ಆಮಿ ಅತ್ಯಾಧುನಿಕತೆಚ್ಯಾ ಯುಗಾಂತ್ ಆಸಾಂವ್. ತಾಂತ್ರಿಕ್ ಸಾಧನಾಂ, ಆಧುನಿಕ್ ಸಂಪರ್ಕ್ ಮಾಧ್ಯಮಾನಿಂ ಕ್ರಾಂತಿ ಜಾಲ್ಲ್ಯಾ ಎಕಾ ಮಹಾನ್ ಸಂಸಾರಾಂತ್ ಆಮ್ಚೆ ಪಯ್ಣ್ ಕರ್ತೆ ಆಸಾಂವ್. ಆಧುನಿಕ್ ಸಂಪರ್ಕ್ ಮಾಧ್ಯಮಾ ಪ್ರತ್ಯೇಕ್ ಜಾವ್ನ್ ಟಿ.ವಿ., ಮೊಬಾಯ್ಲ್, ಅಂತರ್ಜಾಳ್ (ಇಂಟರ್ನೆಟ್), ಕಂಪ್ಯೂಟರ್ ಇತ್ಯಾದಿ ಸಂಗ್ತಿನಿಂ ಆಜ್ ಸಂಪರ್ಕ್ ಕ್ಷೇತ್ರಾಂತ್ ಇತ್ಲಿ ಪ್ರಗತಿ ಕೆಲ್ಯಾ ಆನಿ ಸಂಪರ್ಕ್ ಇತ್ಲೊ ಸರಳ್, ತುರ್ತಾಚೊ ಆನಿ ಸವಾಯೆಚೊ ಕೆಲಾಗೀ ಆಮ್ಚ್ಯಾಚ್ ದೊಳ್ಯಾಂಕ್ ಏಕ್ ವಿಜ್ಮೀತಾಶೆಂ ದಿಸ್ತಾ. ವಿeನ್ ಆನಿ ತಂತ್ರeನಾನ್ ಆಜ್ ವೆಳಾಚೆರ್ ಆನಿ ಜಾಗ್ಯಾಂಚೆರ್ ಜಯ್ತ್ ವರುಂಕ್ ಪ್ರಯತ್ನ್ ಕೆಲಾಂ! ಪೂಣ್ ಆಜ್ ನೀಜ್ ಜಾವ್ನ್ ಸಂಬಂಧ್ ಎಕಾಮೆಕಾಥಂಯ್ ಮಾಯಾ ಮೋಗ್ ಆನಿ ಬರೆಂ ಮನ್ ಕಶೆಂ ರಾವ್ಲಾಂ. ಪಯ್ಲೆಂಚೆ ಪರಿಂ ಎಕಾಮೆಕಾ ಲೋಕ್, ಕುಟ್ಮಾಂ, ವಾಡ್ಯಾಗಾರಾಂ, ಫಿರ್ಗಜ್ಗಾರಾಂ ಎಕಾಮೆಕಾಚ್ಯಾ ಗರ್ಜಾಂಕ್ ಪಾಂವ್ಚೆ, ಗರ್ಜೆ ಆಕಾಂತಾ ವೆಳಾರ್ ಎಕಾಮೆಕಾಕ್ ಆಧಾರ್ ದಿಂವ್ಚೆ, ಎಕಾಮೆಕಾಚ್ಯಾ ಸುಖಾದುಖಾನಿಂ ಫೆಸ್ತಾ ಪರ್ಬೆನಿಂ ಭಾಗ್ ಘೆವ್ನ್ ಎಕಾಮೆಕಾಕ್ ಮೊಗಾನ್ ಸಾಂಗಾತಾ ಉತ್ತೇಜನ್, ಪ್ರೇರಣ್ ದಿಂವ್ಚೆ ಹೆಂ ಸರ್ವ್ ಆಜ್ ಖಂಯ್ಸರ್ ಮಾಯಾಗ್ ಜಾಲಾಂ!
