ದ್ವಿತಿನಿಯಮ್. 11:26, "ಅಬ್ಳೆ, ಹಾಂವ್ ತುಜೆ ಮುಕಾರ್ ದೋನ್ ಸಂಗ್ತಿ ದವರ್ತಾಂ: ಆಶೀರ್ವಾದ್ ಆನಿ ಶಿರಾಪ್."
ಎಕಾ ಮನ್ಶಾಕ್ ಏಕ್ ಮಾಸ್ಳಿ ಪೊಸ್ಚೆಂ ತಳೆಂ ಆಸ್ಲೆಂ. ಗೆಲ್ಯಾತ್ಯಾ 20 ವರ್ಸಾ೦ ಥಾವ್ನ್ ಮಾಸ್ಳೆಚೆಂ ಬೆಳೆಂ ಕರ್ನ್ ಬರೊ ಮುನಾಫೊ ತಾಣೆ ಜೊಡ್ಲೊಲೊ. ಪೂಣ್ ಹ್ಯಾ ವರ್ಸಾ ವಿಚಿತ್ರ್ ರಿತಿನ್ ತಳ್ಯಾಂತ್ಲಿ ಮಾಸ್ಳಿ ನಪಂಯ್ಚ್ ಜಾಂವ್ಕ್ ಲಾಗ್ಲಿ. ಸಕ್ಕಡ್ ರಿತಿನ್ ತಪಾಸ್ಣಿ ಕೆಲಿ ತರೀ ಮಿಸ್ತೆರ್ ಸಮ್ಜಾಲೊನಾ. ಮಾಸ್ಳೆಚ್ಯಾ ಸ್ಪೆಷಲಿಸ್ಟಾ ಪ್ರಕಾರ್ ಮಾಸ್ಳೆಕ್ ಪಿಡಾ ಯೇವ್ನ್ ಮರೊಂಕ್ ಸಾಧ್ಯ್ ನಾ. ಆಸ್ಲೆಲಿ ಮಾಸ್ಳಿ ಭಲಾಯ್ಕೆಭರಿತ್ ಆಸಾ ಆನಿ ಮೆಲ್ಲ್ಯಾ ಮಾಸ್ಲೆಚಿಂ ಹಾಡಾಂ ಮೆಳೊಂಕ್ನಾಂತ್. ಜಿವ್ದಾಳಿ ಆನಿ ಸುಕ್ಣಿ, ಮಾಸ್ಳಿ ಖಾಂವ್ಚಿ ಸಾಧ್ತ್ ಆಸಾ ಜಾಲ್ಲ್ಯಾನ್, ತಳೆಂ ರಾಕೊಂಕ್ ಚಡ್ ಕಾಮೆಲ್ಯಾಂಕ್ ದವರ್ಲೆ೦. ತರೀ ಕಿತೆಂಚ್ ಫಾಯ್ದೊ ನಾ ಜಾಲೊ. ಏಕ್ ದೀಸ್ ಧನಿ ವ್ಹಡಾ ಬೆಜಾರಾಯೆನ್ ಆಪ್ಲ್ಯಾ ತಳ್ಯಾಕ್ ಪಳೆವ್ನ್ ಆಸ್ತಾಂ, ಏಕ್ ವಿಚಿತ್ರ್ ಸಂಗತ್ ಪಳೆವ್ನ್ ಆವಾಕ್ಕ್ ಜಾಲೊ. ಪಾಂಚ್ ಫುಟ್ ಉಬಾರಾಯೆ ಥಾವ್ನ್ ತಳ್ಯಾಕ್ ಉದಾಕ್ ಧಾ ಇಂಚಾ ರೂಂದಾಯೆಚ್ಯಾ ಪಾಪಾ ಥಾವ್ನ್ ಪಡ್ತೆಲೆಂ. ಹೊ ಪೈಪ್ ಶೆಂಬರ್ ಮೀಟರ್ ಪಯ್ಸ್ ಥಾವ್ನ್ ತಳ್ಯಾಚೆಂ ಉದಾಕ್ ಹಾಡ್ತೆಲೆಂ. ಏಕ್ ಮಾಸ್ಳಿ ಉದ್ಕಾಚ್ಯಾ ವ್ಹಾಳಾ ವಿರೋಧ್ ಪಾಂಚ್ ಫುಟ್ ಉಡೊನ್ ಪಾಪಾಂತ್ಲ್ಯಾನ್ ರಿಗ್ಲಿ, ಮ್ಹಣ್ಜೆ ತಿ ಉದ್ಕಾಚ್ಯಾ ವ್ಹಾಳಾ ವಿರೋಧ್ ಉಪ್ಯೆವ್ನ್ ಉದಾಕ್ ವ್ಹಾಳೊವ್ನ್ ಯೆಂವ್ಚ್ಯಾ ತಳ್ಯಾಕ್ ಪಾವ್ತಾ. ಥಂಯ್ಸರ್ ಸುಕ್ಣಿ ಆನಿ ಜಿವ್ದಾಳಿ ಹ್ಯಾ ಮಾಸ್ಳೆಂಕ್ ಬೊಂಚಾಂವ್ಕ್, ಮಾರುಂಕ್ ಆನಿ ಗಿಳುಂಕ್ ತಯಾರ್ ಆಸ್ತಾತ್. ಮಾಸ್ಳಿ ನಪಂಯ್ಚ್ ಜಾಂವ್ಕ್ ನೀಜ್ ಕಾರಣ್ ಹೆಂ!
ಲೇಕ್ ನಾತ್ಲೆಲೆ ತಿತ್ಲೆ ವ್ಯಕ್ತಿ, ತರ್ನಾಟೆ ತಶೆಂ ಜಾಂಟೆ ಖೊಟೆಪಣಾಚ್ಯಾ ಜಾಳಾಂತ್, ತಶೆಂಚ್ ಸಾಂಪ್ಡಾತಾತ್ ನಹಿಂಗಿ? "... ಇಸ್ರಾಯೆಲಾಚ್ಯಾ ಘರಾಣ್ಯಾ ತುಂ ಮರೊಂಕ್ ಕಿತ್ಯಾಕ್ ಆಶೆತಾಯಿ?" (ಎಜೆಕಿಯೆಲ್. 18:31). ಸರ್ವೆಸ್ಪರ್ ದೇವ್ ದಯಾಳ್, ಮೊಗಾಳ್ ಆನಿ ಕಾಕುಳ್ದಾರ್. "ಮ್ಹಜ್ಯಾ ಬಾಳಾ ಮ್ಹಜಿ ಶಿಕೊವ್ಣ್ ವಿಸ್ರಾನಾಕಾ ಆನಿ ತುಜೆಂ ಕಾಳಿಜ್ ಮ್ಹಜೆ ಉಪಾದೆಸ್ ಪಾಳುಂದಿ. ಹೆಂ ಪರಿಂ ತುಜ್ಯಾ ಜಿವಿತಾಚೆ ದೀಸ್ ಆನಿ ವರ್ಸಾ೦ ವಾಡ್ತೆಲಿಂ ಆನಿ ವರ್ತಿ ಅಭಿವೃದ್ಧಿ ತುಕಾ ತಿ ದಿತೆಲಿ" (ಮ್ಹಣ್ಣ್ಯೊ. 3:1). ದೇವ್ ಬಾಪಯ್ ಸಾರ್ಕ್ಯಾ ಮೊಗಾನ್ ಆಪ್ಲ್ಯಾ ಭುರ್ಗ್ಯಾಂಕ್ ವಾಟ್ ದಾಕಯ್ತಾ. ಪುಣ್ ಖೊಟೆ ತಾಚಿ ಪರ್ವಾ ಕರಿನಾಂತ್. ತಳ್ಯಾಂತ್ಲ್ಯಾ ಮಾಸ್ಳೆಕ್ ಜಾಯಿ ಪುರ್ತೆ೦ ಖಾಂವ್ಕ್ ಧನಿ ದಿತಾಲೊ ಆನಿ ತಾಂಚೆಂ ಸಂರಕ್ಷಣ್ ಕರ್ತಲೊ. ಪೂಣ್ ಮಾಸ್ಳಿ ಆಪ್ಲ್ಯಾ ನಾಸಾಕ್ ಉಡೊನ್ ಧಾಂವ್ತೆಲ್ಯೊ. "ಶಾಣೊ ಆಪಾಯಿ ಪಳೆವ್ನ್ ಲಿಪ್ತಾ; ಪೂಣ್ ಪಿಸೊ ಆಪಾಯಾಂ ಸರ್ಶಿಂ ಧಾಂವ್ತಾ ಆನಿ ಕಷ್ಟಾಂತ್ ಸಾಂಪಾಡ್ತಾ" (ಮ್ಹಣ್ಣ್ಯೊ. 22:3; 27:12).
