ದೈವಿಕ್ ಸ೦ದೇಶ್

"ಹರ್ಯೆಕ್ಲ್ಯಾ ಥಂಯ್ ದಿಸೊನ್ ಯೆತಾತ್ ತಿಂ ಪವಿತ್ರ್ ಅತ್ಮ್ಯಾಚಿಂ ದೆಣಿಂ ಸಮೆಸ್ತಾಂಚ್ಯಾ ಆದಾಯಾ ಪಾಸತ್ ಮ್ಹಣ್ ದಿಲ್ಯಾಂತ್" (1 ಕೊರಿಂತ್ 12:7).

ದೇವ್ ಆಪ್ಣಾಕ್‌ಚ್ ಸಂಪೂರ್ಣ್ ಥರಾನ್ ಆಮ್ಕಾಂ ದಿತಾ ಆಮಿ ತಾಚೆಥಂಯ್ ಸಂಪೂರ್ಣ್ ಜಾಂವ್ಚ್ಯಾಕ್. ದೆವಾಚೆಂ ಪವಿತ್ರ್ ಮಂದಿರ್ ಜಾವ್ನಾಸ್ಚಿಂ ಆಮಿಂ ತಾಚ್ಯಾ ಅತ್ಮ್ಯಾ ಮಾರಿಫಾತ್ ಎಕಾಮೆಕಾಥಂಯ್, ಎಕಾಚ್ ಭಾವಾರ್ಥಾನ್ ಎಕ್ವಟ್ತಾಂವ್. ಸಾಂ. ಪಾವ್ಲ್ ಹೆಂ ಸತ್ ದಾಂಬುನ್ ಆಮ್ಕಾಂ ಸಾರ್ಕೆಂ ಸಮ್ಜುಂಚ್ಯಾ ಭಾಶೆನ್ ಸಾಂಗ್ತಾ: "ಜಾಂಕಾಂ ದೆವಾಚೊ ಅತ್ಮೊ ಚಲವ್ನ್ ವ್ಹರ್ತಾ, ತಿಂ ದೆವಾಚಿಂ ಭುರ್ಗಿಂ; ಕಿತ್ಯಾಕ್ ಜಾಚೆಥಂಯ್ ಕ್ರಿಸ್ತಾಚೊ ಅತ್ಮೊ ನಾ, ತೊ ಕ್ರಿಸ್ತಾಚೊ ನ್ಹಯ್" (ರೊಮಾ. 8:14, 9). ತುಂ ಆನಿ ಹಾಂವ್ ಜರ್ತರ್ ಆಮ್ಕಾಂಚ್ 'ಕ್ರಿಸ್ತಾಂವ್' ಮ್ಹಣ್ ಲೆಕ್ತಾಂವ್ ತರ್ ಆಮಿ ಆಮ್ಕಾಂಚ್ ವಿಚಾರುಂಕ್ ಜಾಯ್ - 'ಮ್ಹಜೆಥಂಯ್ ಕ್ರಿಸ್ತಾಚೊ ಅತ್ಮೊ ಆಸಾಗೀ, ಆಸಾ ತರ್ ರುಜ್ವಾತ್ ಕಸಲಿ?

"ತುಮ್ಚೆರ್ ಪವಿತ್ರ್ ಅತ್ಮೊ ಯೆತಲೊ ತೆದ್ನಾ ತುಮ್ಕಾಂ ಬಳ್ ಮೆಳ್ತಲೆಂ. ಉಪ್ರಾಂತ್ ಜೆರುಜಲೆಮಾಂತ್, ಸಗ್ಳ್ಯಾ ಜುದೇಯಾಂತ್ ಆನಿ ಸಾಮಾರಿಯಾಂತ್ ಆನಿ ಸಂಸಾರಾಚ್ಯಾ ಪೊಂತಾ ಥಾವ್ನ್ ಪೊಂತ್ ಪರ್ಯಾಂತ್ ತುಮಿ ಮ್ಹಾಕಾ ಸಾಕ್ಸ್ ದಿತಲ್ಯಾತ್" (ಧ. ಕೃ. 1:8).

ಸಬಾರಾಂಕ್ ಸಾಂತಿಸಿಮ್ ತ್ರಿಂದಾದಿಚೊ ತಿಸ್ರೊ ಜಣ್ ಜಾವ್ನ್ ಆಸ್ಚೊ ಪವಿತ್ರ್ ಅತ್ಮೊ ಏಕ್ ಮಿಸ್ತೆರ್. ಪೂಣ್ ಪವಿತ್ರ್ ಅತ್ಮ್ಯಾನ್ ಭರೊನ್ ಜಿಯೆತೆಲ್ಯಾಕ್ ಮಿಸ್ತೆರ್ ನ್ಹಯ್ ಬಗಾರ್ ಏಕ್ ಸತ್ ಜಾವ್ನಾಸಾ. ಭಾವ್ ಜೋಸ್ ಅನಾತನಮ್ ಅಶೆಂ ಮ್ಹಣ್ತಾ, ಜರ್ತರ್ ಆಮಿ ಪವಿತ್ರ್ ಅತ್ಮ್ಯಾನ್ ಭರೊಂವ್ಕ್ ನಾಂವ್ ತರ್ ಆಮಿ ಕ್ರಿಸ್ತಾಂವ್ ನ್ಹಯ್. ವ್ಹಯ್! ಜೀವ್ ದಿಂವ್ಚೊ ಪವಿತ್ರ್ ಅತ್ಮೊ ನಾ ತರ್ ಖರಿ ಇಗರ್ಜ್‌ಮಾತಾ ಬಾಂದುಂಕ್ ಅಸಾಧ್ಯ್. ಪವಿತ್ರ್ ಅತ್ಮೊ ನಾ ತರ್ ತಿ ಇಗರ್ಜ್‌ಮಾತಾ ಜೀವ್ ನಾತ್‌ಲ್ಲಿ ಏಕ್ ಸಮಡ್ತ್ ಜಾವ್ನಾಸಾ. ಜೀವ್ ದಿಂವ್ಚೊ ಪವಿತ್ರ್ ಅತ್ಮೊ ಆಮ್ಚೆ ಥಂಯ್ ನಾ ತರ್ ಜೆಜು ಥಂಯ್ ಆಮ್ಚೆಂ ಜಿವಿತ್ ಜೊಡುಂಕ್ ಅಸಾಧ್ಯ್. "ಹೊಗ್ಳಾಪ್ ತುಕಾ ಸೊಮ್ಯಾ, ಫಾದರ್, ತುಮ್ಚೆಂ ಮಾಗ್ಣೆಂ ದೆವಾನ್ ಆಯ್ಕಾಲೆಂ ಆನಿ ಮ್ಹಾಕಾ ಏಕ್ ಬರೆಂ ಕಾಮ್ ಮೆಳ್ಳೆಂ" ಮ್ಹಣ್ ಎಕಾ ತರ್ನಾಟ್ಯಾನ್ ಫೋನ್ ಕೆಲೆಂ. ಅನ್ಯೇಕ್ಲ್ಯಾನ್ ಬರಯ್ಲೆಂ "ತುಮಿ ಆಮ್ಚೆಂ ಘರ್ ಆಶೀರ್ವಾದಿತ್ ಕೆಲ್ಯಾ ಉಪ್ರಾಂತ್ ಆಮ್ಚ್ಯಾ ಘರಾಂತ್ ಸಮಾಧಾನ್ ಆಯ್ಲಾಂ". ಅನ್ಯೇಕಾ ಚೆಡ್ವಾನ್ ಅಜಾಪ್ ಜಾವ್ನ್ "ಮ್ಹಜೆಂ ಪಾಟ್ಲೆಂ ಜಿವಿತ್ ಉಗ್ಡಾಪೆಂ ಜಾಲೆಂ" ಮ್ಹಣ್ ಸಾಂಗ್ಲೆಂ. "ದೆಂವ್ಚಾರ್ ತಾಚೆ ಥಾವ್ನ್ ಪೋಳ್ನ್ ಧಾಂವ್ಲೊ". ಎಕಾ ಇಷ್ಟಾನ್ ವಾಂಟುನ್ ಘೆತ್ಲೆಂ. ಹ್ಯಾ ಸರ್ವ್ ಅಜಾಪಾಂಚೊ ಘುಟ್ ಕಸಲೊ ಜಾವ್ಯೆತ್? ಹೆಂ ಕಶೆಂ ಸಾಧ್ಯ್?! ಪವಿತ್ರ್ ಅತ್ಮೊ ಕೋಣ್?! ತಾಕಾ ಕಶೆಂ ಆಮಿ ಸಮ್ಜೊವ್ನ್ ಘೆಂವ್ಚೆಂ?! ತಾಚಿಂ ಕಾಮಾಂ ಕಸಲಿಂ ಜಾವ್ಯೆತ್? ಆಮ್ಚೆ ಥಂಯ್ ಆಮಿ ತಾಕಾ ಕಶೆಂ ಆಪ್ಣಾಂವ್ಚೆಂ? ತಾಚೆ ಥಂಯ್ ಆಮಿ ಕಶೆಂ ವಾಡ್ಚೆಂ? ತರ್ ಹೆಂ ಸತ್ ಆಮಿ ಜಾಣಾ ಜಾವ್ಯಾಂ.

