ಪಯ್ಲೆಂ: ಆ.ಕೃ. 1:1-11; ಶುಭ್ವಾರ್ತಾ: ಮಾರ್ಕ್. 16:15-20 ದುಸ್ರೆಂ: ಎಫೆಜ್. 1:17-23
ವಿಶಯ್: ಜೆಜುಚೆಂ ಸ್ವರ್ಗಾರೋಹಣ್ ಆಮ್ಚ್ಯಾ ಭರ್ವಸ್ಯಾಚೆಂ ಕಾರಣ್
ಆಮ್ಚ್ಯೆ ಭೊಂವಾರಿಂ ಹಜಾರೊಂ ಸಮಸ್ಯಾನಿಂ ವೆಡೊ ಗಾಲಾ. ಎಕಾ ವಾಟೆನ್, ಆರ್ಥಿಕ್ ಪರಿಸ್ಥಿತಿ ಭಿಗಡ್ಲ್ಯಾ ಜಾಲ್ಯಾರ್, ದುಸ್ರ್ಯಾ ವಾಟೆನ್ ಅಶಾಂತಿ, ಅಸಮಾಧಾನ್, ಝಗ್ಡಿಂ ಆನಿ ಗೊಂದೊಳ್ ವಾಡೊನ್ಚ್ ಆಸಾ. ದೀಸ್ ವೆತಾಂ ವೆತಾಂ ಆಮ್ಚಿ ಭದ್ರತಿ ಉಣಿ ಜಾಲ್ಲ್ಯಾಬರಿಂ ದಿಸ್ತಾ. ಸಬಾರ್ ಸವಾಲಾಂ ಮತಿಂತ್ ಉದೆತಾತ್: ಆಪ್ಲ್ಯಾ ಶಿಸಾಂಕ್ ಬಳ್ವಂತ್ ಕೆಲ್ಲೊ ಜೆಜು ಆಜ್ ಆಮ್ಕಾಂಯ್ ಸರ್ವ್ ವಾಯ್ಟಾವಿರೋಧ್ ಝುಜೊಂಕ್ ಬಳ್ವಂತ್ ಕರ್ಚೊನಾಂಗಿ? ಮರ್ಣಾಚೆರ್ ಜಯ್ತ್ ವ್ಹರುನ್, ಪುನರ್ಜಿವಂತ್ ಜಾಲ್ಲೊ ಜೆಜು ಆಮ್ಚ್ಯಾ ಮರ್ನಾಚ್ಯಾ ಪಾಸಾಂತ್ಲೊ ಆಮ್ಕಾಂ ಸುಟವ್ನ್ ನವೊ ಭರ್ವಸೊ ಆಮ್ಕಾಂ ದಿಂವ್ಚೊನಾಂಗೀ? ಜೆಜುಚ್ಯಾ ಸ್ವರ್ಗಾರೋಹಣಾಚಿ ಪರಬ್ ಹ್ಯಾ ಆಮ್ಚ್ಯಾ ಸವಾಲಾಂಕ್ ಜಾಪ್ ದಿತಾಂ ಆನಿ ಆಮ್ಕಾಂ ಹ್ಯಾ ಸಂಸಾರಾಂತ್ ಸೊಮ್ಯಾ ಜೆಜುಚೆ ಬಳ್ವಂತ್ ಸಾಕ್ಷಿ ಜಾಂವ್ಕ್ ಆಪವ್ಣೆ ದಿತಾ.