ಹ್ಯಾಚ್ ದಿಸಾನಿ ಏಕ್ ಸೊಭಿತ್ ಸುಂದರ್ ಯುವಕ್ ರೆತಿರ್ ಕರುಂಕ್ ಆಯ್ಲೊ. ಇಂಜಿನಿಯರಿಂಗ್ ಪದವೀಧರ್ ತೊ. ನಾಂವಾಡ್ದಿಕ್ ವಿದೇಶಿ ಕಂಪೆನಿಂತ್ ಬರೆಂ ಕಾಮ್ ಆಸ್ಲೆಂ ಆನಿ ತ್ಯಾ ಮಾರಿಫಾತ್ ಜಾಯ್ತೆ ದೇಶ್ ಆನಿ ಗಾಂವ್ ತೊ ಭಂವ್ಲಾ. ತಾಣೆ ಜೊಡ್ಲೆಲ್ಯಾ ಪೈಶಾಂಕ್ ಲೇಕ್ ನಾ. ಪೂಣ್ ತೊ ಹಾಂಗಾ ಯೆತಾನಾ, ತೊ ಏಕ್ ಬೆಬ್ಡೊ, ಅಮಾಲಾಚ್ಯಾ ವಸ್ತುಂಚೆಂ ವ್ಯಸನಿ ಆನಿ ದೆದೆಸ್ಪೊರ್ ವ್ಯಕ್ತಿ. ಸಕ್ಕಡ್ ದುಡು ಹೊಗ್ಡಾವ್ನ್ ಭಿಕ್ಷಾಧಿಪತಿ ಜಾಲಾ. ತೊ ಏಕ್ ಸುಂದರ್ ಚಲಿಯೆಚ್ಯಾ ಮೊಗಾರ್ ಪಡ್ಲೊ. ಆವಯಿ-ಬಾಪಾಯ್ನ್ ಆನಿ ಮೊಗಾಚ್ಯಾಂನಿ ಕಿತ್ಲೆಂ ಸಮ್ಜಾಯ್ಲ್ಯಾರೀ ತೆಂಚ್ ಚೆಡು ಜಾಯಿ ಮ್ಹಣ್ ಹಠ್ ಧರ್ನ್ ತಾಚೆ ಸಾಂಗಾತಾ ಜಿಯೆಂವ್ಕ್ ಲಾಗ್ಲೊ. ತ್ಯಾ ಚೆಡ್ವಾಕ್ ಪಯ್ಲೆಂಚ್ ಜಾಯ್ತೆ ತರ್ನಾಟೆ ಈಷ್ಟ್ ಜಾವ್ನಾಸ್ಲೆ. ತ್ಯಾ ಚಲಿಯೆನ್ ಪಾಂಚ್ ವರ್ಸಾಂನಿ, ಹಾಕಾ ಸಂಪೂರ್ಣ್ ಖಾಲಿ ಕೆಲೊ. ತಾಚೆ ಫ್ಲ್ಯಾಟ್ ವಿಕುನ್, ದುಡು ಆಪ್ಣಾಸಂಗಿಂ ದವರ್ಲೊ, ಫೊರ್ಜರಿ ದಸ್ಕತ್ ಘಾಲ್ನ್ ತಾಚೆಂ ಬ್ಯಾಂಕ್ ಬ್ಯಾಲೆನ್ಸ್ ಖಾಲಿ ಕೆಲೆಂ. ಆನಿ ಆತಾಂ ತೆಂ ಏಕ್ ಗ್ರೇಸ್ತ್ ಮನ್ಶ್ಯಾಕಡೆಂ ಕಾಜಾರ್ ಜಾವ್ನ್ ಹಾಂಗ್ಕಾಂಗಾಂತ್ ವಸ್ತಿ ಕರ್ತಾ.
