"ಪೂಣ್ ಆಪ್ಲ್ಯಾ ಖೊಟೆಪಣಾವರ್ವಿಂ ಸತ್ ಪರ್ಗಟ್ ಜಾಯ್ನಾತ್ಲ್ಲೆಬರಿ ಅಡ್ವಾರ್ತಲ್ಯಾ ದೇವ್ಭಿರಾಂತ್ ನಾತ್ಲ್ಲ್ಯಾ ಮನ್ಶಾಂಚ್ಯಾ ಸರ್ವ್ ಖೊಟೆಪಣಾಚೆರ್ ದೆವಾಚೊ ಕ್ರೋಧ್ ಸರ್ಗಿಂ ಥಾವ್ನ್ ದೆಂವೊನ್ ಆಯ್ಲ್ಲಲೊ ಆತಾಂ ದಿಸೊನ್ ಯೆತಾ" (ರೊಮಾ. 1:18). ಹಾಚ್ಯಾ ಪಯ್ಲೆಂಚ್ಯಾ ವೊಳಿಂನಿ ಸಾಂ. ಪಾವ್ಲ್ ಭಾವಾಡ್ತ್ ಆನಿ ಭರ್ವಶ್ಯಾ ಮುಕಾಂತ್ರ್ ದೆವಾಲಾಗಿಂ ಸಂಬಂಧ್ ದವರ್ಚ್ಯಾ ವಿಶ್ಯಾಂತ್ ಬರಯ್ತಾ. ಹಾಕಾ ಸರಿ ವಿರೋಧ್ ಜಾವ್ನ್ ಮನಿಸ್ ಆಪ್ಲ್ಯಾಚ್, ಯೋಜನಾಂ ಆನಿ ಆಲೋಚನ್ಯಾಂ ವರ್ವಿಂ ಅನ್ಯಾ ದೆವಾಕ್ ಆರಾಧನ್ ಕೆಲ್ಯಾರ್ ದೆವಾಚ್ಯಾ ಕ್ರೋಧಾಕ್ ಬಲಿ ಜಾತಾತ್ ಮ್ಹಣ್ ಸಾಂಗ್ತಾ. ಅಶೆಂ ತಾಣೆಂ ಬರಯ್ತಾನಾ ಸಾಂ. ಪಾವ್ಲಾಚೆ ಮತಿಂತ್ ಕಿತೆಂ ಆಸ್ಲ್ಲೆಂ? ಮನ್ಶಾಚ್ಯಾ ಪಾತ್ಕಾಕ್ ಆನಿ ವಾಯ್ಟಾಕ್ ಪ್ರತಿಕ್ರಿಯಾ ಜಾವ್ನ್ ಪರ್ನ್ಯಾ ಸೊಲ್ಲ್ಯಾಂತ್ ಆಮ್ಕಾಂ ವಾಚುಂಕ್ ಮೆಳ್ಚ್ಯಾ ಉತ್ರಾಂಚ್ಯಾ ಆಧಾರಾರ್ ತೊ ಬರಯ್ತಾ. ದೃಶ್ಟಾತಾಕ್ -"ಪಳೆಯಾ, ಸರ್ವೆಸ್ಪರಾಚೆಂ ನಾಂವ್ ಪಯ್ಸ್ ಥಾವ್ನ್ ಯೆತಾ; ತಾಚೊ ಕ್ರೋಧ್ ಜಳ್ತಾ, ಕಡಕ್ ತಾಚಿ ಧಮ್ಕಿ. ತಾಚೆ ವೋಂಟ್ ರಾಗಾನ್ ಭರ್ಲ್ಯಾಂತ್, ತಾಚಿ ಜೀಬ್ ಗ್ರಾಶಿತಲ್ಯಾ ಉಜ್ಯಾ ಸಾರ್ಕಿ, ತಾಚೊ ಸ್ವಾಸ್ ಗಳ್ಯಾಕಡೆ ಪರ್ಯಾಂತ್ ಯೆತಾ ತ್ಯಾ ಅವ್ರಾನ್ ಭರ್ಲಲೆ ನ್ಹಂಯ್ ಸಾರ್ಕೊ; ತೊ ರಾಷ್ಟ್ರಾಂಕ್ ನಾಸಾಚೆ ಚಾಳ್ಣಿಂತ್ ಚಾಳ್ತಲೊ. ತಾಂಚ್ಯಾ ತೊಂಡಾಕ್ ವಾಟ್ ಚುಕೊಂವ್ಚಿ ಲಗಾಮ್ ಘಾಲ್ತಲೊ" (ಇಸಾ. 30:27-28). ಹೆಂ ಇಸ್ರಾಯೆಲ್ ಪರ್ಜೆನ್ ದೆವಾಲಾಗಿಂ ಕೆಲ್ಲೊ ಸೊಲ್ಲೊ ಮೊಡ್ಲ್ಲ್ಯಾ ವೆಳಾರ್ ದೆವಾಚಿ ಪ್ರತಿಕ್ರಿಯಾ ವರ್ಣನ್ ಕರ್ಚಿ ಏಕಾ ರೀತ್ ಜಾವ್ನಾಸಾ. ಎಜೆಕಿಯೆಲ್ ಪ್ರವಾದಿಚ್ಯಾ ಗ್ರಂಥಾಂತ್ ಅಶೆಂ ವಾಚುಂಕ್ ಮೆಳ್ತಾ - "ಅಶೆಂ ಮ್ಹಜೊ ಕ್ರೋಧ್ ಶಾಂತ್ ಜಾತಲೊ ಆನಿ ತಾಂಚೆರ್ ಹಾಂವೆಂ ಮ್ಹಜೊ ರಾಗ್ ಕಾಡುನ್ ಹಾಂವ್ ಮ್ಹಾಕಾಚ್ ಸಮಾಧಾನ್ ಕರ್ತಲೊಂ; ತಾಂಚೆರ್ ಹಾಂವೆಂ ಮ್ಹಜೊ ಕ್ರೋಧ್, ಒತ್ತಡ್, ಹಾಂವ್, ಸರ್ವೆಸ್ಪರ್, ಮೊಗಾಚ್ಯಾ ಆವೆಶಾನ್ ಭರೊನ್ ಉಲಯ್ಲಾಂ ಮ್ಹಣ್ ತಿಂ ಒಳ್ಕತೆಲಿಂ" (ಎಜೆ. 5:13). ಅನ್ಭಾವಾಡ್ತ್ಯಾಂನಿ ದೆವಾ ಥಂಯ್ ಪಾಟಿಂ ಯೇಂವ್ಕ್ ಜಾಯ್ ಮ್ಹಳ್ಳೊ ಸಂದೇಶ್ ದಿಂವ್ಚ್ಯಾ ಖಾತಿರ್ ಸಾಂಗ್ಚಿ ಏಕ್ ರೀತ್ ಹಿ.
ಪರ್ನ್ಯಾ ಸೊಲ್ಲ್ಯಾಂತ್ಲ್ಯಾ ಸುರ್ವಿಲ್ಲ್ಯಾ ಭಾಗಾಂತ್ ದೆವಾಚೊ ಕ್ರೋಧ್, ದೆವಾಲಾಗಿಂ ಖರಾರ್ ಕೆಲ್ಲೆ ಇಸ್ರಾಯೆಲ್ ಪರ್ಜೆಕ್ ಸಂಬಂಧ್ ಜಾಲ್ಲೊ ಜಾವ್ನಾಸಾ. ಇಸ್ರಾಯೆಲ್ ಪರ್ಜೆನ್ ದೆವಾಲಾಗಿಂ ವಿಶೇಸ್ ಆನಿ ಮಹತ್ವಾಚೊ ಸಂಬಂಧ್ ದವರ್ಲ್ಲೊ. ದೆವಾನ್ ತಾಂಕಾಂ ವಿಂಚುನ್ ಆಪ್ಣಾಲಾಗಿಂ ವಿಶೇಸ್ ಸಂಬಂಧ್ ಆಸಾ ಕರುಂಕ್ ಆವ್ಕಾಸ್ ಕರ್ನ್ ದಿಲ್ಲೊ. ಹೊ ಸಂಬಂಧ್ ತಾಣೆ ದೆವಾನ್ ದಿಲ್ಲೆ ಉಪಾದೆಸ್ ಪಾಳ್ಳ್ಯಾರ್ ಮಾತ್ರ್ ಉರ್ತಲೊ ಮ್ಹಣ್ ಸಾಂಗ್ಲ್ಲೆಂ ನಿರ್ಗಮನ್ ಗ್ರಂಥಾಂತ್ 24 ಅಧ್ಯಾಯ್ 3-8 ವೊಳ್ ವಾಚ್ಲ್ಯಾರ್ ಆಮ್ಕಾಂ ಸಮ್ಜಾತಾ. ತಶೆಂ ಮ್ಹಳ್ಯಾರ್ ಇಸ್ರಾಯೆಲ್ ಪರ್ಜೆನ್ ದೆವಾನ್ ದಿಲ್ಲೆ ಉಪಾದೆಸ್ ಪಾಳಿನಾತ್ಲ್ಯಾರ್ ದೆವಾಚೊ ಕ್ರೋಧ್ ಚಾಳ್ವಾಯಿಲ್ಲೆಬರಿ ಜಾತಾ. ಇಸ್ರಾಯೆಲ್ ಪರ್ಜೆನ್ ಬಾಲ್ ದೆವಾಕ್ ಆರಾಧನ್ ಕೆಲ್ಲ್ಯಾ ವೆಳಾರ್ ಪವಿತ್ರ್ ಪುಸ್ತಕ್ ಸಾಂಗ್ತಾ, "ಲೋಕ್ ಹೆ ಪರಿಂ ಪಯ್ಲೆಂಚ್ಯಾ ಬಾಲಾಚಿ ಪುಜಾ ಕೆಲಿ ದೆಕುನ್ ಸರ್ವೆಸ್ಪರಾಚೊ ರಾಗ್ ತಾಂಚೆ ವಿರೋಧ್ ಪೆಟ್ಲೊ" (ಗಣ. 25:3). ದೆವಾಚೊ ಕ್ರೋಧ್ ಆಮಿ ಸಾಂಗ್ಚ್ಯಾ ಮನ್ಶಾಂಚ್ಯಾ ಕ್ರೋಧಾಬರಿ ನಹಿಂ. ದಾಮುನ್ ದವರ್ಲ್ಲಿಂ ಭೊಗ್ಣಾಂ ಎಕ್ಚ್ ಪಾವ್ಟಿಂ ಹಿಂಸಾಚಾರಾಂತ್ ಭಾಯ್ರ್ ಘಾಲ್ನ್ ಪ್ರತಿಕ್ರಿಯಾ ದಾಕಂವ್ಚೆ ತಸಲೊ ಕ್ರೋಧ್ ನ್ಹಯ್, ದೆವಾಚೊ ಕ್ರೋಧ್ ರಾಜಾಂವಿಕ್. ಭೊಗ್ಣಾಂಚೊ ನ್ಹಯ್, ತೊ ನಿತಿವಂತ್ ಆನಿ ಪ್ರಾಮಾಣಿಕ್. ಅನೀತ್ ಕರ್ಚೊ ನ್ಹಯ್, ಹೊ ಕ್ರೋಧ್ ಪಾತ್ಕಾಕ್ ಆನಿ ವಾಯ್ಟಾಕ್ ವಿರೋಧ್ ಹೊ ಕ್ರೋಧ್ ಜೆಜುನ್ ದೆವಾಳ್ ಶುದ್ಧ್ ಕರ್ತಾನಾ ದಾಕಯಿಲ್ಲ್ಯಾ ಪ್ರತಿಕ್ರಿಯಾ ತಸಲೊ (ಜುವಾಂವ್. 2:13-16). ಹೊ ಕ್ರೋಧ್ ದೆವಾಚ್ಯಾ ರಾಜಾಖಾತಿರ್, ನಿತಿರೂಪಾರ್ ಮೊಗಾನ್ ಜಳ್ಚೊ ಜಾವ್ನಾಸಾ.
