ದೈವಿಕ್ ಸ೦ದೇಶ್

ಆಮಿ ಸಂಸಾರಾಂತ್ ಜಿಯೆತಾಸ್ತಾನಾ, ಸಬಾರ್ ಥರಾಂಚ್ಯಾ ಲೊಕಾಮಧೆಂ ಜಿಯೆತಾಂವ್. ತಾಂಚ್ಯಾ ಮದ್ಲೆ ಥೊಡೆ ಆಮ್ಚಿಂ ಮನಾಂ-ಕಾಳ್ಜಾಂ ಆಕರ್ಷಿತ್ ಕರ್ತಾತ್ ಆನಿ ತಾಂಚೆಂ ವ್ಯಕ್ತಿತ್ವ್ ಬರೆಂ ಆನಿ ವರ್ತೆಂ ತಶೆಂ ಆಮ್ಕಾಂ ಭೊಗ್ತಾ; ಆನಿ ತ್ಯಾ ದೆಕುನ್ ಮನಿಸ್ ತಸಲ್ಯಾ ವರ್ತ್ಯಾ ಮಾನಾಚ್ಯಾ, ಘನಾಚ್ಯಾ ಯಾ ವಿಶೇಸ್ ತಾಲೆಂತಾಂನಿ ಭರ್‌ಲ್ಲ್ಯಾ ವ್ಯಕ್ತಿಂಚೊ ಪಾಟ್ಲಾವ್ ಕರುಂಕ್ ಪಳೆತಾ - ತಾಂಚ್ಯಾ ಪರಿಂ ಉಬೊಂವ್ಕ್, ಚಲೊಂಕ್, ನೆಸೊಂಕ್ ವ ಸ್ಟೈಲ್ ಕರುಂಕ್, ಹಾಸೊಂಕ್ ಯಾ ಖೆಳೊಂಕ್ ವ ಮ್ಯೂಸಿಕ್ ವಾಜೊಂವ್ಕ್ ವಾ ನಾಚೊಂಕ್ ಪ್ರಯತ್ನ್ ಕರ್ತಾ. ಜರ್ ಹೆರಾಂನಿ ಅಸಲೆಂ ಪೂರಾ ಪಳೆವ್ನ್ ತಾಂಕಾಂ.. ತುಂ ಧೋನಿ ಪರಿಂ ದಿಸ್ತಾಯ್ ತುಂ ಅಖ್ತರಾಪರಿಂ ಬೌಲಿಂಗ್ ಕರ್ತಾಯ್, ತುಂ ಜಾಲ್ಯಾರ್ ಐಶ್ವರ್‍ಯ ರೈಚ್ ಸೈ... ಮ್ಹಣ್ತಾನಾ ಬಾರೀ ಖುಶಿ... ಕೊಲರ್, ಮಿಶಿ ವಯ್ರ್ ವೆತಾ... ಪೂಣ್ ಹೆರಾಂಕ್ 'ತುಂ ಕಾಲೆಂ ಮಾತಾರ್‍ಯಾ ಪರಿಂ ದಿಸ್ತಾಯ್, ಪಿರ್‍ಕ್ಯಾ ಪರಿಂ ನೆಸ್ಲ್ಯಾಂಯ್' ಮ್ಹಳ್ಯಾರ್ ಬೆಜಾರಾಯ್ ಜಾತಾ. ಅಶೆಂ ಆಮ್ಕಾಂ ಜೀವನಾಂತ್ ಆಮ್ಚೊ ಬಾಯ್ಲೊ ಆವ್ತಾರ್ ಪಳೆವ್ನ್ ಲೊಕಾಂನಿ ಪುಗರ್‍ಲ್ಯಾರ್ ಆಮ್ಕಾಂ ಸಂತೊಸ್ ಪೂಣ್ ಭಿತರ್ಲ್ಯಾನ್ ಕಶೆಂ ಆಸ್ಲ್ಯಾರ್‌ಯೀ ಚಲ್ತಾ ಹ್ಯಾ ಸಂಸಾರಾರ್!

