ಥೊಡ್ಯಾ ದಿಸಾಂ ಪಯ್ಲೆಂ, ಏಕ್ ಭಾವ್ ಮ್ಹಾಕಾ ಮೆಳ್ಳೊ ಆನಿ ಮ್ಹಣಾಲೊ, ಸಂಸಾರಾಂತ್ ಮನಿಸ್ ದೆಂವ್ಚಾರಾಕ್ ಕಿತ್ಯಾಕ್ ಭಿಯೆತಾ? ದೆಂವ್ಚಾರ್ ಮ್ಹಳ್ಳೊ ನಾಂ ನಯಿಂಗೀ? ದೆಂವ್ಚಾರಾಕ್ ಆಮಿಂಚ್ ಕರ್ನ್ ಘೆತ್ಲಾ ಮ್ಹಣಾಲೊ ತೊ. ತೆದ್ನಾಂ ಹಾಂವೆಂ ತಾಕಾ ವಿಚಾರ್ಲೆ೦, ತರ್ ಹ್ಯಾ ಸಂಸಾರಾಚೊ ಅಧಿಪತಿ ಕೋಣ್? ತಾಕಾ ಜಾಪ್ ದೀವ್ನ್ ತೊ ಮ್ಹಣಾಲೊ, ದೇವ್ ಆನಿ ಕೋಣ್? ಪರ್ತ್ಯಾನ್ ಹಾಂವೆ ತಾಕಾ ವಿಚಾರ್ಲೆಂ, ಕೋಣ್ ದೇವ್? ಮುಖಾರ್ಸುನ್ ತೊ ಮ್ಹಣಾಲೊ, ಹೊ ಸಂಸಾರ್ ರಚ್ಲ್ಲೊ ರಚ್ನಾರ್ ದೇವ್. ದೆವಾನ್ ಹೊ ಸಂಸಾರ್ ರಚ್ಲಾ ತೆಂ ಖರೆಂ; ತರ್ ದೇವ್ಚ್ಚ್ ಆಪ್ಣೆಂ ರಚ್ಲ್ಲೊ ಸಂಸಾರ್ ನಾಸ್ ಕರ್ತಾ ಕಿತ್ಯಾಕ್? ಹ್ಯಾ ಸವಾಲಾಕ್ ತಾಚೆ ಕಡೆನ್ ಜಾಪ್ ನಾತ್ಲ್ಲಿ. ವ್ಹಯ್ ಭಾವಾ ಭಯ್ಣಿಂನೊ, ಆಮ್ಕಾಂ ಜಾಯ್ತ್ಯಾ ಜಾಣಾಂಕ್ ಸತ್ ಕಳಿತ್ ನಾಂ, ದೆವಾಚೊ ಆನಿ ಆಮ್ಚೊ ದುಸ್ಮಾನ್ ಹೊ ಸಂಸಾರ್ ನಾಸ್ ಕರ್ತಾ ಮ್ಹಣ್ ಆಮಿ ನೆಣಾಂವ್. ದೆವಾಚೆಂ ಉತಾರ್ಚ್ಚ್ ಆಮ್ಕಾಂ ಹ್ಯಾ ವಿಶಿಂ ಖರಿ ಸಮ್ಜಣಿ ದಿತಾ ತೆಂ ಆಮಿಂ ಪಳೆವ್ಯಾಂ.