ತುಮ್ಚೆರ್ ಪವಿತ್ರ್ ಅತ್ಮೊ ಯೆತಲೊ ತೆದ್ನಾ ತುಮ್ಕಾಂ ಬಳ್ ಮೆಳ್ತಲೆಂ... ಆನಿ ತುಮಿಂ ಮ್ಹಾಕಾ ಸಾಕ್ಸ್ ದಿತಲ್ಯಾತ್ (ಪಯ್ಲೆಂ ವಾಚಪ್)
ಜೆಜುಚೆಂ ಸ್ವರ್ಗಾರೋಹಣ್ ದೋನ್ ಥರಾಂನಿ ಆಮಿಂ ಪಳೆವ್ಯೆತಾ: ಸಕ್ಕಡ್ ಅಖೇರ್ ಜಾಲೆಂ ವಾ ನವ್ಯಾನ್ ಆರಂಭ್ ಜಾಲೆಂ. ಜೆಜುಚೆಂ 'ಸಂಸಾರಿ' ಮಿಸಾಂವ್ ಖಂಡಿತ್ ಜಾವ್ನ್ ತಾಚ್ಯಾ ಸ್ವರ್ಗಾರೋಹಣಾಂತ್ ಅಖೇರ್ ಜಾಲೆಂ, ಪುಣ್ ಜೆಜುಚ್ಯಾ ಶಿಸಾಂಚೆಂ ನವೆಂ ಜಿವಿತ್ ತಾಚ್ಯಾ ಸ್ವರ್ಗಾರೋಹಣಾಂತ್ ಆರಂಭ್ ಜಾಲೆಂ. ತಾಚ್ಯಾ ಪರ್ಗಟ್ ಜಿಣ್ಯೆ ವೆಳಾರ್ ಆಸ್ಲ್ಲೊ ಜೆಜು ತಾಂಚೆ ಮಧೆಂ ನಾತ್ಲ್ಲೊ ಜಾಲ್ಯಾರ್ಯೀ, ಜಿವಂತ್ ಜೆಜುಚೆಂ ಹಾಜರ್ಪಣ್ ತಾಂಚೆಮಧೆಂ ವರ್ತ್ಯಾ ರಿತಿನ್ ತಾಣಿಂ ಅನ್ಭೋಗ್ ಕೆಲೊ, ಜಿವಂತ್ ಜೆಜುಚಿ ಸಕತ್ ತಾಂಚೆ ಥಂಯ್ ಆಸ್ಲ್ಲ್ಯಾ ವರ್ವಿಂ (ಆ.ಕೃ. 1:8) ತೆ ನಿರಾಶಿ ಜಾಂವ್ಕ್ ನಾಂತ್, ಬಗಾರ್ ಧೈರಾನ್ ಕಶ್ಟ್, ದಗ್ದೊಣಿ ಸೊಸುಂಕ್ ಫುಡೆಂ ಸರ್ಲೆ. ಪವಿತ್ರ್ ಸಭೆಚ್ಯಾ ಚರಿತ್ರೆಂತ್ ಪರತ್ ಪರತ್ ಅಸಲೆ ಸಂದರ್ಭ್ ಉದೆಲ್ಯಾತ್. ಪಾಟ್ಲ್ಯಾ 2000 ವರ್ಸಾ೦ನಿ ಪವಿತ್ರ್ ಸಭಾ ಸಬಾರ್ ಅನ್ವಾರಾಂಕ್ ಒಳಗ್ ಜಾಲ್ಲೆವೆಳಿಂ, ನವಿ ಹುಮೆದ್ ಆನಿ ನವೊ ಭರ್ವಸೊ ಜಿವಂತ್ ಜೆಜುಥಂಯ್ ಜೊಡುನ್, ಭಾವಾರ್ಥ್ಯಾಚ್ಯಾ ಭದ್ರ್ ಬುನ್ಯಾದಿಚೆರ್ ಘಟ್ ರಾವ್ಲ್ಯಾ. ಜಿವಂತ್ ಜೆಜುಚ್ಯಾ ಸಕ್ತೆಚೆರ್ ಆಮ್ಚೊ ಭಾವಾರ್ಥ್ ಥಿರ್ ಕರುನ್, ಹೊ ಭರ್ವಸೊ ಆಮ್ಚ್ಯಾ ಕಾಳಾರ್ ಜಿವೊ ದವರ್ಚೆ೦ ಆಮ್ಚೆಂ ಕರ್ತವ್ಯ್ ಜಾವ್ನಾಸಾ.