"ಆನಿ ಆತಾಂ ದೆವಾನ್ ನಜರೆತಾಚ್ಯಾ ಜೆಜುಕ್ ಪವಿತ್ರ್ ಅತ್ಮ್ಯಾನ್ ಮಾಖ್ಲೊ ಆನಿ ತ್ಯಾ ಪದ್ವೆನ್ ತೊ ಬರೆಂ ಕರಿತ್ತ್ ಗೆಲೊ ಆನಿ ಸೈತಾನಾಚ್ಯಾ ಬಂಧಡೆಂತ್ ಆಸ್ಲೆಲ್ಯಾಂಕ್ ಗೂಣ್ ಕರಿತ್ತ್ ಗೆಲೊ ಕಿತ್ಯಾಕ್ ದೇವ್ ತಾಚೆ ಸಾಂಗಾತಾ ಆಸ್ಲೊ" (ಧ. ಕೃ. 10:38). ನಜರೆತ್ಚೊ ಜೆಜು ಆಪ್ಲಿ ಪರ್ಗಟ್ ಜಿಣಿ ಪವಿತ್ರ್ ಅತ್ಮ್ಯಾನ್ ಭರೊನ್ ಆರಂಭ್ ಕರ್ತಾ. "ಸೊಮಿಯಾಚೊ ಅತ್ಮೊ ಮ್ಹಜೆರ್ ಆಸಾ, ಕಿತ್ಯಾಕ್ ತಾಣೆ ಮ್ಹಾಕಾ ದುರ್ಬಳ್ಯಾಂಕ್ ಬರಿ ಖಬರ್ ಪರ್ಗಟ್ ಕರುಂಕ್ ಅಭಿಷೇಕ್ ಕೆಲಾ..."(ಲೂಕ್. 4:18). ಜೆಜು ಪವಿತ್ರ್ ಅತ್ಮ್ಯಾಚ್ಯಾ ಪ್ರೇರಣಾಖಾಲ್ ಜಿಯೆಲೊ. ಜೆಜುಚೆಂ ವ್ಯಕ್ತಿತ್ವ್ ಸಮ್ಜೊನ್ ಘೆಂವ್ಕ್ ಆನಿ ತಾಚೆಂ ಪುನರ್‌ಜಿವಂತ್ಪಣ್ ಅನ್ಬೋಗ್ ಕರುಂಕ್ ಆಮ್ಕಾಂ ಪವಿತ್ರ್ ಅತ್ಮ್ಯಾಚಿ ಗರ್ಜ್ ಆಸಾ. ದೆಕುನ್ ಜೆಜು ಮ್ಹಣ್ತಾ: "ಸತಾಚೊ ತೊ ಪವಿತ್ರ್ ಅತ್ಮೊ ತುಮ್ಚೆ ಥಂಯ್ ಆಯಿಲ್ಲ್ಯಾ ವೆಳಾ, ತೊ ತುಮ್ಕಾಂ ಸಂಪೂರ್ಣ್ ಸತಾಕ್ ವರ್ನ್ ಪಾಯ್ತಾಲೊ" (ಜು. 16:13). ಜೆಜುನ್ ಆಪ್ಲ್ಯಾ ಶಿಸಾಂಕ್ ದೆವಾಚ್ಯಾ ರಾಜಾಚಿ ಬರಿ ಖಬರ್ ಸಗ್ಳ್ಯಾ ಸಂಸಾರಾಕ್ ಪರ್ಗಟುಂಕ್ ಆಜ್ಞಾ ದಿಲಿ. ಪುಣ್ ಹೆಂ ಕಾಮ್ ಸುರು ಕರ್ಚ್ಯಾ ಪಯ್ಲೆಂ ಅತ್ಮ್ಯಾಚೊ ಅಭಿಷೇಕ್ ಘೆಂವ್ಕ್ ಕಠೀಣ್ ತಾಕಿದ್ ದಿಲಿ. "ಆನಿ ಆಬ್ಳೆ ಮ್ಹಜ್ಯಾ ಬಾಪಾಚಿ ಭಾಸಾವ್ಣಿ ಜಾವ್ನಾಸ್ಚೊ ಅತ್ಮೊ ತುಮ್ಚೆರ್ ಧಾಡ್ತಲೊ. ದೆಕುನ್ ತ್ಯಾ ಸರ್ಗಿ೦ಚ್ಯಾ ಸಕ್ತೆನ್ ಅಭಿಷಿಕ್ತ್ ಜಾಯ್ಸರ್ ತುಮಿ ಹ್ಯಾ ಶಹರಾಂತ್‌ಚ್ ರಾವಾಜಾಯ್" (ಲೂಕ್. 24:49).