ದೆವಾಚ್ಯಾ ಉತ್ರಾಂಕ್ ಕಾನ್ ದೀನಾಸ್ತಾ ಜಿಯೆತೆಲ್ಲ್ಯಾಂಚೊ ಪರಿಣಾಮ್ ಹೊ: "ದೆಕುನ್ ಹರ್ಯೆಕ್ಲೊ ಜೊ ಮ್ಹಜಿಂ ಉತ್ರಾಂ ಆಯ್ಕಾತಾ ಆನಿ ತ್ಯಾ ಪರ್ಮಾಣೆ ಜಿಯೆತಾ, ತೊ ಖಡ್ವಾಚೆರ್ ಬುನ್ಯಾದ್ ಘಾಲ್ನ್ ಘರ್ ಬಾಂದ್ಲೆಲ್ಯಾ ಬುದ್ವಂತ್ ಮನ್ಶಾಪರಿಂ. ಆನಿ ಜೊ ಕೋಣ್ ಮ್ಹಜಿ ಉತ್ರಾಂ ಆಯ್ಕಾತಾ ಪೂಣ್ ತ್ಯಾ ಪರ್ಮಾಣೆ ಜಿಯೆನಾ ತೊ ರೆಂವೆರ್ ಘರ್ ಬಾಂದ್ಲೆಲ್ಯಾ ಮೂರ್ಖಾಪರಿಂ" (ಮಾತೆವ್. 7:24-26). 'ಟೈಟಾನಿಕ್' ಮ್ಹಳ್ಳೆಂ ಮಜ್ಬೂತ್ ತಾರುಂ ಬಾಂದ್ಲೆಲ್ಯಾನಿ ಮ್ಹಳೆಂ; ದೆವಾಚ್ಯಾನ್ ಸಯ್ತ್ ಹೆಂ ತಾರುಂ ಬುಡೊಂವ್ಕ್ ಜಾಯ್ನಾ. ಪೂಣ್ ಆಮಿ ಜಾಣಾಂವ್, ತಾಚ್ಯಾ ಪಯ್ಲ್ಯಾ ಪಯ್ಣಾರ್ಚ್ ಎಕಾ ಬರ್ಫಾಚ್ಯಾ ಕುದ್ರ್ಯಾಕ್ ಆಪ್ಟೊನ್, ಆಪ್ಣಾಸಂಗಿಂ 1500 ಲೊಕಾಕ್ ಘೆವ್ನ್ ಗೂಂಡ್ ಅಟ್ಲಾಂಟಿಕ್ ಸಾಗೊರಾಂತ್ ನಪಂಯ್ಚ್ ಜಾಲೆಂ.