ಹ್ಯಾ ಸರ್ವಾಂ ಮಧೆಂ ಆಜ್ ಜೀವಿತ್, ಮೌಲ್ಯಾಂ, ದೇವ್, ಧರ್ಮ್, ಪವಿತ್ರ್ ಆನಿ ಧಾರ್ಮಿಕ್ ಆನಿ ಸಾಮಾಜಿಕ್ ಬಾಂಧ್, ಕಾಜಾರಾ, ಕುಟ್ಮಾಂ, ವಿಶ್ವಾಸ್ಪಣ್, ಉತ್ರಾಂಕ್ ಮೋಲ್, ಆಖೇರ್ ಪರ್ಯಾಂತ್ ಥಿರಾಸಣ್ ಹೆಂ ಸರ್ವ್ ಖಂಯ್ಸರ್ ಗೆಲಾಂ? ಆಧುನಿಕ್ ವಿeನ್ ಆನಿ ತಂತ್ರeನ್ ಮನ್ಶ್ಯಾಕುಳಾಚೆಂ ಸಬಾರ್ ಸಮಸ್ಯೆ ಪರಿಹಾರ್ ಕೆಲಾಂ ಆನಿ ಕರ್ತೆ ಆಸಾ ಮ್ಹಣ್ ಆಮ್ಕಾಂ ವಿಶ್ವಾಸ್ ದೀಂವ್ಕ್ ಪ್ರಯತ್ನ್ ಕರ್ತಾ ತರೀ ಆನ್ಯೆಕಾ ಕುಶಿನ್ ಮನ್ಶ್ಯಾ ಜೀವಿತಾಕ್ ಆಜ್ ತೀರ್ ತಿರ್ಕುಟ್ ಕರ್ನ್ ಮನ್ಶಾ ಜಿವಿತಾಚ್ಯೆ ಥೊಡ್ಯಾ ಪ್ರಮುಖ್ ಸಂಗ್ತಿಂಚೆರ್, ಮನ್ಶ್ಯಾಜೀವಾಚ್ಯಾ ಮೋಲಾಚೆರ್ ಸಬಾರ್ ವರ್ಸಾಂ ಥಾವ್ನ್ ಧಾವೊನ್ ಆಯ್ಲೆಲ್ಯಾ ಸಬಾರ್ ಮುಳಾವ್ಯಾ ಮೌಲ್ಯಾಂಚೆರ್ ಆಜ್ ಖೆಳ್ ಖೆಳ್ತಾ ಆಸಾ ನಂಯ್ಗೀ? ಆನಿ ಅಸಲ್ಯಾ ಸಂದರ್ಭಾರ್ ಏಕ್ ಅಧಿಕ್ ಮಹತ್ವಾಚೆಂ ಸವಾಲ್ ಆಮ್ಚ್ಯಾ ಯುವಜಣಾಂಕ್ ಆಜ್ ಕಿತೆಂ ಪುಡ್ತೆ ಆಸ್ತಾ? ಆಮ್ಚೆ ಯುವಜಣ್ ಆಜ್ ಖಂಯ್ಚಾ ದಿಶೆನ್ ಬಾಯ್ರ್ ಸಕ್ಲ್ಯಾತ್ ಆನಿ ಖಂಯ್ಚೆರ್ ಪಾವೊಂವ್ಕ್ ಆಸಾತ್?
ಆಜ್ ಚಡಾವತ್ ಯುವಜಣ್ ಆನಿ ಭುರ್ಗಿಂ, ಕುಟ್ಮಾಚ್ಯಾ (ಆವಯ್-ಬಾಪಾಯ್ಚಾ), ಸಮಾಜೆಚ್ಯಾ, ತಾಂಚ್ಯಾಚ್ ಪ್ರಾಯೆಚ್ಯಾ ಈಷ್ಟಾಮಂತ್ರಾಚ್ಯಾ, ಬಾಯ್ಲ್ಯಾ ಸಂಸಾರಾಚ್ಯಾ ಆನಿ ಪ್ರತ್ಯೇಕ್ ಜಾವ್ನ್ ಆಧುನಿಕ್ ಸಂಪರ್ಕ್ ಮಾಧ್ಯಮಾಚ್ಯಾ ಪ್ರಭಾವಾಕ್ ಆನಿ ವಿಶೇಷ್ ಒತ್ತಡಾಕ್ ಒಳಗ್ ಜಾಲ್ಯಾತ್! ಸಬಾರ್ ಯುವಜಣಾಂಕ್ ಮತಿನ್ ಸಮತೋಲನ್ ಸಾಂಬಾಳ್ತಾ ಹೆಂ ಒತ್ತಡ್ ಸಾಂಬಾಳುಂಕ್ ಮಸ್ತ್ ಕಷ್ಟ್ ಮಾರ್ತೆ ಆಸಾತ್. ಆಜ್ ಕಾಲ್ ಆಮ್ಚ್ಯಾ ಯುವಜಣಾಂನಿ ತಾಂಚ್ಯಾಚ್ ಜೀವನಾಚೆರ್ ಆನಿ ಹೆರಾಂಚ್ಯಾ ಜೀವಿತಾಚೆರ್, ಮೌಲ್ಯಾಂಚೆರ್ ಕರ್ಚೆ ತೆ ಪ್ರಯೋಗ್ ಆನಿ ತ್ಯಾ ಪ್ರಯೋಗಾ ವರ್ವಿಂ ತಾಂಚ್ಯಾ ಜೀವಿತಾಂತ್ ತಾಣಿಂ ವಿಂಚ್ಬಿಚಿ ತೊ ಜಿಣಿ ವಾಟೆಚಿ ದಿಸಾ ನಿಜಾಕೀ ವರ್ತ್ಯಾ ಬಿಯಾಚಿ ಸಂಗತ್ ಜಾವ್ನಾಸಾ! ಆನಿ ಹಾಚೊ ಪರಿಣಾಮ್ ಸಬಾರ್ ಥರಾನಿಂ ಬಿರಾಂಕುಳ್ ಜಾವ್ನಾಸಾ!
ಆಜ್ ದೊಸ್ಚ್ಯಾ ಸಬಾರ್ ಸವಾಲಾಂ ಪಯ್ಕಿ: ಕೊಣಾಕ್ ಆಜ್ ಕಾಲ್ಚೆ ಯುವಜಣ್ ಆಯ್ಕತಾತ್? ತಾಂಚ್ಯಾ ಜಿಣ್ಯೆಚೆ ಆದರ್ಶ್ ವ್ಯಕ್ತಿ ಕೋಣ್? ಕೋಣ್ ತಾಂಕಾ ಪ್ರೇರಣ್ ದಿತಾ? ಖಂಚ್ಯಾ ಸಂಗ್ತಿಕ್ ತೆ ಚಡ್ ಮೋಲ್ ದಿತಾತ್ ಆನಿ ಕಿತ್ಯಾಕ್? ಜಿವಿತಾ ವಿಶ್ಯಾಂತ್ ತಾಂಚೆ ಚಿಂತಾಪ್ ಕಸಲೆಂ? ತಾಂಚ್ಯಾ ಆವಯ್ ಬಾಪಯ್ ಆನಿ ವ್ಹಡಿಲಾಂಕ್ ಆಯ್ಚೆ ಯುವಜಣಾಂ ಕಸಲೆಂ ದೃಷ್ಟೆನ್ ದೆಕ್ತಾತ್? ತಾಂಚೆ ಪ್ರಕಾರ್ 'ಜವಾಬ್ದಾರಿ', 'ಕರ್ತವ್ಯ್' ಹಾಚೊ ಅರ್ಥ್ ಕಸಲೊ? ನೈತಿಕ್ ಸಂಗ್ತಿ ವಿಶ್ಯಾಂತ್ ಆನಿ ನೈತಿಕ್ ಮೊಲಾಂ ವಿಶ್ಯಾಂತ್ ಕಸಲೆಂ ಸಿದ್ಧಾಂತ್ ಆಜ್ಕಾಲ್ ತಿಂ ಪಾಳ್ತೆ ಆಸಾತ್?
