"ತೆದ್ನಾ ಸರ್ವೆಸ್ಪರಾ ದೆವಾನ್ ಧರ್ಣಿಚೆ ಮಾತಿಯೆಚೊ ಮನ್ಶಾಕ್ ಕೆಲೊ ಆನಿ ತಾಚ್ಯಾ ನಾಕಾಚ್ಯಾ ಪುಡಾಂನಿ ಜಿವಾಚೊ ಸ್ವಾಸ್ ಫುಂಕ್ಲೊ ಆನಿ ಮನಿಸ್ ಏಕ್ ಜಿವೊ ಪ್ರಾಣಿ ಜಾಲೊ." (ಉತ್ಪತ್ತಿ. 2:7). ಆಮ್ಚೆಂ ಪಯ್ಕಿ ಜಾಯ್ತೆ ಜಣ್ ಚಿಂತಾತ್ ಕೀ ಆಮ್ಚೊ ಜೀವ್ ಆಮ್ಚ್ಯಾ ಆವಯ್ ಬಾಪಾಯ್ ಥಾವ್ನ್ ಆಯ್ಲಾ ಮ್ಹಣ್. ಪೂಣ್ ಆಮ್ಚೆಂ ಥೈಂ ಅಸಲ್ಲೊ ಪ್ರಾಣ್ ಆನಿ ಜೀವಿತಾಚೊ ಶ್ವಾಸ್, ಜೀವ್ದಾತಾರ್ ದೆವಾ ಥಾವ್ನ್ ಮ್ಹಣ್ಜೆ ಸರ್ಗಿಂಚಾ ಬಾಪಾ ಥಾವ್ನ್ ಆಯ್ಲಾ ಮ್ಹಳ್ಳೆಂ ಆಮಿ ನೆಣಾಂವ್. ಕಿತ್ಯಾಕ್ ದೆವಾನ್ ಮ್ಹಳಾಂ "ಆಮ್ಚ್ಯಾಚ್ ರುಪಾಚೊ ಆನಿ ಆಮ್ಚ್ಯಾಚ್ ಸಾರ್ಕ್ಯಾಚೊ ಮನ್ಶಾಕ್ ಆಮಿ ಕರುಂಯಾ." (ಉತ್ಪತ್ತಿ. 1:26). "ಮ್ಹಜೆಂ ಅಂತರಂಗ್ ತುವೆಂ ಘಡ್ಲಾಂಯ್, ಮ್ಹಜೆ ಆವಯ್ಚೆ ಉದರಿಂ ತುವೆಂ ಮ್ಹಾಕಾ ವಿಣ್ಲಾಯ್." (ಕೀರ್ತನಾಂ. 139:13). ಆವಯ್ಚ್ಯಾ ಕುಸ್ವ್ಯಾಂತ್ ದೆವಾನ್ ಆಮ್ಕಾಂ ದವರ್ಚ್ಯಾ ಪಯ್ಲೆಂ ದೇವ್ ಆಮ್ಕಾಂ ಜಾಣಾಂ. ದೆವಾಚೆಂ ಉತಾರ್ ಆಮ್ಕಾಂ ಸಾಂಗ್ತಾಕೀ "ಆಕಾರಾವೀಣ್ ಆಸ್ಲಲ್ಯಾ ಮ್ಹಾಕಾ ತುಜ್ಯಾ ದೊಳ್ಯಾಂನಿ ದೆಕ್ಲೊ." (ಕೀರ್ತನಾಂ. 139:16b)
ಏಕ್ ಭುರ್ಗೆಂ ಜಲ್ಮಾತಾನಾ, ಅವಯ್ ಬಾಪಾಯ್ ಮಧೆಂ, ಕುಟ್ಮಾದಾರಾಂ ಮಧೆಂ ವರ್ತೊ ಸಂತೋಸ್ ಆನಿ ಆನಂದ್ ಆಮಿ ಪಳೈತಾಂವ್. ಕಿತ್ಯಾಕ್ ಏಕ್ ನವೊ ಜೀವ್ ಸಂಸಾರಾಕ್ ಆಯ್ಲೊ ಮ್ಹಣ್ ಆಮಿ ಸಕ್ಕಡ್ ಸಂತೊಸಾನ್ ಸಂಭ್ರಮ್ತಾಂವ್. ಪೂಣ್ ಜರ್ ತರ್, ಏಕ್ ಭುರ್ಗೆಂ ಜಲ್ಮಾತಾನಾ, ತಾಚೆಂ ಥಂಯ್ ಜೀವ್ ನಾಂ ತರ್ ಆಮಿ ರುದಾನ್ ಕರ್ತಾಂವ್. ದೆಕುನ್ ಕೂಡ್ ನೈಂ, ಜೀವ್ ಆಮಿ ಚಡ್ ಆಶೆತಾಂವ್. ಹರ್ಯೆಕಾ ವರ್ಸಾ ಜಲ್ಮಾ ದೀಸ್ ಆಚಾರ್ಸಿತಾನಾ, ಹ್ಯಾ ಜೀವಾಚೊ ವ ಜೀವಿತ್ ಮ್ಹಳ್ಯಾ ದೆಣ್ಯಾಚೊ ಆಮಿ ಆಚರಣ್ ಕರ್ತಾಂವ್. ಸೈರಿಂ, ಕುಟ್ಮಾಚಿಂ, ಮೊಗಾಚಿಂ, ಇಷ್ಟಾಂ ಆನಿ ವಳ್ಕಿಚಿಂ ಸಾಂಗಾತಾ ಮೆಳ್ತಾಂವ್, ಕೇಕ್ ಕಾತರ್ತಾಂವ್, ಸಾಂಗಾತಾ ಜೆವ್ತಾಂವ್. ಹ್ಯಾ ವರ್ವಿಂ ಕೊಣಾಕ್ ಫಾಯ್ದೊ? ವ್ಹಯ್ ಆಯಿಲ್ಯಾಂಕ್ ಆನಿ ಭುರ್ಗ್ಯಾಂಕ್, ಕಿತ್ಯಾಕ್ ತಾಕಾ ಜಾಯ್ತ್ತಿಂ ಇನಾಮಾಂ ಮೆಳ್ತಾತ್ ಆನಿ ಆಯಿಲ್ಯಾ ಸೈರ್ಯಾಂಕ್ ಪೊಟ್ಭರ್ನ್ ಜೆವಾಣ್ ಮೆಳ್ತಾ. ಪೂಣ್ ಜೆಜು ಆಮ್ಕಾಂ ಸಾಂಗ್ತಾ "ಜೀವ್ ದಿಂವ್ಚೊ ಪ್ರೇರಕ್ ಅತ್ಮ್ಯಾನ್, ಮನಿಸ್ ಖಂಯ್ಚಾಕ್ಯೀ ಉಪ್ಕಾರನಾ." (ಜುವಾಂವ್. 6:63a). ಕಿತ್ಯಾಕ್ "ಮನಿಸ್ ಉಂಡ್ಯಾನ್ ಮಾತ್ರ್ ನ್ಹಯ್, ಬಗರ್ ದೆವಾಚ್ಯಾ ತೊಂಡಾಂತ್ಲ್ಯಾನ್ ಭಾಯ್ರ್ ಸರ್ತಾ ತ್ಯಾ ಹರ್ಯೆಕ್ ಉತ್ರಾನ್ ಜಿಯೆತಾ." (ಮಾತೆವ್. 4:4)
ಆಮ್ಚೆಂ ಜೀವಿತ್ ಕೇವಲ್ ವರ್ಸಾಂತ್ ಏಕ್ ದೀಸ್ ಮಾತ್ರ್ ನೈಂ, ಹರ್ಯೆಕಾ ದಿಸಾ, ಹರ್ಯೆಕಾ ಘಡಿಯೆ ಆಮಿ ಜಿಯೆಜೈ. ಹರ್ಯೆಕಾ ದಿಸಾ ಸಕಾಳಿಂ ಆಮಿ ಉಟ್ತಾನಾಂ ಆಮಿ ಭಾಗಿ ಮ್ಹಣ್ ಜಣಾಂ ಜಾಯ್ಜಾಯ್. ಜಾಯ್ತ್ತಿಂ ಜಣಾಂ ರಾತಿಂ ನಿದ್ಲ್ಲಿಂ ಸಕಾಳಿಂ ಉಟಾನಾಂತ್, ಮರಣ್ ಪಾವ್ತಾತ್. ಪೂಣ್ ದೇವ್ ಆಮ್ಕಾಂ ಹರ್ಯೆಕ್ ದೀಸ್ ಫಾವೊ ಕರ್ತಾನಾ, ಆಮಿ ಬರ್ಯಾನ್ ಜಿಯೆಂವ್ಕ್ ಆಮ್ಕಾಂ ಫಾವೊ ಕರ್ತಾ. ದೆವಾಚೆಂ ಉತಾರ್ ಅಮ್ಕಾಂ ಸಾಂಗ್ತಾಂ "ಹಾಂವ್ ಆಡ್ ಪಡ್ತಾಂ ಆನಿ ನಿದ್ತಾಂ, ಹಾಂವ್ ಪರ್ತುನ್ ಉಟ್ತಾಂ, ಕಿತ್ಯಾಕ್ ಸರ್ವೆಸ್ಪರ್ ಮ್ಹಾಕಾ ಸಾಂಬಾಳ್ತಾ." (ಕೀರ್ತನಾಂ. 