1. ಧ. ಕೃ. 9:26-31, 2. 1 ಜುವಾಂವ್ 3:18-24, ವಾಂಜೆಲ್: ಜುವಾಂವ್. 15:1-8
ವಿಷಯ್: ಜೆಜು ಖರ್ಯಾ ದಾಕ್ವಲಿ ಥಂಯ್ ಆಮಿ ಸುಫಳ್, ತಾಚೆವಿಣೆಂ ಆಮಿ ನಿರ್ಫಳ್
ಆಪ್ಲ್ಯಾ ೩೨ ವರ್ಸಾ೦ ಪ್ರಾಯೆ ಪರ್ಯಾ೦ತ್ ಸಾಂ. ಆಗುಸ್ತಿನ್ ವಾಯ್ಟ್ ಜಿಣಿ ಜಿಯೆಲೊ. ದೆವಾಚೆರ್ ಭಾವಾಡ್ತ್ ನಾಸ್ತಾನಾ, ಅನಿಸ್ಕಳ್ ಆನಿ ಪಾರ್ಪೊಳ್ ವಾಟೆನ್ ಚಮ್ಕಾತಾಲೊ. ಪುಣ್ ಜೆದ್ನಾಂ ತಾಕಾ ಪುನರ್ಜಿವಂತ್ ಜೆಜು ಭೆಟ್ಲೊ, ತೊ ಏಕ್ ನವಿ ರಚ್ನಾ ಜಾಲೊ. ಪರ್ನೆ೦ ತೆಂ ಗೆಲೆಂ, ಸಗ್ಳೆಂ ನವೆಂ ಜಾಲೆಂ. ತೊ ಏಕ್ ಕ್ರಿಸ್ತಾಂವ್ ಜಾಲೊ. ಉಪ್ರಾಂತ್ ಯಾಜಕ್ ಆನಿ ಆಕ್ರೇಕ್ ಭಿಸ್ಪ್ ಜಾಲೊ. ತಾಚಿ ಶಿಕವ್ಣ್ ಆನಿ ಬರ್ಪಾ೦ ಲೊಕಾಮೊಗಾಳ್ ಜಾಲಿಂ ಆನಿ ಆಜೂನ್ ಪವಿತ್ರ್ ಸಭೆಂತ್ ತಾಕಾ ವರ್ತೊ ಗೌರವ್ ಆಸಾ. ಆಪ್ಲ್ಯಾ ಬದ್ಲಾವಣೆ ಉಪ್ರಾಂತ್ ತಾಣೆ ಉಚಾರ್ಲಲೊ ಉದ್ಗಾರ್: "ಕಿತ್ಲೊ ತಡವ್ ಕರ್ನ್ ತುಕಾ ಜಾಣಾ ಜಾಲೊಂ ಮ್ಹಜ್ಯಾ ದೆವಾ... ನಾ ವಿಶೆವ್ ತುಜೆ ಬಗಾರ್ ಮ್ಹಾಕಾ..."
ದಾಮಾಸ್ಕಾಚ್ಯಾ ವಾಟೆರ್ ಪುನರ್ಜಿವಂತ್ ಜೆಜುಚಿ ಭೆಟ್ ಜಾಲ್ಯಾ ಉಪ್ರಾಂತ್ ಸಾವ್ಲಾಚ್ಯಾ ಜಿವಿತಾಚಿ ದಿಶಾಚ್ ಬದ್ಲಲಿ. ಜೆಜುಚ್ಯಾ ಶಿಸಾಂಕ್ ಧರ್ಣಿ ವಯ್ಲೆ ನಪಂಯ್ಚ್ ಕರುಂಕ್ ಭಾಯ್ರ್ ಸರ್ಲಲೊ ಸಾವ್ಲ್, ಆಪ್ಲ್ಯಾ ಕುಡಿಂತ್ಲೊ ಆಕ್ರೇಚೊ ಥೆಂಬೊ ರಗತ್ ಸಯ್ತ್ ಕ್ರಿಸ್ತಾ ಖಾತಿರ್ ವಾರೊಂವ್ಕ್ ಆಯ್ತೊ ಜಾಲೊ. ಪುನರ್ಜಿವಂತ್ಪಣಾಚಿ ಸಕತ್ ತಿ! ಪಾಸ್ಕಾಚ್ಯಾ ಕಾಳಾರ್ ತೆಂ ಪುನರ್ಜಿವಂತ್ಪಣ್ ತುಜೆಂ ಆನಿ ಮ್ಹಜೆಂ ಜಾಂವ್!