ದೇವ್ ಧರ್ಮ್, ಮಾಗ್ಣೆಂ ಆಯ್ಚ್ಯಾ ಯುವಜಣಾಂಕ್ ಕಿತೆಂ ಜಾವ್ನಾಸಾ ಆನಿ ಹ್ಯಾ ವಿಶ್ಯಾಂತ್ ತಾಂಚೆ ಚಿಂತಾಪ್ ಕಸಲೆಂ? ಸತಾ ಆನಿ ಘಟಿ ಮಧೆಗಾತ್ ಆಸ್ಚೊ ತಫಾವತ್ ಕಸೆಂ ತೆಂ ಸಮ್ಜಾತಾತ್? ಕೇವಲ್ ಪ್ರತಿಫಳ್ (ಫಾಯ್ದೊ) ಜೊಡ್ಚೆ ಖಾತಿರ್ ಯಶಸ್ವಿ ಜೊಡ್ಚೆಖಾತಿರ್ ಆನಿ ತಾತ್ಕಾಲಿಕ್ ವಿಲಾಸಿ ಸಂತೊಸ್ ಜೊಡ್ಚೊಚ್ಗೀ ತಾಂಚೊ ಉದ್ದೇಶ್? ತಾಂಚ್ಯೊ ಕುಟ್ಮಾ ಜಿವಿತಾಚಿ ಮೌಲ್ಯಾಂ ಕಸಲಿಂ? ಕಾಜಾರಿ ಸಾಕ್ರಾಮೆಂತ್, ಕುಟಾಮ್, ಆವಯ್ಬಾಪಾಯ್ಚಿ ಜಿಣಿಂ ಭುರ್ಗ್ಯಾಂಕ್ ಲ್ಹಾನ್ ವ್ಹಡ್ ಕರ್ಚೆ ಅಸಲ್ಯಾ ವಿಶ್ಯಾಂತ್ ತಾಂಚ್ಯೆ ದೃಷ್ಟಿಕೋನ್ ಕಸಲೆಂ? ತಾಂಕಾ ಪಯ್ಶೆ ಕಿತ್ಲ್ಯಾ ಮಹತ್ವಾಚೆ ಆನಿ ತಾಣಿ ತಿ ಜೊಡ್ಚಿ ವಿಧಾನಾ ಕಸಲಿಂ ಕಿತ್ಲೆ ಜೊಡ್ಲ್ಯಾರ್ ತೆ ಪುರೊ?
ಆಜ್ ಯುವಜಣಾಂ ಉಲಂವ್ಚೆಂ ಆನಿ ತೆಂ ಕಾರ್ಯಾನ್ನ್ ಕರ್ಚೆ ವಿಶ್ಯಾ೦ತ್ ಕಿತ್ಲೆ ಜಾಗ್ರುತ್ ಆಸಾತ್? ದುಸ್ರ್ಯಾಂಚ್ಯಾ ಭೊಗ್ಣಾಂಕ್, ತಾಂಚ್ಯಾ ದುಖಿಕ್ ಆನಿ ಕಷ್ಟಾಂಕ್ ಕಿತ್ಲೆ ಸ್ಪಂದನ್ ತೆ ಕರ್ತಾತ್ ಆನಿ ಸಮ್ಜಾತಾತ್? ಜಿಣ್ಯೆಂತ್ ಅಸಲ್ಯಾ ನಿಯಾಳ್ಯಾ ಆನಿ ಚಿಂತ್ನಾ ಥಂಯ್ ತಾಂಕಾ ಅಭಿರುಚ್ ಆಸಾಗಿ? ತಾಂಚಿ ಚುಕ್ ತಿದ್ವಿಲ್ಲಿ ಮಾನುನ್ ಘೆಂವ್ಕ್ ತೆ ತಯಾರ್ ಆಸಾತ್ಗಿ? ಎಕಾ ವ್ಯಕ್ತಿಕ್ ತಿ 'ವ್ಯಕ್ತಿ' ದೆವಾಚೆಂ ಪ್ರತಿರೂಪ್ ಮ್ಹಣ್ ದೆಕ್ತಾತ್ಗೀ ಯಾ ತ್ಯಾ ವ್ಯಕ್ತಿಕ್ ಖುಶಾಲಾಯೆ ಖಾತಿರ್ ಆನಿ ವಾಯ್ದ್ಯಾ ಖಾತಿರ್ ಉಪ್ಯೆಗ್ ಕರ್ಚೆ ತಸಲಿ ವಸ್ತೆ ಮ್ಹಣ್ ತೆ ಲೆಗ್ತಾತ್?
