ಪವಿತ್ರ್ ಪುಸ್ತಕ್ ಸಾಂಗ್ತಾ "ಸರ್ವ್ ವಾಯ್ಟಾ ವಿಶಿಂ ಚತ್ರಾಯ್ ಘೆಯಾ" (ಸಿರಾಖ್. 17:14). ಸರ್ವ್ ವಾಯ್ಟ್ ಕಾಳೊಕಾಕ್ ಸಂಬಂಧ್ ಜಾಲ್ಲೆಂ. ದೆವಾಚಾ ಉಪಾದೆಸಾಂಕ್ ಆಮಿ ಖಾಲ್ ಜಾಯ್ನಾತ್ಲ್ಯಾರ್, ಆನಿ ತಾಚೆಂ ಜಿವಿತಾಚೆಂ ಉತಾರ್ ಆಮಿ ಸ್ವೀಕಾರ್ ಕರಿನಾಂವ್ ತರ್, ಸೈತಾನ್, ಕಾಳೊಕಾಚಿ ಸಕತ್ ಆಮ್ಕಾಂ ತಾಚ್ಯಾ ರಾಜಾಕ್ ವಾಟ್ ವ್ಹರ್ತಾ. ಕಿತ್ಯಾಕ್ ಮ್ಹಳ್ಯಾರ್, "ಸಗ್ಳೊ ಸಂಸಾರ್ಚ್ ಸೈತಾನಾಚೆ ಪದ್ವೆಖಾಲ್ ಆಸಾ ತರ್ಯೀ ಆಮಿ ದೆವಾಚೆ ಮ್ಹಣ್ ಆಮಿ ಜಾಣಾಂವ್." (1 ಜುವಾಂವ್ 5:19). ಪವಿತ್ರ್ ಪುಸ್ತಕಾಂತ್ ಅಶೆಂ ಬರಯ್ಲಾಂ "ತವಳ್ ತುಮಿ ಹ್ಯಾ ಸಂಸಾರಾಚೆ ಖೊಟೆ ವಾಟೆನ್ ಚಲುನ್ ಆಸ್ಲ್ಲ್ಯಾತ್; ಅಂತ್ರಾಳಾ ವಯ್ಲ್ಯಾ ಅತ್ಮಿಕ್ ನಿವಾಸಿಯಾಂಚ್ಯಾ ಅಧಿಪತಿಕ್ ತಶೆಂಚ್ ದೆವಾಚೆಂ ಉತರ್ ಮಸ್ತುನ್ ಚಲ್ತಲ್ಯಾಂ ಮಧೆಂ ರಾಜ್ಯ್ ಕರ್ತಾ ತ್ಯಾ ಅತ್ಮ್ಯಾಕ್ ತುಮಿ ಖಾಲ್ ಜಾವ್ನ್ ಚಲ್ತಾಲ್ಯಾತ್ "(ಎಫೆಜ್ಗಾರಾಂಕ್. 2:2)
1987 ಇಸ್ವೆಂತ್ ಮರಿ ದಿಷ್ಟಿಕ್ ಪಡ್ಲೆಲ್ಯಾ ವೆಳಾರ್ ತಿಣೆಂ ದಿಲ್ಲೊ ಸಂದೇಶ್ ಜಾವ್ನಾಸಾ - ಫ್ಯಾಶನಾಂ ಆನಿ ವಿವಿಧ್ ಥರಾಚ್ಯಾ ನ್ಹೆಸ್ಣಾಂ ವರ್ವಿಂ ದೆಂವ್ಚಾರ್ ಜಯ್ತ್ ಜೊಡ್ತಾ ಆನಿ ಜಾಯ್ತೊ ಲೋಕ್ ಮಿಸಾಚ್ಯಾ ಬಲಿದಾನಾಕ್ ಮಾಣ್ಸುಗೆನ್ ನ್ಹೆಸನಾಸ್ತಾಂ ಹೆರಾಂಕ್ ಪಾತ್ಕಾಕ್ ಕಾರಣ್ ಜಾತಾತ್. ಆಮಿ ಹೆರಾಂಕ್ ದೆವಾ ಸರ್ಶಿಂ ಆಕರ್ಶಿತ್ ಕರಿಜೆ, ನ್ಹಂಯ್ ಆಮ್ಚೆಂ ಥಂಯ್. ದೆಕುನ್ ಮಾನಾನ್ ಆನಿ ಗೌರವಾನ್ ಆಮಿ ನ್ಹೆಸಜೆ. ಪರ್ತ್ಯಾನ್ 1990 ಇಸ್ವೆಂತ್ ಮರಿ ದಿಷ್ಟಿಕ್ ಪಡೊನ್, ಮ್ಹಣಾಲಿ, ಸ್ತ್ರಿಯಾಂನಿ ಭಕ್ತಿಪಣ್ ಆಧಾರ್ತಾನಾ ವ ಇಗರ್ಜೆಕ್ ವೆತಾನಾ, ಪೆಂಟಾಂ, ಚಡ್ಡ್ಯೊ ಆನಿ ಆಂಗ್ ದಾಕಂವ್ಚಿಂ ಮುಸ್ತಾಯ್ಕಿ ನ್ಹೆಸಾನಾಯೆ. ತಾಂಚೆಂ ನ್ಹೆಸಾಣ್ ದೆವಾಚೆಂ ತೆಂಪ್ಲ್ ಜಾವ್ನಾಸಾ ತ್ಯಾ ಕುಡಿಕ್ ಧಾಂಪಣ್ ಜಾಯ್ಜೆ. ನಾ ತರ್ ಹೆರಾಂಕ್ ಪಾತ್ಕಾಕ್ ಘಾಲ್ನ್ ತಾಂಕಾಂಚ್ ತಿಂ ವಾಯ್ಟ್ ಜೊಡ್ನ್ ಘೆತಾತ್.
ಆಯ್ಚ್ಯಾ ಕಾಳಾರ್ ಆಮಿ ಕಿತೆಂ ಪಳೆಯ್ತಾಂವ್? ಕ್ರೀಸ್ತಾಂವ್ ಕೋಣ್ ಮ್ಹಣ್ ಅಮ್ಚ್ಯಾ ಫ್ಯಾಶನಾಂ ವರ್ವಿಂ, ನಾ ಮಾಣ್ಸುಗೆಚಾ ನೆಸ್ಣಾಂ ವರ್ವಿಂ ಕಳ್ತಾ. ಆಯ್ತಾರಾಚಾ ಮಿಸಾಕ್ ವೆತಾನಾ ಲೋಕ್ ಭಕ್ತಿಪಣ್ ಆಧಾರುಂಕ್ ವೆತಾಗಿ? ವ ಫ್ಯಾಶನ್ ಪರೇಡ್ ಕರುಂಕ್ ವೆತಾ ಮ್ಹಳ್ಳೆಂ ಸಮ್ಜಾನಾ, ಕಿತ್ಯಾಕ್ ತಿಂ ತಾಂಚೆಂ ಆಂಗ್ ದಾಕವ್ನ್, ಭಿತರ್ಲೆ೦ ಸಕ್ಕಡ್ ದಿಸ್ಚೆಂ ಪಾತಳ್ ನ್ಹೆಸೊನ್, ಟಾಯ್ಟ್ ಫಿಟ್ ಘಾಲ್ನ್, ಆನಿ ಥೊಡಿಂ ಅರ್ಧ್ಯಾರ್ ಕಾತರ್ಲೆಲಿ ಮುಸ್ತಾಯ್ಕಿ ಘಾಲ್ನ್ ಹೆರಾಂಕ್ ತಾಳ್ಣೆಕ್ ವೊಡ್ತಾತ್. ಅನಿ ಥೊಡಿಂ ಮಿನಿ ನ್ಹೆಸೊನ್, ವ ಅಂಗಾಕ್ ಚಿಡ್ಕೊನ್ ಆಸ್ಚಿ ಮುಸ್ತಾಯ್ಕಿ ಘಾಲ್ಲೆ ವರ್ವಿಂ ತಾಂಚಿ ಕೂಡ್ ಭಾಯ್ಲ್ಯಾನ್ ದಿಸ್ಚೆಬರಿ ನ್ಹೆಸ್ತಾತ್. ತಶೆಂಚ್ ಕೆಸಾಂಚೆಂ ಫ್ಯಾಶನ್, ಕೆಸಾಂಕ್ ರಂಗ್ ಘಾಲ್ನ್, ಕೇಸ್ ಪಾತಳ್ ಕರ್ನ್ ವಾ ನೀಟ್ ಕರ್ನ್, ಸ್ಟೈಲ್ ಕರ್ನ್ ಯೆತಾತ್. ಥೊಡ್ಯಾಂಚೊ ನಾಕ್ಶ್ಯೊ ಲಾಂಬ್, ಲಾಂಬ್, ವೊಂಟ್ ತಾಂಬ್ಡೆ ತಾಂಬ್ಡೆ ಆನಿ ತಾಂಚ್ಯಾ ತೊಂಡಾರ್ ದಾಟ್ ದಾಟ್ ಮೆಕಪ್ ಘಾಲ್ನ್ ಬೊಂಬ್ಯಾಂಬರಿ ದಿಸ್ತಾತ್. ದೆವಾನ್ ಆಮ್ಕಾಂ ತಾಚ್ಯಾ ಸರ್ಕ್ಯಾಚೆ ಆನಿ ಸುರ್ಪಾಯೆಚೆ ಜಾವ್ನ್ ರಚ್ಲಾಂ, ತಾಚ್ಯಾ ಮಹಿಮೆ ಖಾತಿರ್, ಆಮ್ಕಾಂಚ್ ಆಮಿ ಜಾಯ್ ತೆ ಭಾಷೆನ್ ನ್ಹೆಸೊನ್, ತಾಕಾ ಆಕ್ಮಾನ್ ಕರುಂಕ್ ನ್ಹಂಯ್. ಜೆಂ ಕಿತೆಂ ಅಸ್ವಾಭಾವಿಕ್ ಥರಾನ್ ಆಮಿ ಕರ್ತಾಂವ್, ತೆಂ ದೆಂವ್ಚಾರಾ ಥಾವ್ನ್ ಯೆತಾ. ಖಂಚ್ಯಾ ಭಾವಾಡ್ತಾನ್ ವಾ ಭರ್ವಶ್ಯಾನ್, ಆಮಿ ದೆವಾಕಡೆನ್ ಮಾಗ್ಯೆತ್? ಜರ್ ತರ್ ಆಮಿ ದೆವಾಕ್ ಮೆಚ್ವೊಂಚೆ ರೀತಿನ್ ತಾಚೆ ಸಮೊರ್ ಯೆನಾ ತರ್? ದೆವಾಚೆಂ ಉತಾರ್ ಆಮ್ಕಾಂ ಸಾಂಗ್ತಾಂ "ಪಳೆಯಾ, ಸರ್ವೆಸ್ಪರಾಚೊ ಹಾತ್ ತಾರಣ್ ಕರುಂಕ್ ಸಕನಾ ಮ್ಹಣುಂಯೆತ್ ತಿತ್ಲೊ ಮೊಟ್ವೊ ನ್ಹಂಯ್, ತಾಚೆ ಕಾನ್ ಆಯ್ಕುಂಕ್ ಸಕನಾಂತ್ ಮ್ಹಣುಂಯೆತ್ ತಿತ್ಲೆ ಭೆರೆ ನ್ಹಯ್, ಬಗರ್ ತುಮ್ಚ್ಯಾ ಅಪ್ರಾಧಾಂ ವರ್ವಿಂ ತುಮ್ಚೆ ಮದೆಂ ಆನಿ ತುಮ್ಚ್ಯಾ ದೆವಾ ಮದೆಂ ವೆಗ್ಳಾಚಾರ್ ಜಾಲಾ, ತುಮ್ಚ್ಯಾ ಪಾತ್ಕಾಂನಿ ತಾಚೆಂ ತೋಂಡ್ ಲಿಪಯ್ಲಾಂ, ಆನಿ ಹೆ ವರ್ವಿಂ ತೊ ತುಮ್ಕಾಂ ಆಯ್ಕುಂಕ್ ಸಕನಾ." (ಇಸಾಯಿಯಾ. 59:1-2).
