ದೈವಿಕ್ ಸ೦ದೇಶ್

ಪಯ್ಲೆಂ: ಆ.ಕೃ. 10:25-26, 34-35, 44:48; ದುಸ್ರೆಂ: 1 ಜುವಾಂವ್. 4:7-10;

ಶುಭ್‌ವಾರ್ತಾ: ಜುವಾಂವ್. 15:9-17

ವಿಶಯ್: ಪರಿಪೂರ್ಣ್ ಮೋಗ್

ಜೆಜುಕ್ ಆಪ್ಲ್ಯಾ ಪಾಟ್ಲಾವ್ದಾರ್‍ಯಾಂ ಲಾಗಿಂ ವಿಶೇಸ್ ಸಂಬಂಧ್ ಆಸಾ. ಹೊ ಸಂಬಂಧ್ ಹ್ಯಾ ಉತ್ರಾಂ ಮುಕಾಂತ್ರ್ ತೊ ಉಚಾರ್ತಾ, "ಜಸೊ ಬಾಪಾನ್ ಮ್ಹಜೊ ಮೋಗ್ ಕೆಲಾ, ತಸೊ ಹಾಂವೆಂಯೀ ತುಮ್ಚೊ ಮೋಗ್ ಕೆಲಾ. ತುಮಿ ಮ್ಹಜ್ಯಾ ಮೊಗಾಂತ್ ರಾವಾಜಾಯ್" (ಜುವಾಂವ್. 15:9). ಬಾಪಾನ್ ತಾಚೊ ಕಸೊ ಮೋಗ್ ಕೆಲಾ? ಆನಿ ತಾಣೆ ಆಮ್ಚೊ ಕಸೊ ಮೋಗ್ ಕೆಲಾ? "ದೆವಾನ್ ಸಂಸಾರಾಚೊ ಆಸೊಯಿ ಮೋಗ್ ಕೆಲಾ ಕೀ, ತಾಣೆಂ ಆಪ್ಲ್ಯಾ ಎಕ್ಲ್ಯಾಚ್ ಪುತಾಕ್ ಒಪುನ್ ದಿಲೊ, ತಾಕಾ ಸತ್ಮಾನ್ತಲ್ಯಾ ಕೊಣಾಚೊಚ್ ನಾಸ್ ಜಾಯ್ನಾ ಜಾಂವ್ಚ್ಯಾಕ್; ಬಗಾರ್ ತಾಕಾ ಸಾಸ್ಣಿಕ್ ಜಿವಿತ್ ಮೆಳ್ಚ್ಯಾಕ್" (ಜುವಾಂವ್. 3:16). ದೇವ್ ಜಾವ್ನಾಸಾ ಸಂಪೂರ್ಣ್ ದೆಕುನ್ ತಾಚೊ ಮೋಗ್ ಸಂಪೂರ್ಣ್ ಜಾವ್ನಾಸಾ. ಅಸಲ್ಯಾ ಸಂಪೂರ್ಣ್ ಮೊಗಾನ್ ಆಪ್ಲ್ಯಾ ಪುತಾಚೊ ತಾಣೆ ಮೋಗ್ ಕೆಲೊ. ಹೊ ಮೋಗ್ ಜೆಜುನ್ ಬ್ಯಾಪ್ತಿಜ್ಮ್ ಘೆತಾನಾ ದೃಢ್ ಕೆಲಾ. "ಜೆಜುಯಿ ಸ್ನಾನ್ ಘೆವ್ನ್ ಮಾಗ್ಣ್ಯಾರ್ ಆಸ್ತಾನಾ ಆಕಾಸ್ ಉಗ್ತೊ ಜಾಲೊ ಆನಿ ಪವಿತ್ರ್ ಅತ್ಮೊ ದೈಹಿಕ್ ರುಪಿಂ ಏಕ್ ಪಾರ್ವ್ಯಾಬರಿ ತಾಚೆರ್ ದೆವ್ಲೊ. ತೆದ್ನಾಂ ಆಕಾಸಾ ಥಾವ್ನ್ ಆಯ್ಲೊ ಏಕ್ ತಾಳೊ; ತುಂ ಮ್ಹಜೊ ಪೂತ್, ಮ್ಹಜೊ ಮೊಗಾಚೊ; ತುಂ ಮ್ಹಾಕಾ ಭೋವ್ ಚಡ್ ಮಾನ್ವಲಾಯ್" (ಲೂಕ್. 3:22). ಜೆಜು ಬಾಪಾಚೊ ಪರಿಪೂರ್ಣ್ ಪೂತ್. ಆಮ್ಕಾ ತೊ ತ್ಯಾಚ್ ಪರಿಪೂರ್ಣ್ ಮೊಗಾಂತ್ ಮೋಗ್ ಕರ್ತಾ. ಪರಿಪೂರ್ಣ್ ಭುರ್ಗ್ಯಾಂಚೊ ಆವಯ್-ಬಾಪಯ್ಕ್ ಚಡ್ ಮೋಗ್. ಕೋಣ್ ಹಿಂ ಪರಿಪೂರ್ಣ್ ಭುರ್ಗಿಂ? ಭುರ್ಗಿಂ ಕೋಣ್ ವಿಧೇಯ್ ಜಾತಾತ್, ಮಾನ್-ಮರ್ಯಾದ್, ಗೌರವ್ ದಿತಾತ್, ನಿಸ್ವಾರ್ಥಿ ಆನಿ ಕೆದಿಂಚ್ ಪೆಲ್ಯಾಕ್ ದುಃಖ್ ದೀನಾಂತ್ ತಿಂಚ್ ತಿಂ ಪರಿಪೂರ್ಣ್ ಭುರ್ಗಿಂ.