3:5). "ತೊ ತುಜೆ ಪಾಂಯ್ ನಿಸ್ರುಂಕ್ ದಿಂವ್ಚೊ ನಾ, ಜೊ ತುಕಾ ರಾಕ್ತಾ, ತೊ ನಿದನಾ. ನಾ, ಇಸ್ರಾಯೆಲಾಚೊ ರಾಕ್ಣೊ ನಿದನಾ, ಜೆಮೆನಾ." (ಕೀರ್ತನಾಂ. 121:3-4).
ತರ್ ಭಾವಾಂ ಭಯ್ಣಿಂನೊ, ಹರ್ಯೆಕ್ ದೀಸ್ ಆಮ್ಕಾಂ ದೆವಾನ್ ದಿಲ್ಲೆಂ ದೆಣೆಂ ಜಾವ್ನಾಸಾ. ದೆಕುನ್ ಜಿಯೆಂವ್ಚೆಂ ಮ್ಹಳ್ಯಾರ್ ಖಾಂವ್ಚೆಂ, ಜೆಂವ್ಚೆಂ, ಪಿಯೆಂವ್ಚೆಂ ಆನಿ ಸಂಸಾರಿ ಖುಶಾಲಾಯ್ ಭೊಗ್ಚೆಂ ನೈಂ. ಜೀವಿತಾಚಿ ಹರ್ಯೆಕ್ ಘಡಿ ಸೊಮ್ಯಾ ಸವೆಂ, ತಾಣೆಂ ಆಮ್ಕಾಂ ದಿಲ್ಯಾ ಸರ್ವ್ ದೆಣ್ಯಾಂ ಖಾತಿರ್, ಕೆಲ್ಯಾ ಸರ್ವ್ ಉಪ್ಕಾರಾಂ ಖಾತಿರ್, ಸಂತೊಸ್ ಪಾಂವ್ಚೆಂ. ಸಾಂ. ಪಾವ್ಲ್ ಅಮ್ಕಾಂ ಸಾಂಗ್ತಾ "ಸೊಮಿಯಾ ಥಂಯ್ ಸದಾಂಚ್ ತುಮಿ ಸಂತೊಸ್ ಪಾವಾ; ಪರ್ತ್ಯಾನ್ ಹಾಂವ್ ಸಾಂಗ್ತಾಂ: ಸಂತೊಸ್ ಪಾವಾ!" (ಫಿಲಿಪ್ಪಿಗಾರಾಂಕ್. 4:4). ಕಿತ್ಯಾಕ್, ಸೊಮ್ಯಾ ಸವೆಂ, ಜಿಯೆಂವ್ಚೆಂ, ಸಂತೊಸ್ ಭೊಗ್ಚೆಂ, ಸಂಸಾರಾಂತ್ ಹಜಾರ್ ಸಂಭ್ರಮ್ ಆಚರ್ಸುನ್, ಇಷ್ಟಾಂ ಸಾಂಗಾತಾ, ಕುಟ್ಮಾಧಾರಾಂ ಸಾಂಗಾತಾ ಮಝಾ ಮಾರ್ಚೆ ವರ್ನಿಂ ಚಡ್ ದಾದೊಸ್ಕಾಯೆಚೆಂ. ದಾವಿದ್ ರಾಯ್ ಆಪ್ಲ್ಯಾ ಕೀರ್ತನಾಂತ್ ಬೊರೈತಾ "ತುಜ್ಯಾ ಆಂಗ್ಣಾಂತ್ ಕಾಡ್ಚೊ ಏಕ್ ದೀಸ್ ದುಸ್ರೆ ಕಡೆನ್ ಕಾಡ್ಚ್ಯಾ ಹಜಾರ್ ದಿಸಾಂ ಪ್ರಾಸ್ ಚಡ್ ಬರೊ". (ಕೀರ್ತನಾಂ. 84:10).
