I. ಧರ್ಮ್ದುತಾಂಚಿ ಕೃತ್ಯಾಂ. 4:8-12,; II. 1 ಜುವಾಂವ್ 3:1-2; ವಾಂಜೆಲ್: ಜುವಾಂವ್. 10:11-18
ವಿಷಯ್: ತೊ ಬರೆಂ ಕರಿತ್ ಗೆಲೊ
ಸಂಸಾರಾಂತ್ ಜಾಂವ್ ಸಮಾಜೆಂತ್ ಜಾಂವ್ ಹರ್ಯೆಕ್ಲೊ ಹರ್ಯೆಕ್ಲ್ಯಾನ್ ಬರ್ಯಾನ್ ಆಸಾಜಾಯ್ ಮ್ಹಣ್ ಅಪೇಕ್ಷಿತಾ. ಹೆರಾಂನಿ ಬರ್ಯಾ ಮನ್ಶಾಂಚೊ ಪಾಟ್ಲಾವ್ ಕರುಂಕ್ ತಿಂ ಏಕ್ ಆದರ್ಶ್ ಜಾವ್ನಾಸಾತ್. ಮದರ್ ತೆರೆಸಾ ಬರಿ ದೆಕುನ್ ಸಗ್ಳೊ ಸಂಸಾರ್ ತಿಕಾ ಮಾನಾನ್ ಲೆಕ್ತಾ. ಮಹಾತ್ಮಾ ಗಾಂಧಿ ಏಕ್ ಬರೊ ವ್ಯಕ್ತಿ ಜಾಲ್ಲ್ಯಾ ನಿಮ್ತಿ ಭಾರತಾಂತ್ಲೊ ಹರ್ಯೆಕ್ಲೊ ತಾಕಾ ಮಾನಾನ್ ಆನಿ ಗೌರವಾನ್ ಲೆಕ್ತಾ. ತ್ಯಾ ದೆಕುನ್ ಎಕಾ ಬರ್ಯಾ ವ್ಯಕ್ತಿಚೆಂ ನಾಂವ್ ತೊ ಮೆಲ್ಯಾ ಉಪ್ರಾಂತ್ಯೀ ಆಮಿ ಉಡಾಸಾಕ್ ಹಾಡ್ನ್ ತಾಕಾ ಗೌರವ್ ದಿತಾಂವ್. ಜೆಜುಚೆ ಆನಿ ಆಪೊಸ್ತಲಾಂಚೆ ಬರೆಂಪಣ್ ಆಮಿ ಹೆರಾಂಕ್ಯೀ ಪರ್ಗಟ್ ಕರಿಜಾಯ್ ಮ್ಹಣ್ ಆಯ್ಚಿಂ ವಾಚ್ಪಾಂ ಆಮ್ಕಾಂ ಆಮ್ಚ್ಯಾ ಉಡಾಸಾಕ್ ಹಾಡ್ತಾತ್.
ಆಯ್ಚ್ಯಾ ಪಯ್ಲ್ಯಾ ವಾಚ್ಪಾಂತ್ ಆಮಿ ಆಯ್ಕಾತಾಂವ್, ಪೆದ್ರು ಪವಿತ್ರ್ ಅತ್ಮ್ಯಾನ್ ಭರೊನ್ ಲೊಕಾಂಚ್ಯಾ ಫುಡಾರ್ಯಾಂಕಡೆ ಆನಿ ಮಾಲ್ಗಡ್ಯಾಂಕಡೆ ಧಯ್ರಾನ್ ಉಲೊಂವ್ಕ್ಲಾಗ್ಲೊ. ಪೆದ್ರುನ್ ಆನಿ ಜುವಾಂವ್ನ್ ದೆವಾಳಾಚ್ಯಾ ಬಾಗ್ಲಾಕಡೆ ಎಕಾ ಥೊಂಟ್ಯಾ ಮನ್ಶಾಕ್ ಜೆಜುಚ್ಯಾ ನಾಂವಾನ್ ಗೂಣ್ ಕೆಲೊ ದೆಕುನ್ ತಾಂಕಾಂ ಧರ್ಲೆ೦ ಆನಿ ಬಂಧೆಂತ್ ದವರ್ಲೆ೦. ತರಿಪೂಣ್ ತಾಂಕಾ ಭ್ಯೆಂ ದಿಸ್ಲೆಂನಾ. ತೆ ಧಯ್ರಾನ್ ಜೆಜುಕ್ ಪರ್ಗಟುನ್ ಬರೆಂ ಕರಿತ್ ಗೆಲೆ. ಏಕ್ ಪಾವ್ಟಿಂ ಮದರ್ ತೆರೆಜಾಕ್ ಎಕ್ಲ್ಯಾನ್ ಅಶೆಂ ಸವಾಲ್ ಕೆಲೆಂ, "ಮದರ್, ತುಂ ದುಬ್ಳ್ಯಾ ದಾಕ್ಟ್ಯಾಂಕ್ ಇತ್ಲೆಂ ಬರೆಪಣ್ ಕರ್ತಾಯ್, ಜಾಲ್ಯಾರೀ ಲೋಕ್ ತುಜೆ ವಿಶ್ಯಾಂತ್ ಖಬ್ರೊ ಕರ್ನ್ ಪಾಡ್ ಕಿತ್ಯಾಕ್ ಉಲಯ್ತಾ?" ಮದರಾನ್ ದಿಲ್ಲಿ ಜಾಪ್ ಜಾವ್ನಾಸಾ, "ತಾಂಕಾಂ ಕಿತೆಂ ಉಲೊಂವ್ಕ್ ಆಸಾ ತೆಂ ತಿಂ ಉಲೊಂವ್ದಿತ್ ಪೂಣ್ ಮ್ಹಜೆಂ ಕಾಮ್ ದುಬ್ಳ್ಯಾ ದಾಕ್ಟ್ಯಾಂ ಥಂಯ್ ಹಾಂವ್ ಮುಂದರ್ಸುನ್ ವ್ಹರ್ತೆಲಿಂ. ಕೆದಿ ವ್ಹಡ್ ಜವಾಬ್ದಾರಿ ಮನ್ಶಾಕುಳಾ ಥಂಯ್!"
ಆಯ್ಚ್ಯಾ ವಾಂಜೆಲಾಂತ್ ಜೆಜುಕ್ ಬರೊ ಗೊವ್ಳಿ ಮ್ಹಣ್ ಆಪಯ್ತಾತ್. ಸತ್ಚ್ ತೊ ಬರೊ ಗೊವ್ಳಿ ಜಾವ್ನಾಸಾ. ಜೆಜು ಬರೊ ಜಾವ್ನಾಸಾ ಆನಿ ತಾಚೆ ಪ್ರಾಸ್ ಬರೊ ಆನಿ ವರ್ತೊ ಹ್ಯಾ ಸಂಸಾರಾಂತ್ ಕೊಣ್೦ಚ್ ಜಲ್ಮೊಂಕ್ ನಾ. ಏಕ್ ಬರೊ ಗೊವ್ಳಿ ಜಾವ್ನ್ ಆಪ್ಲ್ಯಾ ಶೆಳಿಯಾಂ ಖಾತಿರ್ ಆಪ್ಲೊಚ್ ಜೀವ್ ತಾಣೆಂ ದಿಲಾ. ಏಕ್ ಬರೊ ಗೊವ್ಳಿ ಜಾವ್ನ್ ಆಪ್ಲ್ಯಾ ಹರ್ಯೆಕಾ ಶೆಳಿಯೆಕ್ ತೊ ನಾಂವಾನ್ ಒಳ್ಕತಾ. ಪ್ರತ್ಯೇಕ್ ಜಾವ್ನ್ ತಾಚ್ಯಾ ಹಿಂಡಾ ಥಾವ್ನ್ ಭಾಯ್ರ್ ಗೆಲ್ಲ್ಯಾ ಶೆಳಿಯಾಂಚೆರ್ ತಾಕಾ ಖರೊಚ್ ಹುಸ್ಕೊ ಆಸಾ. ತ್ಯಾ ದೆಕುನ್ ತಾಣೆ ದಾಕೊಂವ್ಚೆಂ ತೆಂ ಬರೆಂಪಣ್ ತಾಚ್ಯಾ ಹಿಂಡಾಂತ್ ಆಸ್ಲ್ಲ್ಯಾಂಕ್ ಮಾತ್ರ್ ನ್ಹಯ್. ವ್ಹಯ್! ಏಕ್ ಬರೊ ಗೊವ್ಳಿ ಜಾವ್ನ್ ಜೆಜು ಸಕ್ಡಾಂಕ್ ಬರೆಂ ಕರಿತ್ ಗೆಲೊ. ದೆಕುನ್ ಹರ್ಯೆಕ್ಲ್ಯಾಕ್, ಹರ್ಯೆಕ್ ಕಡೆ ಆನಿ ಹರ್ಯೆಕಾ ಪರಿಸ್ಥಿತೆಂತ್ ಬರೆಂ ಕರುಂಕ್ ಜೆಜುನ್ ಆಮ್ಕಾಂ ಉಲೊ ದಿಲಾ.