ಅಸಲ್ಲ್ಯಾ ಸಂಸಾರಾಂತ್ ಮಿಸಾಂವ್ ಕರುಂಕ್ ದೆವಾನ್ ವಿಂಚ್ಲಾಂ ಆಮ್ಕಾಂ ಯಾಜಕ್ ತಶೆಂಚ್ ಧಾರ್ಮಿಕಾಂಕ್... ನ್ಹಯ್ ಕೇವಲ್ ಸೊಮ್ಯಾಪರಿಂ ದಿಸ್ಚ್ಯಾಕ್, ವಾ ನೆಸ್ಚ್ಯಾಕ್ ಬಗಾರ್ ಕಾಳ್ಜಾ-ಮನಾಂ-ಜಿಣ್ಯೆದ್ವಾರಿಂ ಆಮಿಂ ಸೊಮ್ಯಾಪರಿಂ ಜಾಂವ್ಚ್ಯಾಕ್. ಜಶೆಂ ಬಾಯ್ರ್ ಮ್ಹಣ್ಜೆ ಸಂಸಾರಾಂತ್ ಲೋಕ್ ಬಾಯ್ಲಾನ್ ವರ್ತೆ ಜಾಂವ್ಕ್ ಮೊಸ್ತು ಥರಾನ್ ಪೆಚಾಡ್ತಾ, ತಾಚ್ಯಾ ಖಾತಿರ್ ಆಪ್ಲೊ ದುಡು, ವೇಳ್, ಬರೆಂಪಣ್ ಖರ್ಚುಂಕ್ ಆನಿ ಥೊಡ್ಯಾ ಸಂದರ್ಭಾಂನಿ ಹೊಗ್ಡಾಂವ್ಕ್‌ಯೀ ಪಾವ್ತಾ ಆನಿ ಸಂಸಾರಾಂತ್ ಹರ್‍ಯೆಕಾಂತ್‌ಯೀ ಹಾಂವ್ ಕಾಂಯ್ ಪಾಟಿಂ ನಾಂ ಮ್ಹಣ್ ದಾಕಯ್ತಾ ತರ್ ಆಮಿ ಯಾಜಕ್ ಭಾವ್, ಆನಿ ಧಾರ್ಮಿಕ್ ಖಂಯ್ ಆಸಾಂವ್... ಸೊಮಿಂ ಆಮ್ಕಾಂ ತಾಚ್ಯೆ ಸಂಗಿಂ ಆಸ್ಚ್ಯಾಕ್ (Mt. 3:14a) ತಾಚೊ ಜಿಣ್ಯೆದ್ವಾರಿಂ ಪಾಟ್ಲಾವ್ ಕರ್ಚ್ಯಾಕ್ (Mt. 10:38) ಆನಿ ತಾಚ್ಯೆ ಥಾವ್ನ್ ಸದಾಂ ಶಿಕ್ಚ್ಯಾಕ್ (Mt. 11:29) ಆನಿ ಕಾಳ್ಜಾ-ಮನಾನ್ ತಾಚ್ಯೆ ಪರಿಂ ಜಾಂವ್ಚ್ಯಾಕ್ ಆಪಯ್ತಾ. ಹೆಂ ಏಕ್ ವರ್ತೆಂ ಪಂಥಾಹ್ವಾನ್. ಕೇವಲ್ ಸೊಮ್ಯಾವಿಶ್ಯಾಂತ್ ಶಿಕ್ಚೆಂ, ಆನಿ ವಾಚ್ಚೆಂ ಆನಿ ತೆಂ ಲೊಕಾಂಕ್ ಶಿಕೊಂವ್ಚೆಂ ವ ಶೆರ್ಮಾಂವ್ ದಿಂವ್ಚೆಂ ಬಗಾರ್ ಆಮ್ಚೆಂ ವ್ಯಕ್ತಿತ್ವ್ ಸೊಮ್ಯಾಕ್‌ಚ್ ಸರಿ ಜಾಯ್ಜೆ. ಆಮಿಂ ಉಲಂವ್ಚಿ ರೀತ್, ಆಮ್ಚೆ ಥಂಯ್ ಆಸಾಜಾಯ್ ತಸಲೆಂ ಖಾಲ್ತೆಪಣ್, ದಯಾಳಾಯ್, ಅಸ್ಕತ್ ಆನಿ ಪಾತ್ಕಿ ಮನ್ಶ್ಯಾಂಕ್ ಸಮ್ಜೊನ್ ಘೆಂವ್ಚೆಂ ತಸಲೆಂ ಮೊವಾಳಾಯೆನ್ ಭರ್‌ಲ್ಲೆಂ ಏಕ್ ಕಾಳಿಜ್. ಆಪ್ಣಾಚೊಚ್ ಸಂತೊಸ್ ನ್ಹಯ್ ಬಗಾರ್ ಹೆರಾಂಚೊ ಸಂತೊಸ್ ಪಳೆಂವ್ಚೆಂ, ಹೆರಾಂಖಾತಿರ್ ಜಿಯೆಂವ್ಚೆಂ, ಹೆರಾಂ ಥಂಯ್ ಆಸ್ಚೊ ತೊ ಖಂತ್ ಹುಸ್ಕೊ, ಹೆರಾಂಚೆ ದುಃಖ್ ರಡ್ಣೆ-ಆಟೆವಿಟೆ ಸಮ್ಜೊನ್ ಘೆಂವ್ಚಿ ಸಕತ್. ಥೊಡೆ ಪುಣೀ ಸೊಸುನ್ ವರ್ನ್ ಹೆರಾಂಕ್ ಇಲ್ಲೆ ತರೀ ಬರೆಂಪಣ್ ಲಾಭಾಶೆಂ ಕರ್‍ಚೆಂ; ತ್ಯಾಗಾಚಿ ಜಿಣಿ-ನಿಸ್ವಾರ್ಥಿ ಸೆವಾ... ಹೆರಾಂಖಾತಿರ್ ಮಾಗ್ಚೆಂ ಆನಿ ಗರ್ಜೆಂತ್ ತಶೆಂಚ್ ಕಷ್ಟಾಂತ್ (ಚುಕೊನ್ ಗೆಲ್ಲ್ಯಾ ಶೆಳಿಯಾಂಕ್) ದೆವಾ ಥಂಯ್ ಮೊಗಾನ್ ಆನಿ ಭಾವಾಡ್ತಾನ್ ಪಾಟಿಂ ಹಾಡ್ಚೆಂ... ಅಶೆಂ ಸಬಾರ್ ಸಂಗ್ತಿಂನಿ ಹಾಂವೆಂ ತಾಚ್ಯೆಪರಿಂ ಜಾಯ್ಜೆ ಆನಿ ಜಾಂವ್ಕ್ ಸಾಧ್ಯ್ ಆಸಾ.

