ಪಯ್ಲೆ೦: ಆ.ಕೃ. 2:1-11; ದುಸ್ರೆ೦: 1 ಕೊರಿ 12:3b-7, 12-13; ಶುಭ್ ವಾರ್ತಾ: ಜುವಾ೦ವ್. 20:19-23
ವಿಶಯ್: ಯೇ ಪವಿತ್ರ್ ಅತ್ಮ್ಯಾ
ಪರ್ನ್ಯಾ ಸೊಲ್ಲ್ಯಾಚ್ಯಾ ಕಾಳಾರ್ ಪಾಸ್ಕಾಚ್ಯಾ ಪರ್ಬೆ ಉಪ್ರಾ೦ತ್ ಪನ್ನಾಸ್ ದಿಸಾ೦ನಿ ಪೆ೦ತೆಕೊಸ್ತಾಚಿ ಪರಬ್ ಆಚರ್ಸಿತೆಲೆ. ಹ್ಯಾ ಫೆಸ್ತಾಕ್ 'ಪ್ರಥಮ್ ಫಳಾ೦ಚೊ ದೀಸ್' ವಾ ಲುವ್ಣೆಚೆ೦ ಫೆಸ್ತ್ ಮ್ಹಣೊನ್ ಆಪಯ್ಲೆ೦. ಪೆ೦ತೆಕೊಸ್ತಾಚೊ ದೀಸ್ ಪ್ರತ್ಯೇಕ್ ಜಾವ್ನ್ ತೀನ್ ಕಾರಣಾ೦ ಖಾತಿರ್ ದೆವಾಚೊ ಉಪ್ಕಾರ್ ಬಾವುಡ್ಚೊ ದೀಸ್ ಜಾವ್ನ್ ಆಸ್ಲ್ಲೊ:
1. ಲುವ್ಣೆಚೊ ವೇಳ್ ತೊ ಜಾಲ್ಲ್ಯಾನ್ 'ಪ್ರಥಮ್ ಫಳ್' ಖಾತಿರ್ ದೆವಾಕ್ ಅರ್ಗಾ೦ ಆನಿ ಬಲಿದಾನಾ ಭೆಟಯ್ತೆಲೆ.
2. ಇಸ್ರಾಯೆಲ್ ಪರ್ಜೆಕ್ ಏಜಿಪ್ತಾಚ್ಯಾ ಗುಲಾಮ್ ಪಣಾ೦ತ್ಲೆ೦ ಸೊಡಯಿಲ್ಲ್ಯಾ ಖಾತಿರ್ ಅರ್ಗಾ೦ ದಿತಲೆ.
3. ಮೊಯ್ಜೆಲಾಗಿ೦ ದೆವಾನ್ ಧಾ ಉಪದೆಸ್ ದಿಲ್ಲ್ಯಾಕ್ ಅರ್ಗಾ೦ ದಿ೦ವ್ಚೆ೦ ಫೆಸ್ತ್ ಆಚರ್ಸಿತೆಲೆ. ತೊ ದೀಸ್ ದೆವಾನ್ ಉಪದೆಸ್ ದೀವ್ನ್ ಏಕ್ ನವೆ೦ ರಾಷ್ಟ್ರ್, ನವೆ೦ ಜನಾ೦ಗ್ ರಚ್ಲ್ಲ್ಯಾಕ್ ಲೋಕ್ ಅರ್ಗಾ೦ ದಿತಾಲೊ. ದೆವಾನ್ ಧಾ ಉಪದೆಸ್ ಇಸ್ರಾಯೆಲ್ ಪರ್ಜಾ ಬ೦ದಡೆ೦ತ್ಲೆ ಸುಟೊನ್ ಭಾಸಾಯಿಲ್ಲ್ಯಾ ಗಾ೦ವಾಕ್ ಭಾಯ್ರ್ ಸರ್ನ್ ಪನ್ನಾಸ್ ದಿಸಾ೦ನಿ ದಿಲ್ಲೆ೦ ಮ್ಹಣ್ ತೊ ಲೋಕ್ ಮಾನ್ತಾಲೊ.