ದುಸ್ರ್ಯಾ ವಾಚ್ಪಾಂತ್ ಆಮಿ ಜೆಜುಚಿಂ ನೀಜ್, ಖರಿಂ ಭುರ್ಗಿಂ ಜಾಂವ್ಕ್ ದೆವಾನ್ ಆಮ್ಕಾಂ ಉಲೊ ದಿಲಾ. ಜರ್ತರ್ ಆಮಿ ಜೆಜುಚಿಂ ಖರಿಂ ಭುರ್ಗಿಂ ವ್ಹಯ್ ಜಾಲ್ಯಾರ್ ಆಮ್ಚೊ ಸಂಬಂಧ್ ಜೆಜು ಥಂಯ್ ಥಿರ್ ರಾವ್ತಾ. ಜರ್ತರ್ ಜೆಜು ಥಂಯ್ ಆಮಿ ಎಕ್ವಟಾನ್ ರಾವ್ಲ್ಯಾಂವ್ ತರ್ ಬರ್ಯಾ ಗೊವ್ಳ್ಯಾನ್ ಆಮ್ಚ್ಯಾ ಧನಿಯಾ ಜೆಜುನ್ ಕೆಲ್ಲ್ಯಾಬರಿಂ ಆಮಿಂಯೀ ಬರೆಂ ಕರುಂಕ್ ಸಕ್ತೆಲ್ಯಾಂವ್. "ಮ್ಹಜೊ ಪಾಟ್ಲಾವ್ ಕರ್" ವ "ತುಮಿ ಜಾವ್ನಾಸಾತ್ ಮೀಟ್ ಸಂಸಾರಾಚೆಂ" ವ "ತುಮಿ ಜಾವ್ನಾಸಾತ್ ಸಂಸಾರಾಚೊ ಉಜ್ವಾಡ್". ತ್ಯಾ ದೆಕುನ್ ಜೆಜುನ್ ಮ್ಹಳ್ಳಿಂ ಹಿಂ ಉತ್ರಾಂ ಅರ್ಥಾಭರಿತ್ ಜಾವ್ನಾಸಾತ್. ದೆಕುನ್ ಜೆಜು ಥಂಯ್ ಆಮ್ಚೊ ಸಂಬಂಧ್ ಆಸ್ಚೊ ಮ್ಹಳ್ಯಾರ್, ತಾಚಾ ವಾಟೆನ್ ಆಮಿ ಚಲ್ಚೆಂ, ತಾಕಾ ಆಮ್ಚಿ ಏಕ್ ದೇಖ್ ಕರ್ನ್ ಕಾಣ್ಘೆಂವ್ಚೆಂ, ಆನಿ ತಾಣೆಂ ಕೆಲ್ಲ್ಯಾಬರಿ ಕರ್ನ್ ಸರ್ಗಿಂಚೆಂ ರಾಜ್ ಆಮ್ಚ್ಯಾ ಜಿವಿತಾಂತ್ ಭೊಗ್ಲ್ಯಾರ್ ಸಂಸಾರಾರ್ ಸಮಾಧಾನ್ ಆನಿ ಶಾಂತಿ ರಾಜ್ ಕರ್ತೆಲಿ.
ಮೊಗಾಚ್ಯಾ ಭಾವಾಂನೊ ಆನಿ ಭಯ್ಣಿಂನೊ, ಎಕಾ ಬರ್ಯಾ ಗೊವ್ಳ್ಯಾಚೊ ಪಾಟ್ಲಾವ್ ಕರ್ನ್ ಆಮ್ಚ್ಯಾ ಉತ್ರಾಂನಿ, ಕರ್ನ್ಯಾಂನಿ ತಾಚಾ ಸತಾಚಾ ಆನಿ ನಿತಿಚಾ ಮೆಟಾಂನಿ ಆಮಿಂಯೀ ಚಲೊಂವ್ಕ್ ಹ್ಯಾ ಮಿಸಾಚಾ ಬಲಿದಾನಾ ವೆಳಾರ್ ಆಮಿ ಕುರ್ಪಾ ಮಾಗ್ಯಾಂ. ಆಮ್ಚ್ಯಾ ಜಿವಿತಾಚಾ ಪಯ್ಣಾರ್ ಹೆಂ ಸತ್ ಸಂಪೂರ್ಣ್ ಕರುಂಕ್, ಪುನರ್-ಜಿವಂತ್ ಜಾಲ್ಲೊ ಜೆಜು ಆಮ್ಕಾಂ ಸಾಂಗಾತ್ ದಿಂವ್ದಿ.
- ಮಾ. ಜೆರಿ ಸಿಕ್ವೇರಾ, ಎಸ್.ವಿ.ಡಿ.