ಖಂಡಿತ್ ಜಾವ್ನ್ ಯುವಜಣ್ ಸಮಾಜೆಚೆ ಏಕ್ ಬಳಾಧಿಕ್ ಆನಿ ಪವಿತ್ರ್ ಸಕತ್! ಸ್ವಾಭಾವಿಕ್ ಜಾವ್ನ್ ಆಮ್ಚ್ಯಾ ಯುವಜಣಾಂ ಥಂಯ್ ಕ್ರಿಯಾತ್ಮಕ್ ಚಿಂತಾಪ್, ಸಕತ್ ಬರೆಂ ಮನ್ ಆಸಾ ಪೂಣ್ ಫಾವೊ ತೆ ವಿಮರ್ಸೊ ಆನಿ 'ಸಕ್ತೆಕ್' ಬರ್ಯಾಮನಾಕ್ ಆನಿ ಕ್ರಿಯಾತ್ಮಕ್ ಚಿಂತ್ಪಾಕ್ ಆನಿ ಕರ್ನೆಕ್ ಏಕ್ ಧನಾತ್ಮಕ್ ದಿಶಾ ದೀನಾತ್ಲ್ಯಾರೀ ಪವಿತ್ರ್ ಆನಿ ಬಳಾಧಿಕ್ ಸ್ವಾಭಾವಿಕ್ ಸಕತ್ ನಿರ್ಪಳ್ ಸಕತ್ ಜಾತಲಿ! ಮಾತ್ರ್ ನಂಯ್ ಸಮಾಜೆಕ್ ಏಕ್ ಮಾರಕ್ ಜಾಂವ್ಚಿ ವಾಯ್ಟ್ ಸಕತ್ಯೀ ಜಾತಲಿ!
ವ್ಹಯ್ ವಿಮರ್ಸೊ ಕರಿನಾಸ್ತಾಂ, ಸಾರ್ಕೆ ಚಿಂತಿನಾಸ್ತಾ ಕರ್ಚೆಂ ಕಾಮ್ ಸಬಾರ್ ಪಾವ್ಟಿಂ ಮಸ್ತ್ ನಿರ್ಪಳ್ ಆನಿ ವಾಯ್ಟ್ ಕಾಮ್ ಜಾಂವ್ಕ್ ಪಾವ್ತಾ. ಹೆಂ ಯುವಜಣಾಂಕ್ ಮಾತ್ರ್ ನಂಯ್ ಬಗಾರ್ ತಾಂಚ್ಯಾ ಮೊಗಾಚ್ಯಾಂಕೀ?
ಚುಕಿ, ಅನಾಹುತಾಂ ಖಂಡಿತ್ ಜಾವ್ನ್ ಸಕ್ಡಾಂ ಥಂಯ್ ಘಡ್ತಾತ್ ಆನಿ ಘಡ್ತೆಲ್ಯೊ. ಪೂಣ್ ಆಮಿ ಹೆರಾಂಚ್ಯಾ ಚುಕಿ ಆನಿ ಅನಾಹುತಾಂ ಥಾವ್ನ್ ಖಂಡಿತ್ ಜಾವ್ನ್ ಸಬಾರ್ ಸಂಗ್ತಿ ಶಿಕ್ಯೆತ್ ಆನಿ ಆಮ್ಚೆ ಥಂಯ್ ತೆಂ ಘಡಾನಾತ್ಲೆ ಪರಿಂ ಜಾಗ್ರುತ್ ಜಾವ್ಯೆತ್! ಆಮಿ ಕಳೊನೀ, ಹೆರಾಂಚಿ ಚುಕೊನ್ ಗೆಲ್ಲೆಂ ಪಳೊನಿ, ಬೆಜವಾಬ್ದಾರ್ ದಾಕೊವ್ನ್ ವರ್ತಾತ್ ತೆಚ್ ಚೂಕ್ ಆನಿ ಅನಾಹುತಾಂಕ್ ಬಲಿ ಜಾಂವ್ಚ್ಯಾಕೀ ಆನಿ ತಾಂತುನ್ ಥಾವ್ನ್ ಬಾಯ್ರ್ ಯೇಂವ್ಕ್ ಕಷ್ಟ್ ಕಾಡ್ಚ್ಯಾಕೀ ಜಾಗ್ರುತ್ ರಾವೊನ್ ಚುಕಿ ಅನಾಹುತ್ ಆಮ್ಚೆ ಥಂಯ್ ಘಡಾನಾಶೆ ಚತ್ರಾಯ್ ಗೆತ್ಲ್ಯಾರೀ ಕಿತ್ಲೆಂ ಬರೆಂ ನಂಯ್?