ದೆವಾನ್ ತುಮ್ಕಾಂ ಕಸಲ್ಯಾ ಭರ್ವಶ್ಯಾಕ್ ಆಪಯ್ಲ್ಯಾಂತ್ ಮ್ಹಣ್ ತುಮಿ ಸಮ್ಜಾಜಾಯ್ (ದುಸ್ರೆಂ ವಾಚಪ್)
ಸಂಸಾರಾನ್ ದಿಂವ್ಚೊ ಭರ್ವಸೊ ತಾತ್ಕಾಲಿಕ್, ಥೊಡ್ಯಾಚ್ ಕಾಳಾಚೊ ಪುಣ್ ದೆವಾಥಂಯ್ ಆಮ್ಕಾಂ ಆಸಾ ತೊ ಭರ್ವಸೊ ಶಾಶ್ವತ್ ಆನಿ ಸಾಸ್ಣಿಕ್. ಅಸಲ್ಯಾ ಭರ್ವಸ್ಯಾಕ್ ಆಮ್ಕಾಂ ಆಪವ್ಣೆಂ ಮೆಳ್ಳಾಂ ಮ್ಹಣ್ತಾ ಸಾಂ. ಪಾವ್ಲ್ (ಎಫೆಜ್. 1:18). ಅಸಲೊ ಭರ್ವಸೊಚ್ ಆಮ್ಚಿ ವರ್ತಿ ಗ್ರೇಸ್ತ್ಕಾಯ್ ಆನಿ ಹ್ಯಾ ಭರ್ವಸ್ಯಾಂತ್ ಜಿಯೆತೆಲ್ಯಾಂಕ್ ದೆವಾಚಿ ಪದ್ವಿ ಆನಿ ಸಕತ್ ಧಾರಾಳ್ ಮಾಫಾನ್ ಲಾಭ್ತಾ (ಎಫೆಜ್. 1:19). ಹ್ಯಾ ಭರ್ವಸ್ಯಾಚೆಂ ಮೂಳ್ ಜಾವ್ನಾಸಾ ಸೊಮ್ಯಾ ಜೆಜುಚೆಂ ಪುನರ್ಜಿವಂತ್ಪಣ್. ಹ್ಯಾ ಭರ್ವಸ್ಯಾಚೆಂ ಕಾರಣ್ ಜಾವ್ನಾಸಾ ಜಿವಂತ್ ಜೆಜಥಂಯ್ ಆಮಿ ಸಾಸ್ಣಾಕ್ ಜಿಯೆತೆಲ್ಯಾಂವ್, ತಾಚ್ಯಾ ರಾಜಾಂತ್ ಆಮಿ ಸದಾಂಚ್ ಜಿವಿಂ ಆಸ್ತೆಲ್ಯಾಂವ್, ತಾಚೆಥಂಯ್ ಆಮಿ ಸಂಪೂರ್ಣತೆಕ್ ಪಾವ್ತೆಲ್ಯಾಂವ್ ಮಳ್ಳಿ ಆಮ್ಚಿ ಪಾತ್ಯೆಣಿ (ಎಫೆಜ್. 1:20-23). ಅಸಲ್ಯಾ ಥಿರ್ ಪಾತ್ಯೆಣೆಂತ್ ಜಿಯೆತೆಲ್ಯಾಂಕ್ ಆಮ್ಕಾಂ, ಆಮ್ಚ್ಯಾ ಭೊವಾರಿಂ ಆಸ್ಚ್ಯಾ ಗೊಂದೊಳಾಚ್ಯಾ ಪರಿಸ್ಥಿತೆಂತ್ ಸೊಮ್ಯಾಚ್ಯಾ ಜಿವಂತ್ಪಣಾಚಿ ಸಕತ್ ದಾಕಂವ್ಕ್ ಏಕ್ ಆವ್ಕಾಸ್. ಕೆದಾಳಾ ಹೊ ಆವ್ಕಾಸ್ ಆಮಿ ಗಳ್ಸಿತಾಂವ್ ಖರೆಂಚ್ ಆಮಿ ಸೊಮ್ಯಾಚ್ಯಾ ಶುಭ್ವಾರ್ತೆಚೆ ಸಾಕ್ಷಿ ಜಾತಾಂವ್ (ಮಾರ್ಕ್. 16:15)
ಮಾಗ್ಣೆಂ: ಸೊಮ್ಯಾ ಜೆಜು ತುಜ್ಯಾ ಶಿಸಾಂಕ್ ತುಜ್ಯೆ ಸಕ್ತೆನ್ ಭರುನ್ ತಾಂಕಾ ತುಜ್ಯೆ ಖರೆ ಸಾಕ್ಷಿ ಕೆಲೆಯ್. ತುಜ್ಯೆ ಸಕ್ತೆಚೆರ್ ಪಾತ್ಯೆವ್ನ್, ಧೈರಾನ್ ಸರ್ವ್ ಸಮಸ್ಯಾಂಕ್ ಫುಡ್ ಕರುಂಕ್ ಆನಿ ತುಜ್ಯಾ ಜಿವಂತ್ಪಣಾಥಂಯ್ ಭರ್ವಸೊ ಜಿವಾಳ್ ದವರುಂಕ್ ಮ್ಹಾಕಾ ತುಜಿ ಕುರ್ಪಾ ದೀ. ಆಮೆನ್.
- ಬಾ| ವಲ್ಟಿ, ಎಸ್ವಿಡಿ