್ ಮೆಳ್ಚೆಖಾತಿರ್ ಮಾಗ್. ಪವಿತ್ರ್ ಅತ್ಮೊ ತುಕಾ ಆನಿ ತುಜ್ಯಾ ಮೊಗಾಚ್ಯಾಂಕ್ ಏಕ್ ನವಿ ರಚ್ನಾ ಕರುಂದಿ, ಸದಾಂಚ್ ದೆವಾಚ್ಯಾ ಎಕ್ವಟಾಂತ್ ದವ್ರುಂದಿ ಆನಿ ಉಜ್ಯಾಚ್ಯಾ ಪಾಗೊರಾಮಧೆಂ ಸುರಕ್ಷಿತ್ ಸಾಂಬಾಳುಂದಿ ಮ್ಹಣ್ ಮಾಗ್ತಾಂ, ಆಮೆನ್! ಭಾಗಿ ಪೆಂತೆಕೊಸ್ತಾಚೆಂ ಫೆಸ್ತ್ ತುಕಾ!
- ಫಾ| ಅಬು, ಎಸ್.ವಿ.ಡಿ