ಹೆರಾಂಚಿ ಕಾರಾಂ, ಹೆರಾಂಚಿ ಘರಾಂ ಆನಿ ವಡ್ವಿಕಾಯೆಚಿಂ ಲಾರಾಂ ದೆಖ್ತಾನಾ ಎಕ್ಲ್ಯಾಕ್ ಆಪುಣ್ ಎಕ್ಲೊ ಕಿತ್ಯಾ ಹ್ಯಾ ಕಾಳಾರ್ ಪಾಟಿಂ ಉರಾಜಾಯ್ ಮ್ಹಳ್ಳಿಂ ಥೊಡಿಂ ಸವಾಲಾಂ ಆಮ್ಕಾಂ ಯೆತಿತ್. ಪೂಣ್ ದೆದೆಸ್ಪಾರ್ ಜಾಯ್ಜೆ ಮ್ಹಣ್ ನಾ.

ಸೊಮ್ಯಾಕ್ ಅಸಾಧ್ಯ್ ಜಾಲ್ಲೆಂ ಕಿತೆಂಚ್ ನಾ. ಆಮಿಂ ಖಂಚಾ ಥರಾನ್ ದಿಸ್ಲ್ಯಾರೀ ಆಮ್ಚೆಂ ಥಂಯ್ ಕಿತ್ಲೆ ಬರೆಂಪಣ್ ಆಸಾ ಆನಿ ಖಂಯ್ಚ್ಯಾಂತ್ ಆಮಿ ಫುಡೆಂ ಆಸಾಂವ್ ತಸಲ್ಲ್ಯಾಂತ್ ಆನಿಕೀ ಫುಡೆ ಸರುಂಕ್ ಚಡಿತ್ ಸಕತ್ ಆನಿ ಬರೆಂ ಮನ್ ತಶೆಂಚ್ ಬರೆಂ ಕಾಳಿಜ್ ಸರ್ವೆಸ್ಪರ್ ರಚುಂದಿ ಮ್ಹಳ್ಳೆಂ ಮ್ಹಜೆಂ ಮಾಗ್ಣೆಂ. ಆಮಿಂ ಆಮ್ಚೆ ಕೇಸ್ ಯಾ, ವೇಸ್, ನೆಸಾಪ್ ಆನಿ ಉಲೊಣೆಂ ನ್ಹಯ್ ಬಗಾರ್ ಆಮ್ಚ್ಯಾ ಕಾಳ್ಜಾ ಮನಾಂತ್ ಸಗ್ಳಿ ಜಿಣಿಂಚ್ ಜೆಜುಪರಿಂ ಜಾಂವ್ಕ್ ಅತ್ರೆಗ್ಯಾಂ, ಪೆಚಾಡ್ಯಾಂ ಆನಿ ಮಾಗ್ಯಾಂ. ತಶೆಂಚ್ ಸರ್ವ್ ಆಮ್ಚ್ಯಾ ಲಾಯಿಕ್ ಭಾವಾ ಭಯ್ಣಿಂನಿ, ತುಮ್ಚ್ಯಾ ಯಾಜಕ್ ಭಾವಾಂನಿ ಆನಿ ಧಾರ್ಮಿಕ್ ಭಯ್ಣಿಂನಿ ತಾಂಚ್ಯಾ ಮನ್ಶ್ಯಾ ಸೈಂಬಾಚ್ಯಾ ಪೊಡ್ಣ್ಯಾ, ತಾಳ್ಣ್ಯಾ ಆನಿ ಭುಲವ್ಣ್ಯಾಚೆರ್ ಜಯ್ತ್ ವರ್ನ್ ಕ್ರಿಸ್ತಾಸಾರ್ಕಿಂ ಜಾಂವ್ಚ್ಯಾಕ್ ಸದಾಂ ತುಮಿ ಆಮ್ಚೆಖಾತಿರ್ ಮಾಗಾತ್ ಮ್ಹಳ್ಳಿಂ ಮ್ಹಜಿ ಖಾಲ್ತಿ ವಿನಂತಿ.