ಸೊಮ್ಯಾ ಥಂಯ್ ಆಮಿ ಸದಾಂಚ್ ಸಂತೋಸ್ ಪಾವಾಜೈ ತರ್, ತಾಕಾ ಆಮಿ ಆಮ್ಚೆಂ ಥಂಯ್ ರಾವೊಂಕ್ ದಿಜೈ. ತೊ ಆಮ್ಚೆಂ ಸವೆಂ ಅಸಾ ತರ್, ಆಮ್ಕಾಂ ಕಿತೆಂಚ್ ಉಣೆಂ ಆಸ್ಚೆಂ ನಾಂ. ದೆಕುನ್ಂಚ್ ದಾವಿದ್ ರಾಯ್ ಆಮ್ಕಾಂ ಸಾಂಗ್ತಾಂ "ಚಾಕಾ ಆನಿ ಪಳೆಯಾ: ಸರ್ವೆಸ್ಪರ್ ಕಿತ್ಲೊ ಬರೊ! ತಾಕಾ ಶರಣ್ ಯೆತಾತ್ ತಿಂ ಸುಭಾಗಿ". (ಕೀರ್ತನಾಂ. 34:8).
ತರ್ ಭಾವಾಂ ಭಯ್ಣಿಂನೊ, ಜೆಜುಕ್ ತುಮಿ ತುಮ್ಚ್ಯಾ ಜೀವಿತಾಚೆಂ ಕೇಂದ್ರ್ ಕರಾ ಆನಿ ತೊ ತುಮ್ಚೆಂ ಸವೆಂ ಆಸಾ ಮ್ಹಳ್ಳೆಂ ಖಾತ್ರಿ ಕರಾ. ತೊ ತುಮ್ಚೆಂ ಸವೆಂ ಆಸ್ತಾನಾಂ, ತಾಣೆಂ ಭಾಸಯ್ಲೆಂ ಜಿವಿತ್ ತುಮ್ಚೆಂ ಥೈಂ ಅಸಾ. ತಾಚೊ ಪ್ರಾಣ್ ವ ಜೀವ್ ತುಮ್ಕಾಂ ಚಡಿತ್ ಮಾಪಾನ್ ಭೊಗುಂಕ್ ಮೆಳ್ತಾ. ತೆದ್ನಾಂ 'ಹಾಂವ್ ಆಸಾಂ' ಮ್ಹಳ್ಳೊ ದೇವ್ ಸದಾಂಚ್ ತುಮ್ಚೆಂ ಸವೆಂ ಆಸೊನ್, ಜಿವಿತ್ ಆಮ್ಚೆಂ ಥೈಂ ಸದಾಂಚ್ ವಾಡೈತಾ. ಕಿತ್ಯಾಕ್ ಜೆಜು ಮ್ಹಣ್ತಾ "ಹಾಂವ್ ಆಯ್ಲಾಂ ತಾಂಕಾಂ ಜಿವಿತ್ ಮೆಳೊಂ ಮ್ಹಣ್; ಭರೊನ್ ವೊಮ್ತೊಂಚ್ಯಾ ಮಾಪಾನ್ ತೆಂ ಮೆಳೊಂ ಮ್ಹಣ್". (ಜುವಾಂವ್. 10:10b). ಸಂಸಾರಾಚೆ ಗುಲಾಮ್ ಆಮಿ ಜಾಂವ್ಚೆಂ ನಾಕಾ. ಜೆಜು ಥೈಂ ಆಮಿ ಜಿಯೆವ್ಯಾಂ, ಜಿವಿತ್ ಜೊಡ್ಯಾಂ ಆನಿ ಹೆರಾಂಕ್ ಜಿವಿತ್ ದಿವ್ಯಾಂ.
- ಶರೊನ್ ಪಿಂಟೊ, ಮಂಗ್ಳುರ್