ದೈವಿಕ್ ಸ೦ದೇಶ್

ತುಜೆಂ ಕಾಮ್ ಸರ್ವೆಸ್ಪರಾಚೆ ಅಧೀನ್ ಕರ್, ಆನಿ ತುಜ್ಯೊ ಯೆವ್ಝಣ್ಯೊ ಸುಫಳ್ ಜಾತಲ್ಯೊ (ಮಣ್ಣ್ಯೊ. 16:3).

ಫಾದರ್ ಹಾವೆಂ ಹಾತಿಂ ಘೆತ್‌ಲ್ಲ್ಯಾ ಹರ್ಯೆಕಾ ಕಾಮಾಂತ್ ಮ್ಹಾಕಾ ಸಲ್ವಣಿ ಪಾಟ್ಲ್ಯಾನ್ ಸಲ್ವಣಿ. ಕಸಲ್ಯಾ ವಾಯ್ಟ್ ಸಕ್ತೆಚೆ ಉಪಾದ್ರ್ ಮ್ಹಣ್ ಮ್ಹಾಕಾ ಕಳಾನಾ ಫಾದರ್. ಮ್ಹಾಕಾ ಜಿಯೆಂವ್ಚೆಂಚ್ ನಾಕಾ ಮ್ಹಳ್ಳೆಬರಿ ಭೊಗ್ತಾ. ಮ್ಹಜೆಖಾತಿರ್ ಮಾಗಾ ಫಾದರ್ ಮ್ಹಣ್ ರಾತಿಂ 10.30 ವೊರಾಕ್ ಎಕಾ ಭಾವಾನ್ ಮ್ಹಾಕಾ ಫೋನಾರ್ ಸಾಂಗ್ಲೆಂ. ತ್ಯಾ ಭಾವಾಕ್ ದುಸ್ರ್ಯಾ ದಿಸಾ ಮ್ಹಾಕಾ ಯೇವ್ನ್ ಮೆಳೊಂಕ್ ಹಾವೆಂ ಸಾಂಗುನ್ ತಾಚೆ ಖಾತಿರ್ ಫೋನಾರ್‌ಚ್ ಮಾಗೊನ್ ಹಾಂವ್ ನಿದ್ಲೊಂ. ದುಸ್ರ್ಯಾ ದಿಸಾ ಸಾಕಾಳಿಂ ತ್ಯಾ ಭಾವಾಕ್ ಮೆಳ್ಚ್ಯಾ ಪಯ್ಲೆಂ ಆರಾಧನಾಚಾ ಕೊಪೆಲಾಂತ್ ಹಾಂವ್ ಮಾಗೊನ್ ಆಸ್ತಾನಾ ಜೆಜುಲಾಗಿಂ ಕಸಲೊ ಸಂದೇಶ್ ತ್ಯಾ ಭಾವಾಕ್ ದೀಂವ್ಕ್ ತುಂ ಆಶೆತಾಯ್ ಮ್ಹಣ್ ವಿಚಾರ್‌ಲ್ಲ್ಯಾ ವೆಳಾರ್ ಜೆಜುನ್ ದಿಲ್ಲೊ ಸಂದೇಶ್ ಹೊ: "ತುಜೆಂ ಕಾಮ್ ಸರ್ವೆಸ್ಪರಾಚೆ ಅಧೀನ್ ಕರ್, ಆನಿ ತುಜ್ಯೊ ಯೆವ್ಜಣ್ಯೊ ಸುಫಳ್ ಜಾತಲ್ಯೊ" (ಮಣ್ಣ್ಯೊ. 16:3). ಜೆಜುನ್ ದಿಲ್ಲ್ಯಾ ಸಂದೇಶಾ ಪರ್ಮಾಣೆಂ ತ್ಯಾ ಭಾವಾನ್ ತಾಚೆಂ ಕಾಮ್ ದೆವಾಚ್ಯಾ ಅಧೀನ್ ಕರ್ಚ್ಯಾಕ್ ಪಾಂಚ್ ದಿಸಾಂಚ್ಯಾ ರೆತಿರೆಂತ್ ಹಾಜರ್ ಜಾಂವ್ಕ್ ಹಾವೆಂ ಸೂಚನ್ ದಿಲೆಂ. ಮ್ಹಜೆಂ ಸೂಚನ್ ಸ್ವೀಕಾರ್ ಕರುಂಕ್ ತ್ಯಾ ಭಾವಾಕ್ ಸಬಾರ್ ಅಡ್ಕಳಿ ಆಸ್‌ಲ್ಲ್ಯೊ ಪೂಣ್ ದೆವಾಚ್ಯಾ ಉತ್ರಾಂಚಿ ಸಮ್ಜಣಿ ದಿತಾಸ್ತಾನಾ ಸರ್ವ್ ಅಡ್ಕಳೆಲ್ಯಾ ಪಯ್ಸ್ ಗೆಲ್ಯೊ ಆನಿ ತಾಣೆಂ ಪಾಂಚ್ ದಿಸಾಂಚ್ಯಾ ವಸ್ತೆ ರೆತಿರೆಂತ್ ಭಾಗ್ ಘೆತ್ಲೊ. ರೆತಿರ್ ಅಖೇರ್ ಜಾಂವ್ಚ್ಯಾ ಪಯ್ಲೆಂಚ್ ಮ್ಹಣ್ಜೆ ಬ್ರೆಸ್ತಾರಾದಿಸಾ ಕುಮ್ಸಾರಾಚ್ಯಾ ಸಾಕ್ರಮೆಂತಾ ಮಾರಿಫಾತ್ ನಿತಳ್ ಜಾವ್ನ್ ದೆವಾಕ್ ಅರ್ಗಾಂ ಹೊಗ್ಳಾಪ್ ದಿತಾಸ್ತಾನಾ ತಾಕಾ ಫೊನಾ ಮುಖಾಂತ್ರ್ ಬರಿ ಖಬಾರ್ ಮೆಳ್ಳಿ. ಸ ಮಹಿನ್ಯಾಥಾವ್ನ್ ಇಸ್ರಾಯೆಲ್ ವಚೊಂಕ್ ತೊ ವಿಜಾಖಾತಿರ್ ರಾಕೊನ್ ಆಸ್‌ಲ್ಲೊ, ತಿ ವೀಜಾ ತಾಕಾ ಫಾವೊ ಜಾಲ್ಲಿ! ಆಜ್ ತೊ ಭಾವ್ ಇಸ್ರಾಯೆಲಾಂತ್ ವಾವ್ರ್ ಕರುನ್ ಆಸಾ ಮಾತ್ರ್ ನಂಯ್ ಹೆರಾಂಕ್‌ಯೀ ದೆವಾಸರ್ಶಿಂ ಹಾಡುಂಕ್ ದೆವಾಚೆಂ ವರ್ತೆಂ ಹಾತೆರ್ ಜಾವ್ನ್ ತೊ ವಾವುರ್ನ್ ಆಸಾ!

ಮನಿಸ್ ಸಬಾರ್ ಯೋಜನಾ ಕರ್ತಾ ಪುಣ್ ಜಿಂ ಯೋಜನಾಂ ದೆವಾಚ್ಯಾ ಖುಶೆಕ್ ಸರಿ ಜಾವ್ನ್ ಕೆಲ್ಲಿಂ ಜಾವ್ನಾಸಾತ್ ತಿಂ ಮಾತ್ರ್ ಸುಫಳ್ ಜಾತಾತ್. ಸರ್ವೆಸ್ಪರ್ ದೇವ್ ಮ್ಹಣ್ತಾ, "ಮ್ಹಜಿ ಚಿಂತ್ನಾ ತುಮ್ಚಿಂ ಚಿಂತ್ನಾ ನಂಯ್, ಮ್ಹಜ್ಯೊ ವಾಟೊ ತುಮ್ಚ್ಯೊ ವಾಟೊ ನಂಯ್. ಜಿತ್ಲೆಂ ಮಳಬ್ ಪೃಥ್ವೆ ಥಾವ್ನ್ ವಯ್ರ್ ಆಸಾ, ತಿತ್ಲ್ಯೊ ಮ್ಹಜ್ಯೊ ವಾಟೊ ತುಮ್ಚ್ಯಾ ವಾಟಾಂ ವಯ್ರ್ ಆಸಾತ್" (ಇಸಾ. 55:8-9). ತರ್ ದೆವಾಚೆ ವಾಟೊ ಕಸಲೆ ಜಾವ್ನಾಸಾತ್, ತಾಚಿಂ ಯೋಜನಾಂ ಕಿತೆಂ ಜಾವ್ನಾಸಾತ್ ಮ್ಹಣ್ ಆಮಿಂ ಕಶೆಂ ಸಮ್ಜುನ್ ಘೆಂವ್ಚೆಂ? ತೀನ್ ಸಂಗ್ತಿ ಹ್ಯಾ ದಿಶೆಂತ್ ದೆವಾಚ್ಯಾ ಉತ್ರಾ ಮಾರಿಫಾತ್ ಹಾಂಗಾಸರ್ ಆಮಿ ಸಮ್ಜವ್ಯೆತ್.