ದೆವಾಕ್ ಫಟಂವ್ಕ್ ಜಾಯ್ನಾ
"ಫಟ್ವೊನ್ ಪಡಾನಾಕಾತ್, ದೆವಾಕ್ ಫಟೊಂಕ್ ಜಾಯ್ನಾ; ಜೆಂ ಕಿತೆಂ ವೊಂಪ್ತಾಂತ್, ತೆಂಚ್ ತುಂ ಲುಂವ್ತಾಯಿ" (ಗಾಲಾತ್. 6:7). ಜೋನ್ ಲೆನನ್ ಮ್ಹಳ್ಳೊ ಗಾವ್ಪಿ ಪರ್ಗಟ್ ರಿತಿರ್ ಕ್ರಿಸ್ತಾಂವಾಂಕ್ ಅವ್ಮರ್ಯಾದ್ ಕರಿಲಾಗ್ಲೊ. 'ಕ್ರಿಸ್ತಾಂವ್ ವೆಗಿಂಚ್ ನಾ ಜಾತೆಲೆ, ಹ್ಯಾ ವಿಶ್ಯಾಂತ್ ವಿವಾದ್ ನಾಕಾ, ತೆಂ ಖಂಡಿತ್' ತೊ ಮ್ಹಣಾಲೊ. ಜೆಜು ವ್ಹಡ್ ನ್ಹಯ್, ಪೂಣ್ ತಾಚೆ ಪಾಟ್ಲಾವ್ದಾರ್ ಭೋವ್ ಸೊಂಪೆಂ. ಆಜ್ ಆಮಿ ಸಕ್ಡಾಂಚ್ಯಾಕೀ ನಾಂವಾಡ್ದಿಕ್ ಚಡ್ ತಾಣೆ ವ್ಹಡ್ವಿಕ್ ಉಲಯ್ಲೆಲಿ 1966 ವ್ಯಾ ವರ್ಸಾ. ಭೋವ್ ಬಿರ್ಮೊತಿಚೆಂ ಮರಣ್ ತಾಕಾ ಮೆಳ್ಳೆಂ: ಸ ಪಾವ್ಟಿಂ ತಾಕಾ ಗುಳೆ ಮಾರ್ಲೆ.
"ದೇವ್ ಅಹಂಕಾರ್ಯಾಂಕ್ ಪಯ್ಸ್ ಕರ್ತಾ ಆನಿ ಖಾಲ್ತ್ಯಾಂಕ್ ಆಪ್ಲಿ ದಯಾ ದಾಕಯ್ತಾ" (1 ಪೆದ್ರು 5:5). ಬ್ರೆಜಿಲ್ ಗಾಂವ್ಚೊ ಟ್ಯಾನ್ಕ್ರೆಡೊ ನೆವೆಸ್ ಗರ್ವಾನ್ ಉದ್ಗಾರ್ಲೊ: ಮ್ಹಾಕಾ ಪಾಂಚ್ ಲಾಖ್ ಓಟ್ ಮೆಳ್ತಿತ್ ಜಾಲ್ಯಾರ್, ಹಾಂವ್ ಬ್ರೆಜಿಲಾಚೊ ಪ್ರೆಸಿಡೆಂಟ್ ಜಾತೊಲೊಂಚ್. ದೆವಾಚ್ಯಾನ್ ಸಯ್ತ್ ಮ್ಹಾಕಾ ಆಡಯ್ಲ್ಯಾಪರಿಂ ನಾ. ತಾಕಾ ಓಟ್ ಮೆಳ್ಳೆ, ಪೂಣ್ ಅಧ್ಯಕ್ಷ್ ಜಾಂವ್ಚ್ಯಾ ಆದ್ಲ್ಯಾ ದಿಸಾ, ಕಠೀನ್ ಪಿಡಾ ಆಯ್ಲಿ ಆನಿ ಅಧ್ಯಕ್ಷ್ ಸ್ಥಾನ್ ಆಪ್ಣಾಯ್ನಾಸ್ತಾಂ ಸರ್ಲೊ.
"ರಗ್ತಾ-ಮಾಸಾಂತ್ ವೊಂಪ್ತಾಯಿ, ತ್ಯಾ ಕುಡಿಂತ್ ಥಾವ್ನ್ ಖೊಟೆಪಣ್ ತುಂ ಲುಂವ್ತೊಲೊಯಿ..."(ಗಾಲಾತ್. 6:8). ಆಪ್ಲೆಂ ಲಿಂಗ್ ಬದ್ಲಿಲೊ ಕಾಝಾಝಾ ಪ್ರಸಿದ್ಧ್ ಗಾವ್ಪಿ. ಹಜಾರೊಂ ಲೊಕಾ ಮುಕಾರ್ ತೊ ಸಿಗ್ರೆಟಿಚೊ ಧುಂವೊರ್ ಸೊಡುನ್ ಮ್ಹಣಾಲೊ: "ಹೊ ದುಂವೊರ್ ತುಕಾ ದೆವಾ" ಚಡ್ ದೀಸ್ ಗೆಲೆನಾಂತ್. ಬಾತ್ತೀಸ್ ವರ್ಸಾ೦ಚ್ಯಾ ಪ್ರಾಯೆರ್ AIDS(ಏಡ್ಸ್) ರೋಗಾನ್ ತಾಕಾ ಗ್ರಾಸಿಲೊ.