"ಪವಿತ್ರ್ ಆತ್ಮೊ ತುಜೆರ್ ಯೆತಲೊ ಆನಿ ಪರಮೋನ್ನತಾಚಿ ಸಕತ್ ತುಜೆರ್ ಸಾವ್ಳಿ ಘಾಲ್ತಲಿ" (ಲೂಕ್. 1:35)

"ಕಿತ್ಯಾಕ್ ಸರ್ವೆಸ್ಪರಾ ಮುಖಾರ್ ತೊ ವರ್ತೊ ಜಾತಲೊ, ವಾಯ್ನ್ ವಾ ಅಮಾಲಾಚೆಂ ಕಸಲೆಂಯ್ ತೊ ಸೆವ್ಚೊನಾ; ಆನಿ ತಾಚೆ ಆವಯ್ಚೆ ಕುಶಿಂತ್ ಆಸ್ತಾನಾಂಚ್ ತೊ ಪವಿತ್ರ್ ಆತ್ಮ್ಯಾನ್ ಭರೊನ್ ಆಸ್ತಲೊ" (ಲೂಕ್. 1:15)

"ಪೂಣ್ ಆಪ್ಲ್ಯಾ ಖೊಟೆಪಣಾವರ್ವಿಂ ಸತ್ ಪರ್ಗಟ್ ಜಾಯ್ನಾತ್‌ಲ್ಲೆಬರಿ ಅಡ್ವಾರ್‍ತಲ್ಯಾ ದೇವ್‌ಭಿರಾಂತ್ ನಾತ್‌ಲ್ಲ್ಯಾ ಮನ್ಶಾಂಚ್ಯಾ ಸರ್ವ್ ಖೊಟೆಪಣಾಚೆರ್ ದೆವಾಚೊ ಕ್ರೋಧ್ ಸರ್ಗಿಂ ಥಾವ್ನ್ ದೆಂವೊನ್ ಆಯ್ಲ್ಲಲೊ ಆತಾಂ ದಿಸೊನ್ ಯೆತಾ" (ರೊಮಾ. 1:18). ಹಾಚ್ಯಾ ಪಯ್ಲೆಂಚ್ಯಾ ವೊಳಿಂನಿ ಸಾಂ. ಪಾವ್ಲ್ ಭಾವಾಡ್ತ್ ಆನಿ ಭರ್ವಶ್ಯಾ ಮುಕಾಂತ್ರ್ ದೆವಾಲಾಗಿಂ ಸಂಬಂಧ್ ದವರ್‍ಚ್ಯಾ ವಿಶ್ಯಾಂತ್ ಬರಯ್ತಾ. ಹಾಕಾ ಸರಿ ವಿರೋಧ್ ಜಾವ್ನ್ ಮನಿಸ್ ಆಪ್ಲ್ಯಾಚ್, ಯೋಜನಾಂ ಆನಿ ಆಲೋಚನ್ಯಾಂ ವರ್ವಿಂ ಅನ್ಯಾ ದೆವಾಕ್ ಆರಾಧನ್ ಕೆಲ್ಯಾರ್ ದೆವಾಚ್ಯಾ ಕ್ರೋಧಾಕ್ ಬಲಿ ಜಾತಾತ್ ಮ್ಹಣ್ ಸಾಂಗ್ತಾ. ಅಶೆಂ ತಾಣೆಂ ಬರಯ್ತಾನಾ ಸಾಂ. ಪಾವ್ಲಾಚೆ ಮತಿಂತ್ ಕಿತೆಂ ಆಸ್‌ಲ್ಲೆಂ? ಮನ್ಶಾಚ್ಯಾ ಪಾತ್ಕಾಕ್ ಆನಿ ವಾಯ್ಟಾಕ್ ಪ್ರತಿಕ್ರಿಯಾ ಜಾವ್ನ್ ಪರ್ನ್ಯಾ ಸೊಲ್ಲ್ಯಾಂತ್ ಆಮ್ಕಾಂ ವಾಚುಂಕ್ ಮೆಳ್ಚ್ಯಾ ಉತ್ರಾಂಚ್ಯಾ ಆಧಾರಾರ್ ತೊ ಬರಯ್ತಾ. ದೃಶ್ಟಾತಾಕ್ -"ಪಳೆಯಾ, ಸರ್ವೆಸ್ಪರಾಚೆಂ ನಾಂವ್ ಪಯ್ಸ್ ಥಾವ್ನ್ ಯೆತಾ; ತಾಚೊ ಕ್ರೋಧ್ ಜಳ್ತಾ, ಕಡಕ್ ತಾಚಿ ಧಮ್ಕಿ. ತಾಚೆ ವೋಂಟ್ ರಾಗಾನ್ ಭರ್‍ಲ್ಯಾಂತ್, ತಾಚಿ ಜೀಬ್ ಗ್ರಾಶಿತಲ್ಯಾ ಉಜ್ಯಾ ಸಾರ್ಕಿ, ತಾಚೊ ಸ್ವಾಸ್ ಗಳ್ಯಾಕಡೆ ಪರ್ಯಾಂತ್ ಯೆತಾ ತ್ಯಾ ಅವ್ರಾನ್ ಭರ್ಲಲೆ ನ್ಹಂಯ್ ಸಾರ್ಕೊ; ತೊ ರಾಷ್ಟ್ರಾಂಕ್ ನಾಸಾಚೆ ಚಾಳ್ಣಿಂತ್ ಚಾಳ್ತಲೊ. ತಾಂಚ್ಯಾ ತೊಂಡಾಕ್ ವಾಟ್ ಚುಕೊಂವ್ಚಿ ಲಗಾಮ್ ಘಾಲ್ತಲೊ" (ಇಸಾ. 30:27-28). ಹೆಂ ಇಸ್ರಾಯೆಲ್ ಪರ್ಜೆನ್ ದೆವಾಲಾಗಿಂ ಕೆಲ್ಲೊ ಸೊಲ್ಲೊ ಮೊಡ್‌ಲ್ಲ್ಯಾ ವೆಳಾರ್ ದೆವಾಚಿ ಪ್ರತಿಕ್ರಿಯಾ ವರ್ಣನ್ ಕರ್ಚಿ ಏಕಾ ರೀತ್ ಜಾವ್ನಾಸಾ. ಎಜೆಕಿಯೆಲ್ ಪ್ರವಾದಿಚ್ಯಾ ಗ್ರಂಥಾಂತ್ ಅಶೆಂ ವಾಚುಂಕ್ ಮೆಳ್ತಾ - "ಅಶೆಂ ಮ್ಹಜೊ ಕ್ರೋಧ್ ಶಾಂತ್ ಜಾತಲೊ ಆನಿ ತಾಂಚೆರ್ ಹಾಂವೆಂ ಮ್ಹಜೊ ರಾಗ್ ಕಾಡುನ್ ಹಾಂವ್ ಮ್ಹಾಕಾಚ್ ಸಮಾಧಾನ್ ಕರ್ತಲೊಂ; ತಾಂಚೆರ್ ಹಾಂವೆಂ ಮ್ಹಜೊ ಕ್ರೋಧ್, ಒತ್ತಡ್, ಹಾಂವ್, ಸರ್ವೆಸ್ಪರ್, ಮೊಗಾಚ್ಯಾ ಆವೆಶಾನ್ ಭರೊನ್ ಉಲಯ್ಲಾಂ ಮ್ಹಣ್ ತಿಂ ಒಳ್ಕತೆಲಿಂ" (ಎಜೆ. 5:13). ಅನ್ಭಾವಾಡ್ತ್ಯಾಂನಿ ದೆವಾ ಥಂಯ್ ಪಾಟಿಂ ಯೇಂವ್ಕ್ ಜಾಯ್ ಮ್ಹಳ್ಳೊ ಸಂದೇಶ್ ದಿಂವ್ಚ್ಯಾ ಖಾತಿರ್ ಸಾಂಗ್ಚಿ ಏಕ್ ರೀತ್ ಹಿ.