1. ಕೃತ್ಯಾಂ. 9:26-31: ಕ್ರಿಸ್ತಾಚ್ಯಾ ಪಾಟ್ಲಾವ್ದಾರಾಂಕ್ ನಾಸ್ ಕರುಂಕ್ ಶಪಥ್ ಘೆತ್ಲಲೊ ಸಾವ್ಲ್ ಆಪ್ಲಿ ಜಿಣಿ ಬದ್ಲುನ್ ಪಾವ್ಲ್ ಜಾಲೊ. ಪುಣ್ ಭಾವಾರ್ಥ್ಯಾ೦ಚ್ಯಾ ಮೆಳಾಂತ್ ತಾಕಾ ಸುರ್ವೆರ್ ಸ್ವಾಗತ್ ಮೆಳ್ಳೊನಾ. ಜಾಯ್ತ್ಯಾ ಕ್ರಿಸ್ತಾಚ್ಯಾ ಪಾಟ್ಲಾವ್ದಾರಾಂಕ್ ಜಿವೆಶಿಂ ಮಾರಯಿಲ್ಲೊ ಹೊ ಸಾವ್ಲ್ ಆತಾಂ ಕ್ರಿಸ್ತಾಚ್ಯಾ ನಾಂವಾನ್ ಸಾಸ್ಣಿಕ್ ಜಿವಿತ್ ಪ್ರಸಾರ್ ಕರ್ತಾನಾ ಸಕ್ಕಡ್ ಆಜ್ಯಾಪ್! ಏಕ್ ಪಾವ್ಟಿಂ ಪುನರ್ಜಿವಂತ್ ಜೆಜುಕ್ ತುಂ ಭೆಟ್ತಾಯ್, ತುಜೆಂ ಜಿವಿತ್ ಸಾಸ್ಣಾಕ್ ಬದ್ಲಾತಾ! ತುಂ ಏಕ್ ನವಿಂ ರಚ್ನಾ!
2. 1 ಜುವಾಂವ್ 3:18-24: ಆಮ್ಚಿ ಕ್ರಿಸ್ತಾಂವ್ ಜಿಣಿ ಕೇವಲ್ ರಾಜಾಂವ್, ಶೆರ್ಮಾ೦ವ್ ಆನಿ ಲಿಸಾಂವ್ ನ್ಹಯ್. ಖಾಲಿ ಉತ್ರಾನ್ ವಾ ಜಿಬೆನ್ ಮಾತ್ರ್ ಮೋಗ್ ಕರ್ಚೊ ನ್ಹಯ್ ಬಗಾರ್ ಯಥಾರ್ಥ್ಪಣಾನ್ ಆನಿ ಕರ್ನೆನ್ ಆಮಿ ತೊ ದಾಕಂವ್ಕ್ ಜಾಯ್ (v. 18). ಮದರ್ ತೆರೆಸಾ ಆನಿ ಜುವಾಂವ್ ಪಾವ್ಲ್ ದುಸ್ರ್ಯಾಚಿ ಆದರ್ಶ್ ಜಿಣಿ ಆಮ್ಚ್ಯಾ ದೊಳ್ಯಾಂ ಮುಕಾರ್ ಆಜೂನ್ ಜಿವಿ ಆಸಾ. ಆಮ್ಚ್ಯಾ ಕುಟ್ಮಾಂತ್, ವಾಡ್ಯಾಂತ್, ಫಿರ್ಗಜೆಂತ್ ಆನಿ ಸಮಾಜೆಂತ್ ತ್ಯಾಚ್ ರಿತಿನ್ ಮೊಗಾಚ್ಯಾ ಸಮರ್ಪಣಾನ್ ಜಿಯೆವ್ಯಾಂ.