ಸಂಸಾರಾಚೊ ಅಧಿಪತಿ
ಸಾಂ ಜುವಾಂವ್ಚ್ಯಾ ಪಯ್ಲ್ಯಾ ಪತ್ರಾಂತ್ ಆಮಿ ವಾಚ್ತಾಂವ್, "ಸಗ್ಳೊ ಸಂಸಾರ್ಚ್ ಸೈತಾನಾಚೇ ಪದ್ವೆಖಾಲ್ ಆಸಾ" (1ಜುವಾಂವ್ 5:19) ತರ್ ಹಾಚೊ ಅರ್ಥ್ ಕಿತೆಂ? ದೆವಾನ್ ಹೊ ಸೊಭಿತ್ ಸಂಸಾರ್ ರಚುನ್, ಮ್ಹನ್ಶಾಚ್ಯಾ ಅಧಿನ್ ಕೆಲೊ, ಪೂಣ್ ಮ್ಹನಿಸ್ ಹೊ ಅಧಿಕಾರ್ ಹೊಗ್ಡಾಯ್ತಾ. ಉತ್ಪತ್ತಿ ಗ್ರಂಥಾಂತ್ ಆಮಿ ವಾಚ್ತಾಂವ್, ದೆವಾನ್ ಮ್ಹನ್ಶಾಚೆರ್ ಆಶಿರ್ವಾದ್ ಘಾಲೊ ಆನಿ ಮ್ಹಳೆಂ "ವಾಡಾ ಆನಿ ಚಡಾ ಆನಿ ಪೃಥ್ವಿ ಭರಾ, ಆನಿ ತಿ ತುಮ್ಚೆ ಆಧೀನ್ ಹಾಡಾ. ದರ್ಯಾಚ್ಯಾ ಮಾಸ್ಳ್ಯಾಂಚೆರ್, ಅಂತ್ರಾಳಾಚ್ಯಾ ಸುಕ್ಣ್ಯಾಂಚೆರ್ ಆನಿ ಪೃಥ್ವೆಚೆರ್ ಜಿಯೆತಲ್ಯಾ ಸರ್ವ್ ಮೊನ್ಜಾತಿಂಚೆರ್ ಅಧಿಕಾರ್ ಚಲಯಾ." (ಉತ್ಪತ್ತಿ. 1:28). ಪೂಣ್ ಮ್ಹನಿಸ್ ದೆವಾಚೆರ್ ಉಪ್ರಾಟ್ಲೊ ಆನಿ ಸೈತಾನಾಕ್ ಖಾಲ್ ಜಾಲೊ. ದೆಕುನ್ ದೆವಾನ್ ಮ್ಹನ್ಶಾಕ್, ಸಂಸಾರಾಚೆರ್ ದಿಲ್ಲೊ ಅಧಿಕಾರ್ ತಾಣೆಂ ಹೊಗ್ಡಾಯ್ಲೊ ಆನಿ ದೆಂವ್ಚಾರಾಕ್ ತೊ ಖಾಲ್ ಜಾಲೊ. ದೆಕುನ್, ದೆಂವ್ಚಾರಾಚೊ ಗುಲಾಮ್ ಜಾಲೊ ಆನಿ ದೆಂವ್ಚಾರ್ ಹ್ಯಾ ಸಂಸಾರಾಚೊ ಅಧಿಪತಿ ಜಾಲೊ. ದೆಕುನ್ಂಚ್ ದೆಂವ್ಚಾರ್ ಜೆಜುಕ್ ಮ್ಹಣ್ತಾ "ಹ್ಯಾ ಸರ್ವಾಂಚೊ ಅಧಿಕಾರ್ ಆನಿ ತಾಂಚೊ ವೈಭವ್ ಹಾಂವ್ ತುಕಾ ದಿತಾಂ; ಕಿತ್ಯಾಕ್ ಹೊ ಅಧಿಕಾರ್ ಮ್ಹಜೇ ಸ್ವಾಧೀನ್ ಸೊಡ್ಲಾ ಆನಿ ಮ್ಹಾಕಾ ಖುಶಿ ಆಸಾ ತಾಕಾ ಹಾಂವೆಂ ತೊ ದಿವ್ಯೆತ್" (ಲೂಕ್. 4:6).
