ದೈವಿಕ್ ಸ೦ದೇಶ್

ಭುರ್ಗ್ಯಾಂನಿ ವ್ಹಡಿಲಾಂಚ್ಯಾ ಉತ್ರಾಂಕ್ ಕಾನ್ ದೀನಾಸ್ತಾನಾ ಅಪ್ಲಿಚ್ ಖುಶಿ ಕರುನ್ ಜಿಣ್ಯೆಂತ್ ದೆಸ್ವಾಟ್ ಜಾಲ್ಲಿಂ ಘಡಿತಾಂ ಆಮಿಂ ಸಭಾರ್ ಪಳೆಲ್ಯಾಂತ್. ಹಾಂವ್ ಮ್ಹಾಕಾ ಜಾಯ್ ತೆಂ ಕರ್ತಾಂ, ತುವೆಂ ಮ್ಹಾಕಾ ಸಾಂಗ್ಚಿ ಗರ್ಜ್ ನಾ ಮ್ಹಳ್ಳೆಂ ಗರ್ವಾಚೆಂ, ಹಂಕಾರಾಚೆಂ ಚಿಂತಪ್ ಎಕ್ಲ್ಯಾಚ್ಯಾ ನಾಸಾಕ್ ಕಾರಣ್ ಜಾತಾ. ಅಸಲ್ಯಾ ಚಿಂತ್ವಾಚೊ ಮನಿಸ್ ಆಪ್ಲೊಚ್ ಘೊಂಡ್ ಖೊಂಡ್ತಾ ಆನಿ ತ್ಯಾ ಫೊಂಡಾಂತ್ ಅಪ್ಲಾಕ್‌ಚ್ ಪುರ್‍ತಾ ಮ್ಹಣ್ತಾತ್ ಜಾಣಾರಿ. ಪವಿತ್ರ್ ಪುಸ್ತಕ್ ಜಾಗ್ರಣ್ ದೀವ್ನ್ ಮ್ಹಣ್ತಾ - "ಗರ್ವಿಷ್ಟ್ ಮನ್ಶ್ಯಾಚೆ ಪಿಡೆಕ್ ಒಕತ್ ನಾ, ಖೊಟೆಪಣಾಚ್ಯಾ ಝಾಡಾನ್ ತಾಚೆ ಭಿತರ್ ಪಾಳಾಂ ಘೆತ್ಲ್ಯಾಂತ್" (ಸಿರಾಖ್. 3:28). ಹ್ಯಾಚ್ ಖಾತಿರ್ ಕೀರ್ತನ್‌ಗಾರ್ ದೆವಾಚೆ ಆದೇಶ್ ಸ್ವೀಕಾರ್ ಕರುನ್ ಆಪ್ಲೆಂ ಕಾಳಿಜ್ ಉಘಡುನ್ ಸಾಂಗ್ತಾ - "ತುಜೆ ಆದೇಶ್ ಮ್ಹಜೊ ಸಂತೊಸ್, ತೆ ಮ್ಹಾಕಾ ಬೂದ್ ದಿತಾತ್. ಹಾಂವ್ ಧುಳಿಂತ್ ಪಡುನ್ ಆಸಾಂ, ತುಜ್ಯಾ ಉತ್ರಾನ್ ಮ್ಹಾಕಾ ಜಿವಿತ್ ದಿ." (ಕೀರ್ತನ್. 119:24-25)

ಸಭಾರ್ ರಿತಿಚ್ಯಾ 'ಆವಾಜಾ'ನ್ ಭರೊನ್ ಆಸ್‌ಲ್ಲ್ಯಾ ಹ್ಯಾ ಸಂಸಾರಾಂತ್ ದೆವಾಚ್ಯಾ ಉತ್ರಾಂಕ್, ತಾಚ್ಯಾ ತಾಳ್ಯಾಕ್ ಚೀತ್ ದಿಂವ್ಚೆಂ ಕಷ್ಟಾಂಚೆಂ ಜಾಲಾಂ. ಸಂಸಾರಿ ಗ್ರೇಸ್ತ್‌ಕಾಯ್, ನಾಂವ್, ಪದ್ವಿ, ಅಧಿಕಾರ್ ಸರ್ವಸ್ವ್ ಮ್ಹಣ್ ಚಿಂತುನ್ ದೆವಾಚ್ಯಾ ಉತ್ರಾಕ್ ಕೊನ್ಶ್ಯಾಕ್ ಲೊಟ್ಚ್ಯಾ ಮನ್ಶ್ಯಾಕ್, ಹರ್ಯೆಕ್ಲ್ಯಾಂಚೆ ಬರೆಪಣ್ ಆಶೆಂವ್ಚೊ ಕಾಕುಳ್ತಾರ್ ಬಾಪ್ ಆಪಯ್ತಾ ಆನಿ ಮ್ಹಣ್ತಾ: ಮ್ಹಜ್ಯಾ ಪುತಾ, ಆಯ್ಕ್ ಆನಿ ಮ್ಹಜ್ಯಾ ಉತ್ರಾಂಚೊ ಸ್ವೀಕಾರ್ ಕರ್; ತೆದ್ನಾ ತುಜ್ಯಾ ಜಿವಿತಾಚಿಂ ವರ್ಸಾ೦ ವಾಡ್ತೆಲಿಂ. ಮ್ಹಜ್ಯಾ ಉತ್ರಾಂಕ್ ಚೀತ್ ದಿ, ತಿಂ ತುಜ್ಯಾ ದೊಳ್ಯಾಂ ಮುಕ್ಲಿಂ ಪಯ್ಸ್ ಕರಿನಾಕಾ, ತುಜ್ಯಾ ಕಾಳ್ಜಾ ಭಿತರ್ ತಿಂ ದವರ್. ಕಿತ್ಲ್ಯಾಕ್ ಜಾಂಕಾಂ ತಿಂ ಮೆಳ್ತಾತ್ ತಾಂಕಾ ತಿಂ ಜಿವಿತ್, ತಾಂಚೆ ಸಗ್ಳೆ ಕುಡಿಕ್ ತಿಂ ಭಲಾಯ್ಕಿ. (ಮಣ್ಣ್ಯೊ. 4:10, 20-22)

"ಆಜ್ ತುಮಿಂ ದೆವಾಚೊ ತಾಳೊ ಆಯ್ಕತಾತ್ ಜಾಲ್ಯಾರ್, ತುಮ್ಚಿಂ ಕಾಳ್ಜಾಂ ಧಾರುಣ್ ಕರಿನಾಕಾತ್" (ಹೆಬ್ರೆವ್. 4:7)

ತುಮ್ಚೊ ಮೊಗಾಚೊ

ಬಾಪ್ ವಲ್ಟಿ ಎಸ್.ವಿ.ಡಿ.