3. ಜುವಾಂವ್. 15:1-8: ಜೆಜು ಜಾವ್ನಾಸಾ ಖರಿ ದಾಕ್ವಲ್. ಫುಲಾಂ ಆನಿ ಫಳಾಂ ಫಾಂಟ್ಯಾರ್ ಆಸ್ತಾತ್ ತರೀ ವಾಲಿವಿಣೆಂ ಫಾಂಟೆ ಸುಕ್ತಾತ್, ಬಾವ್ತಾತ್ ಆನಿ ಮೊರ್ತಾತ್. ಸುಫಳ್ ಜಾಂವ್ಕ್ ಫಾಂಟ್ಯಾಂಕ್ ವಾಲಿ ಥಾವ್ನ್ ಜೀವ್, ಸಾರ್, ಬಳ್ ಆನಿ ಸಕತ್ ವಾಳೊನ್ ಯೇಜಾಯ್. ಆಮಿ ಖರ್ಯಾ ದಾಕ್ವಲಿ ಥಂಯ್ ಎಕ್ವಟಾನ್ ನಾಂವ್ ತರ್, ಆಗುಸ್ತಿನ್ ಆನಿ ಸಾವ್ಲ್ ಕನ್ವಡ್ತರಾಚ್ಯಾ ಪಯ್ಲೆಂ ಆಸ್ಲೆಲೆಪರಿಂ ಆಮಿಯೀ ನಿರ್ಫಳ್ ಆನಿ ಪಾರ್ಪೊಳ್. ಪುನರ್ಜಿವಂತ್ ಜೆಜು ಆಮ್ಚ್ಯಾ ಕ್ರಿಸ್ತಾಂವ್ ಜಿವಿತಾಚೊ ಸಾರ್, ತೊ ಕರ್ತಾ ಆಮ್ಕಾಂ ಸುಫಳ್.
ಪ್ರಾರ್ಥುಯಾಂ: ಮೊಗಾಳಾ ಜೆಜು, ತುಂ ಪುನರ್ಜಿವಂತ್ ಜಾವ್ನ್ ಆಮ್ಚೆ ಮಧೆಂ ಹಾಜರ್ ಆಸಾಯ್. ತುಂ ಸದಾಂಚ್ ಆಸಾಯ್ ಜಿವೊ. ತುಜೆ ಥಂಯ್ ಆಮ್ಚೆಂ ವೈಯುಕ್ತಿಕ್ ಪುನರ್ಜಿವಂತ್ಪಣ್ ಆನ್ಬೊಗ್ ಕರಿಶೆಂ ಕರ್. ತುಜೆ ಥಂಯ್ ಎಕ್ವಟೊನ್ ಆಮಿ ಆಮ್ಚ್ಯಾ ಕ್ರಿಸ್ತಾಂವ್ ಜಿವಿತಾಂತ್ ತುಕಾ ಮಹಿಮಾ ದಿಂವ್ಚೆಪರಿಂ ಮಾಯಾಮೊಗಾಚ್ಯೊ, ಸೆವೆಚ್ಯೊ ಆನಿ ಸಮರ್ಪಣಾಚ್ಯೊ ಕರ್ನ್ಯೊ ಕರಿಶೆಂ ಕರ್. ತುಜ್ಯಾ ಪವಿತ್ರ್ ಆನಿ ಮಧುರ್ ನಾಂವಾನ್ ಆಮಿ ಮಾಗ್ತಾಂವ್. ಆಮೆನ್.
- ಬಾ| ಅಬು ಎಸ್ವಿಡಿ