ದೆಕುನ್ ಪವಿತ್ರ್ ಪುಸ್ತಕಾಂತ್ ಆಮಿ ಜಾಯ್ತ್ಯಾ ಕಡೆನ್ ವಾಚ್ತಾಂವ್, ಸಬಾರ್ ಜಾಗ್ಯಾನಿಂ ಅಶೆಂ ಬೊರೈಲಾಂ ಕೀ ಸೈತಾನ್ ವಾ ದೆಂವ್ಚಾರ್ ಹ್ಯಾ ಸಂಸಾರಾಚೊ ಅಧಿಪತಿ ಜಾವ್ನಾಸಾ ಮ್ಹಣೊನ್. ಜೆಜು ಆಪ್ಲ್ಯಾ ಶಿಸಾಂಕ್ ಸಾಂಗ್ತಾ, "ಹ್ಯಾ ಸಂಸಾರಾಚಿ ಝಡ್ತಿ ಜಾಂವ್ಚೊ ವೇಳ್ ಹೊ. ಆತಾಂಚ್ ಹ್ಯಾ ಸಂಸಾರಾಚ್ಯಾ ಅಧಿಪತಿಕ್ ಲೊಟುನ್ ಭಾಯ್ರ್ ಘಾಲ್ತಲೆ. ಆನಿ ಮ್ಹಾಕಾ ಧರ್ಣಿರ್ ಥಾವ್ನ್ ಊಂಚ್ ಉಭಾರ್ಲಲ್ಯಾ ವೆಳಾರ್ ಸರ್ವ್ ಮನ್ಶಾಂಕ್ ಹಾಂವ್ ಮ್ಹಜೇ ಥಂಯ್ ವೊಡ್ತಲೊಂ" (ಜುವಾಂವ್. 12:31-32). ಪರ್ತ್ಯಾನ್ ಜೆಜುನ್ ಆಪ್ಲ್ಯಾ ಶಿಸಾಂಕ್ ಮ್ಹಳೆಂ "ಆತಾಂ ಹ್ಯಾ ಸಂಸಾರಾಚೊ ಅಧಿಪತಿ ಯೆಂವ್ಕ್ ಲಾಗಿಂ ಜಾಲಾ ಆಸ್ತಾಂ ಅನಿಕೀ ಚಡ್ ವೇಳ್ ಹಾಂವ್ ತುಮ್ಚೇಲಾಗಿಂ ಉಲಂವ್ಚೊ ನಾಂ. ತಾಕಾ ಮ್ಹಜೇ ವಯ್ರ್ ಕಸಲೊಚ್ ಅಧಿಕಾರ್ ನಾ" (ಜುವಾಂವ್. 14:30). ಹೊ ಸಂಸಾರಾಚೊ ಅಧಿಪತಿ ಕೋಣ್? ಜೆಜು ಕೊಣಾ ವಿಶ್ಯಾಂತ್ ಉಲೈತಾ?, ಪರ್ತ್ಯಾನ್ ಆಮಿ ವಾಚ್ತಾಂವ್ "ತೊ ಯೆತಚ್, ಪಾತ್ಕಾ ವಿಶ್ಯಾಂತ್, ನಿತಿ ವಿಶ್ಯಾಂತ್ ಆನಿ ನಿತಿ ಫೈಸಲಾ ವಿಶ್ಯಾಂತ್ ಸಂಸಾರಾಕ್ ಗುನ್ಯಾಂವ್ಕಾರ್ ಕರ್ತಲೊ. ಪಾತ್ಕಾ ವಿಶ್ಯಾಂತ್, ಕಿತ್ಯಾಕ್ ಮ್ಹಾಕಾ ತಾಂಣಿಂ ಸತ್ಮಾನ್ಲೊನಾ. ನಿತಿ ವಿಶ್ಯಾಂತ್, ಕಿತ್ಯಾಕ್ ಹಾಂವ್ ಬಾಪಾಶಿಂ ವೆತಾಂ ಆನಿ ತುಮಿ ಮ್ಹಾಕಾ ಅನಿಕ್ ಪಳೆಂವ್ಚೆನಾಂತ್. ನಿತಿ ಫೈಸಲಾ ವಿಶ್ಯಾಂತ್, ಕಿತ್ಯಾಕ್ ಹ್ಯಾ ಸಂಸಾರಾಚ್ಯಾ ಅಧಿಕಾರ್ಯಾಂಚೆರ್ ಖ್ಯಾಸ್ತಿಚೆಂ ಫರ್ಮಾಣ್ ಪಡ್ಲಾಂ-ಹೆಂ ಸರ್ವ್ ತೊ ರುಜು ಕರ್ತಲೊ" (ಜುವಾಂವ್. 16:8-11). ಹೊ ಸಂಸಾರಾಚೊ ಅಧಿಪತಿ ಕೋಣ್ ಜಾವ್ನಾಸಾ? ವ್ಹಯ್ ತೊ ಆನಿ ಕೊಣೀಂ ನೈಂ. ತೊ ಹ್ಯಾ ಸಗ್ಳ್ಯಾ ಸಂಸಾರಾಕ್ ಆಡ್ ವಾಟೆಕ್ ವೊಡ್ತಾ ತೊ ದೆಂವ್ಚಾರ್ ವ ಸೈತಾನ್ ಜಾವ್ನಾಸಾ. ಹ್ಯಾ ವಿಶ್ಯಾಂತ್ ದೆವಾಚೆಂ ಉತಾರ್ ಆಮ್ಕಾಂ ಸಾರ್ಕಿ ಸಮ್ಜಣಿಂ ದಿತಾ.