1. ಸಗ್ಳ್ಯಾ ತುಜ್ಯಾ ಕಾಳ್ಜಾನ್ ಸರ್ವೆಸ್ಪರಾಚೆರ್ ವಿಶ್ವಾಸ್ ದವರ್, ತುಜೆಚ್ ಬುದ್ವಂತ್ಕಾಯೆಚೆರ್ ಪಾತ್ಯೆಣಿ ದವರ್ನಾಕಾ: (ಮಣ್ಣ್ಯೊ. 3:5)

ಎಕಾ ಹಫ್ತ್ಯಾ ಆದಿಂ ಟೈಮ್ಸ್ ಆಫ್ ಇಂಡಿಯಾ ಇಂಗ್ಲಿಷ್ ಪತ್ರಾರ್ ಕಿತ್ಲ್ಯಾ ವಿeನಿಂಕ್ ದೆವಾಚೆರ್ ವಿಶ್ವಾಸ್ ಆಸಾ ಮ್ಹಣ್ ಸಮ್ಜುಂಚೆ ಖಾತಿರ್ ಹಾರ್‌ವಾಡ್ ಯುನಿವರ್ಸಿಟಿನ್ ಕೆಲ್ಲ್ಯಾ ಸಮೀಕ್ಷೆಚೊ ರಿಪೋರ್ಟ್ ದಿಲ್ಲೊ. ತ್ಯಾ ಸಮೀಕ್ಷೆ ಪರ್ಮಾಣೆಂ ಸುಮಾರ್ 35 ಶೇಕಡಾ ವಿಜ್ನ್ಯಾನಿ ದೇವ್ ನಾ ಮ್ಹಣ್ತಾತ್ ಮ್ಹಣ್ ಕಳೊನ್ ಆಯ್ಲೆಂ. ಉರ್‌ಲ್ಲ್ಯಾ 65 ಶೇಕಡಾಂತ್ ಸುಮಾರ್ 30 ಶೇಕಡಾ ವಿಜ್ನ್ಯಾನಿಂಚಿ ಅಭಿಪ್ರಾಯ್ ಅಶಿಗೀ - ದೇವ್ ಆಸ್ಲ್ಯಾರ್‌ಯೀ ನಾತ್ಲ್ಯಾರ್‌ಯೀ ತೆಂ ಕಾಂಯ್ ಆಮ್ಕಾಂ ಪಡೊನ್ ವಚೊಂಕ್ ನಾ. ಆಮ್ಕಾಂ ತೆಂ ಕಾಂಯ್ ಫರಕ್ ಪಡಾನಾ. ಖಾಲಿ 35 ಶೇಕಡಾ ವಿಜ್ನ್ಯಾನಿ ಮಾತ್ರ್ ದೆವಾಕ್ ಮಾನ್ತಾತ್ ಮ್ಹಣ್ ಹ್ಯಾ ಸಮೀಕ್ಷೆಂತ್ ಆಮಿಂ ಸಮ್ಜಾತಾನಾ ಮನಿಸ್ ಆಪ್ಲೆಚ್ ಬುದ್ವಂತ್ಕಾಯೆಚೆರ್ ಪಾತ್ಯೆಣಿ ದವರ್ನ್ ಆಜ್ ಜಿಯೆವ್ನ್ ಆಸಾ, ಮಾತ್ರ್ ನಂಯ್ ತಿ ಬುದ್ವಂತ್ಕಾಯ್ ದೆವಾಚೆಂ ದೆಣೆಂ ಮ್ಹಣ್ ವಳ್ಕುನ್ ಘೆಂವ್ಕ್ ತಯಾರ್ ನಾ ಮ್ಹಳ್ಳೆಂ ಕೊಡು ಸತ್ ಆಮ್ಕಾಂ ಕಳಿತ್ ಜಾತಾ. ಸರ್ವೆಸ್ಪರ್ ದೇವ್ ಸರ್ವ್ ದೆಣ್ಯಾಂಚೊ ದಾತಾರ್, ಇಸಾಯಿಯಾ ಪ್ರವಾದಿ ಮುಖಾಂತ್ರ್ ಮನ್ಶಾಚಿ ಹಿ ಪರಿಸ್ಥಿತಿ ಪಳೆವ್ನ್ ಮ್ಹಣ್ತಾ - "ಪಾಡೊ ಆಪ್ಲ್ಯಾ ಧನಿಯಾಕ್ ಒಳ್ಕಾತಾ; ಗಾಡುಂ ಆಪ್ಲ್ಯಾ ಧನಿಯಾಚಿ ಖಾವಣ್ ಒಳ್ಕತಾ; ಪೂಣ್ ಇಸ್ರಾಯೆಲ್ ಒಳ್ಕನಾ, ಮ್ಹಜೆ ಪರ್ಜೆಕ್ ಸಮ್ಜಾನಾ" (ಇಸಾ. 1:3). ಪರತ್ ಜೆರೆಮಿಯಾ ಪ್ರವಾದಿ ಮಾರಿಫಾತ್ ಸರ್ವೆಸ್ಪರ್ ಅಶೆಂ ಮ್ಹಣ್ತಾ - "ಜೊ ಮನಿಸ್ ಮನ್ಶಾಂಚೆರ್ ವಿಶ್ವಾಸ್ ದವರ್ತಾ ಆನಿ ಮನ್ಶಾಂಚೆ ಸಕ್ತೆಚೆರ್ ಪಾತ್ಯೆತಾ, ಜೊ ಮನಿಸ್ ಆಪ್ಲೆಂ ಕಾಳಿಜ್ ಸರ್ವೆಸ್ಪರಾ ಥಾವ್ನ್ ಪಯ್ಸ್ ಕರ್‍ತಾ, ತೊ ಮನಿಸ್ ಶಿರಾಪ್ ಪಡ್ಲಲೊ. ತಸಲೊ ಮನಿಸ್ ಅರಣ್ಯಾಂತ್ಲ್ಯಾ ಝಿಲ್ಕುಚ್ಯಾ ಸಾರ್ಕೊ; ಬರೆಂ ಆಯ್ಲ್ಯಾರ್‌ಯೀ ತಾಚೊ ಪರಿಣಾಮ್ ತೊ ಭೊಗಿನಾ, ಕಿತ್ಯಾಕ್ ಅರಣ್ಯಾಂತ್ ಸುಕ್ಯಾ ಕರ್ಡ್ಯಾ ಜಾಗ್ಯಾರ್, ಕೋಣ್‌ಚ್ ವಸ್ತಿ ಕರಿನಾ ತೆ ಖಾರೆ ಭುಂಯ್ಚೆರ್ ತೊ ಜಿಯೆತಾ" (ಜೆರೆ. 17:5-6).