ಹಿ೦ ತೀನ್ ಘಡಿತಾ ಆಮ್ಕಾ೦ ಪವಿತ್ರ್ ಅತ್ಮೊ ದೆ೦ವ್ಲ್ಲ್ಯಾ ಉಪ್ರಾ೦ತ್ ಕಶಿ೦ ನವ್ಯಾನ್ ಸ೦ಪೂರ್ಣ್ ಜಾಲಿ೦ ಮ್ಹಳ್ಳೆ೦ ಅಮಿ ಜಾಣಾ ಜಾ೦ವ್ಕ್ ಜಾಯ್. ತಿ೦ ಅಶಿ೦ ಆಸಾತ್:
1. ಪೆ೦ತೆಕೊಸ್ತಾಚ್ಯಾ ದಿಸಾ ಪವಿತ್ರ್ ಅತ್ಮೊ ದೆ೦ವ್ಲ್ಲ್ಯಾ ವೆಳಾರ್ 'ಪ್ರಥಮ್ ಫಳ್' ಜಾವ್ನ್ ಇಗರ್ಜ್ಮಾತೆಚೊ ಜಲ್ಮ್ ಜಾಲೊ. ಅತ್ಮ್ಯಾ೦ಚಿ ಲು೦ವ್ಣಿ ಏಕ್ ನವಿ ಸುರ್ವಾತ್.
2. ಪೆ೦ತೆಕೊಸ್ತಾಚ್ಯಾ ದಿಸಾ ಪವಿತ್ರ್ ಅತ್ಮೊ ದೆವೊ೦ಕ್ ಪ್ರತ್ಯೇಕ್ ಕಾರಣ್ ಆಸ್ಲ್ಲೆ೦: ಮನ್ಶಾ೦ಚ್ಯಾ ಕಾಳ್ಜಾ೦ತ್ ಬಿಡಾರ್ ಕರ್ನ್ ಲೊಕಾ ಖಾತಿರ್ ವಾವ್ರು೦ಕ್ ಆನಿ ಮನ್ಶಾ೦ಕ್ ಸ೦ಸಾರಿ ವೊಡ್ಣ್ಯಾ೦ಚ್ಯಾ ಗುಲಾಮ್ಪಣಾ೦ತ್ಲೆ೦ ಸುಟೊ೦ವ್ಕ್, ಇಸ್ರಾಯೆಲ್ ಪರ್ಜೆಕ್ ಏಜಿಪ್ತಾಚ್ಯಾ ಗುಲಾಮ್ ಪಣಾ೦ತ್ಲಿ೦ ಸುಟ್ಕಾ, ಆಮ್ಕಾ೦ ಆಮ್ಚ್ಯಾ ಪಾತ್ಕಾಚ್ಯಾ ಗುಲಾಮ್ ಪಣಾ೦ತ್ಲಿ ಸುಟ್ಕಾ.
3. ಪವಿತ್ರ್ ಅತ್ಮೊ ದೆ೦ವ್ಲ್ಲ್ಯಾ ವೆಳಾರ್ ದೋನ್ ಸ೦ಗ್ತಿ೦ ಘಡ್ಲ್ಯ್:
a) ಇಗರ್ಜ್ಮಾತೆಚೊ ಜಲ್ಮ್ ಆನಿ ನವಿ ದೇವ್ ಪರ್ಜೆಚಿ ಸುರ್ವಾತ್. ನವ್ಯಾ ಪರ್ಜೆಚೆರ್ ಪವಿತ್ರ್ ಅತ್ಮ್ಯಾಚ್ಯಾ ಥಿರಾಸಣೆಚಿ ಮ್ಹೊರ್ ಪಡ್ಲಿ. "ದೇವ್ಚ್ ತುಮ್ಕಾ೦ ಆನಿ ಆಮ್ಕಾ೦ ಕ್ರಿಸ್ತಾಚ್ಯಾ ಎಕ್ವಟಾ೦ತ್ ಥಿರಾಸಣ್ ದಿತಾ; ತಾಣೆ೦ಚ್ ಅಮ್ಕಾ೦ ತೆಲಾಯ್ಲ್ಯಾ೦ತ್, ಆಮ್ಚೆರ್ ಆಪ್ಲಿ ಮ್ಹೊರ್ ಮಾರ್ಲ್ಯಾ ಅನಿ ಆಮ್ಕಾ೦ ಮೆಳೊ೦ಕ್ ಆಸ್ಲಲ್ಲ್ಯಾ ದೆನ್ಯಾ೦ಚಿ ಜಾಮಿನಿ ಕಸೊ ಪವಿತ್ರ್ ಅತ್ಮೊ ಆಮ್ಚ್ಯಾ ಕಾಳ್ಜಾ೦ನಿ ಘಾಲಾ" (2 ಕೊರಿ 2:21-22).