ಜೆಜುನ್ ಆಪ್ಲ್ಯಾ ವಿಧೇಯ್ಪಣಾನ್ ಆಪ್ಲ್ಯಾ ಜೀವಾಚೊ ವರ್ತೊ ಸಾಕ್ರಿಫಿಸ್ ಕೆಲಾ. ದೆಕುನ್ ಬಾಪಾನ್ ತಾಚೊ ವರ್ತೊ ಮೋಗ್ ಕೆಲೊ. ಎಕಾ ಗೊವ್ಳ್ಯಾನ್ ಆಪ್ಲ್ಯಾ ಶೆಳಿಯಾಂ ಖಾತಿರ್ ಜೀವ್ ದಿಲ್ಯಾರ್ ನಿಜಾಕೀ ತೊ ಏಕ್ ಬರೊ ಗೊವ್ಳಿ ಜಾವ್ನಾಸಾ. ತಾಚೊ ಮೋಗ್ ಅಪರಿಮಿತ್ ಜಾವ್ನಾಸಾ. ಧನಿ ಖುಶಿ ಜಾವ್ನ್ ಗೊವ್ಳ್ಯಾಚಿ ದುಭಾವಾವಿಣೆ ವರ್ತೊ ಮೋಗ್ ಕರ್‍ತಾ. ಬಾಪಾಚಿ ಖುಶಿ ಕರ್ಚ್ಯಾ೦ತ್ ಜೆಜುನ್ ಆಪ್ಲ್ಯಾ ಜಿವಾಚೊ ಸಾಕ್ರಿಫಿಸ್ ಕರ್ನ್ ಆಮ್ಕಾಂ ತಾಚ್ಯಾ ಹಿಂಡಾಕ್ ಹಾಡ್ಲಿಂ. ಕಸೊ ತಾಚೊ ಮೋಗ್ ಸಂಪೂರ್ಣ್‌ಗೀ ತಶೆಂ ಆಮ್ಚೊಯೀ ಮೋಗ್ ಸಂಪೂರ್ಣ್ ಜಾಂವ್ಚ್ಯಾಕ್ ತಾಣೆ ಆಮ್ಚೊ ಅಸೊ ಮೋಗ್ ಕೆಲೊ. ಕ್ರಿಸ್ತಾಂವ್ ಜಿಣಿ ಆಮ್ಕಾಂ ಸಬಾರ್ ಪಾವ್ಟಿಂ ಕಷ್ಟಾಂಚಿ ಮ್ಹಣ್ ಭೊಗ್ಲ್ಯಾರೀ ಆಮ್ಚ್ಯಾ ಜಿಣಿಯೆಚೊ ಉದ್ದೇಶ್ ಏಕ್‌ಚ್ ಕೀ ಆಮ್ಚೊ ಸಂತೊಸ್ ಜೆಜುಚ್ಯಾ ಸಂತೊಸಾಬರಿ ಸಂಪೂರ್ಣ್ ಜಾಂವ್ಚ್ಯಾಕ್. ಆಮ್ಕಾಂ ಮೊಗಾ ಖಾತಿರ್ ವಿಂಚ್ಲ್ಯಾಂತ್ ಎಕಾಮೆಕಾ ಸ್ಪರ್ಧ್ಯಾಕ್ ರಾವೊಂಕ್ ಯಾ ಝಗಡ್ನ್ ಪಡೊಂಕ್ ನ್ಹಯ್. ಎಕಾಮೆಕಾ ಕಿತ್ಯಾನ್೦ಚ್ ಆಮ್ಕಾಂ ವೆಗ್ಳೆಂ ಕರುಂಕ್ ಜಾಯ್ನಾ. "ಅಶೆಂ ಆಸ್ತಾಂ, ಕೋಣ್ ತೊ ಆಮ್ಕಾಂ ಕ್ರೀಸ್ತಾಚ್ಯಾ ಮೊಗಾ ಥಾವ್ನ್ ವೆಗ್ಳಿಂ ಕರ್ತಲೊ?" (ರೊಮಾ. 