ಆಮ್ಚೊ ಲೊಕ್ ಆಮ್ಚೆ ಥಾವ್ನ್ ಏಕ್ ದೆವೊತ್, ಮೊಗಾಳ್, ಸಮ್ಜೊಣೆಚೊ, ಭೊಗ್ಸಾಣ್ಯಾಚೊ, ಕ್ರಿಸ್ತಾಚ್ಯಾ ಶಿಕವ್ಣೆಕ್ ಸರಿ ಜಾವ್ನ್ ಜಿಯೆಂವ್ಚೆ ತಸಲೊ, ಮಾಗ್ಣ್ಯಾಚೊ ಲೊಕಾಂಕ್ ಆಯ್ಕೊನ್ ಸಮ್ಜೊನ್ ಘೆಂವ್ಕ್ ಸಕತ್, ವೇಳ್ ಆನಿ ಸೊಸ್ಣಿಕಾಯ್ ಆಸ್‌ಲ್ಲೊ ಯಾಜಕ್ ಆನಿ ಧರ್ಮ್ ಭಯ್ಣಿಂ ಆಶೆತಾತ್ ತರ್ ಆಮಿ ಸಮರ್ಪಿತ್ ಜಿಣ್ಯೆಂತ್ ಆಸ್‌ಲ್ಲ್ಯಾ ಭಾವ್ ಭಯ್ಣಿಂನಿಂ ಆಮ್ಚ್ಯಾ ಬೆಸಾಕ್ ಸರಿ ಜಾವ್ನ್ ಕ್ರಿಸ್ತಾಬರಿಂ ಜಾಂವ್ಕ್ ತಶೆಂಚ್ ಖರ್‍ಯಾ ದೆವಾಚಿ ಖರಿ ವಳಕ್ ಲೊಕಾಂಕ್ ಆಮ್ಚೆ ಜಿಣ್ಯೆದ್ವಾರಿಂ ದೀಂವ್ಕ್ ಪೆಚಾಡ್ಯಾಂಗಿ?

"ದೆವಾನ್ ವಿಂಚುನ್ ಕಾಡ್ಲೆಲಿಂ ತುಮಿಂ, ಪವಿತ್ರ್ ಆನಿ ತಾಕಾ ಮೊಗಾಚಿಂ. ದೆಕುನ್ ಕಣ್ವಾಳಾಯೆಚೆಂ, ದಯಾಳಾಯೆಚೆಂ, ದೀನ್ಪಣಾಚೆಂ, ಮೊವಾಳಾಯೆಚೆಂ ಆನಿ ಸೊಸ್ಣಿಕಾಯೆಚೆಂ ಕಾಳಿಜ್ ತುಮ್ಕಾಂ ಆಸುಂಕ್ ಜಾಯ್" (ಕೊಲೊಸ್ಸೆ. 3:12)

- ಬಾ| ಫ್ರಾನ್ಸಿಸ್ ಫೆರ್ನಾಂಡಿಸ್, ಎಸ್‌.ವಿ.ಡಿ.