ದೆವಾಚೊ ವಿರೋಧಿ
ಉಗ್ಡಾಪಣಾಚ್ಯಾ ಬುಕಾಂತ್ ಆಶೆಂ ಬರಯ್ಲಾಂ "ಉಪ್ರಾಂತ್ ಸರ್ಗಾರ್ ಏಕ್ ಝುಜ್ ಸುರು ಜಾಲೆಂ. ಮಿಂಗೆಲ್ ಆನಿ ತಾಚೆ ದೂತ್ ಮಹಾಸರ್ಪಾ ವಿರೋಧ್ ಝುಜಾಕ್ ದೆಂವ್ಲೆ. ಮಹಾಸರಪ್ ಆನಿ ತಾಚೆ ದೂತ್ಯೀ ಭರಾನ್ ಝುಜ್ಲೆ. ಪುಣ್ ಶೆಕಿಂ ಹೆ ಸಲ್ವಲೆ ಆನಿ ಸರ್ಗಾ ವಯ್ಲೊ ಜಾಗೊ ತಾಂಣಿಂ ಹೊಗ್ಡಾಯ್ಲೊ. ತ್ಯಾ ಮಹಾಸರ್ಪಾಕ್, ಮ್ಹಣ್ಜೆ ದೆಂವ್ಚಾರ್ ವಾ ಸೈತಾನ್ ಮ್ಹಣ್ತಾತ್ ತ್ಯಾ ಆನಿ ಸಗ್ಳ್ಯಾ ಸಂಸಾರಾಕ್ಚ್ ಆಡ್ ವಾಟೇಕ್ ವೊಡ್ತಾ ತ್ಯಾ ಆದಿಂಮಾಗಾಂಚ್ಯಾ ಸರ್ಪಾಕ್ ಭಾಯ್ರ್ ಉಡಯ್ಲೊ; ತಾಕಾ ಆನಿ ತಾಚ್ಯಾ ದುತಾಂಕ್ ಭುಮಿಕ್ ಶೆವ್ಟಿಲೆ" (ಜುವಾಂವ್ಕ್ ಕೆಲ್ಲೆಂ ಉಗ್ಡಾಪಣ್. 12:7-9). ಹೊಚ್ಚ್ ದೆಂವ್ಚಾರ್, ವ ಸೈತಾನ್, ಜಾಕಾ ಮ್ಹಣ್ತಾತ್ ಆದಿಂಮಾಗಾಂಚೊ ಮಹಾಸೊರೊಫ್, ಹ್ಯಾ ಸಂಸಾರಾಂತ್ ಆಪ್ಣಾಕ್ಚ್ಚ್ ದೇವ್ ಕರ್ನ್ ಹೊ ಸಂಸಾರ್ ನಾಸ್ ಕರ್ತಾ. ದೆಕುನ್ ಸಾಂ. ಪಾವ್ಲ್ ಕೊರಿಂಥ್ಗಾರಾಂಕ್ ಬೊರೊವ್ನ್ ಸಾಂಗ್ತಾ "ಆಮಿ ಪರ್ಗಟ್ ಕರ್ತಾ೦ವ್ ತಿ ಸುವಾರ್ತಾ ಥೊಡ್ಯಾಂಕ್ ಧಾಂಪ್ಲಲಿ ಆಸಾ ಜಾಲ್ಯಾರ್, ನಾಸಾಚೇ ವಾಟೇಕ್ ಲಾಗ್ಲಲ್ಯಾಂಕ್ ಮಾತ್ರ್ ತಿ ಧಾಂಪ್ಲಲಿ ಆಸಾ. ಸುವಾರ್ತೆಚೊ ಉಜ್ವಾಡ್ ತಾಂಣಿಂ ಪಳೆನಯೆ ಮ್ಹಣ್ ಹ್ಯಾ ಸಂಸಾರಾಚ್ಯಾ ಅಧಿಪತಿನ್ ತಾಂಚ್ಯೊ ಅವಿಶ್ವಾಸಿ ಮತಿ ಕುರ್ಡ್ಯೊ ಕೆಲ್ಯಾತ್. ಹಾಚೇ ವರ್ವಿಂ ದೆವಾಚೆಂಚ್ ಸಾರ್ಕೆಂ ಜಾವ್ನಾಸ್ಲಲ್ಯಾ ಕ್ರಿಸ್ತಾಚಿ ಮಹಿಮಾ ಸುವಾರ್ತೆಚ್ಯಾ ಪರ್ಜಳಾನ್ ಪರ್ಗಟ್ ಜಾಲ್ಲಿ ಪಳೆಂವ್ಕ್ ತೆ ಸಕನಾಂತ್" (2 ಕೊರಿಂಥ್ಗಾರಾಂಕ್. 4:3-4).
ಸೈತಾನ್೦ಚ್ ಹ್ಯಾ ಸಂಸಾರಾಚೊ ಅಧಿಪತಿ ಜಾವ್ನಾಸಾ. ತೊಚ್ಚ್ ಅಂತ್ರಾಳಾರ್ ಬೊಂವ್ಚಿಂ ವಾಯ್ಟ್ ಸಕತ್ ಜಾವ್ನಾಸಾ. ಎಫೆಜ್ಗಾರಾಂಕ್ ಬೊರೈಲ್ಯಾ ಪತ್ರಾಂತ್ ಸಾಂ. ಪಾವ್ಲ್ ಆಮ್ಕಾಂ ಸಾರ್ಕಿ ಸಮ್ಜಣಿಂ ದಿತಾ. ತೊ ಮ್ಹಣ್ತಾ "ತುಮ್ಚ್ಯಾ ಅಪ್ರಾಧಾಂ ಆನಿ ಪಾತ್ಕಾಂ ವರ್ವಿಂ ಏಕ್ ಕಾಳಾರ್ ತುಮಿ ಮೆಲ್ಲ್ಯಾತ್. ತವಳ್ ತುಮಿ ಹ್ಯಾ ಸಂಸಾರಾಚೇ ಖೊಟೇ ವಾಟೆನ್ ಚಲುನ್ ಆಸ್ಲ್ಲ್ಯಾತ್; ಅಂತ್ರಾಳಾ ವಯ್ಲ್ಯಾ ಅತ್ಮೀಕ್ ನಿವಾಸಿಯಾಂಚ್ಯಾ ಅಧಿಪತಿಕ್ ತಶೆಂಚ್ ದೆವಾಚೆಂ ಉತರ್ ಮಸ್ತುನ್ ಚಲ್ತಲ್ಯಾಂ ಮಧೆಂ ರಾಜ್ಯ್ ಕರ್ತಾ ತ್ಯಾ ಅತ್ಮ್ಯಾಕ್ ತುಮಿ ಖಾಲ್ ಜಾವ್ನ್ ಚಲ್ತಾಲ್ಯಾತ್." (ಎಫೆಜ್ಗಾರಾಂಕ್. 2:1-2). ದೆಕುನ್ ಆಮ್ಚೆಂ ಝುಜ್, ತ್ಯಾ ವಾಯ್ಟ್ ಸಕ್ತೆಂ ವಿರೋಧ್. ದೆಕುನ್೦ಚ್ ಪರ್ತ್ಯಾನ್ ಸಾಂ. ಪಾವ್ಲ್ ಎಫೆಜ್ಗಾರಾಂಕ್ ಬೊರೊವ್ನ್ ಮ್ಹಣ್ತಾ "ಆಮ್ಚೆಂ ಝುಜ್ ಫಕತ್ ಮನ್ಶಾಂ ವಿರೋಧ್ ನ್ಹಯ್. ಅಂತ್ರಾಳಾರ್ ಆಸ್ಲಲ್ಯಾ ಅಧಿಕಾರ್ಯಾಂ ಆನಿ ಅಧಿಪತಿಂ ವಿರೋಧ್; ಅಂಧ್ಕಾರಿ ಸಂಸಾರಾಚ್ಯಾ ರಾಜತ್ವಾಂ ಆನಿ ಪ್ರಭುತ್ವಾಂ ವಿರೋಧ್". (ಎಫೆಜ್ಗಾರಾಂಕ್. 