8:35). ಮೋಗ್ ಏಕ್ ವಿಶೇಷ್ ಸಕತ್ ಜಾಂವ್ ಸರ್ಗಾರಾಜಾಂತ್ ವಾ ಸಂಸಾರಾಂತ್. ಮೋಗ್ ಎಕ್ ಗುರುತ್ವಾಕರ್ಷಣ್. ಸಂಸಾರಾಂತ್ ಗುರುತ್ವಾಕರ್ಷಣಾಚೆಂ ನಿಯಮ್ ಕಾಡ್ಲ್ಯಾರ್ ಸಗ್ಳೊ ಸಂಸಾರ್ ಗೊಂದೊಳಾಂತ್, ಘುಸ್ಪಡಿಂತ್ ಆನಿ ಅವ್ಯವಸ್ಥೆಂತ್ ಶಿರ್ಕೊ೦ಕ್ ಆಸಾ. ಮೋಗ್ ಕಾಡ್ನ್ ಸೊಡ್ಲ್ಯಾರ್ ಸಗ್ಳೊ ಸಂಸಾರ್ ಕಿತೆಂ ಜಾಯ್ತ್! ಚಿಂತುಂಕ್ ಕಷ್ಟ್ ಜಾತಾತ್. ಆಮ್ಚಿ ಪಾತ್ಕಾಂ ಕಿತ್ಲೆಂಯೀ ಆಸೊಂದಿ ದೆವಾಚೊ ಮೋಗ್ ಸದಾಂಚ್ ಆಸಾ. ಜೆಜು ದಿಸಾನಾತ್‌ಲ್ಲ್ಯಾ ದೆವಾಚ್ಯಾ ಮೊಗಾಚೆಂ ದಿಸ್ಚೆಂ ರೂಪ್ ಜಾವ್ನಾಸಾ. ಜೆಜುನ್ ತಾಚ್ಯಾ ಶಿಸಾಂಚೊ ನಿಮಾಣೆ ಘಡಿ ಪರ್ಯಾ೦ತ್ ಮೋಗ್ ಕೆಲೊ ಆನಿ ಆಮ್ಚೊಯೀ ತ್ಯಾಚ್‌ಪರಿ ತೊ ಮೋಗ್ ಕರ್ತಾ. ಅಸೊ ಆಮ್ಚೊ ಮೋಗ್ ಕರ್ನ್ ತೊ ಆಮ್ಕಾಂ ಸಾಂಗ್ತಾ, "ತುಮಿ ಮ್ಹಾಕಾ ವಿಂಚುನ್ ಕಾಡುಂಕ್ ನಾ, ಹಾಂವೆಂ ತುಮ್ಕಾಂ ವಿಂಚುನ್ ಕಾಡ್ಲ್ಯಾತ್. ತುಮಿ ಭಾಯ್ರ್ ಸರ್ನ್ ವಚುನ್ ಫಳ್ ದೀಜಯ್; ಉರ್ಚೆ ತಸಲೆಂ ಫಳ್ ದೀಜಯ್ ಮ್ಹಣ್ ಹಾಂವೆಂ ತುಮ್ಕಾಂ ನೆಮ್ಲ್ಯಾತ್" (ಜು. 