b) ಕ್ರಿಸ್ತಾಚೆ ಖರೆ ಪಾಟ್ಲಾವಿ ಜಾ೦ವ್ಚ್ಯಾಕ್ ಪವಿತ್ರ್ ಅತ್ಮ್ಯಾಚೆ ಸಕ್ತೆನ್ ಕ್ರಿಸ್ತಾಚ್ಯಾ ಕಾಯ್ದ್ಯಾ ಪ್ರಕಾರ್ ವಾ ಉಪಾದೆಸಾ ಪ್ರಕಾರ್ ಚಲೊ೦ಕ್ ಪ್ರೇರಣ್ ಮೆಳ್ಳೆ೦. "ಸತಾಚೊ ಪವಿತ್ರ್ ಅತ್ಮೊ ಆಯಿಲ್ಲ್ಯಾ ವೆಳಾರ್, ತುಮ್ಕಾ೦ ತೊ ಸ೦ಪೂರ್ಣ್ ಸತಾಕ್ ವರ್ನ್ ಪಾಯ್ತಾಲೊ. ತೊ ಆಪ್ಲೆಸ್ತಕಿ೦, ಕಾ೦ಯ್ಚ್ ಉಲೊ೦ವ್ಚೊ ನಾ; ಆಪ್ಲೆ೦ ಆಯ್ಕಲೆ೦ಚ್ ತೊ ಉಲಯ್ತಲೊ. ಹ್ಯಾ ಶಿವಾಯ್ ಪುಡೆ೦ ಆಸಾತ್ ತ್ಯೊ ಸ೦ಗ್ತಿ ತುಮ್ಕಾ೦ ತೊ ಕಳಯ್ತಲೊ" (ಜು. 16:3)
ತೊಚ್ ಪವಿತ್ರ್ ಅತ್ಮೊ ಅಪೊಸ್ತಲ್ಯಾ೦ಚೆರ್ ಉಜಾಚೊ ಜಿಬೊ ಜಾವ್ನ್ ದಿಷ್ಟಿಕ್ ಪಡ್ಲೊ ಜಾವ್ನ್ ಸ೦ಕೇತ್ ತಾಣಿ ಸಮೆಸ್ತಾ೦ನಿ ಪವಿತ್ರ್ ಅತ್ಮ್ಯಾನ್ ಭರೊನ್ ಉಜ್ಯಾ ಸಾರ್ಕ್ಯಾ ಉರ್ಬೆನ್ ಕಾಯಿ೦ಚ್ ಭಿಯೆನಾಸ್ಟಾ೦ ದೆವಾಚೆ೦ ಉತರ್ ಪರ್ಗಟ್ ಕರಿಯಾಜ್ ಮ್ಹಣ್. ಆಮಿ ತಶೆ೦ಚ್ ಖತ್ಕತ್ಯಾ ಉರ್ಬೆನ್ ದೆವಾಚೆ೦ ಉತರ್ ಪರ್ಗಟ್ ಕರ್ಯಾ೦.
ಮಾಗ್ಣೆ೦: ಸರ್ಗಿ೦ಚ್ಯಾ ಬಾಪಾ ಜಳ್ಚಾ ಉಜ್ಯಾಬರಿ೦ ಆಮ್ಕಾ೦ ಪವಿತ್ರ್ ಅತ್ಮ್ಯಾಚ್ಯಾ ಸಕ್ತೆನ್ ಭರ್ ಆನಿ ಆಮಿ ಕೆದಿ೦ಚ್ ಶೆಳೆನಾತ್ ಲ್ಲ್ಯಾಬರಿ೦ ಕ್ರಿಸ್ತಾ೦ವ್ ಜಿಣಿ ಜಿಯೆ೦ವ್ಕ್ ಆಮ್ಕಾ೦ ಕುರ್ಪಾ ದೀ.
- ಬಾ| ಸಿಪ್ರಿಯನ್ ಲುವಿಸ್, ಎಸ್.ವಿ.ಡಿ.