ಸಾಂ. ಪಾವ್ಲ್ ತಿಮೊತಿಕ್ ಬರೊವ್ನ್ ಸಾಂಗ್ತಾ "ತಶೆಂಚ್ ಸ್ತ್ರಿಯಾಂನಿ ಮರ್ಯಾದಿಕ್ ಆನಿ ಮಾಣ್ಸುಗೆಕ್ ಸಹಜ್ಲ್ಲೆಬರಿ ನ್ಹೆಸುಂಕ್ಜಾಯ್; ತಾಂಣಿಂ ಕೆಸಾಂಚೊ ಲೆಖಾವರ್ತೊ ಅಲಂಕಾರ್ ಕರ್ಚೊ ನ್ಹಯ್; ಭಾಂಗಾರ್ ಶೃಂಗಾರ್, ಮಾಣ್ಕಾಂ ಮೊತಿಯಾಂ ಘಾಲ್ಚಿಂ ವಾ ಮೊಲಾದಿಕ್ ವಸ್ತುರ್ ನ್ಹೆಸ್ಚೆಂ ನ್ಹಯ್. ಬಗರ್ ಬರೇ ಚಾಲಿನ್ ಆಪ್ಣಾಂಕ್ ನೆಟೊಂವ್ಕ್ ತಿಂ ಶಿಕುಂ; ಕಿತ್ಯಾಕ್ ದೇವ್ಭಕ್ತೆಚ್ಯಾ ಸ್ತ್ರಿಯಾಂಕ್ ಹೆಂಚ್ ಚಡ್ ಬರೆಂ ದಿಸ್ತಾ." (1 ತಿಮೊಥಿ 2:9-10).
ಹ್ಯಾ ದಿಸಾಂನಿ, ದಾದ್ಲೊ ಕೋಣ್, ಸ್ತ್ರೀ ಕೋಣ್ ಮ್ಹಣ್ ಸಾಂಗೊಂಕ್ ಕಷ್ಟ್ ಜಾತಾತ್. ದಾದ್ಲೆ ಸ್ತ್ರಿಯಾಂಬರಿ ನ್ಹೆಸ್ತಾತ್ ಆನಿ ಸ್ತ್ರಿಯೊ ದಾದ್ಲ್ಯಾಬರಿಂ. ದಾದ್ಲೆ ಕಾನಾಂತ್ ಮುದ್ಯೊ ಘಾಲ್ತಾತ್, ಸ್ತ್ರಿಯೊ ದಾದ್ಲ್ಯಾಂಬರಿಂ ಪ್ಯಾಂಟಾ, ಶರ್ಟಾಂ ಘಾಲ್ನ್ ಭಂವ್ತಾತ್. ದೆಕುನ್೦ಚ್ ದೆವಾಚೆಂ ಉತಾರ್ ಆಮ್ಕಾಂ ಜಾಗ್ರುತಾಯ್ ದಿತಾ ಮ್ಹಣೊನ್ "ಸ್ತ್ರಿಯೆನ್ ದಾದ್ಲ್ಯಾ ಮನ್ಶಾನ್ ವಾಪಾರ್ಚಿ ಖಂಯ್ಚ್ಚಿಚ್ ವಸ್ತ್ ಆಪ್ಣಾಚೆರ್ ಘಾಲ್ಚಿ ನ್ಹಯ್ ವಾ ದಾದ್ಲ್ಯಾನ್ ಸ್ತ್ರಿಯೆಚಿ ಮುಸ್ತಾಯ್ಕಿ ನ್ಹೆಸ್ಚಿ ನ್ಹಯ್. ಕೊಣ್ಯೀ ವ್ಯಕ್ತಿ ಅಶೆಂ ಕರಿತ್ ಜಾಲ್ಯಾರ್, ತಿಕಾ ಸರ್ವೆಸ್ಪರ್ ತುಜೊ ದೇವ್ ಕಾಂಟಾಳ್ತಾ" (ದ್ವಿತಿನಿಯಮ್. 22:5)
ಜಾಯ್ತ್ತಿಂ ಅವಯ್ ಬಾಪಯ್, ತಾಂಚ್ಯಾ ಭುರ್ಗ್ಯಾಂಕ್ ಲ್ಹಾನ್ ಅಸ್ತಾನಾಂಚ್ ಸಾರ್ಕೆಂ ನ್ಹೆಸೊಂಕ್ ಶಿಕೈನಾಂತ್, ಬದ್ಲಾಕ್ ಫ್ಯಾಶನಾಂ ಕರುಂಕ್ ಶಿಕೈತಾತ್. ತ್ಯಾ ವರ್ವಿಂ ತಾಂಚಾ ಭುರ್ಗ್ಯಾಂಕ್ ಮುಖಾರ್ ಕಿತೆಂ ಘಡ್ತಾ ಮ್ಹಳ್ಳೆಂ ತಿಂ ವಿಸ್ರತಾತ್. ಮ್ಹಾತಾರಿಂ ಸಯ್ತ್, ತೊಂಡಾರ್ ಮಿರಿಯೊ ಪಡಲ್ಲಿಂ ಸಯ್ತ್ ಆಟ್ ನೇಟ್ ಕರ್ನ್ ನೆಸ್ತಾತ್. ಕಿತ್ಲೆಂಯ್ ಮೆಕಪ್ ಘಾಲ್ಯಾರೀ ಕೊಣಾಯೀ ವರ್ವಿಂ ತಾಂಚಿ ಚಿವೊಳ್ಳೆಲಿ ಕಾತ್ ಸಾರ್ಕಿ ಕರುಂಕ್ ಜಾಯ್ನಾ ವ ತಾಂಕಾಂ ವೆಗ್ಗಿಂಚ್ ಯೆಂವ್ಚೆಂ ಮರಣ್ ಚುಕೊಂವ್ಕ್ ಜಾಯ್ನಾ. ತ್ಯಾ ಪಾಸತ್ ದೆವಾಚೆಂ ಉತಾರ್ ಆಮಿ ಕಶೆಂ ಜಿಯೆಜೆ ಮ್ಹಣ್ ಪೆದ್ರುಚ್ಯಾ ಪತ್ರಾಂತ್ ಆಮ್ಕಾಂ ಸಾಂಗ್ತಾ. "ತುಮ್ಚಿ ಸೊಭಾಯ್ ಜಾಯ್ನಾಯೆ ಭಾಯ್ಲಿ, ವಿಣ್ಲೆಲ್ಯಾ ಕೆಸಾಂಚಿ, ಭಾಂಗ್ರಾ ಶಿಂಗಾರಾಚಿ ಆನಿ ನ್ಹೆಸ್ಲಲ್ಯಾ ಆಂಗ್ವಸ್ತ್ರಾಂಚಿ, ಬಗರ್ ಜಾಯ್ಜಯ್ ತಿ ಭಿತರ್ಲ್ಯಾ ವ್ಯಕ್ತಿತ್ವಾಚಿ, ದುಲಬ್ ಆನಿ ಶಾಂತ್ ಕಾಳ್ಜಾಚೊ ಸ್ವಭಾವ್ ಮ್ಹಳ್ಳ್ಯಾ ಅವಿನಾಶಿ ಮೊತಿಯಾಚಿ, ಜಿ ದೆವಾ ಮುಖಾರ್ ಅಧಿಕ್ ಮೊಲಾದಿಕ್". (1 ಪೆದ್ರು 3:3-4)
ದೆಕುನ್ ಭಾವಾಂ ಭಯ್ಣಿಂನೊ, ಆಮಿ ವಿಸ್ರೊಂಕ್ ನಜೊ. ಆಮಿ ಧುಳಿಂತ್ ಥಾವ್ನ್ ಆಯ್ಲ್ಯಾಂವ್ ಆನಿ ಧುಳಿಕ್ ಆಮಿ ಪಾಟಿಂ ವೊಚೊಂಕ್ ಆಸಾ. ದೆಕುನ್ "ಸಗ್ಳ್ಯಾ ತುಜ್ಯಾ ಕಾಮಾಂನಿ ತುಜ್ಯಾ ಜಿವಿತಾಚ್ಯಾ ಶೆವಟಾಚೊ ಉಗ್ಡಾಸ್ ದವರ್, ಆನಿ ತುಂ ಕೆದಿಂಚ್ ಪಾತಕ್ ಕರ್ಚೊ ನಾಂಯ್." (ಸಿರಾಖ್. 7:36). ಆತ್ಮ್ಯಾಚಿ ಸೊಭಾಯ್ ಚಡ್ ಗರ್ಜೆಚಿ, ಕುಡಿಚಿ ನೈಂ. ಕಿತ್ಯಾಕ್ ಮ್ಹಳ್ಯಾರ್ ಅತ್ಮೊ, ಕುಡಿ ಪ್ರಾಸ್ ವರ್ತೊ ಆನಿ ಅತ್ಮೊ ಮಾತ್ರ್ ಸದಾಂಕಾಲ್ ಬಾಳ್ತಾ. ಕೂಡ್ ಹ್ಯಾ ಸಂಸಾರಾಂತ್ ಕುಸ್ತಾ ಆನಿ ನಾಸ್ ಜಾತಾ. ಉಗ್ಡಾಸ್ ದವರ್, ಪವಿತ್ರ್ ಪುಸ್ತಕಾಂತ್ ಬರಯ್ಲಾಂ "ಮನಿಸ್ ಮರ್ತಚ್ ತಾಕಾ ಮೆಳ್ಚೆಂ ದಾಯ್ಜ್ ಹೆಂ: ಕುಸಡಾಯ್, ಕಿಡೆ, ಮೂಸ್ ಆನಿ ಕಿಡಿ" (ಸಿರಾಖ್. 10:11). ದೆವಾನ್ ತುಕಾ ಆನಿ ಮ್ಹಾಕಾ ಕೂಡ್ ದಿಲ್ಯಾ ಹೆರಾಂಕ್ ದಾಕಂವ್ಕ್ ನ್ಹಂಯ್ ಬಗಾರ್ ತಾಚೆಂ ತೆಂಪ್ಲ್ ಜಾವ್ನ್ ಪವಿತ್ರ್ ದವರುಂಕ್. ಕೊರಿಂಥ್ಗಾರಾಂಕ್ ಬರಯ್ಲ್ಯಾ ಪತ್ರಾಂತ್ ಆಮಿ ವಾಚ್ತಾಂವ್, ಸಾಂ. ಪಾವ್ಲ್ ಆಮ್ಕಾಂ ಸಾಂಗ್ತಾ "ತುಮಿ ದೆವಾಚೆಂ ಮಂದಿರ್ ಆನಿ ದೆವಾಚೊ ಅತ್ಮೊ ತುಮ್ಚೇ ಥಂಯ್ ಬಿಡಾರ್ ಕರ್ನ್ ಆಸಾ ಮ್ಹಣ್ ತುಮಿ ನೆಣಾತ್? ಜರ್ ಎಕ್ಲೊ ದೆವಾಚೆಂ ಮಂದಿರ್ ನಾಸ್ ಕರ್ತಾ, ತರ್ ದೇವ್ ತಾಕಾ ನಾಸ್ ಕರ್ತಲೊ; ಕಿತ್ಯಾಕ್ ದೆವಾಚೆಂ ಮಂದಿರ್ ಪವಿತ್ರ್; ಆನಿ ತೆಂಚ್ ಮಂದಿರ್ ತುಮಿ" (1 ಕೊರಿಂಥ್ಗಾರಾಂಕ್ 3:16-17).
ತರ್ ಭಾವಾಂ ಭಯ್ಣಿಂನೊ ಇಗರ್ಜೆಕ್, ಪವಿತ್ರ್ ಜಾಗ್ಯಾಂಕ್ ವ ಭಕ್ತಿಕ್ ಜಾಗ್ಯಾಂಕ್ ಭೆಟ್ ಕರ್ತಾನಾಂ, ಉಗ್ಡಾಸ್ ದವರಾ ಜೆಜು ಅಮ್ಚೆಂ ಖಾತಿರ್ ಥಂಯ್ ರಾಕೊನ್ ಆಸಾ ದೆಕುನ್ ಆಮ್ಕಾಂಚ್ ಆಮಿ ದೆವಾಕ್ ಮೆಚ್ವೊಂಚೆ ರಿತಿನ್, ಮಾಣ್ಸುಗೆನ್ ಆನಿ ಭಕ್ತಿಪಣಾನ್ ನೆಸಾಜೆ. ಹೆರಾಂಕ್ ಪಾತ್ಕಾಂತ್ ಘಾಲ್ಚೆಂ ನ್ಹಂಯ್, ವ ಹೆರಾಂಕ್ ಆಮ್ಚೆಂ ಥಂಯ್ ಆಕರ್ಶಿತ್ ಕರುಂಕ್ ನೆಸ್ಚೆಂ ನ್ಹಂಯ್. ಆಮ್ಚೆಂ ನ್ಹೆಸಣ್ ದೆವಾಕ್ ಮಾನ್ತಾ ತಸಲೆಂ ಜಾಂವ್. ಕಿತ್ಯಾಕ್ ದೆವಾಚೆಂ ಉತಾರ್ ಸಾಂಗ್ತಾಂ "ಪೂಣ್ ಸರ್ವೆಸ್ಪರಾನ್ ಸಾಮುಯೆಲಾಕ್ ಮ್ಹಳೆಂ: ತಾಚೆಂ ರೂಪ್ ವಾ ತಾಚಿ ಉಂಚಾಯ್ ಪಳೆನಾಕಾ, ಕಿತ್ಯಾಕ್ ಹಾಂವೆಂ ತಾಚೊ ತಿರಸ್ಕಾರ್ ಕೆಲಾ. ಮನಿಸ್ ಪಳೆತಾ ತಶೆಂ ದೇವ್ ಪಳೆನಾ, ಕಿತ್ಯಾಕ್ ಮನಿಸ್ ಭಾಯ್ಲೆಂ ರೂಪ್ ಪಳೆತಾ, ಪೂಣ್ ಸರ್ವೆಸ್ಪರ್ ಕಾಳಿಜ್ ಪಳೆತಾ." (1 ಸಾಮುಯೆಲ್ 16:7). ದೆಕುನ್ ದೆವಾಚ್ಯಾ ದೊಳ್ಯಾಂಕ್ ಆಮಿ ಸೊಭಿತ್ ದಿಸಾಜೆ ತರ್ ಆಮಿ ದೆವಾಚೆಂ ಉತಾರ್ ಕಿತೆಂ ಸಾಂಗ್ತಾ ತೆಂ ಕರುಂಕ್ ಮುಕಾರ್ ಸರ್ಯಾಂ. ಕಿತ್ಯಾಕ್ ಮ್ಹಳ್ಯಾರ್ "ದೆವಾಚೆಂ ಹರೇಕ್ ಉತರ್ ಸತ್, ತಾಚೆ ಥಂಯ್ ಆಸ್ರೊ ಘೆತೆಲ್ಯಾಂಕ್ ತೊ ಢಾಲ್. ತಾಚ್ಯಾ ಉತ್ರಾಂಕ್ ಚಡಿತ್ ಕಾಂಯ್ ಮೆಳಯ್ನಾಕಾ, ಮೆಳಯ್ಶಿ ತರ್ ತೊ ತುಕಾ ಚುಕಿದಾರ್ ಕರ್ತಲೊ ಆನಿ ತುಂ ಫಸಯ್ಣಾರ್ ಮ್ಹಣ್ ಕಳಿತ್ ಜಾತಲೆಂ" (ಮ್ಹಣ್ಣ್ಯೊ. 30:5-6).
- ಸೆಲಿನ್ ಪಿಂಟೊ, ಬೊಂದೆಲ್