15:16). ಜೆಜು ಥಂಯ್ ಆಮಿ ಎಕ್ವಟೊನ್ ಪವಿತ್ರ್ ಅತ್ಮ್ಯಾಚೆ ಫಳ್ ದಿವ್ಯಾಂ - "ಮೋಗ್, ಸಂತೊಸ್, ಸಮಾಧಾನ್, ಬರೆಪಣ್, ವಿಶ್ವಾಸಿಪಣ್, ಭೊಳೆಪಣ್, ಸ್ವಧಮನ್" (ಗಾಲಾ. 5:22-23). ಸಂಸಾರಾಂತ್ ದೇವ್ ಆಪ್ಲೆಂ ಮಿಸಾಂವ್ ಆಮ್ಚೆ ಮುಕಾಂತ್ರ್ ಮುಂದರ್ಸುನ್ ಆಸಾ. "ಜಶೆಂ ಬಾಪಾನ್ ಮ್ಹಾಕಾ ಧಾಡ್ಲಾ, ತಶೆಂ ಹಾಂವ್ ತುಮ್ಕಾಂ ಧಾಡ್ತಾಂ" (ಜು. 20:21). ಹಿಂ ಉತ್ರಾಂ ಆಮ್ಕಾಂ ಸಂತೊಸ್ ದೀಂವ್ದಿತ್. ಆಮಿ ಕ್ರಿಸ್ತಾಚೆ ಖರೆ ಪ್ರತಿನಿಧಿ ಜಾವ್ನ್ ಸಂಸಾರಾಂತ್ ಆಮ್ಚೆಂ ಮಿಸಾಂವ್ ಸಂಪೂರ್ಣ್ ಕರ್‍ಯಾಂ.

ಮಾಗ್ಣೆಂ: ಸರ್ಗಿಂಚ್ಯಾ ಬಾಪಾ, ಆಮ್ಕಾಂ ಹ್ಯಾ ಸಂಸಾರಾಂತ್ ಕ್ರಿಸ್ತಾಚೆ ಸಹ-ವಾವ್ರಾಡಿ ಜಾವ್ನ್ ಸದಾಂಚ್ ತುಜ್ಯಾ ರಾಜಾಖಾತಿರ್ ವಾವ್ರುಂಕ್ ಖುಶಿ ಆಸಾ. ಆಮಿ ಕಷ್ಟಾಂಕ್ ಭಿಯೆನಾಸ್ತಾನಾ ಧಯ್ರಾನ್ ತುಜ್ಯಾ ರಾಜಾಖಾತಿರ್ ವಾವ್ರುಂಕ್ ಧಯ್ರ್ ಆನಿ ಜಾಣ್ವಾಯ್ ದಿ ಮ್ಹಣ್ ಮಾಗ್ತಾಂವ್.

- ಬಾ| ಸಿಪ್ರಿಯನ್ ಲುವಿಸ್, ಎಸ್‌ವಿಡಿ