2. ಸಗ್ಳ್ಯಾ ತುಜ್ಯಾ ವಾಟಾಂನಿ ತಾಕಾ ಒಳ್ಕುನ್ ಘೆಂವ್ಕ್ ಸೊಧ್ ಆನಿ ತೊ ತುಜೊ ಮಾರಗ್ ನೀಟ್ ಕರ್ತಲೊ (ಮಣ್ಣ್ಯೊ. 3:6)

ಕೆದಾಳಾ ಮನಿಸ್ ಆಪ್ಲ್ಯಾ ವಾಟಾನಿಂ ದೆವಾಕ್ ಒಳ್ಕತಾ ತವಳ್ ತಾಚೆ ಮುಖಾರ್ ಮಾರೊಗ್ ನೀಟ್ ಉರ್ತಾ ನಾ ತರ್ ಸಬಾರ್ ರೊಡ್‌ಬ್ಲಾಕ್ ಮೆಳ್ತಾತ್ ಆನಿ ಮನಿಸ್ ಕಂಗಾಲ್ ಜಾತಾ. ಪುಣ್ ಮನಿಸ್, ಚಡಾವತ್ ಆಪ್ಲಿಚ್ ವ್ಹಡ್ವಿಕ್ ಆನಿ ಬಡಾಯ್ ಉಲೊಂಕ್ ಆಶೆತಾ. 'ಹಾವೆಂ ತೆಂ ಕಾಮ್ ಕೆಲೆಂ. ಹೆಂ ಮ್ಹಜೆಂ ಸಾಧನ್...' ಮ್ಹಣ್ಚೊ ಮನಿಸ್ ಆಪ್ಲ್ಯಾ ವಾಟಾನಿಂ ದೆವಾಕ್ ಒಳ್ಕುನ್ ತಾಕಾ ಅರ್ಗಾಂ ಹೊಗ್ಳಾಪ್ ದೀಂವ್ಕ್, ದೆವಾಚಿಂ ಮಹಿಮಾಂ ಗಾಂವ್ಕ್ ಸಕಾನಾ. ಹೆಂ ಸತ್ ಜಾಣಾ ಜಾಲ್ಲೊ ಕೀರ್ತನ್‌ಗಾರ್ ಮ್ಹಣ್ತಾ - "ಸರ್ವೆಸ್ಪರಾ ಥಂಯ್ ತುಜೊ ಸಂತೊಸ್ ಸೊಧ್, ತುಜೆಂ ಕಾಳಿಜ್ ಅತ್ರೆಗ್ತಾ ತೆಂ ತೊ ತುಕಾ ದಿತಲೊ. ತುಜಿ ವಾಟ್ ಸರ್ವೆಸ್ಪರಾಶಿಂ ಪರ್ತಿ, ತಾಚೆರ್ ವಿಶ್ವಾಸ್ ದವರ್ ಆನಿ ತೊ ಸಗ್ಳೆಂ ಕರ್ತಲೊ" (ಕೀರ್ತನ್. 37:4-5). ಸಾಂ. ಪಾವ್ಲ್ ಸೊಮ್ಯಾಕ್ ಮಹಿಮಾ ದೀವ್ನ್ ಮ್ಹಣ್ತಾ - "ವಡ್ವಿಕ್ ಉಲಂವ್ಕ್ ಸೊಧ್ತಾ ತೊ ಸೊಮಿಯಾಚಿ ವ್ಹಡ್ವಿಕ್ ಉಲೊಂವ್" (1 ಕೊರಿಂಥ್ 1:31).

3. ತುಜ್ಯಾಚ್ ದೊಳ್ಯಾಂ ಮುಖಾರ್ ತುಂ ಬುದ್ವಂತ್ ಮ್ಹಣ್ ಲೆಖಿನಾಕಾ, ಸರ್ವೆಸ್ಪರಾಕ್ ಭಿಯೆವ್ನ್ ಚಲ್ ಆನಿ ವಾಯ್ಟಾ ಥಾವ್ನ್ ಪಯ್ಸ್ ಸರ್ (ಮಣ್ಣ್ಯೊ. 3:7)