I. ಧರ್ಮ್‌ದುತಾಂಚಿ ಕೃತ್ಯಾಂ. 4:8-12,; II. 1 ಜುವಾಂವ್ 3:1-2; ವಾಂಜೆಲ್: ಜುವಾಂವ್. 10:11-18

ವಿಷಯ್: ತೊ ಬರೆಂ ಕರಿತ್ ಗೆಲೊ

ಸಂಸಾರಾಂತ್ ಜಾಂವ್ ಸಮಾಜೆಂತ್ ಜಾಂವ್ ಹರ್ಯೆಕ್ಲೊ ಹರ್ಯೆಕ್ಲ್ಯಾನ್ ಬರ್‍ಯಾನ್ ಆಸಾಜಾಯ್ ಮ್ಹಣ್ ಅಪೇಕ್ಷಿತಾ. ಹೆರಾಂನಿ ಬರ್‍ಯಾ ಮನ್ಶಾಂಚೊ ಪಾಟ್ಲಾವ್ ಕರುಂಕ್ ತಿಂ ಏಕ್ ಆದರ್ಶ್ ಜಾವ್ನಾಸಾತ್. ಮದರ್ ತೆರೆಸಾ ಬರಿ ದೆಕುನ್ ಸಗ್ಳೊ ಸಂಸಾರ್ ತಿಕಾ ಮಾನಾನ್ ಲೆಕ್ತಾ. ಮಹಾತ್ಮಾ ಗಾಂಧಿ ಏಕ್ ಬರೊ ವ್ಯಕ್ತಿ ಜಾಲ್ಲ್ಯಾ ನಿಮ್ತಿ ಭಾರತಾಂತ್ಲೊ ಹರ್ಯೆಕ್ಲೊ ತಾಕಾ ಮಾನಾನ್ ಆನಿ ಗೌರವಾನ್ ಲೆಕ್ತಾ. ತ್ಯಾ ದೆಕುನ್ ಎಕಾ ಬರ್‍ಯಾ ವ್ಯಕ್ತಿಚೆಂ ನಾಂವ್ ತೊ ಮೆಲ್ಯಾ ಉಪ್ರಾಂತ್‌ಯೀ ಆಮಿ ಉಡಾಸಾಕ್ ಹಾಡ್ನ್ ತಾಕಾ ಗೌರವ್ ದಿತಾಂವ್. ಜೆಜುಚೆ ಆನಿ ಆಪೊಸ್ತಲಾಂಚೆ ಬರೆಂಪಣ್ ಆಮಿ ಹೆರಾಂಕ್‌ಯೀ ಪರ್ಗಟ್ ಕರಿಜಾಯ್ ಮ್ಹಣ್ ಆಯ್ಚಿಂ ವಾಚ್ಪಾಂ ಆಮ್ಕಾಂ ಆಮ್ಚ್ಯಾ ಉಡಾಸಾಕ್ ಹಾಡ್ತಾತ್.