ವ್ಹಯ್, ಆಜ್ ಆಮ್ಚೊ ಅಮೊಲೊಕ್ ವೇಳ್ ಪ್ರತಿಫಳ್ ದೀನಾತ್ಲ್ಲ್ಯಾ ಸಂಗ್ತಿನಿ ಖರ್ಚುನ್ ಆವಯ್-ಬಾಪಯ್, ಟೀಚರಾಂಕ್, ವ್ಹಡಿಲಾಂಕ್ ಗೌರವ್ ದೀನಾಸ್ತಾಂ; ತುರ್ತಾನ್ ಪಯ್ಶೆಂ ಯಶಸ್ವಿ ಪದ್ವಿ, ನಾಂವ್ ಜೊಡ್ಚೆ ಖಾತಿರ್ ಆನಿ ಸಂಸಾರಿ ತಾಳ್ಯಾಂಚೆರ್ ಆನಿ ಆಮ್ಚ್ಯಾ ಕುಡಿಚ್ಯಾ ಸರ್ವ್ ದಾದೊಸ್ಕಾಯ್ ಆನಿ ಆಸಾ ಥಾಂಬಂವ್ಕ್ ಪ್ರಯತ್ನ್ ಕರ್ಚೆಂ ಸಮಾಜಿಕ್ ರೀತಿನ್ ಏಕ್ ವ್ಹಡ್ ಪಾತಕ್ ಮಾತ್ರ್ ಆಮ್ಚ್ಯಾ ಸಮಾಜೆಕ್ ಭೃಷ್ಟಂವ್ಚಿ ಏಕ್ ವಿಕಾಳ್ ಕರ್ನಿ. ಆನಿ ಹಾಚೆಂ ಪ್ರತಿಫಳ್ ಆಮ್ಚೆ ಭಂವ್ತಿಚಿ ಸಮಾಜ್ ಆಮ್ಕಾಂಚ್ ಪಾಟಿಂ ದಿತಾ ತೆಂ ಖರೆಂ! ಅಸಲೆಂ ಯುವಜಣಾಂ ತಾಂಚ್ಯಾ ಜೀವಿತಾಂತ್ ದೆದೆಸ್ಪೊರ್ ಜಾವ್ನ್ ಕೊಣಾಚೊಚ್ ಮೋಗ್, ವಿಶ್ವಾಸ್ ಜೊಡುಂಕ್ ಸಕಾನಾತ್ಲ್ಲೆ ಕ್ರೂರ್ ಮನ್ಜಾತಿ ಜಾವ್ನ್ ಅಪ್ಣೆಚ್ ನಾಸ್ ತೆ ಕರ್ತಾತ್.
ಅಸಲೆಂ ಘಡಿತಾಂ ಚುಕೊಂವ್ಚೆಖಾತಿರ್ ಕಿತೆಂ ಆಮಿ ಕರುಂಕ್ ಜಾಯ್? ಸಬಾರ್ ಸಂಗ್ತಿ ಆಸಾತ್! ತಾಂಚೆ ಪಯ್ಕಿ ಆಮಿಂ ಹರ್ಯೆಕ್ಲ್ಯಾನಿಂ ಹರ್ಯೆಕಾ ಕುಟ್ಮಾನಿಂ, ವಾಡ್ಯಾನಿಂ, ಫಿರ್ಗಜಾಂನಿ, ಸಂಸ್ಥ್ಯಾನಿಂ ಯುವಜಣಾಂಕ್ ತಾಂಚಿ ಕ್ರಿಯಾತ್ಮಕ್ ಸಕ್ತೆ ವಿಶ್ಯಾಂತ್ ಆನಿ ತಾಂಚ್ಯಾ ಸಮಾಜ್ ಬಾಂದ್ಚ್ಯಾ ಜವಾಬ್ದಾರೆ ವಿಶ್ಯಾಂತ್ ಸಮ್ಜಣಿ, ಉತ್ತೇಜನ್, ಸಹಕಾರ್ ಆನಿ ಪಾಟಿಂಬೊ ದೀಜಾಯ್! ಕುಟಾಮ್ ಹಾಚೆಂ ಮೂಳ್ ಕೇಂದ್ರ್ ಜಾವ್ನಾಸಾ ಆವಯ್ ಬಾಪಾಯ್ನ್ ಲ್ಹಾನ್ ಭುರ್ಗ್ಯಾಪಣಾರ್ಚ್, ಭುರ್ಗ್ಯಾಂನಿ ಇಚಾರ್ಲೆಂ ಸರ್ವ್ ದಿಂವ್ಚೆ ತಾಂಚೆ ಕರ್ತವ್ಯ್ ಮ್ಹಣ್ ಸಮ್ಜೊನ್ ಭುರ್ಗ್ಯಾಂಕ್ ವಾಯ್ಟ್ ದಿಶೆನ್ ವೊಚೊಂಕ್ ತಿಂ ಕಾರಣ್ ಜಾವ್ನಾಸಾತ್.