ದೆವಾನ್ ಮನ್ಶ್ಯಾಕ್ ಬುದ್ವಂತ್ಕಾಯ್ ದಿಲ್ಯಾ ಬರೆಂ ಆನಿಂ ವಾಯ್ಟ್ ಕಿತೆಂ ಮ್ಹಣ್ ಸಮ್ಜುನ್ ಜೆಂ ಕಿತೆಂ ಬರೆಂ ಆಸಾ ತಾಚಿ ವಿಂಚವ್ಣ್ ಕರುಂಕ್ ಆನಿ ವಾಯ್ಟ್ ಪಯ್ಸ್ ಕರುಂಕ್. ಪುಣ್ ಮನಿಸ್ ಆಪ್ಲ್ಯಾ ಗರ್ವಾನ್ ಆನಿ ಹಂಕಾರಾನ್ ಭರುನ್ ದೆವಾನ್ ದಿಲ್ಲಿ ಬುದ್ವಂತ್ಕಾಯ್ ಖಾಲ್ತೆಪಣಾನ್ ಉಪಯೋಗ್ ಕರ್ಚ್ಯಾ ಬದ್ಲಾಕ್ ಆಪ್ಲ್ಯಾಚ್ ಸ್ವಾರ್ಥಾಖಾತಿರ್ ಗಳ್ಸುನ್ ಜಿಣ್ಯೆಂತ್ ಆಶೀರ್ವಾದ್ ಜೊಡ್ಚ್ಯಾ ಬದ್ಲಾಕ್ ಶಿರಾಪ್ ಮಾಗೊನ್ ಘೆತಾ. ಜೆರೆಮಿಯಾ ಪ್ರವಾದ್ಯಾ ಮಾರಿಫಾತ್ ಸರ್ವೆಸ್ಪರ್ ದೇವ್ ಮ್ಹಣ್ತಾ - "ಮ್ಹಜೆ ಪರ್ಜೆನ್ ದೋನ್ ವಾಯ್ಟಾಂ ಕೆಲಿಂ. ತಾಣಿಂ ಮ್ಹಾಕಾ, ಜಿವ್ಯಾ ಉದ್ಕಾಚೆ ಝರಿಕ್ ಸಾಂಡ್ಲೊ; ತಾಣಿಂ ಆಪ್ಣಾಂ ಪಾಸತ್ ಬಾಂಯೊಂ ಖಣ್ಣ್ಯೊ ಉದಾಕ್ ಧರುಂಕ್ ಉಪ್ಕಾರ್‍ನಾಂತ್ ತ್ಯೊ ಫುಟ್ಕ್ಯೊ ಬಾಂಯೊಂ" (ಜೆರೆ. 2:13). ಜಿವ್ಯಾ ಉದ್ಕಾಚೆ ಝರಿಕ್, ಸರ್ವೆಸ್ಪರಾಕ್ ಅತ್ರೆಗುನ್ ದಾವಿದ್ ರಾಯ್ ಮ್ಹಣ್ತಾ - "ಸರ್ವೆಸ್ಪರಾಲಾಗಿಂ ಹಾಂವ್ ಏಕ್‌ಚ್ ಮಾಗ್ತಾಂ, ತೆಂಚ್ ಹಾಂವ್ ಅತ್ರೆಗ್ತಾಂ; ಸಗ್ಳ್ಯಾ ಮ್ಹಜ್ಯಾ ಜಿವಿತಾಂತ್ ಸರ್ವೆಸ್ಪರಾಚ್ಯಾ ಘರಾಂತ್ ರಾವುಂಕ್, ಸರ್ವೆಸ್ಪರಾಚಿ ಸೊಭಾಯ್ ಪಳೆಂವ್ಕ್ ಆನಿ ತಾಚ್ಯಾ ಮಂದಿರಾಂತ್ ನಿಯಾಳ್ ಕರುಂಕ್" (ಕೀರ್ತನ್. 27:4). ಹೊಚ್ ಅತ್ರೆಗ್ ಆಮ್ಚೊ ಕರುನ್ ದೆವಾಕ್ ಆಮ್ಚ್ಯಾ ಜಿಣ್ಯೆಚೊ ಮ್ಯಾನೆಜರ್ ಜಾವ್ನ್ ಆಮ್ಕಾಂ ಚಲೊನ್ ವ್ಹರುಂಕ್ ಸಂಪೂರ್ಣ್ ಥರಾನ್ ಆಮ್ಕಾಂಚ್ ತಾಕಾ ಆಮಿಂ ಸಮರ್ಪುನ್ ದಿವ್ಯಾಂ. "ಕಿತ್ಲೊ ಅಮೊಲಿಕ್ ದೆವಾ ತುಜೊ ಮೋಗ್! ತುಜ್ಯಾ ಪಾಕಾಚ್ಯಾಂಚೆ ಸಾವ್ಳೆಂತ್ ಆದಾಂವ್ಚಿಂ ಭುರ್ಗಿಂ ಆಸ್ರೊ ಘೆತಾತ್. ತುಜ್ಯಾ ಘರಾಂತ್ಲ್ಯಾ ಗ್ರೇಸ್ತ್‌ಕಾಯೆನ್ ತಿಂ ಧಾದೊಶಿ ಜಾತಾತ್" (ಕೀರ್ತನ್. 36:7).

- ಬಾ| ವಲ್ಟಿ, ಎಸ್‌.ವಿ.ಡಿ.