ದೆವಾಭಿರಾಂತ್ ನಾಸ್ತಾಂ ಜಿಯೆವ್ನ್ ನಾಸ್ ಜಾಲ್ಲ್ಯಾಂಚಿ ವ್ಹಡ್ ಪಟ್ಟಿ ಕರ್ಯೆತ್.
ಭಾವಾಡ್ತಾಚೆರ್ ತುಜೆಂ ಜಿವಿತ್ ಭಾಂದ್
"ಪೂಣ್ ತುಂ ಮ್ಹಜ್ಯಾ ಭೋವ್ ಮೊಗಾಚ್ಯಾ, ತುಜ್ಯಾ ಬೋವ್ ಪವಿತ್ರ್ ಭಾವಾಡ್ತಾಚೆರ್ ತುಜೆಂ ಜಿವಿತ್ ಭಾಂದ್; ಪವಿತ್ರ್ ಅತ್ಮ್ಯಾನ್ ಮಾಗ್" (ಜೂದ್. 20). ಥೊಡ್ಯಾಂ ಥಂಯ್ ಚೂಕ್ ಸಮ್ಜಣಿ ಆಸ್ತಾ, ಕ್ರಿಸ್ತಾಂವ್ ಧರ್ಮ್ ತಾಂಕಾಂ ಸೊಡ್ವಣ್ ದಿತಾ ಮ್ಹಣ್. ಕ್ರಿಸ್ತಾಂವ್ಪಣ್ ತುಕಾ ಸರ್ಗಾಚಿ ಜಾಮಿನಿ ನ್ಹಯ್. "ಪೂಣ್ ಹರ್ಯೆಕ್ಲೊ ಜೊ ಮ್ಹಾಕಾ 'ಸೊಮ್ಯಾ, ಸೊಮ್ಯಾ' ಮ್ಹಣ್ ಉಲೊ ಮಾರ್ತಲೊ ಸರ್ಗಿಂಚ್ಯಾ ರಾಜಾಕ್ ರಿಗ್ಚೊನಾ, ಬಗಾರ್ ಜೊ ಕೋಣ್ ಮ್ಹಜ್ಯಾ ಸರ್ಗಿಂಚ್ಯಾ ಬಾಪಾಚಿ ಖುಶಿ ಕರ್ತಾ." (ಮಾತೆವ್. 7:21). ಆಮ್ಚಿ ಬರಿಂ ಕಾಮಾ ಆಮ್ಚ್ಯಾ ಭಿತರ್ಲ್ಯಾ ಭಾವಾಡ್ತಾಚೆಂ ಭಾಯ್ಲೆಂ ನ್ಹೆಸಾಣ್ ಜಾಯ್ಚೆ. ಆಮ್ಚೆ ದಾನ್-ಧರ್ಮ್, ದಯಾ-ಮಾಯಾ ಆನಿ ಮೋಗ್ ಜೆಜುಚೆರ್ ಆಸ್ಚ್ಯಾ ಭಾವಾಡ್ತಾಚೆರ್ ಭಾಂದುನ್ ಹಾಡೆಜೆ. "ಜಾಗೆ ರಾವಾ, ಭಾವಾಡ್ತಾಚೆರ್ ಥಿರ್ ರಾವಾ, ಧೈರ್ ಘೆಯಾ, ಬಳ್ವಂತ್ ಜಾಯಾ; ಸಕ್ಕಡ್ ತುಮ್ಚೊ ಕರ್ನ್ಯೊ ಮೊಗಾನ್ ಕರಾ" (1 ಕೊರಿಂಥ್ 16:13-14).