1. ಧ. ಕೃ. 9:26-31, 2. 1 ಜುವಾಂವ್ 3:18-24, ವಾಂಜೆಲ್: ಜುವಾಂವ್. 15:1-8

ವಿಷಯ್: ಜೆಜು ಖರ್‍ಯಾ ದಾಕ್ವಲಿ ಥಂಯ್ ಆಮಿ ಸುಫಳ್, ತಾಚೆವಿಣೆಂ ಆಮಿ ನಿರ್ಫಳ್
ಆಪ್ಲ್ಯಾ ೩೨ ವರ್ಸಾ೦ ಪ್ರಾಯೆ ಪರ್ಯಾ೦ತ್ ಸಾಂ. ಆಗುಸ್ತಿನ್ ವಾಯ್ಟ್ ಜಿಣಿ ಜಿಯೆಲೊ. ದೆವಾಚೆರ್ ಭಾವಾಡ್ತ್ ನಾಸ್ತಾನಾ, ಅನಿಸ್ಕಳ್ ಆನಿ ಪಾರ್ಪೊಳ್ ವಾಟೆನ್ ಚಮ್ಕಾತಾಲೊ. ಪುಣ್ ಜೆದ್ನಾಂ ತಾಕಾ ಪುನರ್‌ಜಿವಂತ್ ಜೆಜು ಭೆಟ್ಲೊ, ತೊ ಏಕ್ ನವಿ ರಚ್ನಾ ಜಾಲೊ. ಪರ್ನೆ೦ ತೆಂ ಗೆಲೆಂ, ಸಗ್ಳೆಂ ನವೆಂ ಜಾಲೆಂ. ತೊ ಏಕ್ ಕ್ರಿಸ್ತಾಂವ್ ಜಾಲೊ. ಉಪ್ರಾಂತ್ ಯಾಜಕ್ ಆನಿ ಆಕ್ರೇಕ್ ಭಿಸ್ಪ್ ಜಾಲೊ. ತಾಚಿ ಶಿಕವ್ಣ್ ಆನಿ ಬರ್ಪಾ೦ ಲೊಕಾಮೊಗಾಳ್ ಜಾಲಿಂ ಆನಿ ಆಜೂನ್ ಪವಿತ್ರ್ ಸಭೆಂತ್ ತಾಕಾ ವರ್ತೊ ಗೌರವ್ ಆಸಾ. ಆಪ್ಲ್ಯಾ ಬದ್ಲಾವಣೆ ಉಪ್ರಾಂತ್ ತಾಣೆ ಉಚಾರ್ಲಲೊ ಉದ್ಗಾರ್: "ಕಿತ್ಲೊ ತಡವ್ ಕರ್ನ್ ತುಕಾ ಜಾಣಾ ಜಾಲೊಂ ಮ್ಹಜ್ಯಾ ದೆವಾ... ನಾ ವಿಶೆವ್ ತುಜೆ ಬಗಾರ್ ಮ್ಹಾಕಾ..."

ಪಯ್ಲೆಂ: ಆ.ಕೃ. 10:25-26, 34-35, 44:48; ದುಸ್ರೆಂ: 1 ಜುವಾಂವ್. 4:7-10;