ಭುರ್ಗ್ಯಾಂಕ್ ಆನಿ ಯುವಜಣಾಂಕ್ ಆಧುನಿಕ್ ಸಂಸಾರಿ ವಸ್ತು ದಿಂವ್ಚೆಂ ಪೂಣ್ ತಾಚಾಕೀ ಪಯ್ಲೆಂ ಮುಳಾವಿಂ ಮೌಲ್ಯಾಂ, ಮಾಗ್ಣೆಂ, ಮೋಗ್, ಎಕ್ವಟ್, ದಯಾಳಾಯೆಚೆಂ ಕಾಳಿಜ್, ಸಮ್ಜಣಿಂ, ಗೌರವ್ ದೀಂವ್ಕ್, ಹೆರಾಂಕ್, ಗರ್ಜೆವಂತಾಕ್ ಕುಮೊಕ್ ಕರುಂಕ್ ಹೊ ಸರ್ವ್ ಪಯ್ಲೆಂ ಶಿಕಯ್ಜಾಯ್. ವ್ಹಯ್ ಹೆ ಸರ್ವ್ ಸಂಗ್ತಿ ಸುಪರ್ ಮಾರ್ಕೆಟಿನಿಂ ಆನಿ ಶೊಪಿಂಗ್ ಸೆಂಟರಾನಿಂ ಮೆಳ್ನಾಂತ್ ಪೂಣ್ ಹೆಂ ಸಂಗ್ತಿ ಆಮ್ಚಿ ಭುರ್ಗಿಂ ಆನಿ ಆಮ್ಚೆ ಯುವಜಣ್ ತಾಂಚ್ಯಾ ತಾಂಚ್ಯಾ ಆವಯ್ ಬಾಪಾಯ್ಚ್ಯಾ ಆನಿ ವ್ಹಡಿಲಾಂಚ್ಯಾ ಜೀವನಾ ಥಾವ್ನ್ ಶಿಕ್ತಾತ್.
ದೆಕುನ್ ಆವಯ್ ಬಾಪಾಯ್ನೊ, ವ್ಹಡಿಲಾನೊಂ ಆಮ್ಚ್ಯಾ ಯುವಜಣಾಂಕ್ ಬರೆಂ ಶಿಕಂವ್ಚೆ ಆನಿ ವಾಯ್ಟ ದಾಕಂವ್ಚೆ ಹಿ ಜವಾಬ್ದಾರಿ ತುಮ್ಚೆರ್ ಆಸಾ ಆನಿ ತುಮ್ಚಿ ಹಿ ಜವಾಬ್ದಾರಿ ಅಧಿಕ್ ಮಹತ್ವಾಚಿ, ಅಧಿಕ್ ತುರ್ತಾಚಿ! ಯುವಜಣಾಂಕ್ ಫಾಲ್ಯಾಂ ದುರ್ಸಾನಾಕಾತ್ ಆಜ್ ತುಮ್ಚ್ಯಾ ಜೀವಿತಾ ಮುಖಾಂತ್ರ್ ತಾಂಕಾ ಬರೆಂ ಶಿಕಯಾ!
ಬಾ| ಸುನಿಲ್ ಮಿನೇಜಸ್, ಎಸ್.ವಿ.ಡಿ.