6:12). ದೆವಾಚೆಂ ಉತಾರ್ ಸತ್, ದೆಕುನ್ ಸಾಂ. ಪೆದ್ರು ಆಮ್ಕಾಂ ಚತ್ರಾಯ್ ದಿತಾ ಆನಿ ಸಾಂಗ್ತಾ "ಜಾಗಿಂ ಜಾಯಾ, ಜಾಗ್ರುತ್ ರಾವಾ. ತುಮ್ಚೊ ವೈರಿ ದೆಂವ್ಚಾರ್ ಘರೊಜ್ ಘಾಲ್ತಲ್ಯಾ ಸಿಂಹಾಬರಿ ಕೊನಾಕ್ ಗಿಳ್ಚೆಂ ಮ್ಹಣ್ ಸೊಧುನ್ ಭೊಂವ್ತಾ. ಭಾವಾರ್ಥಾಂತ್ ಥಿರ್ ರಾವುನ್ ತಾಕಾ ತುಮಿ ಮುಖಾರ್ ರಾವಾ. ಸಂಸಾರಾಂತ್ ಸಗ್ಳ್ಯಾನ್ ಶಿಂಪಡ್ಲಲ್ಯಾ ತುಮ್ಚ್ಯಾ ಭಾವಾಂ ಭಯ್ಣಿಂಕ್ ತಸಲೆಚ್ ಕಷ್ಟ್ ಸೊಸುಂಕ್ ಆಸಾತ್ ಮ್ಹಣ್ ಉಗ್ಡಾಸ್ ದವರಾ." (1 ಪೆದ್ರು 5:8-9)
ದೆಂವ್ಚಾರ್ ವ ಸೈತಾನ್ ಮ್ಹಳ್ಳೊ ಆಸಾ
ತರ್ ಭಾವಾಂ ಭಯ್ಣಿಂನೊ, ಸೈತಾನ್ ಮ್ಹಳ್ಳೊ ಆಸಾ ಆನಿ ತಾಕಾ ಆನಿ ತಾಚಾ ದುತಾಂಕ್ ಭುಮಿಕ್ ಶೆವ್ಟಿಲೆಂ ಮ್ಹಣ್ ಉಗ್ಡಾಪಣಾಚಾ ಬುಕಾಂತ್ ಆಮಿ ಆಯ್ಕಾಲೆಂ. ಸರ್ಗಾರ್ ದೆವಾಚೊ ಜಾಗೊ ತಾಕಾ ಮೆಳೊಂಕ್ ನಾಂ ದೆಕುನ್ ತೊ ದೆವಾಚೆರ್ ಆನಿ ತಾಚ್ಯಾ ಭುರ್ಗ್ಯಾಂಚೆರ್ ಝುಜ್ ಮಾಂಡ್ತಾ ಮ್ಹಣ್ ಆಮಿ ವಾಚ್ತಾಂವ್. "ಹೆಂ ಪಳೆವ್ನ್ ಸ್ತ್ರಿಯೆಚೆರ್ ರಾಗಾನ್ ಪೆಟ್ಲಲೊ ಮಹಾಸರಪ್ ತಿಚ್ಯಾ ಹೆರ್ ಭುರ್ಗ್ಯಾಬಾಳಾಂಚೆರ್ ಮ್ಹಣ್ಜೆ ದೆವಾಚೆ ಉಪದೆಸ್ ಪಾಳ್ತಲ್ಯಾಂಚೆರ್ ಆನಿ ಜೆಜುಕ್ ಸಾಕ್ಸ್ ದಿತಲ್ಯಾಂಚೆರ್ ಝುಜುಂಕ್ ಭಾಯ್ರ್ ಸರ್ಲೊ; ಆನಿ ವಚುನ್ ದರ್ಯಾವೆಳೇರ್ ಉಬೊ ರಾವ್ಲೊ" (ಜುವಾಂವ್ಕ್ ಕೆಲ್ಲೆಂ ಉಗ್ಡಾಪಣ್. 12:17). ಸರ್ಗಾರ್ ದೆವಾಚಾ ಸಿಂಹಾಸನಾಚೆರ್ ಭೊಸೊಂಕ್ ತೊ ಆಶೆಲ್ಲೊ. ಪೂಣ್ ಸಂರಕ್ಷಕ್ ಕಿರುಬಾನ್ ತಾಕಾ ಧರ್ಣಿಕ್ ಶೆವ್ಟಿಲೊ. ತೊ ದೆವಾಚೆರ್ ಕಸೊ ಉಪ್ರಾಟ್ಲೊ ಮ್ಹಳ್ಳೆ ವಿಶಿಂ ಆಮಿ ಇಸಾಯಿಯಾ ಪ್ರವಾದ್ಯಾಚಾ ಬುಕಾಂತ್ ವಾಚ್ತಾಂವ್. "ತುಂ ತುಜ್ಯಾ ಕಾಳ್ಜಾಂತ್ ಮ್ಹಣ್ತಾಲೊಯ್: ಹಾಂವ್ ಆಕಾಸಾರ್ ಚಡ್ತಲೊ, ದೆವಾಚ್ಯಾ ನೆಕೆತ್ರಾಂ ಪ್ರಾಸ್ ವಯ್ರ್ ಹಾಂವ್ ಮ್ಹಜೆಂ ಶಿಂವಾಸನ್ ದವರ್ತಲೊಂ; ಉತ್ತರೆಚೆ ಶಿಮೆರ್ ಆಸಾ ತ್ಯಾ ಜಮಾತೆಚ್ಯಾ ಪರ್ವತಾರ್ ಹಾಂವ್ ಮ್ಹಜಿ ಬಸ್ಕಾ ಘೆತಲೊಂ ಹಾಂವ್ ಕುಪಾಂ ಪ್ರಾಸ್ ಊಂಚ್ ಚಡ್ತಲೊಂ, ಮಹೋನ್ನತಾ ಸಾರ್ಕೊ ಹಾಂವ್ ಜಾತಲೊ!" (ಇಸಾಯಿಯಾ. 14:13-14). ವ್ಹಯ್ ದೆವಾಚೊ ಜಾಗೊ ತೊ ಆಶೆಲೊ. ದೆವಾಬರಿಂ, ಸರ್ಗಾರ್ ರಾಜ್ ಚಲೊಂಕ್ ತೊ ಪಳೆತಾಲೊ. ದೆಕುನ್ ತಾಕಾ ಪೊಂಡಾಚಾ ಗುಂಡಾಯೆಕ್ ಲೊಟೊನ್ ಘಾಲಾ. ತಾಕಾ ಆನಿ ತಾಚಾ ದುತಾಂಕ್ ಭುಮಿಕ್ ಶೆವ್ಟಿಲಾಂ. ದೆವಾನ್ ತಾಕಾ ರಚ್ತಾನಾಂ, ತೊ ಸೊಭಿತ್, ಸುಂದರ್, ಜಾಣ್ವಾಯೆನ್ ಭರ್ಲ್ಲೊ ಉಜ್ವಾಡಾಚೊ ಆಂಜ್ ಜಾವ್ನಾಸ್ಲ್ಲೊ (2 ಕೊರಿಂಥ್ 11:14) ಆಂಜ್ ಮ್ಹಳ್ಯಾರ್ ಆಮಿ ವಾಚ್ತಾಂವ್ ಹೆಬ್ರೆವಾಂಕ್ ಬೊರೈಲ್ಯಾ ಪತ್ರಾಂತ್, ದೆವಾಚಾ ಸೆವೆಂತ್ ಆಸ್ಲ್ಲೆ ಆತ್ಮೆ (ಹೆಬ್ರೆವಾಂಕ್. 1:14) ತೊ ಏಕ್ ಆಂಜ್ ಜಾವ್ನಾಸ್ಲ್ಲೊ ದೆಕುನ್ ಆತಾಂ ತೊ ಏಕ್ ಆತ್ಮೊ ಜಾವ್ನಾಸಾ. ಕಾಳೊಕಾಚಿ ಸಕತ್ ವ ಖೊಟೊ ಆತ್ಮೊ ಜಾವ್ನ್ ಹೊ ಸಂಸಾರ್ ನಾಸ್ ಕರ್ತಾ. ದೆಕುನ್೦ಚ್ ಸಾಂ. ಜುವಾಂವ್ ಆಮ್ಕಾಂ ಸಾಂಗ್ತಾ "ತುಮ್ಚೇ ಸವೆಂ ಆಸಾ ತೊ ಅತ್ಮೊ ಸಂಸಾರಾ ಸವೆಂ ಆಸ್ಲಲ್ಯಾ ಅತ್ಮ್ಯಾಪ್ರಾಸ್ ಚಡ್ ಬಳಾದಿಕ್." (1 ಜುವಾಂವ್ 4:4). ದೆಕುನ್ ಭಾವಾಂ ಭಯ್ಣಿಂನೊ, ಸಂಸಾರಾಚಾ ಅಧಿಪತಿ ವಿಶ್ಯಾಂತ್ ಆಮಿ ನೆಣಾರಿ ಜಾಂವ್ಚೆಂ ನಾಕಾ. ಕಾಳೊಕಾಚಿ ಸಕತ್ ಮ್ಹಳ್ಳಿ ಆಸಾ. ವಾಯ್ಟ್ ಸಕತ್ ಮ್ಹಳ್ಳಿ ಆಸಾ. ಆಮ್ಕಾಂ ದೆವಾ ಥಾವ್ನ್ ಮ್ಹಣ್ಜೆ, ಉಜ್ವಾಡಾ ಥಾವ್ನ್, ಮೊಗಾ ಥಾವ್ನ್, ಸತಾ ಥಾವ್ನ್ ಆನಿ ಸರ್ವ್ ಬೊರ್ಯಾಪಣಾ ಥಾವ್ನ್ ಪಯ್ಸ್ ಕರುಂಕ್ ದೆಂವ್ಚಾರ್ ಕಿತೆಂ ಕರ್ತಾ ತೆಂ ದೆವಾಚಾ ಉತ್ರಾಂ ಮುಖಾಂತ್ರ್ ಜಾಣಾಂ ಜಾಯಾ. "ದೆಕುನ್ ದೆವಾಕ್ ತುಮಿ ಖಾಲ್ ಜಾಯಾ, ದೆಂವ್ಚಾರಾಕ್ ಆಡ್ ರಾವಾ, ಆನಿ ತೊ ತುಮ್ಚೇ ಥಾವ್ನ್ ಪೊಳ್ತಲೊ." (ಜಾಕೊಬಾಚೆಂ ಪತ್ರ್. 4:7)
- ಮಾ. ಜೆರಿ ಸಿಕ್ವೇರಾ, ಎಸ್.ವಿ.ಡಿ.