ಶುಭ್‌ವಾರ್ತಾ: ಜುವಾಂವ್. 15:9-17

ವಿಶಯ್: ಪರಿಪೂರ್ಣ್ ಮೋಗ್

ಜೆಜುಕ್ ಆಪ್ಲ್ಯಾ ಪಾಟ್ಲಾವ್ದಾರ್‍ಯಾಂ ಲಾಗಿಂ ವಿಶೇಸ್ ಸಂಬಂಧ್ ಆಸಾ. ಹೊ ಸಂಬಂಧ್ ಹ್ಯಾ ಉತ್ರಾಂ ಮುಕಾಂತ್ರ್ ತೊ ಉಚಾರ್ತಾ, "ಜಸೊ ಬಾಪಾನ್ ಮ್ಹಜೊ ಮೋಗ್ ಕೆಲಾ, ತಸೊ ಹಾಂವೆಂಯೀ ತುಮ್ಚೊ ಮೋಗ್ ಕೆಲಾ. ತುಮಿ ಮ್ಹಜ್ಯಾ ಮೊಗಾಂತ್ ರಾವಾಜಾಯ್" (ಜುವಾಂವ್. 15:9). ಬಾಪಾನ್ ತಾಚೊ ಕಸೊ ಮೋಗ್ ಕೆಲಾ? ಆನಿ ತಾಣೆ ಆಮ್ಚೊ ಕಸೊ ಮೋಗ್ ಕೆಲಾ? "ದೆವಾನ್ ಸಂಸಾರಾಚೊ ಆಸೊಯಿ ಮೋಗ್ ಕೆಲಾ ಕೀ, ತಾಣೆಂ ಆಪ್ಲ್ಯಾ ಎಕ್ಲ್ಯಾಚ್ ಪುತಾಕ್ ಒಪುನ್ ದಿಲೊ, ತಾಕಾ ಸತ್ಮಾನ್ತಲ್ಯಾ ಕೊಣಾಚೊಚ್ ನಾಸ್ ಜಾಯ್ನಾ ಜಾಂವ್ಚ್ಯಾಕ್; ಬಗಾರ್ ತಾಕಾ ಸಾಸ್ಣಿಕ್ ಜಿವಿತ್ ಮೆಳ್ಚ್ಯಾಕ್" (ಜುವಾಂವ್. 3:16). ದೇವ್ ಜಾವ್ನಾಸಾ ಸಂಪೂರ್ಣ್ ದೆಕುನ್ ತಾಚೊ ಮೋಗ್ ಸಂಪೂರ್ಣ್ ಜಾವ್ನಾಸಾ. ಅಸಲ್ಯಾ ಸಂಪೂರ್ಣ್ ಮೊಗಾನ್ ಆಪ್ಲ್ಯಾ ಪುತಾಚೊ ತಾಣೆ ಮೋಗ್ ಕೆಲೊ. ಹೊ ಮೋಗ್ ಜೆಜುನ್ ಬ್ಯಾಪ್ತಿಜ್ಮ್ ಘೆತಾನಾ ದೃಢ್ ಕೆಲಾ. "ಜೆಜುಯಿ ಸ್ನಾನ್ ಘೆವ್ನ್ ಮಾಗ್ಣ್ಯಾರ್ ಆಸ್ತಾನಾ ಆಕಾಸ್ ಉಗ್ತೊ ಜಾಲೊ ಆನಿ ಪವಿತ್ರ್ ಅತ್ಮೊ ದೈಹಿಕ್ ರುಪಿಂ ಏಕ್ ಪಾರ್ವ್ಯಾಬರಿ ತಾಚೆರ್ ದೆವ್ಲೊ. ತೆದ್ನಾಂ ಆಕಾಸಾ ಥಾವ್ನ್ ಆಯ್ಲೊ ಏಕ್ ತಾಳೊ; ತುಂ ಮ್ಹಜೊ ಪೂತ್, ಮ್ಹಜೊ ಮೊಗಾಚೊ; ತುಂ ಮ್ಹಾಕಾ ಭೋವ್ ಚಡ್ ಮಾನ್ವಲಾಯ್" (ಲೂಕ್. 3:22). ಜೆಜು ಬಾಪಾಚೊ ಪರಿಪೂರ್ಣ್ ಪೂತ್. ಆಮ್ಕಾ ತೊ ತ್ಯಾಚ್ ಪರಿಪೂರ್ಣ್ ಮೊಗಾಂತ್ ಮೋಗ್ ಕರ್ತಾ. ಪರಿಪೂರ್ಣ್ ಭುರ್ಗ್ಯಾಂಚೊ ಆವಯ್-ಬಾಪಯ್ಕ್ ಚಡ್ ಮೋಗ್. ಕೋಣ್ ಹಿಂ ಪರಿಪೂರ್ಣ್ ಭುರ್ಗಿಂ? ಭುರ್ಗಿಂ ಕೋಣ್ ವಿಧೇಯ್ ಜಾತಾತ್, ಮಾನ್-ಮರ್ಯಾದ್, ಗೌರವ್ ದಿತಾತ್, ನಿಸ್ವಾರ್ಥಿ ಆನಿ ಕೆದಿಂಚ್ ಪೆಲ್ಯಾಕ್ ದುಃಖ್ ದೀನಾಂತ್ ತಿಂಚ್ ತಿಂ ಪರಿಪೂರ್ಣ್ ಭುರ್ಗಿಂ.