ಮ್ಹಜ್ಯಾ ಇಸ್ಕಾಲಾಚ್ಯಾ ದಿಸಾನಿ, ಏಕ್ ಬರ್ಯಾ ಮೆಸ್ತ್ರಿಣೆನ್ ಸಾಂಗ್ಲೆಲಿ ಉತ್ರಾಂ ಅಜೂನ್ ಮ್ಹಜ್ಯಾ ಮನಾಂತ್ ಘುಣ್ಘುಣ್ತಾತ್: ತುಕಾ ಏಕ್ ಮಾಸ್ಳಿ ಜಾಂವ್ಕ್ ಮ್ಹನ್ಗಿ ಯಾ ಏಕ್ ಕುರ್ಲಿ ಜಾಂವ್ಕ್? ಏಕ್ ಮಾಸ್ಳಿ ಜಾವ್ನ್ ಜಿಯೆಂವ್ಕ್ ಭೋವ್ ಕಷ್ಟಾಂಚೆಂ, ತಿಕಾ ಆಪ್ಲಿಂ ಸರ್ವ್ ಖೊವ್ಳಾ ಆನಿ ಪಾಕಾಟೆ ವಾಪರ್ನ್ ಉಪ್ಯೆಂವ್ಕ್ ಆಸಾ. ಜಾಲ್ಯಾರೀ ತಿಕಾ ವಾಂಕ್ಡೆ-ತಿಂಕ್ಡೆ ಆನಿ ಪಾಟಿಂ ಉಪ್ಯೆಂವ್ಕ್ ಜಾಯ್ನಾ. ಪೂಣ್ ಕುರ್ಲಿ ಕಾಂಯಿ ಕಷ್ಟ್ ಕಾಡಿನಾ. ತಿ ವಾಂಕ್ಡೆ-ತಿಂಕ್ಡೆ ಆನಿ ಪಾಟಿಂ ಮಾತ್ರ್ ವೆತಾ, ಕೆದಿಂಚ್ ಮುಕಾರ್ ವಚಾನಾ, ಮ್ಹೆಳೆಂ ಮಾತ್ರ್ ತಿಚೆಂ ಖಾಣ್ ದೇವ್ಭಿರಾಂತಿಚೊ ಮನಿಸ್ ಎಕಾ ಮಾಸ್ಳೆಪರಿಂ. ತೊ ಆಪ್ಲಿ ಸರ್ವ್ ಸಕತ್ ವಾಪರ್ನ್ ಭಾವಾಡ್ತಾಂತ್ ಮುಕಾರ್ ಸರ್ತಾ. ಭಾಗಿ ಜೊ ಪಾತ್ಕ್ಯಾಂಸಂಗಿಂ ಪಾತ್ಕಿ ವಾಟ್ ಚಲಾನಾ... ಬಗಾರ್ ಸೊಮ್ಯಾಚ್ಯಾ ಕಾಯ್ದ್ಯಾನಿ ಉಲ್ಲಾಸ್ತಾ (ಕೀರ್ತನ್. 1:1-2)
ಮೊಗಾಳಾ ಸೊಮ್ಯಾ, ತುಂವೆಂ ಮ್ಹಜೆ ಮುಕಾರ್ ಮ್ಹಾಕಾ ಸಾಸ್ಣಿಕ್ ಜಿವಿತ್ ದಿಂವ್ಚೆ ತುಜೆ ಕಾಯ್ದೆ ಆನಿ ಉಪಾದೆಸ್ ದವರ್ಲ್ಯಾಯಿ. ತೆ ಥಿರಾಸಣೆನ್ ಸಾಂಬಾಳುಂಕ್ ಮ್ಹಾಕಾ ತುಜಿ ಕುರ್ಪಾ ಆನಿ ಜಾಣ್ವಾಯಿ ದೀ. ಹೆಂ ಜಿವಿತ್ ಮ್ಹಜೆಂ ತುಜ್ಯಾ ಆಶೀರ್ವಾದಾನಿ ಸಾರ್ಥಕ್ ಕರ್ ಆನಿ ಸಾಸ್ಣಾಕ್ ತುಜೆ ಸವೆಂ ಜಿಯೆಶೆಂ ಕರ್. ಆಮೆನ್.
- ಫಾ. ಅಬು, ಎಸ್.ವಿ.ಡಿ.