ಪ್ರೊಫೆತ್ ಸಂದೇಶ್ ದೀವ್ನ್೦ಚ್ ಆಯ್ಲ್ಯಾತ್ ಕೀ ಆಮಿ ದೆವಾಕ್ ವಿಧೇಯ್ ಜಾಯ್ನಾತ್ಲ್ಯಾಕ್ ದೆವಾಚೊ ಕ್ರೋಧ್ ಆಮ್ಕಾಂ ನಾಸ್ ಕರ್ತಲೊ. "ಪಳೆಯಾ ಸಗ್ಳೆ ಜೀವ್ ಮ್ಹಜೆ; ಬಾಪಯ್ಚೊ ಜೀವ್ ಆನಿ ಪುತಾಚೊ ಜೀವ್, ದೊನ್ಯೀ ಮ್ಹಜೆಚ್. ಜೊ ಪಾತಕ್ ಕರ್ತಾ ತೊ ಮರ್ತಲೊ" (ಎಜೆ. 18:4). ಪ್ರೊಫೆತಾಂನಿ ಸಾಂಗ್ಚ್ಯಾ ಸಂಸಾರಾಂತ್ ನಯ್ತಿಕ್ಪಣ್, ಧರ್ಮ್ನೀತ್ ಆಸಾ. ತೆಂ ದೆವಾನ್ ರಚ್ಲಾಂ. ಜರ್ತರ್ ಆಮಿ ಹೆಂ ಪಾಳಿನಾಂವ್ ಆಮಿ ಸಂಸಾರ್ ನಾಸ್ ಕರ್ತಾ೦ವ್. ಆಮ್ಚ್ಯಾ ಸ್ವಾರ್ಥಾನ್ ಆಮ್ಚಿಚ್ ಖುಶಿ ಕರ್ನ್ ವಾಯ್ಟ್ ಆಸಾ ಕರ್ತಾ೦ವ್. ತೆದಾಳಾ ಆತ್ಮ್ಯಾಚೆಂ ನಾಸ್ ಜಾತಾ. ಅಸಲೆ ಪರಿಸ್ಥಿತೆಂತ್ ದೆವಾಚೊ ಮೋಗ್ ಆಮ್ಕಾಂ ಬಚಾವ್ ಕರ್ತಾ. ದೆವಾಚ್ಯಾ ಕ್ರೋಧಾ ಪರ್ಮಾಣೆಂ ಆಮಿ ನಾಸ್ ಜಾಂವ್ಕ್ ಜಾಯ್. ಪುಣ್ ತಾಚ್ಯಾ ಮೊಗಾನ್ ತೊ ಆಮಿ ನಾಸ್ ಜಾಯ್ನಾ ಜಾಂವ್ಚ್ಯಾಕ್ ಕುರ್ಪಾ ದಿತಾ ಆನಿ ಆಮ್ಕಾಂ ಬಚಾವ್ ಕರ್ತಾ. ಸಾಂ. ಪಾವ್ಲ್ ಸಾಂಗ್ತಾ ಪಾತಕ್ ಕೆಲ್ಲೊ ಕಷ್ಟಾಂಕ್ ಬಲಿ ಜಾತಾ, ದೃಷ್ಟಾಂತಾಕ್ ಕೃಷಿ ಕರ್ತಾನಾ ಫಾವೊತಿಂ ನಿಯಮಾಂ ಪಾಳಿನಾತ್ಲ್ಯಾರ್ ಬೆಳೆಂ ಬರೆಂ ಜಾಯ್ನಾ, ಬಾಂದಪ್ ಬಾಂದ್ತಾನಾ ಫಾವೊತಿಂ ನಿಯಮಾಂ ಪಾಳಿನಾತ್ಲ್ಯಾರ್ ಬಾಂದಪ್ ಕೊಸಾಳ್ತಾ. ಖಾಣಾ ಜೆವ್ಣಾಂತ್ ನಿಯಮಾಂ ಪಾಳಿನಾತ್ಲ್ಯಾರ್ ಭಲಾಯ್ಕಿ ಭಿಗಡ್ತಾ, ಇತ್ಯಾದಿ. ತ್ಯಾಚ್ ಪರಿಂ ಸಾಂ. ಪಾವ್ಲ್ ಸಾಂಗ್ತಾ, ದೆವಾಚೆ ಉಪದೆಸ್ ಪಾಳಿನಾತ್ಲ್ಯಾರ್ ದೆವಾಚ್ಯಾ ಕ್ರೋಧಾಕ್ ಆಮಿ ಬಲಿ ಜಾತಾಂವ್ ಕಿತ್ಯಾಕ್ ಆಮಿ ದೆವಾಚಿ ರಚ್ನಾಂ. ಆಮಿ ಆಮ್ಚ್ಯಾ ಜಯ್ತಾಕ್ ಆನಿ ಸಂತೊಸಾಕ್ ತಾಚಿಂ ನಿಯಮಾಂ ಪಾಳುಂಕ್ ಜಾಯ್. ಸಾಂ. ಪಾವ್ಲ್ ಆಮ್ಕಾಂ ಉಲೊ ದಿತಾ "ಹ್ಯಾ ವಿಶ್ಯಾಂತ್ ಕೊಣ್ಯೀ ಮನಿಸ್ ಪೊಕೊಳ್ ಉತ್ರಾಂನಿ ತುಮ್ಕಾಂ ಘಟಯ್ನಾ ಜಾಂವ್. ಹಾಚೆ ವರ್ವಿಂ ದೆವಾಚೆಂ ಉತರ್ ಪಾಳಿನಾತ್ಲ್ಲ್ಯಾಂಚೆರ್ ದೆವಾಚೊ ಕ್ರೋಧ್ ದೆಂವ್ತಾ" (ಎಫೆ. 5:6). "ಹ್ಯಾ ಪಾಸೊನ್ ತುಮ್ಚೆ ಥಂಯ್ ಆಸ್ಲ್ಲ್ಯೊ ಸಂಸಾರಿ ಖುಶಾಲಾಯೊ, ವೊಡ್ನ್ಯೊ ಹುಮ್ಕುನ್ ಕಾಡಾ. ವ್ಯಭಿಚಾರ್, ಅನಿಸ್ಕಳ್ಪಣ್, ಕಾಮಾಚಾರ್, ಖೊಟ್ಯೊ ವೊಡ್ಣ್ಯೊ ಆನಿ ಆಬ್ಸ್ವಾರ್ಥ್ - ಆಬ್ಸ್ವಾರ್ಥ್ ಎಕಾ ಥರಾಚಿ ಬೊಂಬ್ಯಾಪ್ರಜಾ - ತುಮಿ ಪಯ್ಸ್ ಕರಾ. ಅಸಲ್ಯಾ ವಾಯ್ಟಾಕ್ ಲಾಗೊನ್ ದೆವಾಚೊ ಕ್ರೋಧ್ ದೆಂವ್ತಾ" (ಕೊಲೊ. 3:5-6).
ಸಗ್ಳ್ಯಾ ಪವಿತ್ರ್ ಪುಸ್ತಕಾಂತ್ ಆಮಿ ನದರ್ ಮಾರ್ಲ್ಯಾರ್ ಆಮ್ಕಾಂ ಏಕ್ ಸತ್ ರುಜು ಜಾತಾಕಿ, ಮನಿಸ್ ದೆವಾಚಿ ಖುಶಿ ಜಾಣಾ ಜಾವ್ನ್ ಜಿಯೆಂವ್ಕ್ ಪ್ರಯತನ್ ಕರ್ಚ್ಯಾ ಬದ್ಲಾಕ್ ಆಪ್ಣಾಚಿ ಖುಶಿ, ಆಪ್ಣಾಚೆಂ ಚಿಂತಪ್ಚ್ ಸಾರ್ಕೆಂ ಆನಿ ಬರೆಂ ಮ್ಹಣ್ ಜಿಯೆತಾ. ದೆವಾನ್ ಆಮ್ಕಾಂ ರಚ್ಲಾಂ ತರೀ ಮನಿಸ್ ಆಪ್ಲ್ಯಾ ಜೀವನಾಚೆಂ ಅಪುಣ್ ಕೇಂದ್ರ್ ದೇವ್ ನ್ಹಯ್ ಮ್ಹಳ್ಳ್ಯಾಬರಿ ಜಿಯೆತಾ. ದೆಕುನ್ ಸಾಂ. ಪಾವ್ಲ್ ಮನ್ಶಾಚ್ಯಾ ಪಾತ್ಕಾಚೊ ಪರಿಣಾಮ್ ಆನಿ ದೆವಾಚೊ ಕ್ರೋಧ್ ಆಪ್ಲ್ಯಾ ಪತ್ರಾಂನಿ ಉಲ್ಲೇಕ್ ಕರ್ತಾ. ಪಾತ್ಕಾಚೊ ಪರಿಣಾಮ್ ಆನಿ ದೆವಾಕ್ ಅನಿಕೀ ಚಡ್ ಸಮ್ಜೊಂವ್ಚೆಂ ಖಾತಿರ್ ಸಾಂ. ಪಾವ್ಲಾನ್ ರೊಮಾಗಾರಾಂಕ್ ಬರಯಿಲ್ಲ್ಯಾ ಪತ್ರಾಂತ್ ಪಯ್ಲೊ ಅಧ್ಯಾಯ್ ೧೮-೨೨ ವೋಳ್ ಮ್ಹಣಾಸರ್ ವಾಚುಂಕ್ ಚುಕಾನಾಕಾ. ಜೆರೆಮಿಯಾ ಪ್ರೊಫೆತಾಮುಕಾಂತ್ರ್ ದೇವ್ ಆಮ್ಕಾಂ ಸಾಂಗ್ತಾಂ, "ಮ್ಹಜಿ ಪರ್ಜಾ ಪಿಶಿ, ತಿ ಮ್ಹಾಕಾ ವಳ್ಕನಾ; ಬೂದ್ ನಾತ್ಲ್ಲಿಂ ಭುರ್ಗಿಂ ತಿಂ, ತಾಂಕಾಂ ಸಮ್ಜಣಿ ನಾ. ವಾಯ್ಟ್ ಕಶೆಂ ಕರ್ಚೆಂ ಮ್ಹಣ್ ತಿಂ ಜಾಣಾಂತ್, ಪುಣ್ ಬರೆಂ ಕರುಂಕ್ ತಿಂ ನೆಣಾಂತ್" (ಜೆರೆ. 4:22). ಹ್ಯಾ ಮಹಿನ್ಯಾಂತ್ ಪೆಂತೆಕೊಸ್ತಾಚೆಂ ಫೆಸ್ತ್ ಆಮಿ ಆಚರ್ಸಿತಾಂವ್. ತ್ಯಾಚ್ ಪವಿತ್ರ್ ಅತ್ಮ್ಯಾಚಿ ಜಾಣ್ವಾಯ್ ಘೆವ್ನ್ ದೆವಾಚಿ ಖುಶಿ ಜಾಣಾ ಜಾವ್ನ್ ತ್ಯಾ ಪರ್ಮಾಣೆ ಜಿಯೆವ್ನ್ ದೆವಾಚೊ ಕ್ರೋಧ್ ಆಮಿ ಪಯ್ಸ್ ಕರ್ಯಾಂ.
- ಫಾ. ಸಿಪ್ರಿಯಾನ್ ಲುವಿಸ್, ಎಸ್ ವಿ.ಡಿ.