ಪಯ್ಲೆಂ: ಆ.ಕೃ. 1:1-11; ಶುಭ್‌ವಾರ್ತಾ: ಮಾರ್ಕ್. 16:15-20 ದುಸ್ರೆಂ: ಎಫೆಜ್. 1:17-23

ವಿಶಯ್: ಜೆಜುಚೆಂ ಸ್ವರ್ಗಾರೋಹಣ್ ಆಮ್ಚ್ಯಾ ಭರ್ವಸ್ಯಾಚೆಂ ಕಾರಣ್

ಆಮ್ಚ್ಯೆ ಭೊಂವಾರಿಂ ಹಜಾರೊಂ ಸಮಸ್ಯಾನಿಂ ವೆಡೊ ಗಾಲಾ. ಎಕಾ ವಾಟೆನ್, ಆರ್ಥಿಕ್ ಪರಿಸ್ಥಿತಿ ಭಿಗಡ್ಲ್ಯಾ ಜಾಲ್ಯಾರ್, ದುಸ್ರ್ಯಾ ವಾಟೆನ್ ಅಶಾಂತಿ, ಅಸಮಾಧಾನ್, ಝಗ್ಡಿಂ ಆನಿ ಗೊಂದೊಳ್ ವಾಡೊನ್‌ಚ್ ಆಸಾ. ದೀಸ್ ವೆತಾಂ ವೆತಾಂ ಆಮ್ಚಿ ಭದ್ರತಿ ಉಣಿ ಜಾಲ್ಲ್ಯಾಬರಿಂ ದಿಸ್ತಾ. ಸಬಾರ್ ಸವಾಲಾಂ ಮತಿಂತ್ ಉದೆತಾತ್: ಆಪ್ಲ್ಯಾ ಶಿಸಾಂಕ್ ಬಳ್ವಂತ್ ಕೆಲ್ಲೊ ಜೆಜು ಆಜ್ ಆಮ್ಕಾಂಯ್ ಸರ್ವ್ ವಾಯ್ಟಾವಿರೋಧ್ ಝುಜೊಂಕ್ ಬಳ್ವಂತ್ ಕರ್‍ಚೊನಾಂಗಿ? ಮರ್ಣಾಚೆರ್ ಜಯ್ತ್ ವ್ಹರುನ್, ಪುನರ್‌ಜಿವಂತ್ ಜಾಲ್ಲೊ ಜೆಜು ಆಮ್ಚ್ಯಾ ಮರ್ನಾಚ್ಯಾ ಪಾಸಾಂತ್ಲೊ ಆಮ್ಕಾಂ ಸುಟವ್ನ್ ನವೊ ಭರ್ವಸೊ ಆಮ್ಕಾಂ ದಿಂವ್ಚೊನಾಂಗೀ? ಜೆಜುಚ್ಯಾ ಸ್ವರ್ಗಾರೋಹಣಾಚಿ ಪರಬ್ ಹ್ಯಾ ಆಮ್ಚ್ಯಾ ಸವಾಲಾಂಕ್ ಜಾಪ್ ದಿತಾಂ ಆನಿ ಆಮ್ಕಾಂ ಹ್ಯಾ ಸಂಸಾರಾಂತ್ ಸೊಮ್ಯಾ ಜೆಜುಚೆ ಬಳ್ವಂತ್ ಸಾಕ್ಷಿ ಜಾಂವ್ಕ್ ಆಪವ್ಣೆ ದಿತಾ.

ಪಯ್ಲೆ೦: ಆ.ಕೃ. 2:1-11; ದುಸ್ರೆ೦: 1 ಕೊರಿ 12:3b-7, 12-13; ಶುಭ್ ವಾರ್ತಾ: ಜುವಾ೦ವ್. 20:19-23

ವಿಶಯ್: ಯೇ ಪವಿತ್ರ್ ಅತ್ಮ್ಯಾ

ಪರ್ನ್ಯಾ ಸೊಲ್ಲ್ಯಾಚ್ಯಾ ಕಾಳಾರ್ ಪಾಸ್ಕಾಚ್ಯಾ ಪರ್ಬೆ ಉಪ್ರಾ೦ತ್ ಪನ್ನಾಸ್ ದಿಸಾ೦ನಿ ಪೆ೦ತೆಕೊಸ್ತಾಚಿ ಪರಬ್ ಆಚರ್ಸಿತೆಲೆ. ಹ್ಯಾ ಫೆಸ್ತಾಕ್ 'ಪ್ರಥಮ್ ಫಳಾ೦ಚೊ ದೀಸ್' ವಾ ಲುವ್ಣೆಚೆ೦ ಫೆಸ್ತ್ ಮ್ಹಣೊನ್ ಆಪಯ್ಲೆ೦. ಪೆ೦ತೆಕೊಸ್ತಾಚೊ ದೀಸ್ ಪ್ರತ್ಯೇಕ್ ಜಾವ್ನ್ ತೀನ್ ಕಾರಣಾ೦ ಖಾತಿರ್ ದೆವಾಚೊ ಉಪ್ಕಾರ್ ಬಾವುಡ್ಚೊ ದೀಸ್ ಜಾವ್ನ್ ಆಸ್ಲ್ಲೊ: